লূকে লেখ্যে গম্ হবর্ 24 - Chakma Bible

মরণ উগুরে জিদেনা

¹ সাপ্তার্ পত্তম দিনোর্ বেন্ন্যে মাদান্ সেই মিলেগুনে সে তুম্বাজ্‌ মজলাগান্দোই গোরান ইধু গেলাক্।

² তারা দেগিলাক্ গোরান মুয়োনত্তুন্ পাত্তর্‌‌‌বো সোরেইনে থুয়ো ওইয়্যে,

³ মাত্তর্ গোরান ভিদিরে যেইনে তারা প্রভু যীশুর্ মরা কিয়্যেগান্ ন-দেগিলাক্।

⁴ যেক্কে তারা আমক্ ওইনে সে পৌইদ্যেনে ভাবদন্ সেক্কে দেবা ঝিমিলেনি ধোক্ক্যেন্ জ্বোল্‌‌জোল্ল্যে কাবড় উজ্যে দ্বিজন্ মানুচ্‌ তারা কায় কুরে এইনে থিয়্যেলাক্।

⁵ সেক্কে মিলেগুনে অমকদ দোরেইনে মাঢা নিগিরিলাক্। সে মানুচ্চো তারারে কলঅ, “যিবে জেদা তারে মরাগুনো ভিদিরে কিত্ত্যে তগর্?

⁶ তে দঅ ইয়েনত্ নেই; তে জেদা ওই উঠ্যে। তে যেক্কে গালীলোত্ এলঅ সেক্কে তে তমা ইধু যিয়েনি কোইয়্যে সিয়েনি ইদোত্ তুলি চঅ।

⁷ তে কোইয়্যেদে, মান্‌জ্য পুয়োবোরে পাপী মানুচ্চুনো আঢত্ ধুরি দিয়্যে অবঅ। সে পরেদি তারে ক্রুশোত্ দিয়্যে অবঅ আর তিন দিনোত্ তাত্তুন্ আরঅ জেদা ওই উদো পুরিবো।”

⁸ সেক্কে তারাত্তুন্ সে কধাগান মনত্ পুরিলো।

⁹ তারা গোরত্তুন্ ফিরি যেইনে সেই এগারজন শিচ্চ্য আর অন্য বেক্কুনোরে এ বেক্‌ কধাগানি জানেলাক্।

¹⁰ সেই মিলেগুনো ভিদিরে এলাক্ মগ্‌দলীনী মরিয়মে, যোহানা আর যাকোবর্ মা মরিয়ম। তারা সমারে আর অন্য যে মিলেগুন এলাক্ তারায়ো এ বেক্‌ কধানি প্রচারগ্‌‍কুনো ইধু কলাক্।

¹¹ মাত্তর্ সেই বেক্‌ কধানি তারা ইধু বাজে কধা ধোক্ক্যেন্ মনে অলঅ। সেনত্তে সেই মিলেগুনো কধা তারা বিশ্বেজ্ ন-গুরিলাক্।

¹² মাত্তর্ পিতরে উদিনে ধাবা গোর ইধু গেলঅ আর মাঢা নিগিরিনে বানা কাবরানি দেগিলো। যিয়েনি ঘোট্যে সিয়েনি আমক্ ওইনে তে ফিরি এলঅ।

ইম্মায়ূ আদামর পধত্

¹³ সেদিন্ন্যে দ্বিজন শিচ্চ্য ইম্মায়ূ নাঙে এক্কান্ আদামত যাদন্। আদামান্ যিরূশালেমত্তুন্ পেরায় সাত মেইল্ দূরোত্ এলঅ ।

¹⁴ যিয়েন ঘোট্যে সিয়েন্দোই তারা কধাবাত্তা কদন্।

¹⁵ সে সময়োত্ যীশু নিজে সিয়েনত্ আঝির্ ওইনে তারা সমারে আঢানা আরাম্ভ গুরিলো।

¹⁶ তারা চোগ্‌কুন যেন নাঢা যেইয়োন্, সেনত্তে তারা যীশুরে চিনি ন-পারিলাক্।

¹⁷ সেক্কে যীশু তারারে কলঅ, “তুমি কি কধা কোই কোই যর্?” সেই দ্বিজন্ শিচ্চ্য শুগুনো মু গুরি থিয়্যেই রলাক্।

¹⁸ সেক্কে ক্লিয়পা নাঙে তারাত্তুন্ একজনে যীশুরে পুযোর্ গুরিলো, “তুই কি যিরূশালেমর্ বানা এক্কো গুরি মানুচ্‌ যিবে কোই ন-পারে এ কয়েকদিনে সিধু কি কি ঘোট্যে?”

