লূকে লেখ্যে গম্ হবর্ 13 - Chakma Bible

মন্ ফিরেনা পৌইদ্যেনে উপদেজ্

¹ সে অক্তত্ সিধু থেইয়্যে কয়েক্কো মান্‌জ্যে যীশুরে গালীল রেজ্যর্ কয়েকজন মান্‌জ্য পৌইদ্যেনে কলাক্। সিগুনে কলাক্, রোমীয় শাসনগুরিয়্যে পীলাতে এই গালীলীয়গুনোরে কাবিনে তারার্ উৎসর্ব-গোজ্যে য়েমান লো সমারে তারার্ লো-গানিয়ো মিযেয়্যে।

² এ কধাগান্ শুনিনে যীশু কলঅ, “তমার্ কি মনে অয়, সেই গালীলীয়গুনে সেবাবোত্যেগুরি যন্ত্রণা ভুগ্‌কোন্ বিলি তারা অন্য বেক্‌ গালীলীয়গুনোত্তুন্ বেশ্ পাপী এলাক্?

³ মুই তমারে কঙর্, সিয়েন নয়, মাত্তর্ পাপত্তুন্ মনানি ন-ফিরেলে তুমিয়ো বেক্কুনে ভস্ত অবা।

⁴ শিলোহর্ অজল্ ঘরান্ পড়ি যানায় যে আদার জনর্ মরণ ওইয়্যে, তমার্ কি মনে অয়, যিরূশালেমর্ বাদ্‌বাগী মানুচ্চুনোত্তুন্ তারার্ বেশ্ দুচ্‌ এলঅ?

⁵ মুই তমারে কঙর্, সিয়েন নয়; মাত্তর্ পাপত্তুন্ মনানি ন-ফিরেলে তুমিয়ো বেক্কুনে ভস্ত অবা।”

⁶ সে পরেদি শিক্ষ্যে দিবাত্যে যীশু এ কধাগান্ কলঅ, “কনঅ এক্কো মান্‌জ্যর্ ফল বাগানত্ এক্কো ডোমোর্ গাজ্ লাগা ওইয়্যে। একবার্ তে এইনে ফলুন্ তোগেল মাত্তর্ ন-পেলঅ।

⁷ সেক্কে তে বাগান চুগিদার্‌বোরে কলঅ, ‘চাহ্, তিন বজর্ ধুরিনে এ ডোমোর্ গাজ্‌চোত্ মুই ফল তগাঙর্ মাত্তর্ কিচ্চু ন-পাঙর্। সেনত্তে তুই গাচ্চো কাবি ফেলা। কিত্তে ইবে বানা বানা ভূইয়ান বরবাদ্ গুরিবো?’

⁸ বাগান চাগর্‌বো জোব্ দিলো, ‘বাবু, এ বজর্‌অ সিবে থেবাত্তে দে। মুই সিবের্ চেরোকিত্ত্যেদি গাঢ্ খুড়িনে সার্ দিম।

⁹ সে পরেদি যুনি ফল ধরে দঅ গম্ সিয়েন ন-অলে তুমি সিবে কাবি ফেলেবা।’ ”

প্রভু যীশু গুজোং মিলেবোরে গম্ গুরিলো

¹⁰ কনঅ এক জিরেবার্ দিনোত্ যীশু এক্কান্ সমাজ-ঘরত্ শিক্ষ্যে দের্।

¹¹ সিধু এমন্‌ এক্কো মিলে এলঅ যিবেরে এক্কো ভান্ন্যেই আত্মায় আদার বজর্ ধুরি অসুগোত্ ভুগোর্। তে গুজোং এলঅ আর এক্কুবারে উজু ওই ন-পারিদো।

¹² যীশু তারে চেলঅ আর তারে কায়কুরে ডাগিনে কলঅ, “মা, তঅ পিড়েনত্তুন্ তুই উদ্ধোর্ অলে।”

