লূকে লেখ্যে গম্ হবর্ 11 - Chakma Bible

তবনা পৌইদ্যেনে শিক্ষ্যে

¹ এক সময়োত্ যীশু কনঅ এক জাগাত্ তবনা গরের্। তবনা থুম্ অনার্ পরেদি তার্ এক্কো শিচ্চ্য তারে কলঅ, “প্রভু, বাপ্তিস্মদিয়্যে যোহনে যেবাবোত্যে তা শিচ্চ্যগুনোরে তবনা গুরিবাত্তে শিগেয়্যে সেবাবোত্যেগুরি আমারেয়ো তুই তবনা গুরিবাত্তে শিগা।”

² যীশু তারারে কলঅ, “যেক্কে তুমি তবনা গরঅ সেক্কে কোইয়ো, ‘ও আমার স্বর্গর বাবা, তঅ নাঙান্ পবিত্র বিলি মানা ওক্। তঅ রেজ্যগান্ এজোক্।

³ পত্তিদিনোর্ হানা তুই আমারে পত্তিদিন্ দে।

⁴ আমা পাপ্পানি খেমা গর্, কারন যিগুনে আমা বিরুদ্ধে অন্যেয় গরন্ আমি তারারে ক্ষেমা গুরিই। আমারে তুই পোরোক্ষ্যেত্ ন-ফেলেচ্।’ ”

⁵ সে পরেদি যীশু তা শিচ্চ্যগুনোরে কলঅ, মনে গরঅ, রেত্ সম্বাগত্ তমাত্তুন্ একজনে তা দাংগুবো ঘরত্ যেইনে কলঅ, দাংগু, মরে তিনেন্ রুটি উদোর্ দে।

⁶ মর্ এক্কো দাংগু পধেদি যাদে যাদে মইধু এইচ্চ্যে। তারে হানা দিবার্ মর্ কিচ্চু নেই।

⁷ সেক্কে ঘর ভিদিরেত্তুন্ তা দাংগুবো জোব্ দিলো, মরে দুঘ্ ন-দিচ্। দোরান্ ইক্কিনে বন্ধ আর মঅ ঝি-পুয়োগুনে বিচ্চোনত্ মঅ লগে ঘুম যাদন্। মুই উদিনে তরে কিচ্চু দি-ন-পারিম্।

⁸ মুই তমারে কঙর্, তে যুনি দাংগু ইজেবে উদিনে তারে কিচ্চু নয়ো দে, তো মানুচ্চো বার্‌বার্ কোজোলী গরের্ বিলি তে উদিবো আর তার যা দরকার্ সিয়েনি তারে দিবো।

⁹ “ইয়েনত্তে মুই তমারে কঙর্, চঅ, তমারে দিয়্যে অবঅ; তগঅ, পেবা; দোরানত্ বাজ্জ্য, তমাত্তে খুলো অবঅ।

¹⁰ যিগুনে চান্ তারা পত্তিজনে পান্; যে তগায় তে পায়; আর যে দোরোত্ বাজ্জেই তাত্তেই দোরান্ খুলো অয়।

¹¹ তমাত্তুন্ এমন্ বাপ কন্না আঘে, যে তা পুয়োবোরে মাছ চেলে সাপ দিবা?

¹² বা বদা চেলে বিছে দিবা?

¹³ সালে তুমি বজং অলেয়ো যুনি তমা ঝি-পুয়োগুনোরে গম্ গম্ জিনিস দিবাত্তে জান, মাত্তর্ যিগুনে স্বর্গর্ বাবঅ ইধু চান্, তে যে তারারে পবিত্র আত্মাগান্ দিবো ইয়েন কত্তমান্ ঘেচ্চেক্‌গুরি নয়!”

প্রভু যীশু কা বল্লোই কাম্ গরে?

¹⁴ যীশু এক্কো ববা অসিজি আত্মারে ধাবেই দিলো। অসিজি আত্মাবো ধাবেই দেনার্ পরেদি ববা মানুচ্চো কধা কুয়ো ধুরিলো। সেক্কে মানুচ্চুনে আমক্ অলাক্,

¹⁵ মাত্তর্ কয়েকজনে কলাক্, “ইবেয়ই বেল্‌সবূল, অসিজি আত্মাগুনোর নেতা, যিবেরে অসিজি আত্মাগুনোরে ধাবেবার খেমতা দিয়্যে ওইয়্যে।”

¹⁶ অন্য মানুচ্চুনে যীশুরে পোরোক্ষ্যে গুরিবাত্তে স্বর্গত্তুন এক্কান চিহ্নো দেগেবাত্তে কলাক্।

