লূকে লেখ্যে গম্ হবর্ 18 - Chakma Bible

তবনা গরানা পৌইদ্যেনে শিক্ষ্যে

^1-2 শিচ্চ্যগুনে যেনে নিত্য তবনা গরন্ আর আজা ন-আড়ান্ সেই শিক্ষ্যেগান্ দিবাত্যে যীশু তারারে এ উদাহরনান্ দিলো: “কনঅ এক শঅরত্ এক্কো বিচেরক্ এলঅ। তে গোজেনরে ন-দোরেদ আর মান্‌জ্যরেয়ো গ্রাজ্য ন-গুরিদো।

³ সেই শঅরত্ এক্কো রানি মিলে এলঅ। তে বার্ বার্ এইনে তারে কদঅ, ‘ন্যায় বিচের্ গুরিনে মঅ বিপক্ষবো বিরুদ্ধে রায় দে।’

⁴ সেই বিচেরক্কো কয়েক্ দিন সং কিচ্চু ন-গুরিলো। মাত্তর্ জেরেদি তে মনে মনে কলঅ, ‘যুনিয়ো মুই গোজেনরে ন-দরাং আর মান্‌জ্যরেয়ো গ্রাজ্য ন-গরং,

⁵ তো এই রানি মিলেবো মরে তোচ্চ্যে লাগার্ বিলি মুই তা পক্ষে গম্ বিচের্ গুরিম্। সিয়েন ন-গুরিলে তে বার্ বার্ এবঅ আর সেক্কে মুই অরান্ ওম্।’ ”

⁶ ইয়েন পরেদি প্রভু আরঅ কলঅ, “ন্যায়বিচেরগ্ ন-অলেয়ো তে কি কোইয়্যে সিয়েন্ ভাবি চঅ।

⁷ সালে যিগুনে গোজেনরে দিনে-রেদে দাগন্, গোজেনে কি তার্ সেই বেঈ-লোইয়্যে মানুচ্চুনোর্ পক্ষে গম্ বিচের্ ন-গুরিবো? তে কি সিয়েন্ গুরিবাত্তে দেরি গুরিবো?

⁸ মুই তমারে কঙর্, তে তারা পক্ষে ন্যায় বিচের্ গত্তে দেরি ন-গুরিবো। মাত্তর্ মান্‌জ্যপুয়োবো যেক্কে এবঅ সেক্কে কি তে পিত্‌থিমীত্ বিশ্বেজ্ দেগিবো?”

ফরীশী আর খাজানা-তুলিয়্যে

⁹ যিগুনে নিজোরে ধার্মিক মনে গুরিনে অন্যগুনোরে ঈচ্ গুরিদাক্ তারারে শিক্ষ্যে দিবাত্যে যীশু এ কধাগান্ কলঅ:

¹⁰ দ্বিজন মানুচ্‌ তবনা গুরিবাত্যে উবোসনা-ঘরত্ গেলাক্। তারাত্তুন্ একজনে এলঅ ফরীশী আর অন্যজনে এলঅ খাজানা-তুলিয়্যে।

¹¹ সেই ফরীশীবো থিয়্যেইনে নিজো পৌইদ্যেনে এ তবনাগান্ গুরিলো, ও গোজেন, মুই তরে ভালেদি জানাঙর্, মুই অন্য মানুচ্চুনো ধোক্ক্যেন্ দগাবাঁজি, অসৎ আর বেভিচেরি নয়; এমন্‌ কি, সে খাজানা-তুলিয়্যেবো ধোক্ক্যেন্অ নয়।

¹² মুই সাপ্তায় দ্বিবার্ উবোচ্‌ থাং আর মর্ বেক্ আয়ত্তুন্ দশ ভাগর্ এক ভাগ্ তরে দুয়োং।

¹³ সেক্কে সেই খাজানা-তুলিয়্যেবো কিজু দূরোত্ থিয়্যেই এলঅ। আগাজ ইন্দি রিনি চেবার্‌‌‌‌অ তার সাহচ্‌ ন-অলঅ; তে বুগ্ চাবেরেইনে কলঅ, ও গোজেন! মুই পাপী; মরে দোয়্যে গর্।

