লূকে লেখ্যে গম্ হবর্ 19 - Chakma Bible

সক্কেয়র মন্ ফিরেনা

¹ যীশু যিরীহো শঅর ভিদিরেদি যার্।

² সিধু সক্কেয় নাঙে এক্কো মানুচ্‌ এলঅ। তে এলদে খাজানা-তুলিয়্যে সদ্দার্ আর এক্কো থাগোয়্যে মানুচ্।

³ যীশু কন্না, সিয়েন তে চেবাত্তে চেষ্টা গরের্, মাত্তর্ বাদি এলঅ বিলি ভিড়োত্তে তারে দেগা ন-যার্।

⁴ সেনত্তে তে যীশুরে চেবাত্যে মুজুঙোত্ ধাবা যেইনে এক্কো ডোমোর্ গাজত্ উদিলো, কিয়া যীশু সে পধেদি যার্।

⁵ যীশু সেই ডোমোর্ গাচ্চো কুরে এইনে উগুরেদি রিনি চেলঅ আর সক্কেয়রে কলঅ, “সক্কেয়, যাদিমাদি লামি আয়, কিয়া এইচ্চ্যে তঅ ঘরত্ মত্তুন্ থা পুরিবো।”

⁶ সক্কেয় যাদিমাদি লামি এলঅ আর খুজীয়্যে যীশুরে গুজি ললঅ।

⁷ ইয়েন্ দেগিনে বেক্কুনে ভুদুভুদু গুরিনে কলাক্, “তে এক্কো পাপী মান্‌‌‌‌জ্যর গর্বা অবাত্যে গেলঅ।”

⁸ সক্কেয় সিধু থিয়্যেইনে প্রভুরে কলঅ, “প্রভু, মুই মর্ ধন সোম্বোত্তির্ অদ্দেক্ নাঢাগুনোরে দি দুয়োঙর্ আর যুনি কাররে থোগেই থাং সালে সিগুনোর্ চেরগুন্ ফিরেই দোঙর্।”

⁹ সেক্কে যীশু কলঅ, “এ ঘরানত্ এইচ্চ্যে পাপত্তুন্ উদ্ধোর্ এলঅ, কিয়া ইবেয়ো দঅ অব্রাহাম গুত্তির্ একজন ।

¹⁰ যিগুনে আঝি যেয়োন্ সিগুনোরে তোগেবাত্যে আর পাপত্তুন্ উদ্ধোর্ গুরিবাত্যে মান্‌‌‌‌জ্য পুয়োবো এইচ্চ্যে।”

রাজা আর তার্ দশজন চাগর্

¹¹ যীশু সেক্কে যিয়েনত্ এলঅ সিয়েনত্তুন্ যিরূশালেমান বেশ্ দূরোত্ নয়, আর যিগুনে তা কধা শুনোদন্ সিগুনে ভাবদন্, গোজেন রেজ্যগান্ সবরে ফগদাং পেবঅ। সেনত্তে যীশু তারারে শিক্ষ্যে দিবাত্যে এ কধাগান্ কলঅ:

¹² সেনত্যে তে কলঅ, এক্কো দাঙর্ বংশর মানুচ্ রাজা ওইনে ফিরি এবঅ বিলি দূর্ দেজত্ গেলঅ।

¹³ যেবার্ আগেদি তে তার্ দশজন চাগররে ডাগিলো আর পত্তিজনরে একশত দীনার্ গুরি দিইনে কলঅ, “মুই ফিরি ন-এজানা সং ইগুন্দোই বেবসা গর্।”

¹⁴ মাত্তর্ তা দেজর্ মানুচ্চুনে তারে ঘিনেদাক্ । ইয়েনত্তে তারা তা পিজেদি মানুচ্ দিপাধেইনে হবর্ দিলাক্, আমি ন-চেই এ মানুচ্চো আমা উগুরে রাজাগিরি গোরোক্।

¹⁵ মানুচ্চো রাজা ওইনে ফিরি এলঅ আর লগে লগে তে চাগরুনোরে তা মুজুঙোত্ ডাগি আনিবাত্যে উগুম্ দিলো। তে জানিবাত্তে চেলঅ বেবসা গুরিনে তারা কন্না কদক্ লাভ্ গোজ্যে।

