মথি লেখ্যে গম্ হবর্ 11 - Chakma Bible

প্রভু যীশু ইধু যোহনর্ শিচ্চ্যগুন

¹ যীশু তা বারজন শিচ্চ্যরে উগুম্ দেনা থুম্ গুরিলো। সে পরেদি তে আদামে আদামে শিক্ষ্যে দিবাত্তে আর প্রচার গুরিবাত্তে সিয়োত্তুন গেলঅ।

² বাপ্তিষ্মদিয়্যে যোহনে জেলোত্ থেইনে যেক্কে যীশু খ্রীষ্টর কামর্ কধা শুনিলো সেক্কে তা শিচ্চ্যগুনোরে দিইনে যীশুরে পুজোর্ গুরিবাত্তে পাধেল,

³ “যিবের্ এবার্ কধা এলঅ তুই কি সিবে, না আমি আর কারত্তে বাজ্জেই থেবং?”

⁴ জোবত্ যীশু তারারে কলঅ, “তুমি যিয়েন্ শুন্ন্য আর দেখ্য সিয়েনি যেইনে যোহনরে কঅ।

⁵ তারে জানঅ, কান্ মানুচ্চুনে দেগদন্, আঢুরুনে আঢদন্, ফারাঙিবলাগুনে সিজি অদন্, বহ্‌রা মানুচ্চুনে শুনোদন্, মরা মানুচ্চুনে জেঁই উদোদন্ আর নাঢা মানুচ্চুনো ইধু গম্ হবর্ প্রচার গরা অর্।

⁶ আর তেয়ই বর্‌পেইয়্যে যে মরে নিইনে মনত্ কনঅ সন্দেহ ন-গরে।”

যোহন পৌইদ্যেনে প্রভু যীশুর কধা

⁷ যোহন শিচ্চ্যগুন ফিরি যাদন্, এমন্ সময়োত্ যীশু মানুচ্চুনো ইধু যোহন পৌইদ্যেনে কুয়ো আরাম্ভ গুরিলো, “তুমি ধূল্যেচর-চাগালাত্ কি চেবাত্তে যেইয়ো? বোইয়্যেরত্ দুল্যে নল্-খাগড়া?

⁸ সিয়েন ন-অলে কি চেবাত্তে যেইয়ো? দোল্ কাবড় উজ্যে কনঅ মান্‌জ্যরে চেবাত্তে নাকি? আজলে যিগুনে দোল্ কাবড় উরোন্ তারা রাজঘরত্ থান্।

⁹ সিয়েন ন-অলে কি চেবাত্তে যেইয়ো? কনঅ ভাববাদীরে নাকি? অয়, মুই তমারে কঙর্, তে ভাববাদীত্তুন্অ বেশ্ দাঙর্।

¹⁰ যোহনে সে মানুচ্চো যিবে পৌইদ্যেনে বোইয়োত্ লেগা আঘে: চাহ্, মুই তঅ আগে মঅ হবর্ কোইয়্যেবোরে পাদাঙর্। তে তঅ আগে যেইনে তঅ পথ্‌তান যুক্কোল্ গুরিবো।

¹¹ মুই তমারে ঘেচ্চেকগুরি কঙর্, মান্‌জ্য ভিদিরে বাপ্তিষ্মদিয়্যে যোহনত্তুন্ দাঙর্ আর কনজন নেই। মাত্তর্ স্বর্গ-রেজ্য ভিদিরে যে বেক্কুনোত্তুন্ চিগোন্ তেয়ো যোহনত্তুন্ দাঙর্।

¹² বাপ্তিষ্মদিয়্যে যোহন সময়ত্তুন্ ধুরি তা ফগদাং গোজ্জ্যে হবরান ইক্কিনে সং স্বর্গ-রেজ্যগান জদবদে জোরে উজেই এজের্, আর যিগুনে উগ্র তারা সিয়েন্ ধুরি আঘন্।

¹³ যোহন সময়ত্তুন্ ধুরি ভাববাদীগুনে বেক্কুনে, এন্ কি, মোশির আইন-কানুনেয়ো আগাম্ কধা কোইয়্যে।

¹⁴ যুনি তুমি এ কধাগান বিশ্বেজ্ গত্তে রাজী থাগঅ সালে শুনো-যিবের্ এবার্ কধা এলঅ এ যোহনে সেই এলিয়।

¹⁵ যিবের্ শুনিবার্ কান্ আঘে তে শুনোক্।”

¹⁶ “এই কাল মানুচ্চুনোরে মুই কাহ্ সমারে সং গুরিম? ইগুন এন্ পুয়ো-ঝি ধোক্ক্যেন্ যিগুনে বাজারত্ বোইনে অন্য পুয়ো-ঝিগুনোরে ডাগিনে কন্,

