মথি লেখ্যে গম্ হবর্ 13 - Chakma Bible

এক্কো চাষাবলার্ হিত্ত্য

¹ সেদিন্যে যীশু ঘরত্তুন্ নিগিলিনে সাগর পারত্ গেলঅ, যিয়েনত্ তে শিক্ষ্যে দিবাত্যে বুয়োল।

² তাইদু বোউত্ মানুচ্ এইনে তুবেলাক্, তে এক্কান্ নৌকোত্ উদিনে বুজিলো, আর বেক্ মানুচ্চুনে সাগর পারত্ থিয়্যেই রলাক্।

³ সেক্কে তে হিত্ত্য কোইনে ভালোক্কানি পৌইদ্যেনে তারারে শিক্ষ্যে দিয়্যে ধুরিলো।

⁴ তে কলঅ, “এক্কো চাষাবলা বীজি ফেলেবাত্তে গেলঅ। ফেলেবার অক্তত্ কয়েক্কো বীজি পধ কুরে পড়িলাক্ আর পেগ্‌কুনে এইনে সিগুন হেই ফেলেলাক্। কয়েক্কো বীজি পাত্তর ভূইয়োত্ পড়িলাক্।

⁵ সিয়েনত্ মাদি বেশ্ ন-এলঅ। মাদি কম্ ন-এলঅ বিলি যাদিমাদি চারাগুন্ গেজেই উদিলাক্,

⁶ মাত্তর্ বেলান্ উদোনার পরেদি সিগুন রোদে পুড়ি গেলাক্ আর শিঙোরানি গমেডালে ন-বজে বিলি শুগেই গেলাক্।

⁷ আরঅ কয়েক্কো বীজি কাদা ঝার ভিদিরে পড়িলাক্। সেক্কে কাদাগাজ্‌চুন দাঙর্ ওইনে চারাগুনোরে চাপি রাগেলাক্।

⁸ মাত্তর্ কয়েক্কো বীজি গম্ ভূইয়োত্ পড়িনে কনবোত্ একশগুন, কনবোত্ ষায়েত্‌গুন আর কনবোত্ ত্রিশগুন শোজ্য অলাক্।”

⁹ হিত্ত্যবোর্ শেজদি যীশু কলঅ, “যিবের্ শুনিবার কান্ আঘে তে শুনোক্।”

হিত্ত্যবো কনার্ উদ্দেচ্চ্য

¹⁰ পরেদি শিচ্চ্যগুনে যীশু ইধু এইনে পুযোর্ গুরিলাক্, “তুই হিত্ত্যলোই মানুচ্চুনোরে শিক্ষ্যে দুয়োর্ কিত্তে?”

¹¹ যীশু জোব্ দিলো, স্বর্গ-রেজ্যর্ গুমুরো সত্যগানি তমারে জানিবাত্তে দিয়্যে ওইয়্যে মাত্তর্ তারারে জানিবাত্তে দিয়্যে ন-অয়,

¹² কিয়া যিবের্ আঘে তারে আরঅ দিয়্যে অবঅ, আর সেক্কে তার্ বোউত্ অবাক্। মাত্তর্ যিবের্ নেই তার যিগুন্ আঘন্ সিগুন্অ তাত্তুন্ নেযা অবঅ।

¹³ সেনত্তে মুই হিত্ত্যলোই তারা ইধু কধা কং, কিয়া তারা দেগিনেয়ো ন-দেগন্, শুনিনেয়ো ন-শুনোন্ বা ন-বুঝোন্।

¹⁴ ইগুনোর্ মাধ্যমে ভাববাদী যিশাইয়র্ এ কধাগান পূরোণ অর্: তুমি শুনোনাত্ থেবা মাত্তর্ কনমতে ন-বুঝিবা; দেগানাত্ থেবা মাত্তর্ কনমতে ন-জানিবা।

¹⁵ এই বেক্ মানুচ্চুনোর মনানি বাজে আর কানানি নাঢা যেইয়্যে, আর তারা তারার্ চোগ্‌কুন নাঢি রাগেয়োন, যেন তারা চোগেদি ন-দেগন্, কানদি ন-শুনোন্ আর মনানদি ন-বুঝোন্, আর গম্ অবাত্তে মইদু ফিরি ন-এজন্।

¹⁶ তুমি বর্‍পেইয়্যে, কিয়া তমা চোগ্‌কুনে দেগন্ আর তমা কানানিয়ে শুনে।

¹⁷ মুই তমারে ঘেচ্চেকগুরি কঙর্, তুমি যিয়েনি যিয়েনি দেগর্ সিয়েনি বোউত্ ভাববাদী আর গোজেনভক্ত মানুচ্চুনে দেগিবাত্তে চেইনেয়ো ন-দেগন্, আর তুমি যিয়েনি যিয়েনি শুন্ন্য সিয়েনি তারা শুনিবাত্তে চেইনেয়ো ন-শুনোন্।

