লূকে লেখ্যে গম্ হবর্ 3 - Chakma Bible

বাপ্তিষ্মদিয়্যে যোহনর প্রচার

¹ রোম-সম্রাট তিবিরিয় কৈসরর্ রাজাগিরির্ পনর বজরত্ যিহূদিয়া রেজ্যর্ আজল্ শাসনগুরিয়্যে এলদে পন্তীয় পীলাত। সেক্কে হেরোদে গালীল রেজ্যত্ আর তা ভেই ফিলিপে যিতূরিয়া রেজ্যত্ আর ত্রাখোনীতিয়াত্ শাসন গুরিদাক্। লুষানিয়া এলদে অবিলীনীর শাসনগুরিয়্যে,

² হানন আহ্ কাইয়াফা এলাক্ যিহূদীগুনোর দাঙর্ ধর্মগুরু। ঠিগ্ এ সময়োত্ গোজেনে ধূল্যেচর-চাগালাত্ সখরিয়র পুয়ো যোহন ইধু তা কধাগান্ ফগদাং গুরিলো ।

³ সেক্কে যোহনে যর্দন গাঙর্ চেরোকিত্তে বেক্ জাগানিত্ যেইনে ফগদাং গরা ধুরিলো যেন মান্‌জ্যে পাপর্ খেমা পেবাত্তে পাপত্তুন্ মনানি ফিরেন্ আর সিয়েনর চিহ্নো ইজেবে বাপ্তিষ্ম লন্।

⁴ ভাববাদী যীশাইয় বোইয়োত্ যিয়েনি লেগা আঘে ঠিগ্ সেবাবোত্যেগুরি ইয়েনি বেক্কানি অলঅ। লেঘা আঘে, “ধূল্যেচর-চাগালাত্ একজনে রঅ ছাড়িনে কত্তে, ‘তুমি প্রভুর্ পথ্‌তান ঠিগ্ গরঅ, তা পথ্‌তান্ উজু গরঅ।

⁵ বেক্ কলগ্‌কানি ভরা অবঅ, মুড়ো-মুড়ি সং গরা অবঅ। বেঙাতেরা পথ্‌তানি উজু গরা অবঅ, সংনেইয়্যে পথ্‌‌তানি সং গরা অবঅ।

⁶ মান্‌জ্যরে পাপত্তুন্ উদ্ধোর্ গুরিবাত্তে গোজেনে যিয়েনি গোজ্যে, বেক্ মানুচ্চুনে সিয়েনি দেগিবাক্।’ ”

⁷ সেক্কে বাপ্তিষ্ম লবাত্তে বোউত্ মানুচ্ যোহন ইধু এজা ধুরিলাক্। যোহনে তারারে কলঅ, “সাপ গুট্টিগুন! গোজেনর্ যে সাজাগান্ লামি এজের্ সিয়েনত্তুন্ ধেই যেবার্ এ বুদ্ধিগান্ তমারে কন্না দিলো?

⁸ তুমি যে পাপত্তুন্ মনানি ফিরেয়ো সিয়েনির্ যগাজ্যে ফল্ তমা জিংকানিত্ দেগঅ। নিজে মনে ন-গোজ্য যে, তুমি অব্রাহাম গুট্টির্ মানুচ্। মুই তমারে কঙর্, এ পাত্তরুনোত্তুন্ গোজেনে অব্রাহামর গুট্টি বানেই পারে।

⁹ গাজ গড়াত্ কুড়োল্ বাজেয়্যে আঘে। যে গাজত্ গম্ ফল ন-ধরে সিবে কাবিনে আগুনোত্ ফেলে দিয়্যে অবঅ ।”

¹⁰ সেক্কে মানুচ্চুনে যোহনরে পুযোর্ গরা ধুরিলাক্, “সালে আমি কি গুরিবোং?”

