লেবীয় 25 - Chakma Bibleজিরেবার-বজরবোর্ সুদোম 1-2 সিনাই মুড়োবো উগুরে লগেপ্রভু মোশির মাধ্যমে ইস্রায়েলীয়গুনোরে কবাত্তে কোইয়েদে, মুই যে দেজ্চান্ তমারে দিবাত্তে যাঙর্ সেই দেজত্ যেবার পরেদি তমাত্তুন্ চাহ্ পুরিবো সেই জাগায়ানর্ ভূইয়ানি লগেপ্রভুর নাঙে জিরেবার সময় পায়। 3 ছয় বজরত্ তুমি ভূইয়োত্ বীজ লাগেবা আর আংগুর্ গাজর্ ডেলা কাযেই দিবা আর গুলোগুলি তুলি আনিবা। 4 মাত্তর্ সাত বজরত্ ভূইয়ানিরে জিরেবার সময় দিয়্যে পুরিবো। ইবে অবঅ লগেপ্রভুর নাঙে জিরেবার দিন। সে সময় তুমি ভূইয়োত বীজ ন-ফেলেবা আর আংগুর্ গাজর ডেলা ন-কাজেবা। 5 সেক্কে ভূইয়োত যিয়েন্ নিজোত্তুন্ জোর্মেব সিয়েন্ তুমি কাবিনে জমা গুরি ন-রাগেবা বা যত্তন্ ন-গোজ্যে অবস্থায় যিদুক্কুন্ আংগুর অবাক্ সিগুনো তুলি ন-আনিবা। ভূইয়ানিরে এক বজর জিরেবাত্তে দিয়্যে পুরিবো। 6 জিরেবার-বজরত্ ভূইয়ানত্ যিয়েনি নিজোত্তুন্ জোর্মেব সিয়েনিই তমার নিজোর, চাগর-চাগরানীগুনোর, তমা ভিদিরে বজত্তি গোজ্যে অন্য জাদর্ চাগর্ আর অন্য মানুচ্চুনোর, 7 পালেয়্যে পরাণবলাগুনোর্ আর দেজ ভিদিরে ঝার্বো য়েমানুনোর হানা অবঅ। এ সময়োত ভূইয়োত্ যিয়েনি জোর্মেব সিয়েনি তুমি হেবা। ফিরি পেইয়্যে বজর্ আর তা সুদোম 8 সাত্তো সাত বজর, অত্তাৎ সাত্তো জিরেবার-বজর পর পর তমাত্তুন্ গুণিনে যাহ্ পুরিবো। ইঙিরিনে সাত্তো জিরেবার বজর পার্ ওই গেলে উনোপঞ্চাশ বজর অবঅ। 9 সে পরেদি বজরর্ সাত মাজর্ দশ দিনোত, অত্তাৎ পাপ ঢাগি দিবার্ দিন্নোত্ তমার দেজত্ বেক্ জাগানিত্ শিংগা বাজা পুরিবো। 10 এ পঞ্চাশ বজরর্ বজর্বোত্ লগেপ্রভুর নাঙে যুদো গুরি নেযেয়ে দেজর্ বেক্ মানুচ্চুনো ইদু উদ্ধোর্ ফগদাঙ্ গরা পুরিবো। তমাত্তেই এই বজরবো অবঅ ফিরি পেইয়ে বজর। এ বজরত্ তুমি বেক্কুনে যে যার্ বংশত্ আর পরিবারর্ সোম্বোত্তিত্ ফিরি যেবা। 11 পত্তি পঞ্চাশ বজরর্ শেজ বজরবো তমাত্তেই ফিরি পাইদে বজর্ অবঅ। এ বজরত্ তুমি বীজ ন-ফেলেবা আর নিজোত্তুন্ ভূইয়ানত্ যিগুন্ জোর্মেবাক সিগুন্ ন-কাবিবা বা যত্তন্ ন-গোজ্যে অবস্থায় যিদুক্কুন্ আংগুর্ জোর্মেবাক সিগুন্ তুলি ন-আনিবা। 12 ইবে অবঅ এক্কো ফিরি পেইয়ে বজর আর তমাত্তুন্ সিবে পবিত্র বিলি মানা পুরিবো। ভূইয়োত্তুন্ এমনে যিগুন্ পাহ্ যেবঅ সিগুনোই তমাত্তুন্ হা পুরিবো। 13 ফিরি পেইয়ে বজরত্ তুমি বেক্কুনে যে যার পরিবারর্ সোম্বোত্তিত্ ফিরি যেবা। 14 তুমি নিজো ভিদিরে ভূই বেজা-কিনে গুরিবার সময়োত্ কারঅ উগুরে অন্যেয় ন-গোজ্য। 