লূকে লেখ্যে গম্ হবর্ 10 - Chakma Bible

সত্তুরজন শিচ্চ্যরে দিপাদানা

¹ ইয়েনর্ পরেদি প্রভু যীশু আরঅ সত্তুর্‌জন শিচ্চ্যরে প্রচারত্ পাধেবাত্তে বেঈ নেযেল। তে নিজে যে আদামত্ আর যে জাগাত্ যেবঅ বিলি ঠিগ্ গোজ্যে সেই বেক্ জাগানিত্ যেবার্ আগেদি শিচ্চ্যগুনোরে দ্বিজন্ দ্বিজন্ গুরি পাধেই দিলো।

² তে শিচ্চ্যগুনোরে কলঅ, ঘেচ্চেক্‌গুরি খেত্-খেত্তি সয়সাগোজ্যে, মাত্তর্ কাম গুরিবার্ মানুচ্ কম্। ইয়েনত্তে খেত্-খেত্তি গিরোজ ইধু কোজোলী গরঅ যেন তে তার্ খেত্-খেত্তিগানি কাবিবাত্তে মানুচ্ পাধেই দে।

³ তুমি যঅ; হোক্যে বাঘ ইধু ভেড়া ছঅ ধোক্ক্যেন্ মুই তমারে পাদাঙর্।

⁴ টেঙার্ থৈল্যে বা ভিক্ষ্যে গুরিয়্যের্ থৈল্যে বা জদা লগে ন-নেযেয়ো আর পদথ্ কাররে ভালেদি ন-জানেয়ো।

⁵ তুমি যে ঘরত্ যেবা পত্তমে কবা, এ ঘরানত্ শান্তি ওক্।

⁶ শান্তি গম্ পান এমন কেঅ যুনি সিয়েনত্ থান্ সালে তমা শান্তিগান্ তা উগুরে থেবঅ, মাত্তর্ যুনি সেবাবোত্যে কনজন্ ন-থান্ সালে তমা শান্তিগান্ তমা ইধু ফিরি এবঅ।

⁷ সেই ঘরানত্ থেয়ো আর তারা যিয়েন্ দুয়োন্ সিয়েনই হেয়ো, কিয়া যে কাম্ গরে তে বেতন্ পেবার্ যগাজ্যে। এক্কান্ ঘর্ ফেলেইনে অন্য ঘরত্ ন-যেয়ো।

⁸ যুনি কনঅ আদামত্ যঅ আর সিদুগো মানুচ্চুনে তমারে মানি লন্ সালে তমারে যিয়েনি হেবাত্তে দিয়্যে অয় সিয়েনি হেয়ো।

⁹ সে আদামর্ পীড়েল্যেগুনোরে গম্ গরঅ আর তারারে কঅ, গোজেন রেজ্যগান্ তমা কায়-কুরে লুম্মেগি।

¹⁰ মাত্তর্ যুনি কনঅ আদামত্ যঅ আর সিদুগো মানুচ্চুনে তমারে মানি ন-লন্ সালে সে আদামর্ পধে পধে যেইনে এ কধাগান্ কঅ,

¹¹ তমা আদামর্ যে ধূল্যেগানি আমা টেঙত্ বাস্যে সিয়েনিয়ো আমি তমা বিরুদ্ধে ঝাড়ি ফেলেলং। তো তুমি জানি রাগেয়ো, গোজেন রেজ্যগান্ কায়-কুরে লুম্মেগি।

¹² মুই তমারে কঙর্, বিচের দিনোত্ সেই আদামত্তুন্ বরং সদোম শঅর মানুচ্চুনো অবস্থা বোউত্ সোজ্য গরেদে ধোক্ক্যেন্ অবঅ।

¹³ “অভিশাব্‌ পেইয়্যে কোরাসীন! অভিশাব্‌ পেইয়্যে বৈৎসৈদা! যেদক্কানি আমক্ অবার্ কাম তমা ইধু গরা ওইয়্যে সিয়েনি যুনি সোর আর সীদোন শঅরত্ গরা অদঅ, সালে তারা ভালোক্ দিন আগে বস্তা পিনিনে ছেইয়ো উগুরে বোইনে পাপত্তুন্ মনানি ফিরেদাক্।

¹⁴ ঘেচ্চেক্‌গুরি, বিচের দিনোত্ সোর আর সীদোনর্ অবস্থা বরং তমাত্তুন্অ বেশ্ বোউত্ সোজ্য গরেদে ধোক্ক্যেন্ অবঅ।