¹¹ যোহনে তারারে কলঅ, “যুনি কারর্ দ্বিবে সিলুম্ থায় সালে যার্ সিলুম্ নেই তে তারে এক্কো দোক্। যার্ হানা আঘে তেয়ো সেবাবোত্যে গোরোক্।”

¹² কয়েক্কো খাজানা তুলিয়্যে বাপ্তিষ্ম লবাত্তে এইনে যোহনরে কলাক্, “মাষ্টর্‌বাবু, আমি কি গুরিবোং?”

¹³ যীশু তারারে কলঅ, “আইনোত্ যিয়েন্ আঘে সিত্তুন্ বেশ্ আদায় ন-গোজ্য।”

¹⁴ কয়েক্কো সৈন্যয়ো তারে পুযোর্ গুরিলাক্, “আর আমি কি গুরিবোং?” যীশু সেই সৈন্যগুনোরে কলঅ, “জুলুম্ গুরিনে বা অন্যেয়গুরি দুষ্ দেগেইনে কারত্তুন্ কিচ্চু আদায় ন-গোজ্য আর তমা বেতনুন্দোই হুজি থাগঅ।”

¹⁵ মানুচ্চুনে খুব্ আজা গুরিনে মনে মনে ভাবদন্ অয়ত বা যোহনে মশীহ।

¹⁶ এমন্ সময়োত্ যোহনে তারারে বেক্কুনোরে কলঅ, “মুই তমারে পানিত্ বাপ্তিষ্ম দুয়োঙর্, মাত্তর্ যিবে মত্তুন্ বেশ্ খেমতাবলা তে এজের্। মুই তার্ জদার্ ফিতেগানি খুলিবার্‌অ যগাজ্যে নয়। তে পবিত্র আত্মা আর আগুনোত্ তমারে বাপ্তিষ্ম দিবো।

¹⁷ কুলোগান্ তা আঢত্ আঘে আর তার খেত্-খেত্তিগানি মাড়িবার জাগা তে গমে ডালে সাব্ গুরিবো। তে শোজ্যগানি গোলাঘরত্ থুবেব, মাত্তর্ যে আগুনান্ কনদিন্অ ন-মরে সে আগুনোত্ তুষ পুড়ি ফেলেব।”

¹⁸ যোহনে আরঅ ভালোক্কানি উপদেজ্ দিইনে মানুচ্চুনো মনত্ উচ্চোমি তুলি দিইনে গোজেনর্ দিয়্যে গম্ হবর্ ফগদাং গুরিলো ।

¹⁹ শাসনগুরিয়্যে হেরোদর্ ভেইয়ো মোগ্‌কো হেরোদিয়ার লগে হেরোদর্ মিলেনার্ কারনে আর তার্ ভালোক্কানি ভান্ন্যেই কামর্ কারনে যোহনে তা দুষ্‌চানি দেগেই দিয়্যে।

²⁰ সেনত্যে তে যোহনরে বন্দী গুরিনে জেলোত্ দিলো। ইয়েন্দোই তার্ অন্য বেক্ ভান্ন্যেই কামানি সমারে এই বজং কামান্অ মিজেল।

প্রভু যীশুর বাপ্তিষ্ম

²¹ যিদুক্কুন্ মানুচ্ যোহন ইধু এচ্চ্যন্ তারা বাপ্তিষ্ম লবার্ অক্তত্ যীশুয়ো বাপ্তিষ্ম ললঅ। বাপ্তিষ্মর্ পরেদি যীশু যেক্কে তবনা গরের্ সেক্কে আগাচ্চান্ খুলি গেলঅ।

²² সে অক্তত্ পবিত্র আত্মা কোদোর ধোক্ক্যেন্ গুরি তা উগুরে লামি এলঅ, আর স্বর্গত্তুন্ এ কধাগান শুনো গেলঅ, “তুয়ই মর্ কোচ্‌পানার্ পুয়ো, তঅ উগুরে মুই অমকদ হুজি।”