15 যে ভূইয়ানি কিনিবো তারে ফিরি পেইয়ে বজরবোর্ পর কয় বজর ওই যেইয়ে সিয়েন্ ইজেব গুরি সে ভূইয়ান্ কিনে পুরিবো আর যে সেই ভূইয়ান্ বিজিবো তারেয়ো ইজেব গুরি চাহ্ পুরিবো মুজুঙেদি ফিরি পেইয়ে বজরবো এবার আগে কয় বজর সং ভূইয়োত্তুন্ ফসল তুলো যেবঅ। 16 যুনি দেগা যায় বেশ্ কয়েক বজর ফসল কাবা যেবঅ সালে ভূইয়োর্ দামান্ বাড়া পুরিবো মাত্তর্ কম অলে দাম কমা পুরিবো, কিত্যে আজলে ভূইয়োত্তুন্ কয়বার্ ফসল তুলো যেবঅ সে সোংখ্যেবোই বেজা অর্। 17 তুমি কনজনে কারঅ উগুরে অন্যেয় ন-গোজ্য। তুমি বেক্কুনে তমার গোজেনরে দোরেইনে চলিবা, কিত্যেই মুই লগেপ্রভু তমার গোজেন। 18 তুমি মর্ সুদোমানি পালেবা আর মর্ রীদি-সুদোমানি মানি চলিবা; সেক্কে তুমি দেজত্ নিচিদেগুরি বজত্তি গুরি পারিবা। 19 সেক্কে তুমি ভূইয়োত্তুন্ পুরো ফসলানি পেবা আর পেট ভুরি হেইনে নিচিদেগুরি সিয়েনত্ বজত্তি গুরি পারিবা। 20 তুমি অয়দ পুযোর্ গুরিবা, সাত বজরত্ আমি যুনি বীজ ন-লাগেই আর ফসল ন-কাবিই সালে কি হেবং? 21 ইয়েনর উত্তোর্ অলঅ ছয় বজরত্ মুই তমারে এমনগুরি বর্ দিম যেনে সে বজরত্ তিন বজর্ চুলি পারদে ধোক্ক্যেন ফসল অয়। 22 সে পরেদি আস্টো বজরত্ বীজ ফেলেবার সময়ানদ পুরোন্ ফসলত্তুন্ তমার্ হা পুরিবো আর নয় বজরত্ ফসল ন-তুলোনা সং সেই তুবেয়ে ফসলত্তুন্ তুমি হেই পারিবা। 23 উমরত্তে কারঅ ভূই বেজানা ন-চলিবো, কিত্যে বেক্ ভূইয়ানি মর্ আরঅ মঅ মুজুঙোত্ তুমি সিয়েনত্ পরবাস্যে ওইনে বজত্তি গুরিবা। 24 তমার্ বেক্কুনোর্ কিনি নেযেয়ে ভূইয়ানি যেনে আরঅ ছাড়েই নেযা যায় সেই সুদোমান রাগা পুরিবো। 25 তমার কনঅ ইস্রায়েলীয় ভেই যুনি নাদা ওই যেইনে তার্ পরিবারত্তুন ভূইয়োর্ কিজু ভাগ বিজি দে সালে তার্ বেগত্তুন্ সঢর্ কুদুম্মোবো এইনে সেই বিজি দিয়্যে সোম্বোত্তিগান ছাড়েই নেযা পুরিবো। 26 তার্ ওইনে সিয়েন্ ছাড়েই নেযেবার্ ধোক্ক্যেন কনজন ন-থেলেয়ো যুনি নিজেই নিজোর্ অবস্থা ভালেদি গুরিনে সিয়েন্ ছাড়েই নেযেই পারে, 27 মাত্তর্ সিয়েন্ বেজানার্ পরেদি বজরুনোত্ তাত্তুন্ গুণি চাহ্ পুরিবো আর বাগি বজরুনোর্ টেঙালোই যে ভূইয়ান্ কিন্যে তাত্তুন্ ফেরত দিয়্যে পুরিবো। ইয়েনর পরেদি তে তার্ নিজোর্ ভূইয়োত্ ফিরি যেই পারিবো। 28 মাত্তর্ টেঙা ফিরেই দিবার্ মত অবস্থা যুনি তে গুরি ন-পারে সালে যে ভূইয়ান্ তে বিজি দিয়্যে সিয়েন্ ফিরি পাইদে বজর সং যে সিয়েন কিন্যে তার্ আঢত্ থেবঅ। ফিরি পাইদে বজরত্ সে ভূইয়ান্ ফিরেই দিয়্যে পুরিবো আর সেক্কে তে নিজোর্ ভূইয়োত্ ফিরি যেই পারিবো। 