¹⁷ মাত্তর্ যীশু হবর্ পেদঅ তারা কি ভাবদন্, সেনত্যে তে তারারে কলঅ, যে রেজ্যগান্ নিজো ভিদিরে যুদ্ধো বাজেইনে দলে দলে ভাগ্ ওই যায় সে রেজ্যগান্ ন-ঠিগে, পরিবারুন্অ নিজো বিরুদ্ধে ভাগ্ ওইনে ন-টিগোন্।

¹⁸ সেনত্যে যুনি শদান রেজ্য ভিদিরে যুদ্ধো বাঁজিনে দলত্ ভাগ ওই থান কেধোক্ক্যেনগুরি ঠিগিবো? তুমি কত্তে মুই বেল্‌সবূল খেমতালোই অসিজি আত্মাগুনোরে ধাবাং।

¹⁹ মুই যুনি এবাবোত্যেগুরি তারারে ধাবাং, কেধোক্ক্যেন গুরি তঅ মানুচ্চুনে ধাবান্? তঅ নিজো মানুচ্চুনে প্রমাণ গুরিবাক্ যে তুমি ঠিগ নয়!

²⁰ না, ইয়েন বরং মুই যুনি গোজেন খেমতালোই অসিজি আত্মা আর ইয়েন প্রমান ওইয়্যেদে যে গোজেন রেজ্যগান দঅ তমা কায়কুরে এইচ্চ্যে।

²¹ যেক্কেনে এক্কো বোলী মানুচ্ তা লগে বেক্ আত্যেরানিলোই যুক্কোল, তা ঘরানরে চুগি দে, তার্ বেক জিনিসচানি ঠিগ্ আঘে।

²² মাত্তর্ যেক্কেনে তাত্তুন্ বেশ্ বোলী কনজন্ এইনে যুনি তারে আক্রমন্ গুরিনে অদেই দে সালে তে যে আত্ত্যেরুনো উগুরে নির্ভর গোজ্যে, অন্য মানুচ্চো সিগুন কাড়ি নেযায় আর লুদেয়্যে জিনিস্‌‌চানি ভাগ গুরি নেযায়।

²³ যুনি কনজনে মঅ পক্ষে ন-থায় সালে দঅ তে মঅ বিপক্ষে আঘে। যে মঅ সমারে ন-কুড়োই তে ছিদি দে।

²⁴ “কনঅ ভান্ন্যেই আত্মা যেক্কে এক্কো মান্‌‌জ্য ভিদিরেত্তুন্ নিগিলি যায় সেক্কে তে জিরেবাত্তে শুগুনো জাগার্ ভিদিরেদি ঘুরোঘুরি গুরি থায়। যেরেদি সিয়েন ন-পেইনে তে কয়, ‘মুই যে ঘরানত্তুন্ নিগিলি এচ্চোং আরঅ মুই সেই ঘরানত্ ফিরি যেম্।’

²⁵ ফিরি এইনে সে ঘরান তে সুদো, সাব্‌গোজ্যে, আর সাজেয়্যে দেখ্যে।

²⁶ সেক্কে তে যেইনে নিজোত্তুন্অ বেশ্ বজং অন্য আরঅ সাত্তো ভান্ন্যেই আত্মা লগে গুরি আনে আর সিধু সোমেইনে বজত্তি গরা ধরে। সিয়েনর্ কারনে সেই মানুচ্চোর্ পত্তম্ দযাত্তুন্ শেজ্ দযাবো আরঅ বজং অয়।”

²⁷ যীশু যেক্কে কধা কর্ সেক্কে ভিড়ো ভিদিরেত্তুন্ এক্কো মিলে রঅ ছাড়িনে কলঅ, “বর্‌পেইয়্যে সে মিলেবো, যিবে তরে পেদত্ ধোজ্যে আর বুগো দুধ হাবেয়্যে।”

²⁸ মাত্তর্ যীশু কলঅ, “ইয়েনত্তুন্ বেশ্ বরং তারা বর্‌পেইয়্যে যিগুনে গোজেনর্ কধা শুনোন্ আর সেবাবোত্যেগুরি কাম্ গরন্।”

নানান্ বাবোত্যে উপদেজ্

²⁹ আরঅ মানুচ্ যীশুর্ চেরোকিত্তে থুবো ধুরিলাক্। সেক্কে যীশু কলঅ, এ কালর্ মানুচ্চুনে বজং। তারা অামক্ অবার চিহ্নো তগান্ মাত্তর্ ভাববাদী যোনার্ আমক্ অবার্ চিহ্নোগান বাদে আর কনঅ চিহ্নো তারারে দেগা ন-অবঅ।