প্রভু যীশুর বংশর্-নাঙানি

²³ প্রায় ত্রিশ বজর্ বয়জত্ যীশু তা কামানি আরাম্ভ গুরিলো। মান্‌জ্যে মনে গুরিদাক্ তে যোষেফর্ পুয়ো। যোষেফে এলির পুয়ো;

²⁴ এলি মত্ততের পুয়ো, মত্তত লেবির পুয়ো, লেবি মল্কির পুয়ো, মল্কি যান্নায়র পুয়ো, যান্নায় যোষেফ পুয়ো;

²⁵ যোষেফ মত্তিথিয়র পুয়ো, মত্তিথিয় আমোসর পুয়ো, আমোস নহূমর পুয়ো, নহূমে ইষ্‌‌লির পুয়ো, ইষ্‌লি নগির পুয়ো;

²⁶ নগি মাটের পুয়ো, মাট মত্তথিয় পুয়ো, মত্তথিয় শিমিয়ির পুয়ো, শিমিয়ি যোষেখের পুয়ো, যোষেখ যূদার পুয়ো;

²⁷ যূদা যোহানার পুয়ো, যোহানা রীষার পুয়ো, রীষা সরুব্বাবিল পুয়ো, সরুব্বাবিল শল্টীয়েলর পুয়ো, শল্টীয়েল নেরির পুয়ো;

²⁸ নেরি মল্কির পুয়ো, মল্কি অদ্দীর পুয়ো, অদ্দী কোষমর পুয়ো, কোষম ইল্‌মাদমর পুয়ো, ইল্‌মাদম এরের পুয়ো;

²⁹ এর যীশুর পুয়ো, যীশু ইলীয়েষর পুয়ো, ইলীয়েষর যোরীম পুয়ো, যোরীম মত্ততের পুয়ো, মত্তত লেবির পুয়ো;

³⁰ লেবি শিমিয়োনর পুয়ো, শিমিয়োন যূদার পুয়ো, যূদা যোষেফর পুয়ো, যোষেফ যোনমর পুয়ো, যোনম ইলিয়াকীমর পুয়ো;

³¹ ইলিয়াকীম মিলেয়ার পুয়ো, মিলেয়া মিন্নার পুয়ো, মিন্না মত্তথের পুয়ো, মত্তথ নাথনর পুয়ো, নাথন দায়ূদোর পুয়ো;

³² দায়ূদ যিশয়র পুয়ো, যিশয় ওবেদ পুয়ো, ওবেদ বোয়স পুয়ো, বোয়স সল্‌মোন পুয়ো, সল্‌‌মোন নহশোনর পুয়ো;

³³ নহশোন অম্মীনাদবর পুয়ো, অম্মীনাদব অদমান পুয়ো, অদমান অর্ণির পুয়ো, অর্ণি হিষ্রোণর পুয়ো, হিষ্রোণ পেরসর পুয়ো, পেরস যিহূদার পুয়ো;

³⁴ যিহূদা যাকোব পুয়ো, যাকোব ইস্‌হাক পুয়ো, ইস্‌হাক অব্রাহামর পুয়ো, অব্রাহাম তেরহর পুয়ো, তেরহ নাহোর পুয়ো;

³⁵ নাহোর সরূগ পুয়ো, সরূগ রুয়ুর পুয়ো, রিয়ু পেলগ পুয়ো, পেলগ এবর পুয়ো, এবর শেলহ পুয়ো;

³⁶ শেলহ কৈনন পুয়ো, কৈনন অর্ফক্‌ষদ পুয়ো, অর্ফক্‌‌ষদ শেমর পুয়ো, শেম নোহর পুয়ো, নোহ লেমক পুয়ো;

³⁷ লেমক মথূশেলহ পুয়ো, মথূশেলহ হনোক পুয়ো, হনোক যেরদ পুয়ো, যেরদ মহললেল পুয়ো, মহললেল কৈনন পুয়ো;

³⁸ কৈনন ইনোশর পুয়ো, ইনোশ শেথ পুয়ো, শেথ আদম পুয়ো, আদমে গোজেনর পুয়ো।