লেবীয় 27 - Chakma Bibleলগেপ্রভুরে দেনা জিনিজো পৌইদ্যেনে সুদোম 1-3 ইয়েনর্ পরেদি লগেপ্রভু মোশিরে কোইয়্যেদে, তুই ইস্রায়েলীয়গুনোরে কঅ, যুনি কনজনে কনঅ বিশেষ মান্যে ছিড়েবাত্তে নিজোরে বা অন্য কনঅ মান্জ্যরে লগেপ্রভু ইদু উৎসর্ব গরে, সালে সে উৎসর্বর্ বদলে যে দামান্ দিয়্যে পুরিবো সিয়েন অলঅ: কুড়িত্তুন ধুরিনে ষায়েট্ বজর বয়জর্ মরদতুনোত্তে ধর্মীয় মাপ মজিম্ পন্জাশ কট্টা রুবো, 4 সে বয়জর্ মিলেগুনোত্তে ত্রিশ কট্টা রুবো; 5 পাজত্তুন্ ধুরি কুড়ি বজর্ বয়জর্ পূঅগুনোত্তে কুড়ি কট্টা রুবো, সে বয়জর্ মিলেগুনোত্তে দশ কট্টা রুবো; 6 এক মাজত্তুন্ ধুরি পাচ্ বজর বয়জর্ পূঅগুনোত্তে পাজ্ কট্টা রুবো, সে বয়জর্ মিলেগুনোত্তে তিন কট্টা রুবো; 7 ষায়েট্ বজর্ বা তার্ বেশ্ বয়জর্ মরদত্তে পন্জাজ্ কট্টা রুবো, সে বয়জর্ মিলেবোত্তে দশ কট্টা রুবো। 8 মান্যেদে সিবে যুনি নাদা অয় আর এ ঠিগ্ গোজ্যে দামান্ দি ন-পারে সালে তাত্তুন্ উৎসর্ব গোজ্যে মানুচ্চোরে নেযেইনে ধর্মগুরুবো ইদু যাহ্ পুরিবো। ধর্মগুরুবো সেক্কে মান্যেদে সিবের্ দিবার্ খেমতাগান বুঝিনে তার্ দামান্ ঠিগ্ গুরি দিবো। 9 তে যুনি লগেপ্রভুর্ মানি লোইয়্যে উৎসর্বর কনঅ য়েমান্ মানত্ গুরি থায়্ সালে লগেপ্রভুরে দিয়্যে সেই য়েমান্নো সুদ্ধো-সাংগ বিলি ধরা পুরিবো। 10 সেই য়েমানর্ বদলে অন্য য়েমান তে দিই ন-পারিবো। সিবে গম্ অলে তার্ বদলে বজঙো বা বজং অলে তার্ বদলে গম্মো দেনা ন-চলিবো। যুনি তে এক্কোে য়েমানর্ বদলে অন্য এক্কো য়েমান দে সালে দ্বিবে য়েমানই সুদ্ধো-সাংগ বিলি ধরা অবঅ। 11 লগেপ্রভু মানি লোইয়্যে উৎসর্ব নয় এধোক্ক্যেন কনঅ ফি-বলা য়েমান যুনি কনজনে মানত্ গরন্ সালে য়েমান্নোরে ধর্মগুরুগুনো ইদু নেযা পুরিবো। 12 য়েমান্নো কি অবস্থায় আঘে ধর্মগুরুবো সিয়েন্ বিচের্ গুরি তার্ যে দামান্ ঠিগ্ গুরি দিবো সিবে অবঅ তার্ দাম। 13 মান্যেদে সিবে যুনি সিয়েন্ ছাড়েই নিবাত্তে চায়্ সালে সেই য়েমান দামান সমারে তাত্তুন্ আরঅ পাচ্ ভাগর্ এক ভাগ দাম বেশ্ দিয়া পুরিবো। 14 যুনি কনজনে তার্ ঘরান্ উৎসর্ব গুরিনে লগেপ্রভুর্ নাঙে যুদো গুরি রাগায়্ সালে ধর্মগুরুবো ঘরানর্ অবস্থা বিচের্ গুরিনে সিয়েনর্ যে দামান্ ঠিগ্ গুরি দিবো সিয়েনোই অবঅ তার্ দাম। 