লূকে লেখ্যে গম্ হবর্ 7 - Chakma Bible

সেনাপতি চাগর্‌বো গম্ অলঅ

¹ যীশু মানুচ্চুনো ইধু এই বেক্ কধানি কনা থুম্ গুরিনে কফরনাহূম শঅরত্ গেলঅ।

² সিধু এক্কো রোমীয় শত-সেনাপতির্ চাগর্ অসুগ্ ওইনে মরং মরং ওইয়্যে। এ চাগর্‌বোরে সেই সেনাপতিবো অমকদ কোচ্‌পেদ।

³ তে যীশু পৌইদ্যেনে শুনিনে যিহূদীগুনোর্ কয়েক্কো বুড়ো নেতারে যীশু ইধু কোজোলী গুরিবাত্তে দিপাধেল যেনে তে এইনে তা চাগর্‌বোরে গম্ গরে।

⁴ সেই নেতাগুনে যীশু ইধু এইনে তারে অমকদ কোজোলী গুরিনে কলাক্, “তুই যিবেত্তে এ কামান্ গুরিবে তে ইয়েনর্ যগাজ্যে,

⁵ কিয়া তে আমা মানুচ্চুনোরে কোচ্‌পায় আর আমা সমাজ-ঘরানি তেয়ই বানেই দিয়্যে।”

⁶ সেক্কে যীশু তারা সমারে গেলঅ। তে সেই ঘর কায়কুরে লুমোনার্ পরেদি সেই সেনাপতিবো তা সমাজ্যেগুনোরে দিইনে কোই পাধেল, “প্রভু, আর্ দুঘ্ ন-গুরিচ্, কিয়া তুই যে মঅ ঘরত্ সোমেবে সিয়েনর্ যগাজ্যে মুই নয়।

⁷ সেনত্তে তইধু যেবার্ যগাজ্যেয়ো মুই নিজোরে মনে ন-গরং। তুই বানা মুয়োদি কঅ, সেক্কে মঅ চাগর্‌বো গম্ ওই যেবঅ।

⁸ মুই এ কধাগান্ হবর্ পাং, কিয়া মত্তুন্অ অন্যর্ কধামজিম্ চলা পড়ে আর সৈন্যগুনেয়ো মঅ কধামজিম্ চলন্। মুই একজনরে ‘যাহ্’ কলে তে যায়, অন্যজনরে ‘আয়’ কলে তে এজে, আর মঅ চাগর্‌বোরে ‘ইয়েন গর্’ কলে তে সিয়েন্ গরে।”

⁹ এ কধাগান শুনিনে যীশু আমক্ অলঅ আর যিদুক্কুন্ মানুচ্ ভিড়্ গুরিনে তা পিজেদি এত্তন্ তারা ইন্দি ফিরিনে তে কলঅ, “মুই তমারে কঙর্, ইস্রায়েলীয়গুনো ভিদিরে এত্তমান্ বিশ্বেজ্‌বলা মুই কনদিন্অ ন-দেগং।”

¹⁰ সেনাপতিবো যিগুনোরে পাধেয়্যে তারা তা ঘরত্ ফিরি যেইনে সেই চাগর্‌বোরে গম্ দেগিলাক্।

প্রভু যীশু রানী মিলেবোর্ পুয়োবোরে জিংকানি দিলো

¹¹ ইয়েনর্ কিজু পরেদি যীশু নায়িন্ নাঙে এক্কান্ আদাম ইন্দি গেলঅ। তা শিচ্চ্যগুনে আহ্ আরঅ বোউত্ মানুচ্ তা সমারে সমারে গেলাক্।

¹² যেক্কে তে সেই আদাম গেদো ইধু লুমিলো সেক্কে মানুচ্চুনে এক্কো মরা মান্‌জ্যরে বারেদি নেযাদন্। যে মানুচ্চো মুরি যেইয়্যে তে এলদে তা মাবোর্ এক্কোগুরি পুয়ো, আর সেই মাবোয়ো রানী মিলে এলঅ। আদামর্ বোউত্ মানুচ্ সেই রানী মিলেবো সমারে এলাক্।