¹³ এ কধাগান্ কোইনে যীশু তা উগুরে আঢ্‌তান্ থলঅ, আর সেক্কেনে তে উজু ওইনে থিয়্যেল আর গোজেনরে বাঈনী গরা ধুরিলো।

¹⁴ যীশু জিরেবার্ দিনোত্ গম্ গোজ্যে বিলি সমাজ-ঘর নেতাবো তোচ্চ্যে পেইনে মানুচ্চুনোরে কলঅ, “কাম্ গুরিবাত্যে দঅ ছয় দিন আঘে। সেনত্তে জিরেবার্ দিনোত্ ন-এইনে সেই ছয় দিনো ভিদিরে এইনে গম্ অ।”

¹⁵ সেক্কে প্রভু যীশু সেই নেতাগুনোরে কলঅ, তুমি ফক্কর্! জিরেবার্ দিনোত্ তুমি বেক্কুনে কি তমার্ বলদ্ গোরু বা গাধাবোরে গোরু ঘরত্তুন্ খুলিনে পানি খাবেবাত্যে লোই ন-যঅ?

¹⁶ সালে অব্রাহাম বংশর্ এই যে মিলেবোরে আদার বজর্ ধুরিনে শদানে বানি থোইয়্যে, সেই বান্যেত্তুন্ জিরেবার্ দিনোত্ কি তারে উদ্ধোর্ গরানা উচিত নয়?

¹⁷ তে এ কধাগান্ কনার্ পরেদি যিগুনে তা বিরুদ্ধে এলাক্ তারা বেক্কুনে লাজেলাক্। মাত্তর্ অন্য মানুচ্চুনে তার্ এই বেক্‌ দাঙর্ কামানি দেগিনে হুজি অলাক্।

সোজ্য-বিজি আর সদার্ হিত্ত্য

¹⁸ ইয়েন পরেদি যীশু কলঅ, “গোজেন রেজ্যগান্ কেধোক্ক্যেন্? কি-অ সমারে মুই ইয়েনর্ তুলনা গুরিম্?

¹⁹ গোজেন রেজ্যগান্ এমন্‌ এক্কো শোজ্য-বিজি ধোক্ক্যেন্ যিবে এক্কো মান্‌জ্যে নেযেইনে তা বাগানত্ লাগেল। যেরেদি চারা বাড়ি উদিনে এক্কো গাজ্ ওই উদিলো। সেক্কে পেগ্‌কুনে এইনে তা ডেলাগুনোত্ ভাহ্ বানিলাক্।”

²⁰ যীশু আরঅ পুযোর্ গুরিলো, “কি-অ সমারে মুই গোজেন রেজ্যগানরে তুলনা গুরিম্?

²¹ ইয়েন এবাবোত্যে, এক্কো মিলে সদালোই আদার কেজি মোইদ্যে মিজেল, সেনত্তে বেক্ মোইদ্যেগান্ ফুলি উদিলো।”

পাপত্তুন্ উদ্ধোর্ পানা পৌইদ্যেনে শিক্ষ্যে

²² আদামে আদামে আর শঅরে শঅরে শিক্ষ্যে দেদে দেদে যীশু যিরূশালেম ইন্দি যাহ্ ধুরিলো।

²³ এক্কো মান্‌জ্যে তারে পুযোর্ গুরিলো “প্রভু, পাপত্তুন্ উদ্ধোর্ কি বানা কয়েকজনে পেবাক্?” সেক্কে যীশু মানুচ্চুনোরে কলঅ,

²⁴ চিগোন্ দুয়োরদি সুমিবাত্যে জদবদে চেষ্টা গরঅ। মুই তমারে কঙর্, ভালোক্‌জনে সুমিবাত্যে চেষ্টা গুরিবাক্ মাত্তর্ ন-পারিবাক্।

