লূকে লেখ্যে গম্ হবর্ 5 - Chakma Bible

শিচ্চ্য অনা

¹ এক সময়োত্ যীশু গিনেষর সাগর পারত্ থিয়্যেই এলঅ। মানুচ্চুনে গোজেন কধা শুনিবাত্তে তা চেরোকিত্তে ঠেলাঠিলি গত্তন্।

² এমন্ সময়োত্ তে সাগর পারত্ দ্বিয়েন্ নঅ দেগিলো। জাল্যেগুনে সেই নঅ দ্বিয়েনত্তুন্ লামিনে তারা জালানি ধদন্।

³ সেক্কে যীশু শিমোন নঅগানত্ উদিলো আর তারে পারত্তুন্ এক্কেনা দূরোত্ নঅগান্ নেযেবাত্তে কলঅ। সে পরেদি তে নঅত্ বোইনে মানুচ্চুনোরে শিক্ষ্যে দিয়্যে ধুরিলো।

⁴ কধা থুম্ অনার্ পরেদি যীশু শিমোনরে কলঅ, “গভীন্ পানিত্ যেইনে মাছ ধুরিবাত্তে তমা জালান্ ফেলঅ।”

⁵ শিমোনে কলঅ, “গুরু, সারা রেত্তো অমকদ কাম্ গুরিনেয়ো কিচ্চু গুরি ন-পারিই; তুয়ো তঅ কধাত্তে মুই জালান্ ফেলেম্।”

⁶ জালান্ ফেলানার পরেদি সিয়েনত্ এদক্ মাছ পড়িলাক্ যে, তারা জালান্ ফাদি যাইদ্যে অক্ত অলঅ ।

⁷ সেক্কে তারা সাহায্যত্তে ইজিরেদি অন্য নঅ সমাজ্যেগুনোরে ডাগিলাক্। তারা এইনে দ্বিয়েন্ নঅত্ এদক্ মাছ বুয়োলাক্ যে, সিয়েনি ডুবেগোইদ্যে ধোক্ক্যেন্ অলঅ।

⁸ ইয়েন্ দেগিনে শিমোন-পিতরে যীশু মুজুঙোত্ মাঢা নিগিড়ি পুড়িনে কলাক্, “প্রভু, মুই পাপী; মত্তুন্ যাগোই।”

⁹ এদক্ মাছ ধরা পোজ্যন্ দেগিনে শিমোন-পিতরে আর তা সমাজ্যেগুন্ বেক্কুনে আমক্ অলাক্।

¹⁰ শিমোন বেবসার্ ভাগীদার্ যাকোব আর যোহন নাঙে সিবদিয়র্ দ্বিবে পুয়োও আমক্ অলাক্। সেক্কে যীশু শিমোনরে কলঅ, “ন-দোরেস্; ইক্কিনেত্তুন্ ধুরি তুই গোজেনত্তে মানুচ্ ধুরিবে।”

¹¹ সে পরেদি তারা নঅগানি পারত্ আনিলাক্ আর বেক্কানি থোইনে যীশু লগে গেলাক্।

দিজন্ পীড়েল্যে গম্ অলাক্

¹² যীশু একবার্ এক্কান্ আদামত্ গেলঅ। সিয়েনত্ এক্কো মান্‌জ্যর্ গোদা কিয়্যেনত্ ভান্ন্যেই ফারাঙি এলঅ। যীশুরে দেগিনে তে মাঢা নিগিরি পড়িনে কোজোলী গুরিনে কলঅ, “প্রভু, তুই আওজ্ গুরিলে মরে গম্ গুরি পারচ্।”

¹³ যীশু আঢ্ বাড়েইনে তারে ধুরিনে কলঅ, “মুই সিয়েনই চাং, তুই সিজি অ।” আর সেক্কেনে তে গম্ ওই গেলঅ।

