লেবীয় 26 - Chakma Bibleবাধ্য থানাত্যে বর্ পানা 1 কনঅ বাবোত্যে দেবেদা মূত্তি তুমি ন-বানেয়ো। নিজোত্তে তক্তালোই কাবিনে বানেয়্যে মূত্তি বা কনঅ পূজোর পাত্তর্ তুমি ন-বোজেবা। পূজো গুরিবাত্তে তুমি পাত্তর্ কাবিনে বানেয়্যে কনঅ মূত্তি তমা দেজত্ ন-রাগেবা। মুই লগেপ্রভু তমার গোজেন। 2 মর্ জিরেবার দিনুন্ আর বজরুন তমাত্তুন্ পালা পুরিবো; মর্ পবিত্র তাম্বুল উগুরে তমাত্তুন্ শ্রদ্ধা রাগা পুরিবো। মুই লগেপ্রভু। 3-4 যুনি তুমি মর্ বেক্ সুদোমানি মান আর মর্ উগুমানি পালেইনে চলঅ সালে ঠিগ্ সময়োত্ মুই ঝড়র্ বেবস্থা গুরিম। সেক্কে তমার ভূইয়ানিত্ বেক্ ফসলানি অবঅ আর গাজ-বাজর্অ ফল জোর্মেবাক। 5 সেক্কে তমার্ গম্ মাড়ানা কাম্ চুলিবো আংগুর তুলোনা অক্ত সং আর আংগুর তুলোনা চুলিবো বীজ লাগানার্ অক্ত সং। তুমি সেক্কে পেট ভুরিনে হেই পেবা আরঅ দেজ ভিদিরে চিদেসজ্জা নেইয়্যে গুরি বজত্তি গুরি পারিবা। 6 দেজত্ সেক্কে মুই সুখ্ দিম। তুমিয়ো সুগে-শান্দিয়্যে ঘুমেবা; কারত্তুন্ কনঅ দোরেবার্ কারন তমার্ ন-থেবঅ। মুই দেজত্তুন্ চিৎ নপুজ্যে য়েমানুন্ ধাবেই দিম্। কনঅ সৈন্য-সামন্ত তমার দেজ্চানরে আক্রমণ গুরিবাত্তে ন-এবাক্। 7 তুমি তমার্ শত্রুগুনোরে লোড়েবা আর শত্রুগুনে তমা মুজুঙোদ্ মুরি যেবাক্। 8 বানা পাচজনে মিলিনে তুমি একশতজন শত্রুরে আর একশতজন মিলিনে দশ আজার শত্রুরে লোড়েবা, আরঅ শত্রুগুনে তমা মুজুঙোত্ মুরি যেবাক্। 9 মুই তমারে সেক্কে কোচ্পানার চোগেন্দি চেম্ আর বংশ বাড়েইনে তমা মানুচ্চুন বাড়েই দিম, আর তমা সমারে মুই মর্ সুদোমান ঠিগ্ রাগেম। 10 নূয়ো শোজ্য রাগেবাত্তে গোলাঘর খালি গুরিবার্ অক্তত্অ আগ বজরর্ শোজ্যত্তুন্ তমার্ খা পুরিবো। 11 মুই তমান্দিত্তুন্ মর্ মুয়োন ন-ফিরেম্। তমা ভিদিরেই মুই মর্ বজত্তির্ জাগায়ান্ গুরিম। 12 মুই তমা সমারে আদাউদো গুরিম আর তমার্ গোজেন ওম্ আরঅ তুমি মর্ নিজোর্ মানুচ্ অবা। 13 মুই লগেপ্রভু তমার গোজেন। মিসর দেজত্তুন্ মুয়ই তমারে নিগিলেই আন্যং যেনে মিসরীয়গুনোর্ চাগর্ ওইনে তমাত্তুন্ আরঅ থাহ্ ন-পড়ে । কানাগানর্ জুঙোলান্ ভাঙি ফেলেইনে মুয়ই তমা মাদাগুন উজু গুরিনে আদিবার্ অবস্থাত্ আন্যং। অবাধ্য অনার্ সাজা 14 মাত্তর্ তুমি যুনি মর্ কধানি ন-শুনো আর এ বেক্ উগুমানি পালন ন-গরঅ, 15 যুনি তুমি মর্ সুদোমানি অগ্রাজ্য গরঅ আর মর্ রীদি-সুদোমানি তুচ্ছো গরঅ, যুনি তুমি মর্ উগুমানি ন-পালেইনে মর্ সুদোমান ভাঙঅ, 16 সালে মুই তমা উগুরে যিয়েন্ গুরিম সিয়েন্ এই-মুই তমা উগুরে অদাদৎ কনঅ কিয়্যে ক্ষয় যাইদে রুগ্ আর সাংগাদিক জ্বর্ আনিম। এদক্কানি রুগ্কোই তমার্ চেবার্ খেমতা আর কিয়্যের্ বল্ কমা ধুরিবো। সেক্কে তুমি বীজ ফেলেলেয়ো কনঅ লাভ ন-অবঅ, তমার ফসলানি শত্রুগুনেই হেবাক্। 