মথি লেখ্যে গম্ হবর্ 16 - Chakma Bible

মানুচ্চুনে চিহ্নো দেগিবাত্তে চান্

¹ পরেদি কয়েক্কো ফরীশী আর সদ্দূকী যীশুরে পোরোক্ষ্যে গুরিবাত্তে তাইধু এলাক্ আর স্বর্গত্তুন কনঅ চিহ্নো দেগেবাত্তে কলাক্।

² মাত্তর্ যীশু জোব দিলো, “যেক্কেনে বেলান্ ডুবেল্লোই, তুমি কোই থাগঅ, ‘আমি দোল্ দিন দেগিবাত্যে যেইর্ কিয়া আগাজ্‌চান রাঙা ওইয়্যে।’

³ আর বেন্যেমাদান্ কঅ, ‘এইয়্যেদঅ ঝড়্ অত্তে কিয়া আগাজ্‌চান রাঙা আর আন্ধার্ ওইয়্যে।’ আগাজ অবস্থা তুমি গমেডালে বিচের্ গুরি জানঅ, অদচ সময়র্ চিহ্নোগান বুঝি ন-পারঅ।

⁴ এ কালর্ পাজি আর অবিশ্বেজি মানুচ্চুনে চিহ্নো তগান্, মাত্তর্ যোনার চিহ্নো বাদে আর কনঅ চিহ্নো তারারে দেগা ন-অবঅ।” ইয়েনর্ পরেদি যীশু তারারে ফেলেই গেলঅ।

শিচ্চ্যগুনোরে উজিয়ার্ গরানা

⁵ সাগর উইপারত্ যেবার সময় শিচ্চ্যগুনে রুটি নেযেবাত্তে ভুলি যেইয়োন্।

⁶ যীশু তারারে কলঅ, “ফরীশী আর সদ্দূকীগুনোর সদাগানিত্তুন্ উজিয়ার্ অ।”

⁷ ইয়েন্দোই শিচ্চ্যগুনে নিজো ভিদিরে কুয়ো-কি গরানা আরাম্ভ গুরিলাক্। “আমি রুটি ন-আনিই বিলিনে তে এ কধাগান্ কত্তে।”

⁸ তারা কি কদন্ এ কধাগান বুঝি পারিনে যীশু পুযোর্ গুরিলো, “ও কম্ বিশ্বেজ গুরিয়্যেগুন, তুমি এজঅ বুঝি ন-পারঅ? নিজো ভিদিরে কিত্যে কুয়ো কি গরর্, তমা ইধু রুটি নেই?

⁹ তমার কি মনত্ ন-উদের্ যেক্কেনে মুই সেই পাচ্ আজার্ মান্‌জ্যত্তে পাচ্চান্ রুটি ভাঙ্যং আর সে পরেদি কয় কারাং তুমি ভোরেয়ো?

¹⁰ আর সেই চের্ আজার্ মান্‌জ্যত্তে সাত্‌টান্ রুটির কধা, আর কয় কারাং তুমি ভোরেয়ো?

¹¹ মুই যে তমা ইধু রুটি পৌইদ্যেনে কধা ন-কং সিয়েন্ তুমি কিত্তে ন-বুঝোর্? ফরীশী আর সদ্দূকীগুনোর সদাগানিত্তুন্ তুমি নিজোরে রোক্ষ্যে গরঅ।”

¹² সেক্কে শিচ্চ্যগুনে বুঝি পারিলাক্, তে রুটির সদাগানত্তুন্ তারারে উজিয়ার্ অবাত্তে ন-কয়, মাত্তর্ ফরীশী আর সদ্দূকীগুনোর শিক্ষ্যেত্তুন্ উজিয়ার্ অবাত্তে কোইয়্যে।

প্রভু যীশুই মশীহ

¹³ পরেদি যীশু যেক্কে কৈসরিয়া-ফিলিপি চাগালাত্ গেলঅ যিয়েনত্ তে শিচ্চ্যগুনোরে পুযোর্ গুরিলো, “মান্‌জ্যপুয়োবো কন্না, এ পৌইদ্যেনে মান্‌জ্যে কি কন্?”

¹⁴ তারা কলাক্, “কেঅ কেঅ কন্দে তুই বাপ্তিস্মদিয়্যে যোহন; কেঅ কেঅ কন্ এলিয়; আরঅ কেঅ কেঅ কন্ যিরমিয় বা ভাববাদীগুনো ভিদিরে এক্কো।”

¹⁵ সেক্কে তে তারারে কলঅ, “মাত্তর্ তুমি কি কঅ, মুই কন্না?”