চাষাবলাবোর্ হিত্ত্যর্ অত্তগান্

^18-19 “ইক্কিনে তুমি চাষাবলাবোর্ হিত্ত্যর্ অত্তগান্ শুনো। যেক্কে কনজনে স্বর্গ-রেজ্যর্ কধা শুনিনেয়ো ন-বুঝোন্ সেক্কে শদান্নো এইনে তা মনত্ যে কধানি কুয়ো ওইয়্যে সিয়েনি কাড়ি লয়। তে পধ কুরে ছিদি পোজ্যে বীজিগুনো মাধ্যমে এবাবোত্যে মানুচ্চুনো পৌইদ্যেনে কুয়ো ওইয়্যে।

²⁰ আর পাত্তর ভূইয়োত্ ফেলেয়্যে বীজিগুনো মাধ্যমে তারা পৌইদ্যেনে কুয়ো ওইয়্যে যিগুনে স্বর্গ-রেজ্যর্ কধা শুনোন্ সেক্কে হুজিয়ে সিয়েনি মানি লন্,

²¹ মাত্তর্ তারা ভিদিরে শিঙোরান্ গমে ডালে ন-বজে বিলি তারা কানক্কনত্তে থির্ থান্। যেক্কে সে কধানিত্তে দুঘ্ আর অত্যেচার্ এজে সেক্কে তারা পিজেদি যান্।

²² কাদা ঝুবো ভিদিরে পোজ্যে বীজিগুনো মাধ্যমে তারা পৌইদ্যেনে কুয়ো ওইয়্যে যিগুনে সে কধানি শুনোন্, মাত্তর্ সংসারর্ চিন্তে-ভাবনা আর ধন-সোম্বোত্তির্ মেয়্যেলোই সেই কধাগানরে চাপি রাগায়। সেনত্তে সেক্কে কনঅ ফল ন-অয়।

²³ গম্ ভূইয়োত্ পোজ্যে বীজিগুনোর্ মাধ্যমে তারা পৌইদ্যেনে কুয়ো ওইয়্যে যিগুনে সে কধানি শুনিনে বুঝোন্ আর ফল দুয়োন্। কনজনে দে একশগুন, কনজনে দে ষায়েট্গুন্ আর কনজনে দে ত্রিশগুণ।”

গম ভিদিরে শ্যামাঘাস

²⁴ যেরেদি তে মানুচ্চুনোরে শিক্ষ্যে দিবাত্তে আর এক্কো হিত্ত্য কলঅ। হিত্ত্যবো এবাবোত্যে: স্বর্গ-রেজ্যগান্ এমন্ এক্কো মান্‌জ্য ধোক্ক্যেন্ যিবে নিজো ভূইয়োত্ গম্ বীজি ফেলেল।

²⁵ যেরেদি যেক্কে বেক্কুনে ঘুমোত্ পড়িলাক্ সেক্কে সে মানুচ্চোর্ শত্রু এইনে গম ভিদিরে শ্যামাঘাসর বীজি ফেলেইনে গেলঅ।

²⁶ যেরেদি গম চারা যেক্কে দাঙর্ ওই উদিনে ফল ধুরিলাক্ সেক্কে সিগুনো ভিদিরে শ্যামাঘাস্অ দেগা গেলঅ।

²⁷ সিগুন দেগিনে ঘর চাগরুনে এইনে গিরোজ্‌সোরে কলাক্, তুই কি ভূইয়োত্ গম্ বীজ্ ন-ছিদোস্? সালে শ্যামাঘাস কুত্তুন্ এলাক্?

²⁸ তে তারারে কলঅ, কন্ শত্রুবো এ কামান্ গোজ্যে। চাগরুনে তারে কলাক্, সালে আমি যেইনে সিগুন তুলি ফেলেবং না কি?

