মথি লেখ্যে গম্ হবর্ 10 - Chakma Bible

বারজন শিচ্চ্যরে দিপাদানা

¹ যীশু তার্ বারজন শিচ্চ্যরে ডাগিলো আর ভুত ধাবেবার্ আর নানান্ বাবোত্যে পীড়ে গম্ গুরিবার খেমতা দিইনে তারারে পাধেই দিলো।

² সেই বারজন প্রচারক নাঙানি অলঅ : পত্তম্, শিমোন যারে পিতর কন্, সে পরেদি তা ভেই আন্দ্রিয়; সিবদিয়র পুয়ো যাকোব আর তা ভেই যোহন; ফিলিপ আহ্ বর্‌থলময়;

³ থোমা আর খাজানা তুলিয়্যে মথি; আল্‌ফেয় পুয়ো যাকোব আহ্ থদ্দেয়;

⁴ একবুচ্চ্যে শিমোন আর যীশুরে যে শত্রুগুনো আঢত্ ধুরি দিয়্যে সেই যিহূদা ইষ্কারিয়োৎ।

⁵ যীশু সেই বারজনরে এই বেক্ উগুমানি দিইনে পাধেল, তুমি অযিহূদীগুনো ইধু বা শমরীয়গুনোর্ কনঅ আদামত্ ন-যেয়ো,

⁶ বানা ইস্রায়েল জাদর্ আজি যেইয়্যে ভেড়াগুনো ইধু যেয়ো।

⁷ তুমি যাদে যাদে এ কধাগান ফগদাং গরঅ, স্বর্গ-রেজ্যগান্ কায়কুরে এইচ্চ্যে।

⁸ ইয়েন বাদেয়ো অসুখ্যেগুনোরে গম্ গরঅ, মরাগুনোরে জিংকানি দুয়ো, ফারাঙি বলাগুনোরে গম্ গরঅ আর ভান্ন্যেই আত্মাগানিরে ধাবেই দুয়ো। তুমি মাগানা পেইয়ো, মাগানা দুয়ো।

⁹ তমার্ কমরত্ গুরি তুমি সনা, রূবো বা তামা পোইজ্যেয়ো ন-নেযেয়ো।

¹⁰ পদত্তে কনঅ বাবোত্যে থৈল্যে, দ্বিবে সিলুম, জদা বা লুদিক্অ ন-নেযেয়ো, কিয়া যে কাম্ গরে তে হানা-উরোনা পেবার্ যোগ্য।

¹¹ তুমি যে কনঅ শঅরত্ বা আদামত্ যেবা সিদু এক্কো যগাজ্যে মানুচ্ তোগেই নেযঅ আর অন্য কনঅ মিক্ক্যে ন-যানা সং তা ঘরানত্ থেয়ো।

¹² সে ঘর ভিদিরে সোমেবার্ অক্তত্ তারারে ভালেদি জানেয়ো।

¹³ যুনি সে ঘরান্ যগাজ্যে অয় সালে তমার্ সুগ্-শান্দি সেই ঘর উগুরে লামি এজোক্। মাত্তর্ যুনি সে ঘরান্ যগাজ্যে ন-অয় সালে তমার সুগ্-শান্দি তমা ইধু ফিরি এজোক্।

¹⁴ যুনি কনজনে তমারে গুজি ন-লয় বা তমা কধা ন-শুনোন্ সালে সেই ঘর বা আদামত্তুন্ যেবার সময়োত্ তমা টেঙর্ ধূল্যেগানি ঝাড়ি ফেল্ল্য।

¹⁵ মুই তমারে ঘেচ্চেকগুরি কঙর্, বিচের দিনোত্ সেই আদামত্তুন্ বরং সদোম আর ঘমোরা শঅরর্ অবস্থা বজমান্ সোজ্য গরেদে ধোক্ক্যেন্ অবঅ।

