লূকে লেখ্যে গম্ হবর্ 21 - Chakma Bible

নাঢা রানি মিলেবোর্ দান

¹ ইয়েনর্ পরেদি যীশু রিনি চেলঅ, থাগোইয়্যে মানুচ্চুনে উবোসনা-ঘরর্ দান বাক্সুত্ তারার্ দানুন্ থদন্।

² তে দেগিলো, এক্কো নাঢা রানি মিলে এইনে দ্বিবে পোইজ্যে থলঅ।

³ সেক্কে যীশু তা শিচ্চ্যগুনোরে কলঅ, “মুই তমারে ঘেচ্চ্যেক্‌গুরি কঙর্, এই নাঢা রানি মিলেবো অন্য বেক্কুনোত্তুন্ বোউত্ বেশ্ থলঅ,

⁴ কিয়া অন্যগুনে বেক্কুনে তারার্ সয়সাগোজ্যে ধনত্তুন্ দান গোজ্যন, মাত্তর্ এ মিলেবোর অভাব থেলেয়ো বাঁজি থেবাত্যে তার্ যিগুন এলঅ বেক্কুন্ দি দিলো।”

যুগোর্ শেজ্ দিনুন্

⁵ কয়েক্কো শিচ্চ্য উবোসনা-ঘর পৌইদ্যেনে কধা কদন্, এই পাত্তরুন্ চাহ্‌দে কত্তমান্ দোল্ আর গোজেনরে দান গুরিবার। সেক্কে যীশু কলঅ,

⁶ “তুই দঅ ইয়েনি বেক্কানি দেগর্, মাত্তর্ এমন সময় এবঅ যেক্কে ইয়েনত্ এক্কো পাত্তর উগুরে আর এক্কো পাত্তর্ ন-থেবঅ; বেক্কুন্ ভাঙি ফেলা অবঅ।”

⁷ শিচ্চ্যগুনে যীশুরে পুযোর্ গুরিলাক্, “মাষ্টরবাবু, কক্কে ইয়েনি অবঅ আর কিবাবোত্যে চিহ্নো দেগিনে আমি বুঝি পারিবোং যে, ইয়েনি ঘুদিবার্ অক্ত ওইয়্যে?”

⁸ জোবত্ যীশু কলঅ, “জাগি থাগঅ, কেঅ যেন তমারে ন-ঠগায়, কিয়া ভালোক্‌জনে মঅ নাঙে এইনে কধা কবাক্, ‘মুয়ই সিবে!’ আর ‘সময় কায়কুরে এচ্চ্যে।’ মাত্তর্ তারারে ন-বেঙেয়ো।

⁹ তুমি যেক্কে যুদ্ধোর্ আর বিদ্রোহর্ হবর্ শুনিবা সেক্কে ন-দোরেয়ো, কিয়া পত্তমে ইয়েনি বেক্কানি অবঅ; মাত্তর্ সেক্কেয়ো যে শেজ্ সময়ান লুম্মেগি সিয়েন্ নয়।”

¹⁰ সে পরেদি যীশু তারারে কলঅ, এক জাদে অন্য জাদর্ বিরুদ্ধে আর এক রেজ্য অন্য রেজ্যর্ বিরুদ্ধে যুদ্ধো গুরিবো।

¹¹ দর্‌‌গরেপারা ভূজোল্ বেবঅ আর নানান্ জাগাত্ ভাদ-রাট্ আর ভানা অবঅ। ইয়েনি বাদেয়ো আগাজত্ এমন ঘটনা ঘুদিবো আর চিহ্নো দেগা যেবঅ যিয়েনি ভারী বেশ্ আর দর্‌গরেপারা।

¹² ইয়েনি বেক্কানি অবার্ আগেদি মানুচ্চুনে তমারে ধুরিবাক্ আর তমা উগুরে অত্যেচার্ গুরিবাক্। বিচেরত্যে তারা তমারে সমাজ-ঘরত্ নেযেবাক্ আর জেলোত্ দিবাক্। মত্তে রাজাগুনোর্ আর শাসনগুরিয়্যেগুনো মুজুঙোত্ তমারে নেযা অবঅ,

¹³ আর সেক্কে মঅ পৌইদ্যেনে সাক্ষি দিবাত্তে তমার্ সুযোগ অবঅ।

¹⁴ তুমি ইক্কিনে মনে মনে ঠিগ্ গুরি ফেলঅ, সেক্কে নিজোর্ পক্ষে কধা কবাত্যে তুমি আগেত্তুন্ ধুরি যুক্কোল্ ন-অবা,

¹⁵ কিয়া মুই তমারে এমন কধা আর এমন জ্ঞান যুগেই দিম্ যিয়েনর জোবত্ তমা শত্রুগুনে কিজু কোইয়ো ন-পারিবাক্ আর সিয়েন অস্বীগের্-অ গুরি ন-পারিবাক্।

¹⁶ তমার্ মা-বাবে, তমার্ ভেইয়ুনে আর তমার্ ইত্ত্য-কুদুম্মোগুনে, তমার্ সমাজ্জ্যেগুনে তমারে ধুরিবাক্; আর কয়েকজনে তমারে ধুরিনে মারেয়ো ফেলেবাক্।

¹⁷ মত্তে বেক্ মানুচ্চুনে তমারে ঘিনেবাক্,

¹⁸ মাত্তর্ কনবাবদে তমার এক্কান্ চুল্-অ ভস্ত ন-অবঅ।

¹⁹ তুমি থির্ থেলে, তুমি নিজোরে উদ্ধোর্ গুরি পারিবা।

²⁰ তুমি যেক্কে দেগিবা যিরূশালেমানরে সৈন্যগুনে ঘিরি ফেল্ল্যন্ সেক্কে বুঝিবা, যিরূশালেমর্ ভস্ত অবার্ সময় এচ্চ্যে।