²⁹ “তে কলঅ, ‘না, লেঙেরা ঘাস্ তুলিবাত্তে যেইনে তুমি অয়ত ঘাস সমারে গম্অ তুলি ফেলেবা।

³⁰ শোজ্য কাবিবার অক্ত সং ইগুনোরে একসমারে বাড়িবাত্তে দুয়ো। যিগুনে শোজ্য কাবন্, মুই সেক্কে তারারে কোম্ যেন তারা পত্তমে লেঙেরা ঘাস্‌চানি থুবেইনে পুড়িবাত্তে বনা বনা গুরি বানন্, আর সে পরেদি গমুন্ মঅ গোলা ঘরত্ তুবোন্।’ ”

শোজ্য বীজি আর সদার্ হিত্ত্য

³¹ যীশু তারারে আর এক্কো হিত্ত্য কলঅ। হিত্ত্যবো এবাবোত্যে: “স্বর্গ-রেজ্যগান এমন্ এক্কো শোজ্য-বীজি ধোক্ক্যেন্ যিগুন্ এক্কো মান্‌জ্যে নেযেইনে নিজো ভূইয়োত্ ফেলেল।

³² বেক্ বীজিগুনো ভিদিরেত্তুন্ ঘেচ্চেকগুরি সিবে বেগত্তুন্ চিগোন্, মাত্তর্ গাজ্ দাঙর্ ওই উদিলে পরেদি সিগুন বেক্ শাক্-পাদ ভিদিরেত্তুন্ বেগত্তুন্ দাঙর্ অয়। সিবে এমন্ এক্কো দাঙর্ গাজ্ ওই উদে, পেগ্‌কুনে এইনে তা ডেলাগুনোত্ বাহ্ বানন্।”

³³ যীশু তারারে আর এক্কো হিত্ত্য কুয়ো ধুরিলো। “স্বর্গ-রেজ্যগান্ এবাবোত্যে। এক্কো মিলে সদা লোইনে আদার কেজি মোয়দ্যে লগে মিজেল। সেনে বেক্ মোয়দ্যেগান্ ফুলি উদিলো।”

³⁴ যীশু হিত্ত্যবোর্ মাধ্যমে মানুচ্চুনোরে এই বেক্ শিক্ষ্যেনি দিলো। তে হিত্ত্য ন-কোইনে কনঅ শিক্ষ্যে তারারে ন-দিদো।

³⁵ ইয়েন্ অলঅ যেন ভাববাদীর মাধ্যমে এই যে কধাগান্ কুয়ো ওইয়্যে সিয়েন্ পূরোণ অয়: শিক্ষ্যে-ভরা উপমা দিইনে মুই মুয়োন্ খুলিম্; জগদর্ আরাম্ভত্তুন্ ধুরি যিয়েনি যিয়েনি লুগেয়্যে এলঅ, সিয়েনি কোম্।

শ্যামাঘাসর হিত্ত্যবোর্ অত্ত

³⁶ পরেদি যীশু মানুচ্চুনোরে ফেলেইনে ঘরত্ সোমেল। সেক্কে তা শিচ্চ্যগুনে এইনে তারে কলাক্, “ভূইয়োর সে শ্যামাঘাসর্ হিত্ত্যবো আমারে বুঝেই দে।”

³⁷ জোবত্ যীশু তারারে কলঅ, যিবে গম্ বীজি ফেলায় তে অলঅ মান্‌জ্য পুয়োবো।

³⁸ এই জগদ্‌তান ভূই, আর স্বর্গ-রেজ্যর্ মানুচ্চুন গম্ বীজি। শদান মানুচ্চুনে অলাক্ সেই শ্যামাঘাস।

³⁹ যে শত্রুবো বীজি ফেলেয়্যে তে অলঅ শদান্, আর শোজ্য কাবিবার অক্তবো অলঅ এ যুগোর্ থুম্ সময়। যিগুনে শোজ্য কাবিবাক্ তারা অলাক্ স্বর্গদূত।

⁴⁰ শ্যামাঘাস তুবেইনে যেধোক্ক্যেন্ আগুনোত্ পুড়ি দিয়্যে অয়, যুগোর্ থুম্ অক্তত্অ ঠিগ্ সেধোক্ক্যেন্ অবঅ। মান্‌জ্যপুয়োবো তা স্বর্গদূত্‌তুনোরে পাধেই দিবো।

⁴¹ যিগুনে অন্যগুনোরে পাপ গরান্ আর যিগুনে নিজে পাপ গরন্ তারারে বেক্কুনোরে সেই স্বর্গদূত্‌তুনে মান্‌জ্যপুয়োবোর্ রেজ্যত্তুন্ একলগে এগত্তর্ গুরিবাক্ আর জ্বোল্‌জোল্যে আগুনো ভিদিরে ফেলে দিবাক্।

⁴² সিয়েনত্ মানুচ্চুনে কানাকুদি গুরিবাক্ আর যন্ত্রণালোই দাত্ কামেরেবাক্।

⁴³ সে অক্তত্ গোজেনভক্ত মানুচ্চুনে তারার্ স্বর্গর্ বাব রেজ্যত্ বেলান ধোক্ক্যেন জ্বোল্‌জোল্যে ওই দেগা দিবাক্। যিবের্ শুনিবার্ কান্ আগে তে শুনোক্।