¹³ সেই রানী মিলেবোরে দেগিনে প্রভু চিত্ পুরিনে কলঅ, “আর ন-কানিচ্।”

¹⁴ সে পরেদি যীশু কায়কুরে যেইনে পালঙান্ ধুরিলো। সেক্কে যিগুনে মরাবো বুয়োই নেযাদন্ তারা থিয়্যেলাক্। যীশু কলঅ, “ও গাবুজ্যে, মুই তরে কঙর্, উঠ্।”

¹⁵ সেক্কে যে মুরি যেইয়্যে সে মানুচ্চো উদিনে বুজিলো আর কধা কুয়ো ধুরিলো। যীশু তারে তা মাবো ইধু ফিরেই দিলো।

¹⁶ ইয়েন্দোই বেক্কুনো মনত্ ভোক্তি আর দর্ লাগিলো। তারা গোজেনরে বাঈনী গুরিনে কুয়ো ধুরিলাক্, “আমা ইধু এক্কো দাঙর্ ভাববাদী আজির্ ওইয়্যে। গোজেনে দোয়্যে গুরিনে তা মানুচ্চুনো ইন্দি মনযোগ্ দিয়্যে।”

¹⁷ যীশু পৌইদ্যেনে এ কধাগান্ যিহূদিয়া রেজ্যত্ আর সিয়েনর্ চেরোকিত্তে বেক্ জাগানিত্ ছিদি পল্ল।

প্রভু যীশু ইধু যোহন শিচ্চ্যগুন্

^18-19 বাপ্তিস্মদিয়্যে যোহন শিচ্চ্যগুনে এই বেক্ ঘটনাগানি যোহনরে জানেলাক্। সেক্কে যোহনে তার্ দ্বিজন শিচ্চ্যরে ডাগিনে যীশু ইধু এ কধাগান্ পুযোর্ গুরিবাত্তে পাধেল, “যিবে এবার্ কধা আঘে তুই কি সিবে, না আমি অন্য কারত্তে বাজ্জেই থেবং?”

²⁰ সেই মানুচ্চুনে যীশু ইধু এইনে কলাক্, “বাপ্তিস্মদিয়্যে যোহনে তইধু আমারে পুযোর্ গুরিবাত্তে পাধেয়্যে, যিবে এবার্ কধা আঘে তুই কি সিবে, না আমি অন্য কারত্তে বাজ্জেই থেবং? ”

²¹ সেক্কে যীশু বোউত্ মান্‌জ্যরে পীড়েত্তুন্ আর অমকদ যন্ত্রণাত্তুন্ গম্ গুরিলো আর ভান্ন্যেই আত্মায় পেইয়্যে মানুচ্চুনোরে গম্ গুরিলো আর বোউত্ কান্ মান্‌জ্যরেয়ো দেগিবার্ খেমতা দিলো।

²² ইয়েনি বেক্কানি গুরিবার্ পরেদি যীশু যোহন শিচ্চ্যগুনোরে জোব্ দিলো, “তুমি যিয়েন্ দেগিলে আর শুনিলে সিয়েন্ যেইনে যোহনরে কঅ। তারে কঅ, কান্ মানুচ্চুনে দেগদন্, আঢুরুনে আঢদন্, ফারাঙিবলাগুনে সিজি অদন্, বহ্‌রা মানুচ্চুনে শুনোদন্, মরা মানুচ্চুনে জেই উদোদন্ আর নাঢা মানুচ্চুনো ইধু গম্ হবর্ ফগদাং গরা অর্।

²³ আর তেয়ই বর্‌পেইয়্যে, যে মরে নিইনে মনত্ কনঅ সন্দেহ ন-গরে।”

²⁴ যোহনে যিগুনোরে দিপাধেয়্যে সেই মানুচ্চুনে যানার্ পরেদি যীশু মানুচ্চুনো ইধু যোহন পৌইদ্যেনে কুয়ো ধুরিলো, “তুমি ধূল্যে-চর চাগালাত্ কি চেবাত্তে যেইয়ো? বোইয়্যেরত্ দুল্যে নল্-খাগড়া?