¹⁹ যীশু তারারে কলঅ, “কি কি ঘোট্যে?” তারা কলাক্, “নাসরত্ আদামর্ যীশুরে নিইনে যিয়েনি যিয়েনি ঘোট্যে। তে ভাববাদী এলঅ। তে কামে আর কধায় গোজেনর্ আর বেক্‌ মানুচ্চুনো চোগোত্ খেমতাবলা এলঅ।

²⁰ আমা আঝল্ ধর্মগুরুগুনে আর ধর্ম-নেতাগুনে তারে রোমীয়গুনো আঢত্ ধুরি দুয়োন্ যাতে তারা তা বিচের্ গুরিনে তারে মরণর্ সাজা দুয়োন্। পরেদি সে যিহূদী নেতাগুনে তারে ক্রুশোত্ দুয়োন্।

²¹ আমি আজা গোজ্যেই তেয়ই ইস্রায়েল জাদরে উদ্ধোর্ গুরিবো। বানা সিয়েন নয়, এচ্চ্যে তিন দিন অলঅ ইয়েনি ঘোট্যে।

²² আরঅ আমা দলর্ কয়েক্কো মিলে আমারে আমক্ বানেয়োন। তারা বেন্যেপোত্যে যীশুর্ কবরত্ গেলাক্,

²³ মাত্তর্ সিয়েনত্ তা কিয়্যেগান্ ন-দেগিলাক্। তারা ফিরি এইনে কলাক্, তারা স্বর্গদূত্তুনোর্ দেগা পেয়োন্ আর সেই স্বর্গদূত্তুনে তারারে কোইয়োন, যীশু বাঁজি আঘে।

²⁴ সেক্কে আমা সমারে যিগুনে এলাক্ তারাত্তুন্ কয়েকজনে কবরত্ যেইনে মিলেগুনে যেবাবোত্যেগুরি কোইয়োন ঠিগ্ সেবাবোত্যেগুরি দেগিলাক্, মাত্তর্ যীশুরে ন-দেগিলাক্।”

²⁵ সেক্কে যীশু তারারে কলঅ, “তুমি কিচ্চু ন-বুঝো। তমা মনানি এমন্ বাজে যে, ভাববাদীগুনে যিয়েন কোইয়োন সিয়েন তুমি বিশ্বেজ্ ন-গরঅ।

²⁶ এ দুঘ্ ভুগ্ গুরিনে কি মশীহর্ মহিমা লাভ গুরিবার্ কধা ন-এলঅ?”

²⁷ ইয়েন পরেদি তে মোশির আর বেক্‌ ভাববাদীগুনোর্ লেগাত্তুন্ আরাম্ব গুরিনে গোদা পবিত্র বোইবো ভিদিরে তা নিজো পৌইদ্যেনে যিয়েনি যিয়েনি লেগা আঘে সিয়েনি বেক্কানি তারারে বুঝেই কলঅ।

²⁸ তারা যে আদমত্ যাদন্ সেই আদাম কায় লুমিলে পরেদি যীশু আরঅ দূরোত্ যেবার্ ভাব্ দেগেল।

²⁹ সেক্কে তারা ভারী কোজোলী গুরিনে তারে কলাক্, “ইক্কে বেলান্ যেইয়্যে, সাজোন্যে ওইয়্যে। তুই আমা সমারে থাগ্।” ইয়েন্দোই তে তারা সমারে থেবাত্তে ঘরত্ সোমেল।

³⁰ যেক্কে তে তারা সমারে হেবাত্যে বুজিলো সেক্কে রুটি লোইনে গোজেনরে ভালেদি জানেল আর সিয়েন্ কট্টা গুরিনে তারারে দিলো।

³¹ সেক্কে তারার্ চোগ্‌কুন খুলি গেলাক্; তারা যীশুরে চিনিলাক্, মাত্তর্ সিয়েনর্ লগে লগে তারে আর দেগা ন-গেলঅ।

³² সেক্কে তারা একজন আরেক জনরে কলাক্, “পধত্ যেক্কে তে আমা সমারে কধা কর্ আর পবিত্র বোইবো বুঝেই দের্ সেক্কে আমা মনান্ কি জুলি জুলি ন-উদের্?”

