মথি লেখ্যে গম্ হবর্ 15 - Chakma Bible

চলেত্তে সুদোমান্

¹ যিরূশালেমত্তুন্ কয়েক্কো ফরীশী আর ধর্ম-মাষ্টর যীশু ইধু এইনে কলাক্,

² “পুরোণি দিনোর্ ধর্ম-মাষ্টরুনোরে দিয়্যে যে সুদোমানি চলি এজের্ তঅ শিচ্চ্যগুনে সিয়েনি মানি ন-চলদন্ কিত্তে? হেবার্ আগেদি তারা গমেডালে আঢ্ ন-ঢন্।”

³ জোবত্ যীশু কলঅ, যে সুদোমান্ পালেই এজর্ সিয়েনত্তে তুমিই বা কিত্তে গোজেনর্ উগুমান্ অমান্য গরর্?

⁴ গোজেনে কোইয়্যেদে, মা-বাবরে সর্মান গরঅ আর যিবের্ কধালোই মা-বাবঅ উগুরে অশ্রদ্ধা থায় তারে হামাক্কায় মারে ফেলা পড়িবো।

⁵ মাত্তর্ তুমি কোই থাগঅ, যুনি কনজনে তার মা-বাবরে কয়, মর্ যে জিনিস্‌‍চান্দোই তর্ সাহায্য অদঅ, সিয়েন গোজেন ইধু দিয়্যে ওইয়্যে,

⁶ সালে মা-বাবরে তার আর সর্মান গুরিবার দরকার্ নেই। তমার্ এই বেক্ নিজো সুদোমানিত্তে তুমি গোজেন কধানি বাদ্ দুয়ো।

⁷ ভন্ডগুন! তমা পৌইদ্যেনে ভাববাদী যিশাইয় ঠিগ্ কধা কোইয়্যে,

⁸ এ মানুচ্চুনে মুয়োদি মরে সর্মান গরন্, মাত্তর্ তারার্ মনানি মত্তুন্ দূরোত্ থায়।

⁹ তারা মিজে মিজে মর্ উবোসনা গরন্; তারার্ দিয়্যে শিক্ষ্যেনি মান্‌জ্যর্ বানেয়্যে কয়েক্কান সুদোম্ বানা।

কেধোক্ক্যেন্ গুরি মানুচ্ অসিজি অন্

¹⁰ পরেদি যীশু মানুচ্চুনোরে ডাগিনে কলঅ, “মঅ কধাগান্ শুনো আর বুঝো।

¹¹ মুয়ো ভিদিরে যিয়েনি যায় সিয়েনি মান্‌জ্যরে অসিজি ন-গরে, মাত্তর্ মুয়ো ভিদিরেত্তুন্ যিয়েনি নিগিলি এজে সিয়েনি মান্‌জ্যরে অসিজি গরে।”

¹² সেক্কে তা শিচ্চ্যগুনে এইনে তারে কলাক্, “ফরীশীগুনে তর্ এ কধাগান্ শুনিনে যে অগমান্ পেইয়োন, সিয়েন্ কি তুই হবর্ পাজ্?”

¹³ জোবত্ তে কলঅ, “যে চারাবো মর্ স্বর্গর্ বাপ্পো ন-লাগায় সিগুন বেক্কুন্ উগুরে ফেলা অবঅ। তারা কধা বাদ্ দুয়ো।

¹⁴ তারাত্যে চিদে ন-গোজ্জ্য! তারা দঅ কান্ মানুচ্চুনোর কানা নেতা; কান্ মান্‌জ্যে কানরে পথ্ দেগেবাত্তে গেলে দ্বি'জনে গাঢত্ পড়ন্।”

¹⁵ সেক্কে পিতর যীশুরে কলঅ, “তুই যে উপমাগান্ দিলে সিয়েন্ আমারে বুঝেই দে।”

^16-17 যীশু তারারে কলঅ, “তুমি কি এজঅ অন্যগুনোত্তুন্ অবুঝ্ আগঅ? তুমি কি ন-বুঝো যে, যেদক্কানি মুয়ো ভিদিরে যায় সিয়েনি পেদ ভিদিরে সমে আর যেরেদি নিগিলি যায়?

¹⁸ মাত্তর্ যিয়েনি মুয়ো ভিদিরেত্তুন্ নিগিলি এজে সিয়েনি মনত্তুন্ এজে, আর সিয়েনিয়ে মান্‌জ্যরে অসিজি গরে।

¹⁹ মনত্তুন্ ভান্ন্যেই চিন্তে, খুন, নানান্ বাবোত্যে বেভিচের্, চুর্, মিজে মাদানা আর ইংসে-নিন্দে নিগিলি এজে।

²⁰ ইয়েনি বেক্কানিয়ে মান্‌জ্যরে অসিজি গরে, মাত্তর্ আঢ্ ন-ধোইনে হেলে মানুচ্ অসিজি ন-অন্।”