15 যুদো গুরি রাগেয়্যে ঘরান্ যুনি তে ছাড়েইনে নিবার্ চায়্ সালে ঘরানর্ দামান সমারে তাত্তুন্ আরঅ পাচ্ ভাগর্ একভাগ দাম বেশ্ দিয়া পুরিবো। সে পরেদি ঘরান্ আরঅ তার্ ওই যেবঅ। 16 কনজনে যুনি তার্ পবিবারর্ সোম্বোত্তির্ এক ভাগ লগেপ্রভুর্ নাঙে যুদো গুরি রাগেবার্ চায় সালে সে ভূইয়ানত্ যিদুক্কুন্ বীজ লাগা যায় সে মজিম তার্ দামান্ ধরা পুরিবো। পত্তি একশঅ আশি কেজি মোক্কের বীজিত্তে দশ কট্টা রূবো ধরা পুরিবো। 17 ফিরি পেবার্ বজর্বোত্ যুনি তে তার্ ভূইয়ান্ লগেপ্রভুর্ নাঙে যুদো গুরি রাগায়্ সালে ধর্মগুরুবো এ সুদোমে যে দামান্ ঠিগ্ গুরি দিবো ভূইয়ানর্ দামান্ সিয়েনোই থেবঅ। 18 মাত্তর্ ফিরি পেবার্ বজর্বোর পরেদিয়ো যুনি তে তার্ ভূইয়ান্ যুদো গুরি রাগায় সালে সে পরেদি ফিরি পেবার্ বজর্বো এত্তে যেদক্ বজর্ বাগী থেবঅ সিবে ইজেব গুরিনেই ধর্মগুরুবো তার্ দামান্ ঠিগ্ গুরি দিবো। সেক্কে সেই সুদোমে ঠিগ্ গোজ্যে পুরো দামত্তুন্ এ দামান্ কম্ অবঅ। 19 কনঅ ভূই-উৎসর্বগুরিয়েবো যুনি তার্ ভূইয়ান্ ছাড়েই নিবাত্তে চায়্ সালে সেই ভূইয়ানর্ ঠিগ্ গোজ্যে দামান সমারে তাত্তুন্ আরঅ পাঁচ ভাগর্ এক ভাগ দাম বেশ্ দিয়া পুরিবো। ইয়েনর্ পরেদি ভূইয়ান আরঅ তার্ ওই যেবঅ। 20 মাত্তর্ যুনি তে ভূইয়ান্ ছাড়েইনে ন-নেযায় বা আর কার ইদু বিজি দে সালে সিয়েন্ আর ছড়েই নেযা ন-যেবঅ। 21 ফিরি পেবার্ বজরবোত্ যেক্কে ভূইয়ান্ খালাস অবঅ সেক্কে সিয়েন্ লগেপ্রভুর্ নাঙে ভস্তর্ অভিশাবর্ তলে ভূইয়ো ধোক্ক্যেন লগেপ্রভুর্ নাঙে যুদো গরা যেবঅ। সেক্কে সিয়েন্ অবঅ ধর্মগুরুগুনোর্ সোম্বোত্তি। 22 নিজোর্ পরিবারর্ ভূইয়োর্ কনঅ ভাগ নয় এধোক্ক্যেন কনঅ কিনি নেযেয়্যে ভূই যুনি কনজনে লগেপ্রভুর্ নাঙে যুদো গুরি রাগান, 23 মাত্তর্ ধর্মগুরুবো ফিরি পাইদে বজরবো সং ইজেব গুরিনে সিয়েনর্ দামান্ ঠিগ্ গুরি দিবো। সেদিন্যেই সেই ভূইয়োর্ দামান্ তাত্তুন্ লগেপ্রভুর নাঙে পবিত্র জিনিস্ ইজেবে দিয়্যে পুরিবো। 24 ভূইয়ান্ তে যাত্তুন্ কিনিবো ফিরি পাইদে বজরত্ সিয়েন্ আরঅ তা সিদু, অত্তাৎ ভূইয়োর্ আগ গিরোজ ইদু যেবগোই। 