²⁵ সিয়েন ন-অলে কি চেবাত্তে যেইয়ো? দোল্ কাবড় পিন্যে এক্কো মান্‌জ্যরে নাহি? যিগুনে মংগা মংগা কাবড় পিনোন্ আর সয়সাগোজ্যেগুরি বজত্তি গরন্ তারা দঅ রাজ্‌ঘরত্ থান্।

²⁶ সিয়েন ন-অলে কি চেবাত্তে যেইয়ো? কনঅ ভাববাদীরে নাহি? অয়, মুই তমারে কঙর্, তে ভাববাদীত্তুন্অ বেশ্ দাঙর্।

²⁷ যোহনে সেই মানুচ্চো যিবে পৌইদ্যেনে পবিত্র বোইবোত্ লেগা আঘে, ‘চাহ্, মুই তঅ আগেদি মঅ হবর্ কোইয়্যেবোরে পাদাঙর্। তে তঅ আগেদি যেইনে তঅ পথ্‌তান্ যুক্কোল্ গুরিবো।’

²⁸ মুই তমারে কঙর্, মান্‌জ্য ভিদিরেত্তুন্ কনজনে যোহনত্তুন্ দাঙর্ নয়; মাত্তর্ গোজেন রেজ্য ভিদিরেত্তুন্ বেগত্তুন্ যে চিগোন্ তেয়ো যোহনত্তুন্ দাঙর্।”

²⁹ বেক্ সাধারন মানুচ্চুন্ আর খাজানা-তুলিয়্যেগুনে যোহন প্রচার্ শুন্ন্যন্ আর তাইধু বাপ্তিস্ম লোইনে গোজেনরে ন্যায়বলা বিলি হাম্ হেইয়োন্।

³⁰ মাত্তর্ ফরীশীগুন আর ধর্ম-মাষ্টরুনে যোহন ইধু বাপ্তিস্ম ন-লন্ বিলি নিজোত্তে গোজেন নাঙে তারা এলাফেলা গোজ্যন্।

³¹ যীশু আরঅ কলঅ, ইক্কিনে এই কাল মানুচ্চুনোরে মুই কা সমারে তুলনা গুরিম্? তারা কি চান্?

³² তারা এমন পুয়ো-ঝিগুনো ধোক্ক্যেন্ যিগুনে বাজারত্ বুয়োইনে একজন আরেকজনরে ডাগিনে কন্, আমি তমাত্তে মেলার্ বাজানা বাজেলং মাত্তর্ তুমি ন-নাজিলে; আমি আবিলেজর্ গীদ্ গেলং মাত্তর্ তুমি ন-কানিলা।

³³ বাপ্তিস্মদিয়্যে যোহনে এইনে রুটি বা আংগুর-রস ন-হেলঅ বিলি তুমি কত্তে, তারে অসিজি আত্মায় পেইয়্যে।

³⁴ আর মান্‌জ্যপুয়োবো এইনে হানা-দানা গোজ্যে বিলি তুমি কত্তে, চঅ, এ মানুচ্চো পেদুক্ আর মদখুর্, খাজানা তুলিয়্যে আর বজং মানুচ্চুনোর্ সমাজ্যে।

³⁵ মাত্তর্ জ্ঞান্দোই যিগুনে চলন্ তারার্ জিংকানিগানি প্রমাণ গরেদে যে, জ্ঞানান্ খাটি।

ফরীশী শিমোন ঘরত্ প্রভু যীশু

³⁶ এক্কো ফরীশী যীশুরে তা সমারে হেবাত্তে বাত্ত্যেল। সেক্কে যীশু তা ঘরত্ যেইনে হানাত্ মিজেল।

³⁷ সে আদামত্ এক্কো ভান্ন্যেই মিলে এলঅ। সেই ফরীশীবো ঘরত্ যীশু হানাত্ এচ্চ্যে হবর্ পেইনে তে এক্কান্ দুব্ পাত্তর কদরাত্ গুরি তুম্বাজ্ তেল্ আনিলো।