¹⁶ শিমোন-পিতরে কলঅ, “তুই সেই মশীহ, জেদা গোজেনর্ পুয়ো।”

¹⁷ জোবত্ যীশু তারে কলঅ, “শিমোন বাপ-যোনা, তুই বর্‌পেইয়্যে, কিয়া কনঅ মানুচ্ তইধু ইয়েন্ ফগদাং ন-গরে; মঅ স্বর্গর্ বাপ্পো ফগদাং গোজ্যে।

¹⁸ মুই তরে কঙর্, তুই পিতর, আর এ পাত্তর উগুরে মুই মর্ মন্ডলীবো গোড়েই তুলিম। নরগর্ কনঅ খেমতা সিবে উগুরে জিদি ন-পারিবো।

¹⁹ মুই তরে স্বর্গ-রেজ্যর্ চাবিগানি দিম্, আর তুই এ পিত্‌থিমীত্ যিয়েনি থুবেবা সিয়েনি স্বর্গত্অ বানি থুয়ো অবঅ আর যিয়েনি খুলিবে সিয়েনি স্বর্গত্অ খুলি দিয়্যে অবঅ।”

²⁰ ইয়েনর্ পরেদি তে তার্ শিচ্চ্যগুনোরে উগুম দিলো যেন তারা কাররে ন-কন্ যে, তেয়ই মশীহ।

নিজো মরণ পৌইদ্যেনে প্রভু যীশু

²¹ সে অক্তত্তুন্ ধুরি যীশু তা শিচ্চ্যগুনোরে গমেডালে কুয়ো ধুরিলো, মত্তুন্ হামাক্কায় যিরূশালেমত্ যাহ্ পড়িবো আর বুড়ো নেতাগুনো ইধু, আজল্ ধর্মগুরুগুনো ইধু আর ধর্ম-মাষ্টরুনোত্তুন্ বোউত্ দুঘ্ পাহ্ পড়িবো। মত্তুন্ মরা পড়িবো আর তিন দিনোত্ মরণত্তুন্ জেঈ উদো পড়িবো।

²² সেক্কে পিতরে তারে এককিত্তেদি নেযেইনে আবিত্তি গুরিনে কলঅ, “প্রভু, ইয়েন্ দূর ওক্। তঅ উগুরে কনদিন্অ এবাবোত্যে ন-অবঅ।”

²³ যীশু ফিরিনে পিতররে কলঅ, “মঅ কায়-কুরেত্তুন দূর অ, শদান্। তুই মর্ পথ্তানর্ কাদা। যিয়েন গোজেনর্ সিয়েন তুই ন-ভাবর্ মাত্তর্ যিয়েন মান্‌জ্যর্ সিয়েন ভাবর্।”

²⁴ ইয়েনর্ পরেদি যীশু তা শিচ্চ্যগুনোরে কলঅ, “যুনি কেঅ মঅ পথ্‌তানদি এবাত্তে চায় সালে তে নিজোর্ আওজ্ মজিম ন-চোলোক্; নিজো ক্রুশ্‌চান বুয়োইনে তে মঅ পিজে পিজে এজোক্।

²⁵ যে কেঅ তার নিজোত্তে বাঁজি থেবার্ চায় তে তার্ জিংকানিগান্ ঘেচ্চেক্‌‍‍‍গুরি আরেব; মাত্তর্ যে কেঅ মত্তে তা পরাণান্ আরায় তে তার্ জিংকানিগান্ ঘেচ্চেক্‌গুরি রোক্ষ্যে গুরিবো।

²⁶ যুনি তুই পুরো পিত্‌থিমীগান পেইনেয়ো সিয়েনর বদলে আজল্ জিংকানিগান্ আরাস্ সালে সিয়েনর্ কি লাভ্ অলঅ? নিশ্চই নয়! সালে কেধোক্ক্যেন গুরি এক্কো মান্‌জ্যে তা জিংকানিগান ফিরি পেবঅ?

²⁷ মান্‌জ্য পুয়োবো তা স্বর্গদূত্তুনোরে সমারে নিইনে তা বাবর্ মহিমালোই এজের্। সেক্কে তে পত্তি মান্‌জ্যরে তারার্ কাম মজিম্ ফল দিবো।

²⁸ মুই তমারে ঘেচ্চেকগুরি কঙর্, ইয়োত্ এমন কয়েকজন আগন্ যিগুনো ইধু মান্‌জ্য পুয়োবোরে রাজা ইজেবে রাজাগিরি গরানা ন-দেগানা সং তারা কনমতে মুরি ন-যেবাক্।”