লূকে লেখ্যে গম্ হবর্ 9 - Chakma Bible

শিচ্চ্যগুনোর্ প্রচারত্-যানা

¹ ইয়েনর্ পরেদি যীশু সেই বারজন শিচ্চ্যরে ডাগিনে এগত্তর্ গুরিলো আর বেক্ ভান্ন্যেই আত্মা উগুরে খেমতা আর অধিকার্ দান গুরিলো। তে তারারে পীড়ে গম্ গুরিবার্ খেমতায়ো দিলো।

² সে পরেদি তে তারারে গোজেন রেজ্য পৌইদ্যেনে ফগদাং গুরিবাত্তে আর পীড়েল্যেগুনোরে গম্ গুরিবাত্তে পাধেই দিলো।

³ যীশু তারারে কলঅ, “তুমি পধত্তে লুদিক্, থৈল্যে, রুটি বা টেঙা কিচ্ছু ন-নেযেয়ো, রুটি বা টেঙা কিচ্ছু ন-নেযেয়ো, এমন কি, দ্বিবেত্ দরে সিলুম্অ নয়।

⁴ যে ঘরত্ তুমি সোমেবা সেই শঅরান্ ন-ছাড়ানা সং সেই ঘরানত্ থেয়ো।

⁵ যুনি মান্‌জ্যে তমারে মানি ন-লন্ সালে তারা আদামান্ ফেলে যেবার্ অক্তত্ তমা টেঙর্ ধূল্যেগানি ঝাড়ি ফেলঅ, যেন সিয়েন্ তারার্ বিরুদ্ধে সাক্ষ্য ওই থায়।”

⁶ সেক্কে শিচ্চ্যগুনে আদামে আদামে যেইনে গোজেন রেজ্যর্ গম্ হবর্ ফগদাং গরানা আর পীড়ে গম্ গরা ধুরিলাক্।

⁷ যীশু যিয়েনি গোজ্যে সিয়েনি বেক্কানি শুনিনে গালীল শাসনগুরিয়্যে হেরোদে আমক্ অলঅ, কিত্যে কয়েকজন মান্‌জ্যে কদন্ বাপ্তিস্মদিয়্যে যোহনে মরণত্তুন্ জেই উঠ্যে;

⁸ কেঅ কেঅ কোইয়োন এলিয় দেগা দিয়্যে; আরঅ কেঅ কেঅ কোইয়োন ভালোক্ দিনো আগর্ এক্কো ভাববাদী জেই উঠ্যে।

⁹ হেরোদে কোইয়্যেদে, “মুই দঅ যোহন মাঢাবো কাবি ফেলেয়োং। সালে যিবে পৌইদ্যেনে মুই ইয়েনি শুন্ন্যং, তে কন্না?” হেরোদে যীশুরে চেবাত্তে চেরেস্টা গরা ধুরিলো।

পাচ্ আজার মান্‌জ্যরে হাবানা

¹⁰ যীশু যে শিচ্চ্যগুনোরে পাধেয়্যে তারা ফিরি এলাক্ আর কি কি গোজ্যন্ বেক্কানি তারা যীশুরে কলাক্। সেক্কে যীশু তারারে লোইনে বৈৎসৈদা আদাম কায় এক্কান্ মানুচ্ নেইয়্যে জাগাত্ গেলঅ।

¹¹ সেই হবরান্ হবর্ পেইনে বোউত্ মানুচ্ যীশু পিজে পিজে গেলাক্। তে সেই মানুচ্চুনোরে মানি ললঅ আর তারা ইধু গোজেন রেজ্যর্ কধা কলঅ। ইয়েনি বাদেয়ো যিগুনোর্ গম্ অবার্ দরকার এলঅ তে তারারে গম্ গুরিলো।