¹⁵ আর তুই, কফরনাহূম, তুই নাহি স্বর্গয়ান সং অজলত্ উদিবে? কনদিন্অ নয়, তরে তলেদি নরগত্ ফেলেই দিয়্যে অবঅ।”

¹⁶ যীশু তা শিচ্চ্যগুনোরে কলঅ, “যিগুনে তমা কধানি শুনোন্ তারা মঅ কধায়ো শুনোন্। যিগুনে তরে এলাফেলা গরন্ তারা মরেয়ো এলাফেলা গরন্। যিগুনে মরে এলাফেলা গরন্, যিবে মরে পাধেয়্যে তারা তারেই এলাফেলা গরন্।”

¹⁷ সেই সত্তুর্‌‌জন শিচ্চ্য হুজিয়ে ফিরি এইনে কলাক্, “প্রভু, তঅ নাঙান্ ধুরিনে কলে ভান্ন্যেই আত্মাগুনেয়ো আমা কধা শুনোন্।”

¹⁸ যীশু তারারে কলঅ, “মুই শদানরে স্বর্গত্তুন্ আগাজ ঝিমিলেনি ধোক্ক্যেন্ গুরি পত্তে দেখ্যং।

¹⁹ চঅ, মুই তমারে সাপ আর বিছে উগুরে আঢি যেবার্ খেমতা দুয়োং আর তমা শত্রু শদানর্ বেক্ বলান উগুরেয়ো খেমতা দুয়োং। কনঅ কিজুয়ে তমারে ক্ষোতি ন-গুরিবো।

²⁰ মাত্তর্ ভান্ন্যেই আত্মাগুনে তমা কধা শুনোন্ বিলি হুজি ন-ওইয়ো বরং স্বর্গত্ তমা নাঙান্ লেগা ওইয়্যে বিলি হুজি ওইয়ো।”

²¹ সেক্কে যীশু পবিত্র আত্মার্ দিয়্যে হুজিয়ে হুজি ওইনে কলঅ, ও বাবা, তুই স্বর্গ আর পিত্‌থিমীর প্রভু। মুই তর্ বাঈনি গরং, কিয়া তুই ইয়েনি বেক্ বিষয়ানি জ্ঞানী আর বুদ্ধিবলাগুনোত্তুন্ লুগেই রাগেয়োচ্ মাত্তর্ চিগোন্ গুড়ো ধোক্ক্যেন্ মানুচ্চুনো ইধু ফগদাং গোজ্যস্। অয় বাবা, তর্ আওজ্ মজিম্ ইয়েনি ওইয়্যে।

²² মঅ বাপ্পো মঅ আঢত্ বেক্কানি দিয়্যে। বাবে বাদে আর কেঅ হবর্ ন-পান্ পুয়ো কন্না, আর পুয়ো বাদে আর কেঅ হবর্ ন-পান্ বাপ কন্না। ইয়েন বাদেয়ো পুয়োবো যিগুনো ইধু বাবরে ফগদাং গুরিবাত্তে আওজ্ গরে বানা তেয়ই হবর্ পায়।

²³ যেরেদি তে শিচ্চ্যগুনো ইন্দি ফিরিনে তারারে ভিদিরে ভিদিরে কলঅ, “তুমি যিয়েনি যিয়েনি দেগর্, সিয়েনি যিগুনে দেগদন্ তারা বর্‌পেইয়্যে।

²⁴ মুই তমারে কঙর্, তুমি যিয়েনি যিয়েনি দেগর্, বোউত্ ভাববাদী আর রাজা সিয়েনি চেবাত্তে চেইনেয়ো ন-দেগন্; আর তুমি যিয়েনি যিয়েনি শুনোর্, সিয়েনি শুনিবাত্তে চেইনেয়ো ন-শুনোন্।”

দোয়্যেলু শমরীয়র্ হিত্ত্য

²⁵ এক্কো ধর্ম-মাষ্টরে যীশুরে যগা চেবাত্তে তাইধু এলঅ। তে কলঅ, “মাষ্টরবাবু, কেধোক্ক্যেন গুরিনে মুই উমর জিংকানি পেম্?”

²⁶ যীশু তারে কলঅ, “মোশির-আইন-কানুনোত্ কি লেগা আঘে? সিয়েনত্ কি পোজ্যস্?”