অযিহূদী মিলের্ বিশ্বেজ্

²¹ পরেদি যীশু সে জাগায়ান্ ছাড়িনে সোর আর সীদোন চাগালাত্ গেলঅ।

²² সিদুগোর্ এক্কো কনানীয় মিলে এইনে রঅ ছাড়িনে কুয়ো ধুরিলো, “ও প্রভু, দায়ূদোর্ গুট্টি, মরে দোয়্যে গর্। ভান্ন্যেই আত্মায় পেইনে মঅ ঝিবো অমকদ দুঘ্ পার্।”

²³ মাত্তর্ যীশু তারে এক্কান্ কধায়ো ন-কলঅ। সেক্কে তা শিচ্চ্যগুনে এইনে তারে কোজোলী গুরি কলাক্, “তারে বিদেয় গুরি দুয়ো, কিয়া তে আমা পিজে পিজে রঅ ছাড়ের্।”

²⁴ জোবত্ যীশু কলঅ, “মরে বানা ইস্রায়েল-গুট্টির আরেয়্যে ভেড়াগুনো ইধু পাধা ওইয়্যে।”

²⁵ সে অক্তত্ মিলেবো তাইধু এইনে তা টেঙত্ পড়িনে কলঅ, “প্রভু, মরে সাহায্য গর্।”

²⁶ যীশু জোবত্ কলঅ, “পুয়ো-ঝিগুনোর হানা লোইনে কুগুরো মুজুঙোত্ ফেলানা গম্ নয়।”

²⁷ তে কলঅ, “ঠিগ্ কধা, প্রভু; মাত্তর্ গিরোজ টেবিলোত্তুন্ যিয়েনি উগুরে সিয়েনি কুগুরে হান্।”

²⁸ সেক্কে যীশু তারে কলঅ, “যদবদে তঅ বিশ্বেজ্‌চান অমকদ বেশ্। তুই যেবাবোত্যে চাজ্ সেবাবোত্যে ওক্।” আর সেক্কে তা ঝিবো গম্ ওই গেলঅ।

চের্ আজার্ মান্‌জ্যরে হাবানা

²⁹ পরেদি যীশু সে জাগায়ান্ ছাড়িনে গালীল সাগর পারদি যাহ্ ধুরিলো আর এক্কো মুড়োত্ উদিনে সিয়েনত্ বুজিলো।

³⁰ সেক্কে মানুচ্চুনে লেং, কান্, আদুড়্, ববা আরঅ ভালোক্কুনোরে নিইনে তাইধু এলাক্। তারা সেই বেক্ মানুচ্চুনোরে তা টেঙ কায় কুরে রাগেলাক্ আর তে তারারে গম্ গুরিলো।

³¹ মানুচ্চুনে যেক্কে দেগিলাক্ ববা কধা কর্, আঢুড়ে গম্ অর্, লেঙ্ মান্‌জ্যে আঢাউদো গত্তন্ আর কান্ মান্‌জ্যে দেগদন্, সেক্কে তারা আমক্ অলাক্ আর ইস্রায়েলীয়গুনোর গোজেনরে বাঈনী গরা ধুরিলাক্।

³² ইয়েনর্ পরেদি যীশু তা শিচ্চ্যগুনোরে ডাগিনে কলঅ, “এ মানুচ্চুনোত্তে মর্ মেয়্যে লাগের্, কিয়া এচ্চ্যে তিন দিন অলঅ ইগুনে মঅ লগে লগে আগন্, আর ইগুনো ইধু কনঅ হানা নেই। এ অবস্থায় মুই ইগুনোরে বিদেয় দিবাত্তে ন-চাং; অয়ত বা তারা পদথ্ অজ্ঞান্ ওই পড়িবাক্।”

³³ শিচ্চ্যগুনে তারে কলাক্, “এই ধূল্যেচর চাগালাত্ ইদুক্কুন্ মান্‌জ্যরে হাবেবাত্তে হানা আমি কুদু পেবং?”

³⁴ যীশু তারারে কলঅ, “তমাইধু কয়ান্ রুটি আঘে?”

শিচ্চ্যগুনে কলাক্, “সাত্তান্ রুটি আর কয়েক্কো চিগোন্ মাছ আঘে”

^35-36 মানুচ্চুনোরে মাদিত্ বুজিবাত্তে উগুম্ দিইনে যীশু সেই সাত্তান্ রুটি আর মাছ্‌চুন ললঅ। পরেদি তে গোজেনরে ভালেদি জানেইনে সিগুন ভাঙিলো আর শিচ্চ্যগুনো আঢত্ দিলো, আর শিচ্চ্যগুনে সিয়েনি মানুচ্চুনোরে দিলাক্।

³⁷ মানুচ্চুনে বেক্কুনে পেট্ ভুরি হেলাক্, আর যে কট্টানি পড়ি রলঅ শিচ্চ্যগুনে সিয়েনি তুলিনে সাত্তো লেই ভোরেলাক্।

³⁸ যিগুনে হেইয়োন্ তারা ভিদিরে মিলে আর চিগোনগুড়ো বাদে চের্ আজার্ মরদ্ এলাক্।

³⁹ ইয়েনর্ পরেদি যীশু মানুচ্চুনোরে বিদেয় দিইনে নৌকোত্ উদিনে মগদন চাগালাত্ গেলঅ।