¹² যেক্কে বেলান্ ডুবেল্লোই সেক্কে সেই বারজন শিচ্চ্য এইনে যীশুরে কলাক্, যীশু তারারে কলঅ, “আমি যিয়েনত্ আগিই সিয়েন্ এক্কান্ নিরিবিলি জাগা। সেনত্তে এ মানুচ্চুনোরে পাধেই দে যেন তারা কায়কুরে অাদামত্ আর খামার ঘরত্ যেইনে হানা আর থেবার্ জাগা তোগেই নেযেই পারন্।”

¹³ যীশু তারারে কলঅ, “তুমি নিজেই তারারে কিজু হেবাত্তে দুয়ো।” তারা কলাক্, “মাত্তর্ আমা ইধু বানা পাচ্চান্ রুটি আর দ্বিবে মাছ বাদে আর কিচ্ছু নেই। বানা আমি যুদি যেইনে এই বেক্ মানুচ্চুনোত্তে হানা কিনি আনি পারিদোং সেক্কে তে তারারে হাবেই পারিদোং।”

¹⁴ সিয়েনত্ কমেদি পাচ্ আজার্ মরদ মানুচ্ এলাক্। যীশু তা শিচ্চ্যগুনোরে কলঅ, “পঞ্চাশ জন্যে দলত্ গুরি এক এক দলত্ মানুচ্চুনোরে বোজেই দুয়ো।”

¹⁵ শিচ্চ্যগুনে সেবাবোত্যেগুরি বেক্ মানুচ্চুনোরে বোজেই দিলাক্।

¹⁶ সেক্কে যীশু সেই পাচ্চান্ রুটি আর দ্বিবে মাছ লোইনে স্বর্গ ইন্দি রিনি চেলঅ আর সিয়েনিত্তে গোজেনরে ভালেদি জানানার্ পরেদি কট্টা কট্টা গুরিলো। সে পরেদি তে মানুচ্চুনোরে দিবাত্তে সিয়েনি শিচ্চ্যগুনো আঢত্ দিলো।

¹⁷ তারা বেক্কুনে পেট ভরে সং হেলাক্। যেরেদি যে কট্টানি পড়ি এলঅ সিয়েনি বারবো লেইয়োত্ তুলি নেযা অলঅ।

নিজো মরণ পৌইদ্যেনে প্রভু যীশু

¹⁸ একদিন্যে যীশু এক্কান্ নিরিবিলি জাগাত্ গায় গায় তবনা গরের্। তা সমারে বানা তা শিচ্চ্যগুনে এলাক্। তে তারারে পুযোর্ গুরিলো, “মুই কন্না, এ পৌইদ্যেনে মানুচ্চুনে কি কন্?”

¹⁹ শিচ্চ্যগুনে কলাক্, “কেঅ কেঅ কন্ তুই বাপ্তিস্মদিয়্যে যোহন; কেঅ কেঅ কন্ এলিয়; আরঅ কেঅ কেঅ কন্ ভালোক্ দিন আগে এক্কো ভাববাদী জেই উঠ্যে।”

²⁰ তে তারারে কলঅ, “মাত্তর্ তুমি কি কঅ, মুই কন্না?” পিতরে কলঅ, “তুই গোজেনর্ সেই মশীহ।”

²¹ পরেদি যীশু তারারে কড়া উগুম গুরিলো যেন তারা কাররে এ কধাগান্ ন-কন্।

²² তে তারারে আরঅ কলঅ, মান্‌জ্য পুয়োবোত্তুন্ বোউত্ দুঘ্ ভুগো পড়িবো। বুড়ো নেতাগুন, আজল্ ধর্মগুরুগুন আর ধর্ম-মাষ্টরুনে তারে এলাফেলা গুরিবাক্। তারে মারে ফেলা অবঅ আর তিন দিনোত্ তারে মরণত্তুন্ জেঈ উদো পড়িবো।

²³ সে পরেদি তে বেক্কুনোরে কলঅ, “যুনি কেঅ মঅ পধেদি এবাত্তে চায়, সালে তে নিজো আয়োচ্ মজিম্ ন-চোলোক্; পত্তিদিন নিজো ক্রুশ্‌চান্ বুয়োইনে তে মঅ পিজেদি এজোক্।