²⁷ সেই ধর্ম-মাষ্টর্‌বো যীশুরে জোব্ দিলো, “তুমি পত্তিজনে তমার্ বেক্ রিবেঙান্, বেক্ পরাণান্, বেক্ বলান্ আর বেক্ মনান্ দিইনে তমা প্রভু গোজেনরে কোচ্‌পেবা; আর তমা পাড়াল্যেগুনোরে নিজো ধোক্ক্যেন্ কোচ্‌পেবা।”

²⁸ যীশু তারে কলঅ, “তুই ঠিগ্ জোব্‌পান দুয়োচ্। যুনি তুই সিয়েন্ গুরি থাচ্ সালে জিংকানি পেবে।”

²⁹ সেই মাষ্টর্‌বো নিজো সর্মানান্ রোক্ষ্যে গুরিবাত্তে যীশুরে কলঅ, “মঅ পাড়াল্যে কন্না?”

³⁰ যীশু জোব্ দিলো, “এক্কো মানুচ্ যিরূশালেমত্তুন্ যিরীহো শঅরত্ যেবার্ অক্তত্ ডাগেদ আঢত্ পড়িলো। তারা মানুচ্চোর্ কাবড়-চুগোড়ানি খুলি ফেলেলাক্ আর তারে মারিনে আধামরা গুরি থোই গেলাক্।”

³¹ পরেদি এক্কো ধর্মগুরু সে পথ্‌তানদি যার্। তে সেই মানুচ্চোরে দেগিনে এক কিত্তেদি গেলঅ।

³² ঠিগ্ সেবাবোত্যেগুরি এক্কো লেবীয় সেই জাগানত্ এলঅ আর তারে দেগিনে তেয়ো আর এক কিত্তেদি গেলঅ।

³³ সে পরেদি শমরিয় রেজ্যর্ এক্কো মানুচ্অ সেই পথ্‌তানদি যাদে যাদে উ মানুচ্চোর্ কায়কুরে এলঅ। তারে দেগিনে তার্ মেয়্যে অলঅ।

³⁴ মানুচ্চো কায়কুরে যেইনে তে তার্ ঘা-গানি উগুরে তেল্ আর আংগুর-রস্ ঢালি দিইনে বানি দিলো। সে পরেদি তা নিজো গাধাবো উগুরে তারে বোজেইনে এক্কান্ হোটেলত্ নেযেইনে তারে সেবা-যত্ন গুরিলো।

³⁵ তার্‌কেল্যে সেই শমরীয় দ্বিবে দীনার্ নিগিলেনে হোটেল গিরোজ্‌সোরে দিইনে কলঅ, এ মানুচ্চোরে যত্তন্ গুরিবে। যুনি ইত্তুন্ বেশ্ খরচ্ অয় সালে মুই ফিরি এইনে সিগুন সুজিম্।

³⁶ যেরেদি যীশু কলঅ, “ইক্কিনে তর্ কি মনে অয়? এই তিনজনত্তুন্ কন্না সেই ডাগেদ আঢত্ পোজ্যে মানুচ্চোর্ পাড়াল্যে?”

³⁷ সেই ধর্ম-মাষ্টর্‌বো কলঅ, “যে তারে মেয়্যে গুরিলো সে মানুচ্চো।” সেক্কে যীশু তারে কলঅ, “সালে তুয়ো যেইনে সেবাবোত্যে গর্।”

মার্থা আর মরিয়মে

³⁸ ইয়েনর্ পরেদি যীশু আর তা শিচ্চ্যগুনে পধেদি যাদে যাদে কনঅ এক্কান্ আদামত্ সোমেলাক্। সিধু মার্থা নাঙে এক্কো মিলে হুজি ওইনে তা ঘরত্ যীশুরে গুজি ললঅ।

³⁹ মরিয়ম নাঙে মার্থার্ এক্কো বোন এলঅ। তে প্রভুর টেঙ কুরে বোইনে তা কধা শুনের্।

⁴⁰ মাত্তর্ মার্থা হানা-দানার্ বেবস্থা গত্তে বেস্ত এলঅ। সেনত্তে তে এইনে কলঅ, “প্রভু, তুই কি ন-দেগচ্, মঅ বোন্নো বেক্ কামানি গায় গায় মঅ উগুরে ফেলে দিয়্যে? তুই তারে কঅ যেন তে মরে বল্ দে।”

⁴¹ সেক্কে যীশু মার্থারে কলঅ, “মার্থা, মার্থা, তুই ভালোক্কানি পৌইদ্যেনে চিদে গরচ্ আর বেস্ত,

⁴² মাত্তর্ এক্কান্ বানা দরকারী বিষয় আঘে। মরিয়মে সেই গম্ বিষয়ান বেঈ লোইয়্যে। সিয়েন তাত্তুন্ নেযা ন-অবঅ।”