³⁸ পরেদি তে যীশু পিজেদি তা টেঙ কুরে যেইনে থিয়্যেল আর কানি কানি চোগো পানিয়ে তা টেঙান্ ভিজেল। সে পরেদি তে তার্ মাঢাবো চুলানিলোই তা টেঙান্ পুযি দিলো আর তা টেঙ উগুরে চুমিনে সেই আতরান্ ঢালি দিলো।

³⁹ যে ফরীশীবো যীশুরে বাত্ত্যেয়্যে তে ইয়েন্ দেগিনে মনে মনে কুয়ো ধুরিলো, “যুনি এ মানুচ্চো ভাববাদী অদঅ সালে হবর্ পেদঅ, কন্না আর কি বাবোত্যে মিলে তা টেঙানি ধরের্; মিলেবো দঅ বজং।”

⁴⁰ যীশু সেই ফরীশীবোরে কলঅ, “শিমোন, তরে মত্তুন্ কিজু কবার্ আঘে।” শিমোনে কলঅ, “গুরু, কঅ।”

⁴¹ যীশু কলঅ, “কনঅ এক্কো মাজন ইধু দ্বিজন মান্‌জ্যে টেঙা কজ্জ লদাক্। একজনে লোইয়্যে পাচশ দীনার্ আর অন্যজনে লোইয়্যে পঞ্চাশ দীনার্।

⁴² তারার্ কারত্তুন্ কজ্জ সুজিবার্ খেমতা ন-এলঅ বিলি তে দোয়্যে গুরি দিজনরে খেমা গুরিলো। সালে কধে চাং, তারা দ্বিজনত্তুন্ কন্না সেই মাজন্নোরে বেশ্ কোচ্‌পেবঅ?”

⁴³ শিমোনে কলঅ, “মর্ মনে অয়, যিবের্ বেশ্ কজ্জ খেমা গরা অলঅ সিবেই।” যীশু তারে কলঅ, “তুই ঠিগ্ কোইয়োচ্।”

⁴⁴ পরেদি যীশু সেই মিলেবো ইন্দি মুয়োন্ ফিরেইনে শিমোনরে কলঅ, “তুই এ মিলেবোরে দঅ দেগর্। মুই তঅ ঘরত্ এজানার্ পরেদি তুই মরে টেঙ্ ধবার্ পানি ন-দুয়োচ্, মাত্তর্ তে চোগো পানিয়ে মঅ টেঙানি ভিজেইনে তা চুলানিলোই পুযি দিয়্যে।

⁴⁵ তুই মরে ন-চুমোচ্, মাত্তর্ মুই ঘরত্ এযানার্ পরেত্তুন্ ধুরি তে মঅ টেঙানি চুমের্।

⁴⁶ তুই মঅ মাঢাবোত্ তেল্ ন-দুয়োচ্, মাত্তর্ তে মঅ টেঙ উগুরে আতর্ ঢালি দিয়্যে।

⁴⁷ সেনত্তে মুই তরে কঙর্, তে বেশ্ কোচ্‌পানা দেগেয়্যে বিলি বুঝো যাত্তে, তার্ পাপ বেশ্ অলেয়ো সিয়েনি খেমা গরা ওইয়্যে। যিবের্ থরা খেমা গরা অয় তে থরা কোচ্‌পানা দেগায়।”

⁴⁸ পরেদি যীশু সেই মিলেবোরে কলঅ, “তঅ পাপ্পানি খেমা গরা ওইয়্যে।”

⁴⁹ যিগুনে যীশু লগে হেবাত্তে বোচ্চ্যন্ তারা মনে মনে কুয়ো ধুরিলাক্, “ইবে কন্না, যে পাপ্অ খেমা গরে?”

⁵⁰ যীশু সেক্কে সেই মিলেবোরে কলঅ, “তুই বিশ্বেজ্ গোজ্যস্ বিলি পাপত্তুন্ উদ্ধোর্ পেইয়োচ্। সুগে-শান্দিয়্যে যাহ্।”