25 বেক্কানির্ দাম ধর্মীয় শেখলর মাপ্ মজিম ঠিগ গরা পুরিবো। দশ গ্রামত্ এক্কো ধর্মীয় শেখেল অয়। 26 কনঅ য়েমানর্ পত্তম চেলা ছঅবো কনজনে লগেপ্রভুর নাঙে যুদো গুরি রাগেই ন-পারিবো, কিত্যে বেক্ য়েমানর্ পত্তম ছঅগুন্ লগেপ্রভুর। ছঅবো গোরুর ওক্ বা ভেড়ার ওক্ সিবে লগেপ্রভুর। 27 যুনি সিবে কনঅ ফি-বলা য়েমানর্ পত্তম ছঅ অয় সালে ধর্মগুরুগুনোর্ ঠিগ গুরি দিয়া দাম সমারে আরঅ পাঁচ ভাগর্ এক ভাগ দাম বেশ্ দিইনে সিবে তে ছাড়েই নেযেই পারিবো। যুনি তে সিবে ছড়েইনে ন-নেযায় সালে সে ঠিগ গুরি দিয়া দামান্দোই সিবে বিজি দিয়া পুরিবো। 28 মাত্তর্ যুনি কনজনে তার্ নিজোর্ কনঅ কিজু লগেপ্রভুর নাঙে ভস্তর্ অভিশাবর তলে বিলি ফগদাঙ্ গরন সালে তে সিয়েন্ আর বিজি দেনা বা ছাড়েই নেযে ন-পারিবো-সিয়েন্ পরিবারর্ ভূই ওক্ বা মানুচ্ বা য়েমান ওক্। এধোক্ক্যেনগুরি যেদক্কানি ভস্তর্ অভিশাবর্ তলে বিলি ফগদাঙ্ গরা অয় সিয়েনি বেক্কানি লগেপ্রভুর নাঙে দাঙর্ পবিত্র জিনিস্ বিলি ধুরি নেযা পুরিবো। 29 যুনি কনঅ মান্জ্যরে লগেপ্রভুর নাঙে ভস্তর্ অভিশাবর্ তলে বিলি ফগদাঙ্ গরা অয় সালে তারে ছড়েই নেযানা ন-চলিবো, তারে মারে ফেলা পুরিবো। 30 “ভূইয়োত্তুন্ যিয়েনি পাহ্ যেবঅ তার্ দশ ভাগর্ এক ভাগ লগেপ্রভুর-সিয়েন্ ভূইয়োর্ ফসল ওক্ বা গাজর্ গুলোগুলি ওক্। সিয়েন্ লগেপ্রভুর্ নাঙে যুদো গুরি রাগেয়্যে । 31 কনজনে যুনি তার্ সেই দশ ভাগর এক ভাগ ছড়েইনে নিবার্ চায়্ সালে তার্ দামান সমারে তাত্তুন্ আরঅ পাচ্ ভাগর্ একভাগ দাম বেশ্ দিয়া পুরিবো। 32 পত্তি য়েমানপালর্ দশ ভাগর এক ভাগ, অত্তাৎ গোরু চোড়েয়্যে লুদিক্কোর্ তলেন্দি যেইয়্যে পত্তি দশ লম্বর য়েমান্নো অবঅ লগেপ্রভুর নাঙে যুদো গুরি রাগেয়্যে। 33 এই দশ লম্বর য়েমানুন গম্ নাকি ভান্ন্যেই সিয়েন্ চেই ন-পারিবো বা এক্কোর্ বদলে অন্য এক্কো দেনা ন-চলিবো। যুনি কনজনে সিয়েন্ গরন্ সালে সেই দশ লম্বর য়েমান্নো আর তার্ বদলে যে য়েমান্নো তে দিবো সিবেয়ো লগেপ্রভুর্ নাঙে যুদো গুরি রাগা অবঅ আর সিবে ছাড়েই নেযে ন-পারিবো।” 34 লগেপ্রভু ইস্রায়েলীয়গুনোত্তে এই বেক্ উগুমানি সিনাই মুড়োবোত্ মোশি ইদু দিয়্যেগোই। |
Copyright © 2021 Bangladesh Bible Society
Bangladesh Bible Society