শিচ্চ্যগুনোরে উপদেজ্ দেনা

¹⁶ চঅ, মুই হোক্ক্যে বাঘ ইধু ভেড়া ধোক্ক্যেন্ তমারে পাদাঙর্। ইয়েনত্তে সাপ ধোক্ক্যেন্ উজিয়ার্ আর কোদোর ধোক্ক্যেন্ সরল অ।

¹⁷ উজিয়ার্ থেয়ো, কিয়া মান্‌জ্যে বিচের-সভাত্ মানুচ্চুনো আঢত্ তমারে ধুরি দিবাক্ আর তারার্ সমাজ-ঘরত্ তমারে চাবুক্ মারিবাক্।

¹⁸ মত্তেই শাসনগুরিয়্যে আর রাজাগুনো মুজুঙোত্ তমারে নেযা অবঅ যেন তারা ইধু আর অযিহূদীগুনো ইধু তুমি স্বাক্ষি দি পারঅ।

¹⁹ মানুচ্চুনে যেক্কে তমারে ধুরি দিবাক্ সেক্কে কেধোক্ক্যেন্ গুরিনে আর কি কুয়ো পুরিবো সিয়েনত্তে চিদে ন-গোজ্য। কি কুয়ো পুরিবো সিয়েন্ তমারে সে সময়োত্ কুয়োই দে অবঅ।

²⁰ তুমি যে কবা সিয়েন্ নয়, বরং তমা বাপ্পো গোজেন আত্মাগানে তমা ভিদিরেদি কধা কবঅ।

²¹ ভেই ভেইয়োরে আর বাবে পুয়োরে মারে ফেলেবাত্তে ধুরি দিবো। পুয়ো-ছাগুনে মা-বাব বিরুদ্ধে থিয়্যেইনে তারারে খুন্ গোরেবাক্।

²² মত্তে বেক্কুনে তমারে ঘিনেবাক্, মাত্তর্ যে থুম্ সং থির্ থেবঅ তে উদ্ধোর্ পেবঅ।

²³ কনঅ আদাম মান্‌জ্যে যেক্কে তমা উগুরে অত্যেচার গুরিবাক্ সেক্কে অন্য আদামত্ ধেই যেয়ো। মুই তমারে ঘেচ্চেকগুরি কঙর্, ইস্রায়েল দেজর্ শঅর আর আদামত্ তমা কামানি থুম্ অবার্ আগেদি মান্‌জ্যপুয়োবো এবঅ।

²⁴ মাষ্টরত্তুন্ ছাত্র দাঙর্ নয় আর গিরোজত্তুন্ চাগর্ দাঙর্ নয়।

²⁵ ছাত্র পক্ষে মাষ্টর ধোক্ক্যেন্ অনা আর চাগর পক্ষে গিরোজ ধোক্ক্যেন্ অনা যদেষ্ট। ঘর গিরোজরে যেক্কে তারা বেল্‌সবূল কোইয়োন সেক্কে ঘরর্ অন্য বেক্কুনোরে আরঅ কদক্ বেশ্ গুরি না বেল্‌সবূল কবাক্।

²⁶ মাত্তর্ তুমি তারারে ন-দোরেয়ো, কিয়া লুগেয়্যে বেক্কানি ফগদাং অবঅ আর গুমোর্ বেক্কানি জানা অবঅ।

²⁷ মুই তমা ইধু যিয়েনি আন্ধারত্ কঙর্ সিয়েনি তুমি পহ্‌রত্ কোয়ো। তুমি যিয়েনি কানে কানে শুনোর্ সিয়েনি ছাল উগুরেত্তুন্ ফগদাং গোজ্য।‍

²⁸ যিগুনে বানা কিয়্যেগান মারে ফেলেই পারন্ মাত্তর্ আত্মাগানরে মারি ন-পারন্ তারারে ন-দোরেয়ো। যিবে কিয়্যে আর আত্মা দ্বিয়েনরে নরগত্ ভস্ত গুরি পারে বরং তারেই দরঅ।