17 মুই তমান্দিত্তুন্ মুয়োন ফিরেই নেযেম্ আর তুমি তমার শত্রুগুনো ইদু উদি যেবা। তমারে ঈচ্ গরন্দেগুনে তমারে শাজন গুরিবাক্ আর কনজনে তমারে ন-লোড়েলেয়ো তুমি ধেই যেবা। 18 এদক্কানির্ পরেদিয়ো যুনি তুমি মর্ কধানি ন-শুনো সালে মুই তমার্ পাপর্ সাতগুণ সাজা দিম। 19 মুই তমার্ বলর্ বাহাদুরি ভাঙি দিম। মুই তমার্ মাদা উগুরে আগাচ্চান্ লুয়ো ধোক্ক্যেন আর টেঙর্ তলে মাটিগান্ পিদল ধোক্ক্যেন দরঅ গুরি দিম। 20 সেক্কে তুমি অনত্তক্ কাম গুরিনে মুরিবা; তমার ভূইয়োত্ সেক্কে ফসলঅ ন-অবঅ, গাজ-বাজত্ গুলোগুলিও ন-ধুরিবাক্। 21 তমার মনত্ যুনি মঅ উগুরে শত্রুতাভাব থায়্ আর যুনি তুমি মর্ কধালোই কান দিবাত্তে ন-চঅ সালে তমার্ পাপর্ সাজা মুই সাতগুন্ বাড়েই দিম। 22 মুই তমা ইধু চিৎ নপুজ্যে য়েমান পাধেই দিম। সিগুনে তমার ঝি-পূঅগুনোরে হেই ফেলেবাক্, তমারে য়েমানপালুনে শেজ্ গুরিবাক আর তমার মান্জ্যর সোংখ্যে কোমেই দিবাক। সেক্কে তমার পথ্তানি খালি পড়ি থেবঅ। 23 এদক্কানি ঘটনার্ পরেদিয়ো যুনি তুমি মর্ শাজনানি মানি ন-নেযেইনে মর্ বিপক্ষে আদঅ, 24 সালে মুই নিজে তমার্ শত্রু ওইনে তমার্ পাপর্ সাতগুন্ সাজা দিম। 25 মর্ সুদোম ভাঙানাত্যে মুই তমা উগুরে যুদ্ধো আনিম। শত্রুগুনে দেগিনে যেক্কে তুমি শঅরত্ যেইনে চুমিবা সেক্কে তমা ইধু মুই ভানা পাদেই দিম, আর সেক্কে তুমি শত্রুর আঢত্ যেইনে পুরিবা। 26 মুই তমারে হানার্ অভাব-অনটনত্ ঘোদেম্। সেক্কে দশজন মিলের্ রুটি সেঁক্কে এক্কোত্তুন্ বেশ্ চুলো ন-লাগিবো, আর হেবার্ অক্তত্ তুমি রুটি মাবি মাবি দিবা। তুমি পেট ভুরি হেই ন-পেবা। 27 এদক্কানির্ পরেদিয়ো যুনি তুমি মর্ কধা ন-শুনিনে মর্ বিরুদ্ধে চলঅ, 28 সালে মুইয়ো অমকদ বেজার্ ওইনে তমা বিপক্ষে চলিম আর তমার পাপর্ সাতগুন্ সাজা দিম। 29 সেক্কে পেট পড়ায়্ তুমি তমার্ ঝি-পূঅগুনোর্ য়েরা হেবা। 30 মুই তমার পূজোর উজু জাগায়ানি শেজ্ গুরি দিম, পৌইরেক-পূজো ভাঙি ফেলেম আর তমার পরাণ নেইয়্যে দেব-দেবীগুনো উগুরে তমার মরাকিয়্যেগানি ফেলেই দিম, আর মুই তমারে অমকদ ঘিনাইদে চোগোন্দি চেইম্। 31 মুই তমার্ আদামানি আর শঅরানি আর উবোসনার্ ঘরানি শেজ্ গুরি দিম। তমার উৎসর্বর তুম্বাজ্চান্ মুই গুজি ন-লোম। 32 মুই তমার দেজ্চান্ এমনগুরি ভস্ত অবস্থাত্ ফেলেই রাগেম যিয়েন দেগিনেই তমার শত্রু-আদাম্মেগুনেয়ো আমক্ ওই উদিবাক্। 33 ভালোক্ জাদ ভিদিরে মুই তমারে ছেট্টেরাগুরি রাগেম্ আর লাম্বা ছুড়ি আঢত্ লোইনে তমা পিজে পিজে লোড়েম। তমার দেজর্ বেক্ ভূই, শঅর আর আদামানি ভস্ত ওইনে পড়ি থেবঅ। 