¹⁴ যীশু তারে এ উগুমান্ দিলো, “এ কধাগান্ কাররে ন-কোচ্ বরং ধর্মগুরুগুনো ইদু যেইনে নিজোরে দেগা। সে পরেদি সিজি অনা পৌইদ্যেনে মোশি যিয়েনি উৎসর্ব গুরিবার্ উগুম্ দিয়্যে সিয়েনি উগুম্ গর্। সেক্কে মানুচ্চুনো ইদু প্রমাণ অবদে তুই গম্ ওই যেইয়োচ্।”

¹⁵ তুয়ো যীশুর হবর্ আরঅ ছিদি পল্ল। তা কধাগান শুনিবাত্তে আর পীড়েত্তুন্ গম্ অবাত্তে বোউত্ মানুচ্ তাইদু এজা ধুরিলাক্।

¹⁶ যীশু পেরায় মানুচ্ জন নেইয়্যে জাগাত্ যেইনে তবনা গুরিদো।

¹⁷ একদিন্ন্যে যীশু যেক্কে শিক্ষ্যে দের্ সেক্কে ফরীশীগুনে আর ধর্ম-মাষ্টরুনে সিয়েনত্ বুয়োই এলাক্। গালীল রেজ্যর্ নানান্ আদামত্ আর যিহূদিয়া রেজ্যত্ আহ্ যিরূশালেম শঅরত্তুন্ ইগুনে এচ্চ্যন্। পীড়েল্যেগুনোরে গম্ গুরিবাত্তে প্রভুর খেমতাগান্ যীশু ভিদিরে এলঅ।

¹⁸ সেক্কে কয়েক্কো মানুচ্ এক্কো বেসৎ-পীড়েল্যেরে খাদত্ গুরি বুয়োই আনিলাক্। তারা তারে ভিদিরে নেযেইনে যীশু মুজুঙোত্ থবার্ চেষ্টা গুরিলাক্,

¹⁹ মাত্তর্ ভিড়োত্তে ভিদিরে যেবার্ পথ ন-পেলাক্। সেক্কে তারা ছালত্ উদিলাক্ আর ছাল টালিগান্ সোরেইনে বিচ্ছোনান্ সুদ্ধো তারে মানুচ্চুনো সংমোধ্যে যীশু মুজুঙোত্ লামেই দিলাক্।

²⁰ যীশু তারার্ বিশ্বেজ্‌চান দেগিনে কলঅ, “দাংগু, তঅ পাব্‌পান খেমা গরা অলঅ।”

²¹ ইয়েন্দোই ধর্ম-মাষ্টর আর ফরীশীগুনে মনে মনে কুয়ো ধুরিলাক্, “এ মানুচ্চো কন্না, যে গোজেনরে অগমান্ গরের্? গোজেনে বাদে আর কন্না পাপ খেমা গুরি পারে?”

²² তারা মনে মনে কি চিন্তে গত্তন্ যীশু সিয়েন্ বুঝি পারিনে কলঅ, “তুমি মনে মনে কিত্তে সে কধাগান্ ভাবর্?

²³ কুবোন্ কনা সহজ, ‘তঅ পাপ্পান্ খেমা গরা অলঅ,’ না ‘তুই উদিনে আঢি বেড়া ’?

²⁴ মাত্তর্ তুমি যেন কোই পারঅ পিত্‌‍থিমীত্ পাপ খেমা গুরিবার খেমতা মান্‌জ্য পুয়োবোর্ আগে”-ইয়েন সং কোইনে তে সেই বেসৎ পীড়েল্যেবোরে কলঅ, “মুই তরে কঙর্, উঠ্, তঅ বিচ্ছোনান্ তুলিনে ঘরত্ যাহ্।”

²⁵ সে মানুচ্চো সেক্কেনে বেক্কুনো মুজুঙোত্ উদিনে ঠিয়েল আর যে বিচ্ছোনান্ উগুরে তে পোজ্যে এলঅ সিয়েন তুলিনে গোজেনরে বাঈনী গত্তে গত্তে ঘরত্ গেলঅ।

²⁶ সেক্কে বেক্কুনে অমকদ আমক্ অলাক্ আর ভোক্তিবলা দরে গোজেনরে বাঈনী গুরিনে কলাক্, “এইচ্চ্চ্যে আমি কি আমক্ অইদ্যে বেপার দেগিলোং!”