²⁴ যে কেঅ তা নিজোত্তে বাঁজি থেদঅ চায় তে তার জিংকানিগান্ ঘেচ্চেক্‌‍‍‍গুরি আরেব; মাত্তর্ যে মত্তে তা পরাণান্ আরায় তে তার জিংকানিগান্ ঘেচ্চেক্‌গুরি রোক্ষ্যে পেবঅ।

²⁵ তুই যুনি পুরো পিত্‌‌থিমীগান জিদিনে সিয়েনর্ বদলে তঅ জিংকানিগান্ ঘেচ্চেক্‌গুরি আরাস্ সালে সিয়েনর্ কি লাভ্ অলঅ? নিশ্চয় নয়!

²⁶ যুনি কেঅ মরে নিইনে আর মঅ কধালোই লাজান্, সালে মান্‌জ্য পুয়োবো যেক্কে নিজোর্ মহিমালোই, বাপর্ আর পবিত্র স্বর্গদূত্তুনোর্ মহিমালোই এবঅ সেক্কে তেয়ো সেই মানুচ্চো পৌইদ্যেনে লাজেব।

²⁷ মুই তমারে ঘেচ্চেক্‌গুরি কঙর্, ইয়েনত্ এমন কয়েক্কো আগন্ যিগুনো ইধু গোজেন রেজ্যগান্ দেগা ন-দেনা সং তারা কনমতে মুরি ন-যেবাক্।”

প্রভু যীশুর্ জোল্‌জোল্যে চেঙারা

²⁸ এই বেক্ কধানি কনার্ এক সাপ্তা পরেদি যীশু তবনা গুরিবাত্তে পিতর, যোহন আর যাকোবরে লোইনে এক্কো মুড়োত্ গেলঅ।

²⁹ তবনা গুরিবার্ অক্তত্ যীশুর মুয়ো চেঙারাগান্ বুদুলী গেলঅ আর তা কাবড়-চুগোড়ানি অমকদ ধুব্ ওই গেলঅ,

³⁰ অঢাদত্ দ্বিজন্ মান্‌জ্যরে তা লগে কধা কধে দেগা গেলঅ। সেই দ্বিজন্ অলাক্ মোশি আর এলিয়।

³¹ তারা মহিমার্ লগে দেগা দিলাক্। যিরূশালেমত্ যে মরণ মুজুঙোত্ যীশু আজির্ অবাত্তে যার্ তারা সে পৌইদ্যেনে কধাবাত্তা কদন্।

³² পিতর আর তা সমাজ্যেগুনে সে অক্তত্ অমকদ ঘুম্ যাদন্। তারা জাগি উদিনে যীশুর মহিমাগান্ দেগিলাক্ আর তা সমারে থিয়্যেইয়্যে সেই দ্বিজন্ মান্‌জ্যরেয়ো দেগিলাক্।

³³ সেই দ্বিজনে যেক্কে যীশু কায়কুরেত্তুন্ যাদন্ সেক্কে পিতর যীশুরে কলঅ, “প্রভু, গম্ ওইয়্যে, আমি ইয়েনত্ আগিই। আমি ইয়েনত্ তিনেন্ তাম্বুল-ঘর্ বানেই-এক্কান্ তর্, এক্কান্ মোশির আর এক্কান্ এলিয়ত্তে।” তে আজলে নয়ো বুঝে তে কি কোইয়্যে।

³⁴ পিতরে যেক্কে কধা কর্ সেক্কে এক্কান্ মেঘ এইনে তারারে ছাবালোই নাঢি ফেলেল। তারা সেই মেঘ ভিদিরে নাঢা পল্লে পরেদি শিচ্চ্যগুনে দোরেলাক্।

³⁵ সেই মেঘ্‌কানত্তুন্ এ কধাগান্ শুনো গেলঅ, “ইবেই মর্ পুয়ো যিবেরে মুই বেঈ লোইয়োং; তুমি ইবে কধা শুনো।”