¹⁶ পত্তম্ মানুচ্চো এইনে কলঅ, প্রভু, তঅ টেঙাগুন্দোই মুই দশগুন্ লাভ্ গোজ্যং।

¹⁷ তে তারে কলঅ, দোল্ কাম গোজ্যস্। তুই এক্কো গম্ চাগর্। তুই সামান্য পৌইদ্যেনে বিশ্বেজি ওইয়োচ্ বিলিনে মুই তরে দশ্‌‌‌‌চান শঅরর্ ভার্ দিলুং।

¹⁸ দ্বি-লম্বর্ চাগর্‌‌‌‌বো এইনে কলঅ, প্রভু, তঅ টেঙাগুন্দোই মুই পাচ্‌‌‌‌গুন লাভ্ গোজ্যং।

¹⁹ তে সেই চাগর্‌‌‌‌বোরে কলঅ, তুই পাচ্চান্ শঅরর্ কামর্ ভার্ পেবে।

²⁰ সে পরেদি অন্য আর এক্কো চাগর্ এইনে কলঅ, প্রভু, এইয়্যে তঅ টেঙাগুন; মুই তঅ টেঙাগুন্ রূমোল কানিত্ বানি থোইয়োং।

²¹ মুই তরে দোরেয়োং, কিয়া তুই অমকদ আঘাত্যে মানুচ্; তুই যিয়েনি ন-থুবোস্ সিয়েনি লোই থাচ্ আর যিয়েনি ন-লাগাচ্ সিয়েনি কাবচ্।

²² সেক্কে তে তারে কলঅ, তুই পাজি চাগর্ ! তঅ মুয়ো কধালোই মুই তর্ বিচের্ গুরিম্। তুই দঅ কোই পারচ্, মুই আঘাত্যে মানুচ্; যিয়েন্ ন-থুবাং সিয়েন লোই থাং আর যিয়েন ন-লাগাং সিয়েন্ কাবং।

²³ ঠিগ্ আঘে, পরেদি কিত্তে তুই মঅ টেঙাগুন ব্যাংকত্ ন-থলে? সে পরেদি আর মুই যেক্কে ফিরি এদুং সেক্কে সুদ সহ সিগুন লোই পারিদুং।

²⁴ পরেদি যিগুনে তা কায়কুরে থিয়্যেই এলাক্ তারারে কলঅ, তাত্তুন্ সেই টেঙাগুন নেযঅ আর যিবের্ দশ দীনার্ আঘন্ তারে দুয়ো।

²⁵ সেক্কে সেই মানুচ্চুনে রাজারে কলাক্, প্রভু, তার দঅ এক আজার্ দীনার্ আঘে।

²⁶ “তে কলঅ, ‘মুই তমারে কঙর্, যিবের্ আঘে তারে আরঅ দিয়্যে অবঅ, মাত্তর্ যিবের্ নেই তার যিগুন্ আঘন্ সিগুন্‌‌‌‌অ তাত্তুন্ নেযা অবঅ।

²⁷ মঅ শত্রুগুনে যিগুনে ন-চান্ মুই রাজা অং, তারারে ইধু আন্ আর মঅ মুজুঙোত্ মারে ফেলা।’ ”

যিরূশালেমত্ সমানা

²⁸ এ বেক্ কধানি কনার্ পরেদি যীশু তারা আগে আগে যিরূশালেম ইন্দি যাহ্ ধুরিলো।

²⁹ যেক্কে তে জৈতুন মুড়োবো ধাগত্ বৈৎফগী আর বৈথনিয়া আদাম ইধু লুমিলো সেক্কে তা দ্বিজন শিচ্চ্যরে ইয়েন কোইনে আগে দিপাধেল,

³⁰ “এ শিক্ষ্যে মজিম তুমি মুজুঙেদি আদামানত্ যঅ। সিধু সুমিবার্ অক্তত্ দেগিবা এক্কো গাধা ছঅ বান্ন্যে আঘে। সিবে উগুরে কেঅ কনদিন্অ ন-চড়ে। সিবে খুলিনে ইধু আনঅ।

³¹ যুনি কেঅ পুযোর্ গরন্, কিত্ত্যে সিবে খুলোর্? সালে কঅ, ‘প্রভুর্ দরকার্ আঘে।’”

³² যে শিচ্চ্যগুনোরে দিপাধা ওইয়্যে তারা যেইনে যীশুর কধা মজিম্ বেক্কানি দেগিলাক্।

³³ তারা যেক্কে সেই ছবুয়ো খুলোদন্ সেক্কে গিরোজ্‌‌‌‌চুনে তারারে পুযোর্ গল্লাক্, “তুমি ছবুয়ো কিত্ত্যে খুলোর্?”