³³ সেক্কে সে দ্বিজনে উদিনে যিরূশালেমত্ গেলাক্ আর সেই এগারজন শিচ্চ্য আহ্ তারা সমারে অন্যগুনোরেয়ো এক জাগাত্ দেগিলাক্।

³⁴ প্রভু যে ঘেচ্চ্যেক্‌গুরি জেদা ওই উঠ্যে আর শিমোনরে দেগা দিয়্যে সিয়েনিলোই তারা কধাবাত্তা কোইয়োন।

³⁵ সে দ্বিজন্ শিচ্চ্য পধত্ যিয়েনি ওইয়্যে সিয়েনি তারারে জানেলাক্। তারা আরঅ জানেলাক্, তে যেক্কে রুটি কট্টা কট্টা গরের্ সেক্কে কিবাবোত্যেগুরি তারা তারে চিনি পাজ্জ্যন্।

প্রভু যীশু শিচ্চ্যগুনোরে দেগা দিলো

³⁶ সেই শিচ্চ্যগুনে যেক্কে এ কধাগান্ কদন্ সেক্কে যীশু নিজে তারা ইধু এইনে থিয়্যেইনে তারারে বেক্কুনোরে কলঅ, “তমার্ শান্তি ওক্।”

³⁷ তারা ভূত দেক্ক্যন্ ভাবিনে অমকদ দোরেলাক্।

³⁸ যীশু তারারে কলঅ, “কিত্ত্যে তুমি থির্ নেইয়্যে অর্ আর কিত্ত্যে বা তমা মনত্ সন্দেহ জাগের্?

³⁹ মঅ আঢ্‌তানি আর ঠেঙানি চঅ। চঅ, ইবে মুই । মরে ধুরি চঅ, কিয়া ভুদোর্ দঅ মঅ ধোক্ক্যেন্ আড়্-য়েরা নেই।”

⁴⁰ এ কধাগান্ কোইনে যীশু তা আঢ্‌তানি আর ঠেঙানি তারারে দেগেল।

⁴¹ মাত্তর্ তারা এদক্ আমক্ আর হুজী ওইয়োন্ যে, বিশ্বেজ্ গুরি ন-পাত্তন্। সেক্কে যীশু তারারে কলঅ, “তমা ইধু কি কনঅ হেবার্ জিনিস আঘে?”

⁴² তারা যীশুরে এক কট্টা ভাজা মাছ দিলাক্।

⁴³ তে সিবে লোইনে তারা মুজুঙোত্ হেলঅ।

⁴⁴ সিয়েন পরেদি তে তারারে কলঅ, “মুই যেক্কে তমা সমারে এলুং সেক্কে কোইয়োং, মোশির আইন-কানুনোত্, ভাববাদীগুনোর লেগাত্ আর গীতসংহিতা ভিদিরে মঅ পৌইদ্যেনে যে যে কধানি লেগা আঘে সিয়েনি বেক্কানি পূরোণ্ উয়ো পুরিবো।”

^45-46 পবিত্র বোইবো বুঝিবাত্যে তে শিচ্চ্যগুনোরে বুদ্ধি খুলি দিলো আর তারারে কলঅ, “লেগা আঘে, মশীহত্তুন্ দুঘ্ পাহ্ পুরিবো আর তিন দিনোর্ দিন্নোত্ মরণত্তুন্ জেদা ওই উদো পুরিবো।

⁴⁷ আরঅ লেগা আঘে, যিরূশালেমত্তুন্ ধুরি আরাম্ভ গুরিনে বেক্ জাদ্‌তুনো ইধু মশীহ নাঙে এ হবরান্ প্রচার গরা অবঅ, পাপত্তুন্ মন ফিরেলে পাপর্ ক্ষেমা পাহ্ যায়।

⁴⁸ তুমিই এ বেক্ বেপারানির্ সাক্ষী।

⁴⁹ চঅ, মঅ বাপ্পো যিয়েনি দিবার্ এগেম্ গোজ্যে সিয়েনি মুই তমা ইধু পাধেই দিম্। স্বর্গত্তুন্ খেমতা ন-পানা সং তুমি এই শঅরত্ থাক্ক্য।”

প্রভু যীশু স্বর্গত্ গেলঅ

⁵⁰ পরেদি যীশু তা শিচ্চ্যগুনোরে লোইনে বৈথনিয়া সং গেলঅ। সিয়েনত্ তে আঢ্ তুলিনে তারারে বর্ দিলো।

⁵¹ বর্ দেদে দেদে তে তারারে ফেলেই গেলঅ আর তারে স্বর্গত্ তুলি নেযা অলঅ।

⁵² সেক্কে তারা মাঢা নিগিরি সালাম্ গুরিনে তারে গোজেনর্ সর্মান দিলাক্ আর ভারী হুজী ওইনে যিরূশালেমত্ ফিরি গেলাক্।

⁵³ তারা নিত্য উবোসনা-ঘরত্ আঝির্ থেইনে গোজেনরে বাঈনী গরা ধুরিলাক্।