³⁶ যেক্কে কধা থামেল সেক্কে দেগা গেলঅ যীশু গায় গায় আঘে। শিচ্চ্যগুনে যিয়েন্ দেখ্যন্ সে পৌইদ্যেনে সেই সময়োত্ কাররে কিচ্চু ন-কোইনে তারা জুরো গুরি রলাক্।

ভান্ন্যেই আত্মায় পেইয়্যে পুয়োবো গম্ অলঅ

³⁷ তার্‌কেল্যে যীশু আর সেই তিনজন শিচ্চ্য মুড়োত্তুন্ লামানার্ পরেদি সয়সাগোজ্যে মানুচ্ যীশু লগে দেগা গুরিবাত্তে এলাক্।

³⁸ সেক্কে ঝাগ ভিদিরেত্তুন্ এক্কো মানুচ্ রঅ ছাড়িনে যীশুরে কলঅ, “মাষ্টরবাবু, দোয়্যে গুরিনে মঅ পুয়োবোরে চাহ্। তে মর্ বানা এক্কোগুরি পুয়ো।

³⁹ তারে এক্কো ভান্ন্যেই আত্মায় ধোজ্যে আর তে আদিক্ক্যেগুরি রঅ ছাড়ি উদে। সেই আত্মাবো তারে যেক্কে মুযুরি ধরে সেক্কে তা মুয়োত্তুন্ ফেনা নিগিলে; সে পরেদি তে তারে অমকদ দুঘ্ দিইনে ঘা ঘা গুরিনে ইরি দে।

⁴⁰ মুই তঅ শিচ্চ্যগুনো ইধু কোজোলী গোজ্যং যেন তারা সেই আত্মাবোরে ধাবেই দুয়োন্, মাত্তর্ তারা ন-পারিলাক্।”

⁴¹ সেক্কে যীশু কলঅ, “অবিশ্বেজি আর পাজি মানুচ্চুন্! আর কয়দিন মুই তমা লগে থেইম্ আর তমারে সোজ্য গুরিম্? তঅ পুয়োবোরে ইধু আন্।”

⁴² পুয়োবো যেক্কে এজের্ সেক্কে সেই ভান্ন্যেই আত্মাবো তারে আছাড়্ মারিনে মুযুরি ধুরিলো। সেক্কে যীশু সেই ভান্ন্যেই আত্মাবোরে ধমক্ দিলো আর পুয়োবোরে গম্ গুরিনে তা বাব ইধু ফিরেই দিলো।

⁴³ গোজেনে যে কত্তমান্ দাঙর্ সিয়েন দেগিনে বেক্কুনে আমক্ অলাক্। যীশু যিয়েনি গোজ্যে সে পৌইদ্যেনে বেক্কুনে যেক্কে আমক্ ওইনে ভাবদন্ সেক্কে তে তা শিচ্চ্যগুনোরে কলঅ,

নানান্ বাবোত্যে উপদেজ্ আর যিরূশালেমত্ যানা

⁴⁴ “মুই কি কোইয়োং এ কধাগান্ ভুলি ন-যেইয়ো, মান্‌জ্য পুয়োবোরে খেমতাবলা মানুচ্চুনো আঢত্ ধুরি দিয়্যে অবঅ।”

⁴⁵ মাত্তর্ শিচ্চ্যগুনে সে কধাগান্ বুঝি ন-পারিলাক্। গোজেনে তারাত্তুন্ সিয়েনি গুমুরোত্ রাগেয়্যে যেন তারা বুঝি ন-পারন্। ইয়েন্দোই কনঅ কধা যীশুরে পুযোর্ গুরিবাত্তেয়ো শিচ্চ্যগুনে দোরেলাক্।

⁴⁶ শিচ্চ্যগুনো ভিদিরে কন্না বেগত্তুন্ দাঙর্ সে পৌইদ্যেনে তারা ভিদিরে তর্ক অর্।

⁴⁷ যীশু হবর্ পেদঅ তারা কি চিন্তে গরদন্, সেনত্যে এক্কো চিগোন্ গুড়োরে নেযেইনে তা কায়কুরে থিয়্যেই রাগেল।