¹⁷ ‘আমি তমাত্তে বাজানা বাজেলং, তুমি ন-নাজিলা; আবিলেজর্ গান্ গেলং, তুমি বুগ্ ন-চাবেড়েলা।’

¹⁸ যেক্কে যোহনে এলঅ; তে উবোস আর আংগুর-রস ন-হেলঅ, সেক্কে বেক্কুনে কদন্, ‘তারে ভুদে পেইয়্যে।’

¹⁹ যেক্কে মান্‌জ্যপুয়োবো এইনে হানা-দানা গুরিলো সেক্কে বেক্কুনে কদন্, ‘উইয়ো চঅ, এক্কো পেদুক্ আর মদখুর্, খাজানা-তুলিয়্যে আর বজং মানুচ্চুনোর সমাজ্যে।’ মাত্তর্ জ্ঞানান্ যে খাটি সিয়েনর্ প্রমানান্ তা কামানি ভিদিরে আঘে।”

অবিশ্বেজি আদাম আর শঅরানি

²⁰ যীশু যেদক্কানি আদামত্ আর শঅরত্ বেশ্ ভাগ আমক্ কাম গোজ্যে সেই বেক্ জাগানির্ মানুচ্চুনে মনানি ন-ফিরেন্। ইয়েনত্তে সেই জাগানিরে তে অঘধা কুয়ো ধুরিলো,

²¹ “অভিশাব্ পেইয়্যে কোরাসীন, অভিশাব্ পেইয়্যে বৈৎসৈদা! তমা ভিদিরে যেদক্কানি আমক্ অবার্ কাম্ গরা ওইয়্যে সিয়েনি যুনি সোর আর সীদোন শঅরত্ গরা অদঅ সালে ভালোক্ দিন আগে তারা বস্তা ফাদা পিনিনে ছেই গুলিনে পাপত্তুন্ মনানি ফিরেদাক্।

²² মুই তমারে ঘেচ্চেকগুরি কঙর্, বিচের দিনোত্ সোর আর সীদোনর অবস্থা বরং তমাত্তুন্ বেশ্ বোউত্ সোজ্য গরেদে ধোক্ক্যেন্ অবঅ।

²³ আর তুই কফরনাহূম! তুই নাকি স্বর্গয়ান সং অজলত্ উদিবে? কনদিন্অ নয়, তরে তলেদি নরগত্ ফেলেই দিয়্যে অবঅ। যেদক্কানি আমক্ অবার্ কাম্ তঅ ভিদিরে গরা ওইয়্যে সিয়েনি যুনি সদোম শঅরত্ গরা অদঅ সালে সদোমান্ এজঅ ঠিগি থেদঅ।

²⁴ মুই তমারে ঘেচ্চেক্‌গুরি কঙর্, বিচার দিনোত্ সদোমর অবস্থা বরং তমাত্তুন্অ বেশ্ বোউত্ সোজ্য গরেদে ধোক্ক্যেন্ অবঅ।”

প্রভু যীশুর ডাগানা

²⁵ সে পরেদি যীশু কলঅ, ও বাবা, তুই স্বর্গ আর পিত্‌থিমীর গিরোজ্। মুই তর্ বাঈনী গরং, কিয়া তুই এই বেক্ বেপারানি জ্ঞানী আর বুদ্ধিবলাগুনোত্তুন্ লুগেই রাগেয়োচ্, মাত্তর্ চিগোন্‌গুরো ধোক্ক্যেন্ মান্‌জ্য ইধু ফগদাং গোজ্যস্।

²⁶ অয় বাবা, তর্ আওজ্ মজিম্ ইয়েনি ওইয়্যে।

²⁷ মঅ বাপ্পো বেক্কানি মঅ আঢত্ দিয়্যে। বাপ্পো বাদে পুয়োবোরে কনজনে হবর্ ন-পায় আর পুয়োবো বাদে বাপ্পোরে কনজনে হবর্ ন-পায়, আর পুয়োবো যাইদু বাবরে ফগদাং গুরিবাত্তে আওজ্ গরে তেয়ই তারে হবর্ পায়।

²⁸ “তুমি যিগুনে অরান্ ওইয়ো আর ভুধি বুগিনে বেড়র্, তুমি বেক্কুনে মইধু এজঅ; মুই তমারে জিরেবাত্তে দিম্।

²⁹ মঅ জুঙোলান্ তমা উগুরে তুলি নেযঅ আর মত্তুন্ শিগো, কিয়া মঅ খাচ্চ্যত্তান্ নরম আর চিদে।

³⁰ ইয়োত্ তুমি মনত্ জিরেন্ পেবা, কিয়া মঅ জুঙোলান্ বুয়োই নেযানা সোজা আর মঅ ভারান্ পাদল্।”