প্রভু যীশু লেবিরে ডাগিলো

²⁷ ইয়েনর্ পরেদি যীশু বারেদি গেলঅ আর খাজানা আদায় গরেদে ঘরত্ লেবি নাঙে এক্কো খাজানা তুলিয়্যেরে বুয়োই থাগদে দেগিলো। যীশু লেবিরে কলঅ, “আয়, মঅ শিচ্চ্য অগি।”

²⁸ সেক্কে লেবি উদিলো আর তার্ বেক্কানি ফেলেইনে যীশু সমারে গেলঅ।

²⁹ পরেদি লেবি যীশুত্তে তা ঘরত্ এক্কো দাঙর্ হানা দিলো। তারা সমারে বোউত্ খাজানা-তুলিয়্যে আর অন্য মানুচ্চুনে হেবাত্তে বুজিলাক্।

³⁰ সেক্কে ফরীশীগুনে আর তারা দলর্ ধর্ম-মাষ্টরুনে বিরক্ত ওইনে যীশু শিচ্চ্যগুনোরে কলাক্, “তুমি খাজানা তুলিয়্যে আর ভান্ন্যেই মানুচ্চুনো সমারে হানা-দানা গরঅ কিত্তে?”

³¹ যীশু তারারে কলঅ, “গম্ মানুচ্চুনোত্তে ডাক্তারর্ দরকার্ নেই বরং পীড়েল্যেগুনোত্তেই দরকার্ আগে।

³² পাপত্তুন্ মনানি ফিরেবাত্তে মুই ধার্মিক্কুনোরে ডাগিবাত্তে ন-এজং বরং পাপীগুনোরে ডাগিবাত্তে এচ্চ্যং।”

উবোস্ থানা পৌইদ্যেনে শিক্ষ্যে

³³ যেরেদি সেই ধর্ম-নেতাগুনে যীশুরে কলাক্, “যোহন শিচ্চ্যগুনে প্রায় উবোস্ আহ্ তবনা গরন্ আর ফরীশীগুনোর শিচ্চ্যগুনেয়ো সিয়েন গরন্, মাত্তর্ তঅ শিচ্চ্যগুনে কনদিন্অ হানা-দানা বাদ্ ন-দুয়োন।”

³⁴ যীশু তারারে কলঅ, “জামেই সমারে থাগদে কি জামেয় সমারে মানুচ্চুনোর্ উবোস্ থা পরে?

³⁵ মাত্তর্ এমন সময় এবঅ যেক্কে তারাত্তুন্ জামেয়রে নেযা অবঅ, আর সেই অক্তত্ তারা উবোস্ থেবাক্।”

³⁶ সে পরেদি যীশু শিক্ষ্যে দিবাত্তে তারা ইদু এ উপমাগান্ দিলো: “নুয়ো সিলুমো কট্টা ফাদিনে কেঅ পুরোণ্ সিলুমোত্ তালি ন-দুয়োন, কিয়া সিয়েন গুরিলে সেই নুয়ো সিলুম্মো দঅ তে ফাদি ফেলেব; আর সেই নুয়ো কট্টাগান্অ পুরোণ্ সিলুমো লগে ন-মানায়।

³⁷ তাজা আংগুর-রস কেঅ পুরোণ্ চাম থৈল্যেত্ ন-থন্, থলে তাজা রসে থৈল্যেগুন্ ফাদি যান্। সেক্কে রস্অ পড়ে, থৈল্যেগুনো বর্‌বাত্ যায়।

³⁸ তাজা আংগুর-রস নুয়ো চাম থৈল্যেত্ থনা উচিত।

³⁹ পুরোণ্ আংগুর-রস্ হানার্ পরেদি কেঅ তাজা আংগুর-রস্ হেবাত্তে ন-চায়, কিয়া তে কয়, ‘পুরোণান্ গম্।’ ”