²¹ সে অক্তত্ যিগুনে যিহূদিয়াত্ থেবাক্ তারা মুড়োমুড়ি চাগালাত্ ধেই যাদোক্। যিগুনে শঅরত্ থেবাক্ সিগুনে শঅর বারেদি যাদোক্। যিগুনে আদাম ইন্দি থেবাক্ সিগুনে কনঅ বাবদে শঅরত্ ন-এত্তোক,

²² কিয়া এ দিনুন্ অবঅ সাজা পেবার্ দিন, আর ইয়োত্ পবিত্র বোইবোত্ যিয়েনি লেগা আঘে সিয়েনি পূরোণ্ অবঅ।

²³ সেক্কে যিগুনে পিদিলী আর যিগুনে চিগোন্ গুরোরে বুগো দুধ হাবান্ তারার্ অবস্থা কিবাবোত্যে অবঅ! দেজত্ ভারী দুঘ্ অবঅ আর যিহূদী মানুচ্চুনো উগুরে গোজেনর্ সাজা লামি এবঅ।

²⁴ লাম্বা ছুড়িলোই তারারে মারে ফেলা অবঅ আর বেক জাদ্‌তুনো ইধু তারা বন্দী ইজেবে ছিদি থেবাক্। যেদক্ দিন সং অযিহূদীগুনো সময়বো ন-পুরায় সেদক্ দিন সং অযিহূদীগুনে যিরূশালেমানরে তারার্ ঠেংঅ পাদালোই উরিবাক্।

²⁵ “সেক্কে বেলান্, চানান্ আর তারাগুনো ইধু বোউত্ চিহ্নো দেগা যেবঅ। পিত্‌থীমিত্ বেক জাদ্‌তুনে দুঘ্ পেবাক্ আর দোজ্যে সাগরর্ গুজুরোনি আর তুবোলত্তে তারা অমকদ থির্ নেইয়্যে অবাক্।

²⁶ জগদত্ কি এজের্ ভাবিনে দরে মান্‌জ্যে মুজ্জ্য যেবাক্, কিয়া বেলান্-চানান্-তারাগুন্ ইগুন্ আর থির্ ন-থেবাক্।

²⁷ সে অক্তত্ দাঙর্ খেমতালোই আর মহিমালোই মান্‌জ্যপুয়োবোরে তারা মেঘ ভিদিরে গুরি এত্তে দেগিবাক্।

²⁸ এ বেক্ ঘটনাগানি ঘদতে আরাম্ব গল্লে পরেদি তুমি উদিনে থিয়্যেইয়ো আর মুয়োনি তুল্ল্য, কিয়া তমার্ উদ্ধোরর্ সময়বো কায়কুরে এচ্চ্যে।”

²⁹ ইয়েনর্ পরেদি যীশু তা শিচ্চ্যগুনোরে শিক্ষ্যে দিবাত্যে এ কধাগান্ কলঅ, ডোমোর্ গাজ্ আর অন্য গাজ্‌চুনোর্ পৌইদ্যেনে ভাবি চঅ।

³⁰ যেক্কেনে দেগিবা তারার্ পাদানি নিগিলি এত্তে দেগিলে পরেদি তুমি বুঝি পারিবা যে, খরান্‌‌‌কাল্ কায়কুরে লুম্মেগি।

³¹ সেবাবোত্যেগুরি যেক্কে তুমি দেগিবা ইয়েনি ঘদের্ সেক্কে বুঝি পারিবা যে গোজেন রেজ্যগান্ কায়কুরে লুম্মেগি।

³² মুই তমারে ঘেচ্চেক্‌গুরি কঙর্, যেক্কে ইয়েনি অবঅ সেক্কেয়ো এ কালর্ কিজু মানুচ্ বাঁজি থেবাক্।

³³ আগাজ্ আর পিত্‌থিমীগান্ শেজ্ অবঅ, মাত্তর্ মঅ কধানি উমরত্তে থেবঅ।

^34-35 “তুমি উজিয়ার্ থেয়ো যেন তমা মনানি ওলোমোত্ত্য, মাত্তলে ধুরিনে আর সংসারর্ চিদেলোই লুঙি ন-পড়। সিয়েন ন-অলে ফাল্ যেবাবোত্যেগুরি অদাদত্ বানা যায় সেবাবোত্যেগুরি অদাদত্ সে দিন্নো তমা উগুরে, এমন কি, পিত্‌থিমীর বেক্ মানুচ্চুনো উগুরে এইনে পুড়িবো।

³⁶ সজাক্ থেয়ো আর নিত্য তবনা গরঅ যেন যিয়েনি ঘুদিবো সিয়েনি পার্ ওই যাদে আর মান্‌জ্য পুয়োবো মুজুঙোত্ যেইনে থিয়্যেবার্ তুমি বল্ পঅ।”

³⁷ সে সময়োত্ যীশু পত্তি দিন উবোসনা-ঘরত্ শিক্ষ্যে দিদো, মাত্তর্ রেদোত্ বারেদি যেইনে জৈতুন মুড়োবোত্ থেদঅ।

³⁸ বেক্ মানুচ্চুনে তা কধানি শুনিবাত্যে বেন্যেপোত্যে উবোসনা-ঘরত্ আঝির্ অদাক্।