আরঅ তিন্নো হিত্ত্য

⁴⁴ স্বর্গ-রেজ্যগান্ ভূইয়ো ভিদিরে লুগেই রাগেয়্যে ধন ধোক্ক্যেন্। এক্কো মান্‌জ্যে সিয়েন্ তোগেই পেইনে আরঅ লুগেই রাগেল। সে পরেদি তে হুজি মনে গেলঅ আর তার যেদক্কানি এলঅ বেক্কানি বিজিনে সে ভূইয়ান কিনিলো।

⁴⁵ আরঅ, স্বর্গ-রেজ্যগান এমন্ এক্কো সদাগর ধোক্ক্যেন্ যে গম্ মুক্তা তগার্।

⁴⁶ এক্কো মংগা মুক্তা তোগেই পেইনে তে যেইনে তার্ যিয়েনি এলঅ বেক্কানি বিজিনে সেই মুক্তাবো কিনিলো।

⁴⁷ “আরঅ, স্বর্গ-রেজ্যগান্ এমন্ এক্কো দাঙর্ জাল ধোক্ক্যেন্ যিয়েন সাগরত্ ফেলা অলঅ আর নানান্ বাবোত্যে মাছ ধরা পড়িলাক্।

⁴⁸ জালান্ পূরেলে পরেদি মানুচ্চুনে সিয়েন্ পারত্ টানি তুলিলাক্। পরেদি তারা বুজিনে গম্ মাছ্‌চুন বেঈনে লেইয়োত্ রাগেলাক্ আর বজঙুন্ ফেলে দিলাক্।

⁴⁹ যুগোর্ থুম্ সময়োত্ এবাবোত্যে অবঅ। স্বর্গদূত্‌তুনে এইনে গোজেনভক্ত মানুচ্চুনো ভিদিরেত্তুন্ পাজিগুনোরে যুদো গুরিবো আর জ্বোল্‌জোল্যে আগুনো ভিদিরে তারারে ফেলে দিবো।

⁵⁰ সিয়েনত্ মানুচ্চুনে কানাকুদি গুরিবাক্ আর যন্ত্রণালোই দাত্ কামেরেবাক্।”

⁵¹ ইয়েনর পরেদি যীশু তা শিচ্চ্যগুনোরে পুযোর্ গুরিলো, “তুমি কি ইয়েনি বেক্কানি বুঝি পাজ্জ্য?”

তারা তারে কলাক্, “অয়, পাজ্যেই।”

⁵² সেক্কে যীশু তারারে কলঅ, “স্বর্গ-রেজ্যেগান পৌইদ্যেনে যিদুক্কুন ধর্ম মাষ্টরে শিক্ষ্যে পেইয়োন তারা বেক্কুন এমন্ এক্কো গিরোজ ধোক্ক্যেন্ যিবে তা ভান্ডালত্তুন্ নুয়ো আর পূরোণ জিনিস নিগিলায়।”

নাসরদত্ প্রভু যীশু এলাফেলা অলঅ

⁵³ শিক্ষ্যে দিবাত্তে এই বেক্ হিত্ত্যবো কনা থুম্ গুরিনে যীশু সিয়েনত্তুন্ নিজো শঅরত্ গেলগোই।

⁵⁴ সে পরেদি নিজো আদামত্ যেইনে তে সমাজ-ঘর মানুচ্চুনোরে শিক্ষ্যে দিয়্যে ধুরিলো। তা কধা শুনিনে মানুচ্চুনে আমক্ ওইনে কলাক্, “এই জ্ঞানান্ আর এই বেক্ আমক্ কামানি গুরিবার খেমতা তে কুত্তুন্ পেলঅ?

⁵⁵ ইবে কি সেই গাজ কালিগরর্ পুয়োবো নয়? তা মাবো নাঙান্ কি মরিয়ম নয়? আর তা ভেইয়ুন কি যাকোব, যোষেফ, শিমোন আর যিহূদা নয়?

⁵⁶ তার বেক্ বোনুনে কি আমা ইধু নেই? সালে কুত্তুন্ তে ইয়েনি বেক্কানি পেলঅ?”

⁵⁷ এবাবোত্যেগুরি তারা যীশুরে এলাফেলা গুরিলাক্। যীশু তারারে কলঅ, “নিজো আদাম আর নিজো ঘর্ বাদে আর বেক্ জাগানিত্ ভাববাদীগুনে সর্মান পান্।”

⁵⁸ কিয়া তারার্ কনঅ বিশ্বেজ্ নেই, সেনত্যে তে সিধু বেশ্ আমক্ অবার্ কাম্ ন-গুরিলো।