²⁵ ঘর গিরোজ্‌সো যেক্কে উদিনে দুয়োরান্ বানিবো সেক্কে তুমি বারেদি থিয়্যেইনে দুয়োরানত্ বাজ্জ্যেদে বাজ্জ্যেদে কবা, প্রভু, আমাত্যে দুয়োরান্ খুলি দে। মাত্তর্ তে তমারে এ জোব্‌পান দিবো, তুমি কুত্তুন্ এচ্চ্য মুই কোই ন-পারং।

²⁶ সেক্কে তুমি কবা, আমি তঅ সমারে হানা-দানা গোজ্জ্যেই, আর তুই দঅ আমারে পধে পধে শিক্ষ্যে দিদে।

²⁷ সেক্কে তে কবঅ, তুমি কুত্তুন্ এচ্চ্য মুই হবর্ ন-পাং। পাজি মানুচ্চুন্, তুমি বেক্কুনে মঅ কায়-কুরেত্তুন যগোই।

²⁸ যেক্কে তুমি দেগিবা, অব্রাহাম, ইস্‌হাক, যাকোব আর ভাববাদী বেক্কুনে গোজেন রেজ্যত্ আঘন্ আর তমারে বারেদি ফেলেই দিয়্যে ওইয়্যে, সেক্কে তুমি কানাকুদি গুরিবা আর যন্ত্রনায় দাত্ কামেড়েবা।

²⁹ পূগ্, পোজিম্, উত্তোর্ আর দোগিণোত্তুন্ মানুচ্ এইনে গোজেন রেজ্যত্ হেবাত্যে ববাক্।

³⁰ যিগুনে ইক্কিনে বেগ যেরেদি আগন্ সিগুনোত্তুন্ পত্তম্ অবাক্, আর যিগুনে ইক্কিনে পত্তম্ আঘন্ সিগুনোত্তুন্ বেগ যেরেদি পড়িবাক্।

যিরূশালেমত্যে দুঘ্ ফগদাং গরানা

³¹ সেক্কে কয়েক্কো ফরীশী যীশু ইধু এইনে কলাক্, “তুই ইত্তুন্ যাগোই, কিয়া হেরোদে তরে মারে ফেলেবাত্তে চার্।”

³² যীশু তারারে কলঅ, তুমি যেইনে সেই শিয়েল্লোরে কঅ, আর কয়েকদিন মুই ভান্ন্যেই আত্মা ধাবেম্ আর পিড়েল্ল্যেগুনোরে গম্ গুরিম আহ্ সে পরেদি মঅ কামানি থুম্ গুরিম।

³³ যাহোক্, আর কয়েকদিন পরেদি মত্তুন্ যাহ্ পুরিবো, কিয়া এক যিরূশালেম বাদে আর কনঅ জাগাত্ কনঅ ভাববাদীর্ মরণ ওই পারে নাহি?

³⁴ “যিরূশালেম! হায় যিরূশালেম! তুই ভাববাদীগুনোরে খুন্ গুরি থাচ্ আর তমা ইধু যিগুনোরে গোজেনর্ হবর্ কোইয়্যে দিপাধা অয় তারারে পাত্তর্ মারি থাচ্। কুরো শর্মা যেবাবোত্যেগুরি ছঅগুনোরে তা ডুয়োনিলোই এগত্তর্ গরে ঠিগ্ সেবাবোত্যেগুরি মুই কয়বার্ তঅ মানুচ্চুনোরে মইধু এগত্তর্ গুরিবাত্তে চেইয়োং, মাত্তর্ তুমি রাজী ন-অ।

³⁵ চঅ, তমা মন্দিরুন তমা মুজুঙোত্ খালি ওই পড়ি থেবঅ। মুই তমারে কঙর্, যেদকদিন সং তুমি ন-কবা, ‘যিবে প্রভুর নাঙে এজের্ তার বাঈনী ওক্,’ সেদক্ বিলোন্ সং তুমি আর মরে ন-দেগিবা।”