²⁹ দ্বিবে চড়ই পেগ্ কি কম্ দামে বেজা ন-যায়? তো তমা বাপ গোজেনর্ অনুমতি বাদে তারার্ এক্কোয়ো মাদিত্ ন-পড়ে;

³⁰ এমন্ কি, তমা মাঢাবোর্ চুলানিয়ো গণা আঘে।

³¹ সেনত্তে তুমি ন-দোরেয়ো। ভালোক্কুন্ চড়ই পেগত্তুন্অ বেশ্ তুমি বোউত্ মূল্যবান।

³² যে কনজনে মান্‌জ্য মুজুঙোত্ মরে স্বিগের্ গরে মুইয়ো মর্ স্বর্গর বাবা মুজুঙোত্ তারে স্বীগের্ গুরিম।

³³ মাত্তর্ যে কনজনে মান্‌জ্য মুজুঙোত্ মরে অস্বীগের্ গরে মুইয়ো মর্ স্বর্গর্ বাবা মুজুঙোত্ তারে অস্বীগের্ গুরিম।

³⁴ মুই পিত্‌থিমীত্ শান্তি দিবাত্তে এচ্চ্যং এ কধাগান মনে ন-গোজ্য। মুই শান্তি দিবাত্তে ন-এজং বরং তলোয়ার দিবাত্তে এচ্চ্যং;

³⁵ পুয়োরে বাব বিরুদ্ধে, ঝি-রে মা বিরুদ্ধে, বৌরে শুড়ি বিরুদ্ধে থিয়্যেই রাগেবাত্তে এচ্চ্যং।

³⁶ এক্কো মান্‌জ্যর নিজো গিরি মানুচ্চুনে তার্ শত্রু অবাক্।

³⁷ যে কনজনে মত্তুন্ বেশ্ মা-বাবরে কোচ্‌পায় তে মর্ যোগ্য নয়। আর যে কনজনে পুয়ো বা ঝি-রে মত্তুন্ বেশ্ কোচ্‌পায় তে মর্ যোগ্য নয়।

³⁸ যে নিজোর ক্রুশ লোইনে মঅ পধেদি ন-চলে তেয়ো মর্ যগাজ্যে নয়।

³⁹ যে কনজনে নিজোর্ জিংকানিগান্ রোক্ষ্যে গুরিবাত্তে চায় তে তার্ ঘেচ্চেক্‌গুরি জিংকানিগান্ আরেব; মাত্তর্ যে কনজনে মত্তে তা পরাণান্ আরায় তে তার্ ঘেচ্চেক্‌গুরি জিংকানিগান্ রোক্ষ্যে গুরিবো।

⁴⁰ “যে তমারে ভালেদি জানায় তে মরে ভালেদি জানায়; আর যে মরে ভালেদি জানেইনে যিবে পাধেয়্যে তে তারে ভালেদি জানায়।

⁴¹ কনঅ ভাববাদীরে যুনি কনজনে ভাববাদী বিলি মানি লয় সালে ভাববাদীবো যে বক্‌শিজ্‌চান পেবঅ তেয়ো সে বক্‌শিজ্‌চান পেবঅ। এক্কো গোজেন ভক্ত মান্‌জ্যরে যুনি কনজনে গোজেন ভক্ত মানুচ্ বিলি মানি লন্ সালে গোজেন ভক্ত মানুচ্চো যে বক্‌শিজ্‌চান পেবঅ তেয়ো সে বক্‌শিজ্‌চান পেবঅ।

⁴² যে কনজনে এই সামান্য মানুচ্চুনো ভিদিরে একজনরে মর্ শিচ্চ্য বিলিনে এক জগ ঠান্ডা পানি দে, মুই তমারে ঘেচ্চেকগুরি কঙর্, তে কনমতে তা বক্‌শিজ্‌চান্ ন-আরেব।”