¹⁴ “মুই তমারে কঙর্, সেই খাজানা-তুলিয়্যেবোরে গোজেনে নিদ্দুজি বিলি মানি লল আর তে ঘরত্ ফিরি গেলঅ। মাত্তর্ সেই ফরীশীবোরে তে নিদ্দুজি বিলি মানি ন-লল। যে কেঅ নিজোরে অজল্ গরে তারে তলে গরা অবঅ আর যে নিজোরে তলে গরে তারে অজল্ গরা অবঅ।”

প্রভু যীশু আর চিগোন্ গুড়োগুন্

¹⁵ মানুচ্চুনে চিগোন্ গুরোগুনোরে যীশু ইধু আনিলাক্ যেন তে তারা উগুরে আঢ্‌‌‍তানি বাজায়্। শিচ্চ্যগুনে ইয়েনি দেগিনে সে মানুচ্চুনোরে গেইল্‌ দিয়্যে ধুরিলাক্।

¹⁶ মাত্তর্ যীশু সেই চিগোন্ গুরোগুনোরে তা ইধু ডাগিলো আর কলঅ, “চিগোন্ গুরোগুনোরে মঅ ইধু এবাত্তে দুয়ো, মানা ন-গোজ্য; কিয়া গোজেন রেজ্যগান্ ইগুনো ধোক্ক্যেন্ মানুচ্চুনোত্যে।

¹⁷ মুই তমারে ঘেচ্চেক্‌‌‍গুরি কঙর্, চিগোন পুয়ো-ঝিগুনো ধোক্ক্যেন্ গুরি গোজেনর শাসন মানি ন-নিলে কেঅ কনমতে গোজেন রেজ্যত্ সোমেই ন-পারিবাক্।”

এক্কো থাগোইয়্যে মানুচ্‌

¹⁸ এক্কো যিহূদী নেতা যীশুরে পুযোর্ গুরিলো, “ গম্ মাষ্টরবাবু, উমর জিংকানি পেবাত্তে মুই কি গুরিম্?”

¹⁹ যীশু তারে কলঅ, “মরে কিত্তে গম্ কর্? গোজেনে বাদে আর কেঅ গম্ নয়।

²⁰ তুই দঅ উগুমানি কোই পারচ্, ‘বেভিচের্ ন-গুরিচ্, খুন্ ন-গুরিচ্, চুর্ ন-গুরিচ্, মিজে সাক্ষি ন-দিচ্, তঅ মা-বাবরে সর্মান গুরিচ্।’ ”

²¹ সেই মানুচ্চো কলঅ, গাবুরোত্তুন্ ধুরি মুই ইয়েনি পালেই এজঙর্।

²² এ কধাগান্ শুনিনে যীশু তারে কলঅ, “এজঅ এক্কান্ কাম তর্ বাগি আঘে । তর্ যিয়েনি আঘে বিজিনে নাঢা মানুচ্চুনোরে দে, সালে তুই স্বর্গত্ ধন্ পেবে। সে পরেদি এইনে মর্ শিচ্চ্য অগি।”

²³ মাত্তর্ যেক্কেনে এ কধাগান্ মানুচ্চো শুনিলো, তে ভারী দুঘ্ পেলঅ, কিয়া তে জদবদে থাগোইয়্যে মানুচ্ এলঅ।

²⁴ সেই নেতাবো ইন্দি রিনি চেইনে যীশু কলঅ, “থাগোইয়্যে মানুচ্চুনোর্ পক্ষে গোজেন রেজ্যত্ সমানা কত্তমান্ আগাত্ত্যে!

²⁵ থাগোইয়্যে মান্‌জ্যর্ পক্ষে গোজেন রেজ্যত্ সমানাত্তুন্ বরং সূচো কানাবোদি উটোর্ যানা সোজা।”

²⁶ যিগুনে শুনিলাক্ সিগুনে তারে পুযোর্ গুরিলাক্, “সালে কন্না পাপত্তুন্ উদ্ধোর্ গুরি পারে?”