³⁴ তারা কলাক্, “প্রভুর্ দরকার্ আঘে।”

³⁵ সে পরেদি শিচ্চ্যগুনে সেই গাধা ছবো যীশু ইধু আনিলাক্ আর তা পিদোত্ তারার্ কিয়্যে কাবড়ান্ বিজেই দিইনে যীশুরে বোজেলাক্।

³⁶ তে যেক্কে যার্ সেক্কে মানুচ্চুনে নিজো কিয়্যে কাবড়ান্ পধত্ বিজেই দিয়্যে ধল্ল্যাক্।

³⁷ এবাবোত্যেগুরি যীশু যিরূশালেম ইধু এইনে যে পধ্‌‌‌‌তান্ জৈতুন মুড়োত্তুন্ লামি যেয়্যে সেই পধ্‌‌‌‌থানত্ এলঅ। যীশু সমারে তার্ বোউত্ শিচ্চ্য এলাক্। সেই শিচ্চ্যগুনে তার্ যে বেক আমক্ কামানি দেক্কোন্ সিয়েনিত্তে খুজীয়্যে রঅ ছাড়িনে গোজেনরে বাঈনী গুরিনে কুয়ো ধুরিলাক্,

³⁸ “প্রভুর্ নাঙে যে রাজাবো এজের্ তার বাঈনী ওক্‌ । স্বর্গত্ শান্তি, আর সিধু গোজেনর্ মহিমা ফগদাং পেইয়্যে।”

³⁹ ভিড়ো ভিদিরেত্তুন্ কয়েক্কো ফরীশী যীশুরে কলাক্, “মাষ্টরবাবু, তঅ শিচ্চ্যগুনোরে জুরো অবাত্যে কঅ।”

⁴⁰ যীশু তারারে কলঅ, “মুই তমারে কঙর্, ইগুনে যুনি জুরো গুরি থান্ সালে পাত্তরুনে জগার্ পারি উদিবাক্।”

⁴¹ তারা যেক্কে যিরূশালেম ইধু এলাক্ সেক্কে যীশু শঅরান্ দেগিনে কানিলো ।

⁴² তে কলঅ, “হায়, শান্তি পেবাত্যে যিয়েনি দরকার্, তুই, অয় তুই যুনি এচ্চ্যে সিয়েন্ বুঝি পাত্তে! মাত্তর্ ইক্কিনে সিয়েন তর্ চোগো আন্দালত্ রোইয়্যে।

⁴³ এমন্ সময় এবঅ যেক্কে শত্রুগুনে তঅ বিরুদ্ধে চেরোকিত্তে দেবাল্ তুলিবাক্ আর তরে ঘিরি রাগেবাক্ আহ্ চেরোকিত্ত্যেত্তুন্ তরে চাপি ধুরিবাক্।

⁴⁴ তারা তরে আর তঅ ভিদিরে বেক্‌ মানুচ্চুনোরে ধুরিনে মাদিত্ আঝার্ মারিবাক্ আর এক্কো পাত্তর উগুরে আর এক্কো পাত্তর্ ন-থবাক্, কিয়া গোজেনে যে অক্তত্ তইন্দি মনযোগ্ দিয়্যে সেই সময়ান্ তুই ন-চিনোচ্।”

⁴⁵ ইয়েনর্ পরেদি যীশু উবোসনা-ঘরত্ সুমিনে বেবসায়ীগুনোরে ধাবেই দিলো।

⁴⁶ তে সেই বেবসায়ীগুনোরে কলঅ, “পবিত্র বোইয়োত্ লেগা আঘে, ‘মঅ উবোসনা ঘরানরে তবনা গরেদে ঘর্ বানা অবঅ’, মাত্তর্ তুমি সিয়েন ডাগেদর্ আড্ডাখানা বানেয়ো।”

⁴⁷ যীশু পত্তিদিন উবোসনা-ঘরত যেইনে শিক্ষ্যে দিয়্যে ধল্ল। আজল ধর্মগুরুগুনে, ধর্ম-মাষ্টরুনে আর মানুচ্চুনোর নেতাগুনে তারে মারে ফেলেবাত্তে চেলাক্,

⁴⁸ মাত্তর্ কিবাবোত্যেগুরি সিয়েন গুরিবাক্ সিয়েনর্ কনঅ পথ তারা তোগেই ন-পেলাক্, কিয়া মানুচ্চুনে মন্ দিইনে তার বেক্ কধানি শুনিদাক্।