34 যেক্কে তুমি তমার্ শত্রুগুনোর্ দেজত্ থেবা সেক্কে ভস্ত ওইনে পড়ি থেইয়্যে তমার্ সেই দেজ্চান্ তার্ পাওনা বেক্ জিরেবার্-বজরুন্ ভোগ গুরিবাত্তে থেবঅ। অয়্, সেক্কে তমার দেজ্চানে জিরেন্ পেবঅ আর তার্ পাওনা জিরেবার্-বজরুন্ ভোগ গুরিবো। 35 তুমি নিজোর্ দেজত্ বজত্তি গুরিবার্ অক্তত্ তমার্ ভূইয়ানি জিরেবার্-বজরুনোত্ জিরেন্ ন-পায় বিলি যেক্কে দেজ্চান্ ভস্ত ওইনে পড়ি থেবঅ সেক্কে ভূইয়ানি জিরেন পেবঅ। 36 তমা ভিদিরেত্তুন্ যিগুনে শত্রুগুনোর্ দেজত্ বাঁচি থেবাক্ তারার্ মনত্ মুই এমন্ দর্ ভোরেই দিম্, বোইয়্যেরত্ পাদা লড়িবার্ রঅবোলোইয়ো তারা ধেই যেবাক্। যুদ্ধোর্ দরে যেধোক্ক্যেন গুরি মান্জে ধেই যান্ সেধোক্ক্যেন গুরি তারা ধেই যেবাক্। পিজেন্দি কনজনে লোড়েইনে ন-গেলেয়ো তারা দাবা যাদে উজোত্ হেইনে পড়ি যেবাক্। 37 কনজনে তারার্ পিজেন্দি ন-লোড়েলেয়ো যুদ্ধোর্ আদত্তুন্ বাঁচিবাত্তে আদি যেইয়্যে মান্জ্য ধোক্ক্যেন গুরি দাবা দিবাত্তে যেইনে তারা এক্কো আর এক্কো উগুরে পড়িবাক্। শত্রুগুনোর মুজুঙোত্ তুমি থিয়্যেই ন-পারিবা। 38 ভালোক্ জাদর্ ভিদিরে ছেট্টেরা ওই পড়িনে তুমি মুরি যেবা, শত্রুগুনোর্ দেজ্চানে তমারে গিলি হেবঅ। 39 সে পরেদিয়ো তমা ভিদিরে যিগুনে সিয়েনত্ পড়ি থেবাক্ তারা তারার্ নিজোর আর আগমানুচ্চুনোর্ দুজোর্ কারনে শেজ্ ওই যেবাক্। 40-41 “মঅ উগুরে অবিশ্বেজর্ আর বিপক্কত্তে মুই তারার্ বিপক্ষে যেইনে শত্রুগুনোর্ দেজত্ তারারে নেযেম্। মাত্তর্ সিয়েনত্ যুনি তারা নিজোর আর তারার্ আগমানুচ্চুনোর সেই বেক্ দুষ্চানি কাম্ খান আর তারার অবাধ্য মনান্ নরম গরে আরঅ তারার্ দুজোর্ সাজা মানন্, 42 সালে মুই যাকোব, ইস্হাক আর অব্রাহামর্ লগে মর্ সুদোমর্ কধা আর তারার্ দেজর্ কধা মনত্ তুলিম্। 43 বাধ্য ওই দেজ্ ছাড়ি যেবার্ পরেদি ভস্ত ওইনে পড়ি থেইয়্যে তারার্ দেজ্চান্ তার্ পাওনা বেক্ জিরেবার্-বজরুন্ ভোগ গুরি থেবঅ। মর্ রীদি-সুদোমানি অগ্রাজ্য আর সুদোমানি ঘিনেনার্ কারনে দুজোর্ সাজা তারার্ পাহ্ পুরিবো। 44 তো শত্রুগুনোর্ দেজত্ থেবার্ অক্তত্ মুই তারারে এধোক্ক্যেনগুরি অগ্রাজ্য ন-গুরিম বা ঘিনাইদে চোগেদি ন-চেম্ যেনে তারা এক্কুবারেই ভস্ত ওই যান্ আর ইঙিরিনে তারা সমারে মর্ সুদোমান্ ভাঙি যায়। মুই লগেপ্রভু তারার্ গোজেন। 45 তারাত্তেই তারার্ আগমানুচ্চুনো সমারে মর্ সুদোমর্ কধা মুই মনত্ তুলিম। এই আগমানুচ্চুনোর্ গোজেন অবঅ বিলি অন্য জাদর্ চোগো মুজুঙোন্দি মিসর্ দেজত্তুন্ মুই তারারে নিগিলেই আন্যং। মুই লগেপ্রভু।” 46 ইয়েনিই অলঅ সেই উগুমানি, রীদি-সুদোম আর নিয়োম যিয়েনি সিনাই মুড়োবোত্ মোশির্ মাধ্যমে লগেপ্রভু তাঁর্ সুদোম ইজেবে ইস্রায়েলীয়গুনোত্তে থিদেবর্ গোজ্যে। |
Copyright © 2021 Bangladesh Bible Society
Bangladesh Bible Society