²⁷ যীশু কলঅ, “যিয়েন মান্‌জ্যর্ পক্ষে অসম্ভব গোজেনর্ পক্ষে সিয়েন সম্ভব।”

²⁸ সেক্কে পিতরে কলঅ, “আমি দঅ বেক্কানি ছাড়িনে তঅ শিচ্চ্য ওইয়্যেই।”

²⁹ “অয়,” যীশু তারারে কলঅ, “মুই তমারে ঘেচ্চেক্‌‌‌‌গুরি কঙর্, যিগুনে গোজেন রেজ্যত্যে ঘর-বাড়ী, মোক্, ভেই, মা-বাপ্ বা পুয়ো-ছা ফেলেইনে এচ্চ্যন্,

³⁰ তারা বেক্কুনে এ যুগোত্ বোউত্ বেশ্ পেবাক্ আর এজেত্তে যুগোত্ উমর্‌‌‌‌অ জিংকানি পেবাক্।”

নিজো মরণ পৌইদ্যেনে প্রভু যীশুর কধা

³¹ যীশু তার্ বারজন শিচ্চ্যরে এক কিত্তেদি ডাগিনে কলঅ, “শুনো! আমি যিরূশালেমত্ যের্‌। মান্‌জ্যপুয়োবো পৌইদ্যেনে ভাববাদীগুনে যিয়েনি যিয়েনি লিগি যেইয়োন্ সিয়েনি সত্য ঘুদিবো।

³² তারে অযিহূদীগুনো আঢত্ দিয়্যে অবঅ, মান্‌‌‌‌জ্যে তারে ঠাট্টা আর অগমান্ গুরিবাক্ আর তা কিয়্যেত্ ছেপ্ ফেলে দিবাক্।

³³ অমকদ চাবুক্ মারানার্ পরেদি তারা তারে মারে ফেলেবাক্, আর তিন দিনোত্ তে জেঈ উদিবো।”

³⁴ মাত্তর্ শিচ্চ্যগুনে ইয়েনি পৌইদ্যেনে কিচ্চু ন-বুঝিলাক্‌। সে কধাগানর্ অত্তগান্ তারা ইধু গুমোরত্ রাগা ওইয়্যে বিলি যীশু যে কি কোইয়্যে সিয়েন্ তারা ন-বুঝিলাক্।

কান্ মানুচ্চো গম্ অলঅ

³⁵ যীশু যেক্কে যিরীহো শঅর ইধু লুমিলো সেক্কে এক্কো কান্ মানুচ্‌ পধঅ কুরে বৈইনে ভিক্ষ্যে মাগের্।

³⁶ ভালোক্কুন্ মানজ্যর্ কধা রঅ শুনিনে তে বেপারান্ কি সিয়েন্ পুযোর্ গুরিলো ।

³⁷ মানুচ্চুনে তারে জানেলাক্, নাসরতর্ যীশু সে পধেদি যার্।

³⁸ সেক্কে তে রঅ ছাড়িনে কলঅ, দায়ূদো গুত্তি যীশু, মরে দোয়্যে গর্!

³⁹ যে মানুচ্চুনে ভিড়ো মুজুঙোত্ এলাক্ সিগুনে তারে ধমক্ দিইনে অলর্ অবাত্তে কলাক্। মাত্তর্ তে আরঅ রঅ ছাড়িনে কলঅ, “দায়ূদো গুত্তি, মরে দোয়্যে গর্।”

⁴⁰ যীশু থামেল আর সেই কান্ মানুচ্চোরে তা ইধু আনিবাত্যে কলঅ। তে কায়কুরে এযানার্ পরেদি যীশু তারে পুযোর্ গুরিলো,

⁴¹ “তুই কি চাজ্? তত্যে মুই কি গুরি পারং?” তে কলঅ, “প্রভু, মুই যেন আরঅ দেগং।”

⁴² যীশু তারে কলঅ, “ঠিগ্ আঘে, সিয়েনই ওক্‌। তুই বিশ্বেজ্ গোজ্যস্ বিলি গম্ ওইয়োচ্।”

⁴³ মানুচ্চো সেক্কে লগে লগে চোগেদি দেগিলো আর গোজেনরে বাঈনী গত্তে গত্তে যীশুর্ পিজে পিজে গেলঅ। ইয়েন দেগিনে বেক্ মানুচ্চুনে গোজেনরে নাঙ্ গিনিলাক্ ।