³⁰ নীনবী শঅর মানুচ্চুনোত্তে যোনা যেবাবোত্যেগুরি নিজে চিহ্নো ওইয়্যে ঠিগ্ সেবাবোত্যে গুরি এ কালর্ মানুচ্চুনোত্তে মান্‌‌জ্য পুয়োবো চিহ্নো অবঅ।

³¹ বিচের দিনোত্ দোগিণ দেজর্ রাণী উদিনে এ কালর্ মানুচ্চুনোরে দুষ্ দেগেই দিবো, কিয়া শলোমন রাজার জ্ঞানর্ কধাবাত্তা শুনিবাত্তে তে পিত্‌থিমীর শেজ দুযিত্তুন্ এচ্চ্যে; আর চঅ, ইয়েনত্ শলোমনত্তুন্অ বেশ্ আরঅ দাঙর্ এক্কো আঘে।

³² বিচের দিনোত্ নীনবী শঅর মানুচ্চুনে উদিনে এ কালর্ মানুচ্চুনোরে দুষ্ দেগেই দিবাক্, কিয়া নীনবীর মানুচ্চুনে যোনার প্রচারর্ কারনে পাপত্তুন্ মনানি ফিরেয়োন্; আর চঅ, ইয়েনত্ যোনাত্তুন্অ আরঅ দাঙর্ এক্কো আঘে।

³³ “কনজনে চেরাগ জ্বালেইনে কনঅ গুমুরো জাগাত্ বা কাল্লোং তলে ন-থন্ বরং চেরাগ টগ উগুরে থন্, যেন ভিদিরে যিগুনে সমন্ তারা পহর্ দেগন্।

³⁴ তঅ চোগ্‌কুন অলঅ তর্ কিয়্যেগানর্ চেরাগ্। যুনি তঅ চোক্কো গম্ অয় সালে তর্ বেক্ কিয়্যেগান্ পহ্‌‌রে ভুরিবো, মাত্তর্ চোগ্ বজং অলে তঅ কিয়্যেগান্অ আন্ধারে ভুরিবো।

³⁵ তঅ ভিদিরে যে পহ্‌‌রান আঘে সিয়েন্ আজলে আন্ধার্ না কি সে পৌইদ্যেনে উজিয়ার্ অ।

³⁶ তঅ পুরো কিয়্যেগান্ যুনি পহ্‌‌রে ভুরি যায় আর এক্কেনায়ো আন্ধার্ ন-থায় সালে সিয়েন্ বেক্কান্ পহ্‌‌র অবঅ, ঠিগ্ যেবাবোত্যে চেরাগ পহ্‌‌র তঅ উগুরে পড়িলে তঅ কিয়্যেগান্ পহর্ অয়।”

ধর্ম-নেতাগুনো পৌইদ্যেনে প্রভু যীশুর মতামত

³⁷ যীশু কধা কনা থুম্ গরানার্ পরেদি এক্কো ফরীশী যীশুরে হানাত্ ভাত্ত্যেল। সেক্কে যীশু ভিদিরে যেইনে হেবাত্তে বুজিলো।

³⁸ সেই ফরীশীবো যেক্কে দেগিলো হানার্ আগেদি যীশু ধর্মর্ সুদোম্ মজিম্ আঢ্ ন-ধলঅ সেক্কে তে আমক্ অলঅ।

³⁹ প্রভু তারে কলঅ, সালে শুনো, তুমি, অত্তাৎ ফরীশীগুন থাল্ আর কদরা বারেদিগান্ তেল্‌তেল্যে গুরি রাগঅ, মাত্তর্ তমা ভিদিরেদিগান্ লুভে আর ভান্ন্যেয়দি ভরা।

⁴⁰ তুমি মূর্খ! যিবে বারেদিগান্ বানেয়্যে তে কি ভিদিরেদিগান্অ ন-বানায়?