⁴⁸ সে পরেদি তে তারারে কলঅ, “যে কেঅ মঅ নাঙে এ চিগোন্ চিজিবোরে ভালেদি জানায় তে মরে ভালেদি জানায়। যে মরে ভালেদি জানায়, যিবে মরে পাধেয়্যে তে তারেয়ো ভালেদি জানায়। তমা ভিদিরে বেগত্তুন্ যে চিগোন্, তেয়ই দাঙর্।”

⁴⁹ যোহনে কলঅ, “মাষ্টরবাবু, তঅ নাঙে আমি একজনরে ভান্ন্যেই আত্মা ধাবাদে দেখ্যেই। তে আমা দলর্ মানুচ্ নয় বিলি আমি তারে মানা গোজ্যেই।”

⁵⁰ যীশু তারে কলঅ, “আর মানা ন-গুরিচ্, কিয়া যে তমা বিপক্ষে ন-থায় তে দঅ তমা পক্ষে আঘে।”

⁵¹ যেক্কে যীশুর স্বর্গত্ যেবার্ অক্ত ওই এলঅ সেক্কে তে যিরূশালেমত্ যেবাত্তে মনান্ থির্ গুরিলো।

⁵² তে আগে ধুরি সিধু মানুচ্চুনোরে পাধেই দিলো। তারা যীশুত্তে বেক্ বেবস্থাগানি গুরিবাত্তে শমরিয়গুনোর এক্কান্ আদামত্ সোমেলাক্,

⁵³ মাত্তর্ যীশু যিরূশালেমত্ যার্ বিলি সে আদাম মানুচ্চুনে তারে মানি ন-ললাক্।

⁵⁴ সিয়েন্ দেগিনে তা শিচ্চ্য যাকোব আর যোহনে কলাক্, “প্রভু, তুই কি চাজ্ যে, এলিয় ধোক্ক্যেন্ আমি ইগুনোরে ভস্ত গুরিবাত্তে স্বর্গত্তুন্ আগুন লামি এবাত্তে কবং?”

⁵⁵ যীশু তারা ইন্দি ফিরিনে তারারে ধমক্ দিলো।

⁵⁶ সে পরেদি তারা অন্য আদামত্ গেলাক্।

⁵⁷ তারা পধেদি যাদন্ এমন সময় এক্কো মানুচ্ যীশুরে কলঅ, “তুই যিধু যেবে মুইয়ো তঅ লগে সিধু যেইম্।”

⁵⁸ যীশু তারে কলঅ, “শিয়েলর্ গাঢ্ আঘে আর পেগোর্ পেগোবা আঘে, মাত্তর্ মান্‌জ্য পুয়োবোর্ মাঢা থবার্ জাগা কনমিক্ক্যে নেই।”

⁵⁹ যেরেদি তে অন্য আর একজনরে কলঅ, “মঅ লগে যেই।” মাত্তর্ সে মানুচ্চো কলঅ, “মাষ্টরবাবু, আগে মঅ বাব্‌পোরে কবর্ দি এবাত্তে দে।”

⁶⁰ যীশু তারে কলঅ, “মরাগুনে তারার্ মরাগুনোরে কবর্ দেদোক্, মাত্তর্ তুই এইনে গোজেন রেজ্য পৌইদ্যেনে ফগদাং গর্।”

⁶¹ আর একজনে কলঅ, “মাষ্টরবাবু, মুই তঅ লগে যেইম্, মাত্তর্ আগে মঅ ঘরত্তুন্ মরে বিদেয় লোইনে এবাত্তে দে।”

⁶² যীশু তারে কলঅ, “নাঙলত্ আঢ্ বাজেইনে যে পিজেদি রিনি চায় তে গোজেন রেজ্যর্ যগাজ্যে নয়।”