⁴¹ তমা থাল্-কদরা ভিদিরে যিয়েনি আঘে সিয়েনি বরং ভিক্ষ্যে ধোক্ক্যেন্ দান গরঅ; দেগিবা, বেক্কানি তমা ইধু সিজি অবঅ।

⁴² ফরীশীগুন তমাত্যে কত্তমান্ দর্‌গরেপারা! তুমি গোজেনরে পুদিনা, তেজ্‌‌পাদা আর নানান্ বাবোত্যে শাগ্-পাদর্ দশ ভাগর্ এক ভাগ্ দি থাগঅ, মাত্তর্ ন্যায়বিচের্ আর গোজেন উগুরে কোচ্‌‌পানা ইন্দি মনযোগ্ ন-দুয়ো। আগ ইয়েনি পালানা লগে লগে যেরেদিনিয়ো পালানা তমার্ উচিত।

⁴³ “অভিশাব্ পেইয়্যে ফরীশীগুন! সমাজ-ঘরর্ আজল্ আজল্ আসনত্ বজদে আর আট্-বাজারত্ সর্মান পাধে তুমি গম্ পঅ।

⁴⁴ তমাত্যে কত্তমান্ দর্‌গরেপারা ! তুমি দঅ চিহ্নো ন-দিয়্যে গৌর ধোক্ক্যেন্। মান্‌‌জ্যে হবর্ ন-পেইয়্যে গুরি সিয়েন উগুরেদি আঢি যান্।”

⁴⁵ সেক্কে ধর্ম-মাষ্টরুনোত্তুন্ একজনে যীশুরে কলঅ, “মাষ্টরবাবু, এ কধাগান্ কোইনে তুই আমারেয়ো অগমান্ গোজ্যস্।”

⁴⁶ যীশু কলঅ, অভিশাব্ পেইয়্যে ধর্ম-মাষ্টরুন! তুমি মানুচ্চুনো উগুরে গুয়োর্ বুধি চাপি দি থাগঅ, মাত্তর্ তারারে সাহায্য গুরিবাত্তে নিজে এক্কো আঙুল্অ ন-লাড়অ।

⁴⁷ অভিশাব্ পোড়োক্ তমার্! ভাববাদীগুনো কবরুন্ তুমি নূয়ো গুরি সাজেই থাগঅ, অদচ তমা পুরোণি মানুচ্চুনে দঅ তারারে খুন্ গোজ্যন্।

⁴⁸ সেনত্তে তমা পুরোণি মানুচ্চুনোর্ কামর্ সাক্ষী তুমি আর তারার্ সেই কামানি তুমি মানিয়ো নেজর্। এক কিত্তেদি তারা ভাববাদীগুনোরে খুন্ গোজ্যন্, অন্যকিত্তেদি তুমি সেই ভাববাদীগুনোর গোরানি বানেই রাগর্।

⁴⁹ সেনত্তে জ্ঞানী গোজেনে কোইয়্যেদে, মুই তারা ইধু ভাববাদীগুনোরে আর হবর্ কোইয়্যেগুনোরে পাধেই দিম্। তারাত্তুন্ কয়েকজনরে তারা খুন্ গুরিবাক্ আর অন্যগুনো উগুরে অত্যেচার্ গুরিবাক্।

⁵⁰ ইয়েনর্ ফল অলঅ, সংসারান্ সৃট্টির সময়োত্তুন্ ধুরি আরাম্ভ গুরিনে যেদক্‌‌জন ভাববাদীরে খুন্ গরা ওইয়্যে, তারার্ লো-গানির্ দায়ী অবাক্ এ কালর্ মানুচ্চুনে।

⁵¹ অয়, মুই তমারে কঙর্, হেবল খুনোত্তুন্ ধুরি আরাম্ভ গুরি যে সখরিয়রে পূজো আর পবিত্র জাগান ভিদিরে মারে ফেলা ওইয়্যে সেই সখরিয়র খুন্ সং বেক্ লো-গানি ঝরানার্ দায়ী অবাক্ এ কালর্ মানুচ্চুনে।

⁵² “ধর্ম-মাষ্টরুন তমাত্যে কত্তমান দর্‌গরেপারা! তুমি জ্ঞানর্ চাবি নেযেয়ো। নিজেয়ো ভিদিরে ন-সমঅ আর যিগুনে ভিদিরে সুমিবাত্তে চেইয়োন্ তারারেয়ো সোমেবাত্তে ন-দুয়ো।”

^53-54 তে সেই জাগায়ান্ ফেলে যেবার অক্তত্ ধর্ম-মাষ্টরুন আর ফরীশীগুনে তা বিরুদ্ধে শত্রুমি গুরিবাত্তে লাক্ক্যন্। নানান্ পৌইদ্যেনে প্রশ্ন পুযোর্ গুরিনে তারে কধা ফালত্ ফেলেবাত্তে তারা বাজ্জেই থাহ্ ধুরিলাক্।