29 দেবাল্লোই-ঘিজ্যে কনঅ শঅরর্ কনঅ ঘর্ যুনি কেউই বিজি দুয়োন্ সালে বেজানার্ পরেদি পুরো এক বজর্ সং সিয়েন্ ছাড়েই নেযেবার্ অধিকার্ তার্ থেবঅ। এ সময়ো ভিদিরে তে সিয়েন ছাড়েই নেযে পারিবো। 30 ঘরান্ যুনি এক বজর ভিদিরে ছাড়েই নেযা ন-অয় সালে যে সিয়েন্ কিন্যে থিদেবর্ গোজ্যে গুরিনে সিয়েন্ তার্ আরঅ তার বংশধরুনোর ওই যেবঅ। ফিরি পেবার্ বজরত্ সিয়েন্ ফিরেই দিয়্যে ন-পুরিবো। 31 মাত্তর্ যেদক্কানি আদামর্ চেরোকিত্তে দেবাল্ নেই সেজাগানর্ ঘরানি খুলোমেলা ভূইয়োর-জাগান ধোক্ক্যেন ধুরি নেযা পুরিবো। সিয়েনি ছাড়েই নেযা যেবঅ আর ফিরি পেবার্ বজরত্ সিয়েনি ফেরদঅ দিয়্যে পুরিবো। 32 মাত্তর্ সোম্বোত্তি ইজেবে পেইয়ে লেবীয়গুনোর্ বেক্ আদাম আর শহর আর সিয়েনি ভিদিরে ঘরানি তারার্ যে কনঅ সময় ছাড়েই নেযেবার্ অধিকারান থেবঅ। 33 লেবীয়োগুনোর্ বিজি দিয়্যে সোম্বোত্তি, অত্তাৎ লেবীয়গুনোর্ আদামত্ আর শহরত্ তারার্ বিজি দিয়া ঘর-বাড়ী যুনি কনঅ লেবীয় ছাড়েই নিবাত্তে চায়, সালে ফিরি পাইদে বজরত্ তে সিয়েন্ ছাড়েই নেযেই পারিবো, কিত্যে ইস্রায়েলীয়গুনো ভিদিরে লেবীয়গুনোর্ আদামান আর শঅরর্ ঘরানি তারার্ সোম্বোত্তি। 34 মাত্তর্ তারার্ আদাম আর শঅরর্ য়েমান চোড়েবার্ মাঠ্টুন্ বিজি ন-পারিবাক্; সিগুন্ তারার্ উমরর্ সোম্বোত্তি। 35 তমার্ কনঅ ইস্রায়েলীয় ভেই যুনি নাদা অবস্থায় পড়িনে নিজোর্ হানা-উরোনার বেবস্থা গুরি ন-পারে, তো যেনে তে তমা ভিদিরে বজত্তি গুরি পারে সেনত্তেই পরবাস্যেগুনোরে যেধোক্ক্যেনগুরি সাহায্য গরা অয় তারেয়ো সেধোক্ক্যেন গুরিনে সাহায্য গরা পুরিবো। 36 তুমি তাত্তুন্ কনঅ বাবদে সুদ নেযেই ন-পারিবা, বরং মানুচ্চো যেনে তমা ইধু বজত্তি গুরি পারে সেনত্তেই তমার গোজেনরে তুমি দোরেনেই চলিবা। 37 মাত্তর্ টেঙা উদোর্ দিলে কনঅ সুদ নেযানা ন-চলিবো তা সিদু কনঅ হেবার্ জিনিস্ বিজিলে কনঅ লাভ গরানা ন-চলিবো। 38 মুই লগেপ্রভু তমার গোজেন। কনান দেজ্চান্ দিবাত্তে আর তমার্ গোজেন অবাত্তে মুয়ই মিসর দেজত্তুন্ তমারে নিগিলেই আন্যং। 39 তমার কনঅ ইস্রায়েলীয় ভেই যুনি নাদা অবস্থায় পড়িনে নিজোরে তমার কার ইদু বিজি দে সালে তুমি তারে চাগর ধোক্ক্যেন ন-খাদেবা। 40 অন্য জাদর্ চাগর সমারে, অত্তাৎ অন্য জাদর্ আদাম্মে সমারে যেধোক্ক্যেন বেবহার গরা অয় তা সমারে সেধোক্ক্যেন বেবহার গরা পুরিবো। তে তাত্তেই ফিরি পেবার বজর সং কাম গুরিবো। 41 সে পরেদি তারে আর তার্ ঝি-পূঅগুনোরে ছাড়ি দিয়্যে পুরিবো। তে সেক্কে তার্ নিজোর্ বংশর আর আগমানুচ্চুনোর্ ভূইয়ানি ফিরি যেবঅ। 42 ইস্রায়েলীয়গুনে মর্ চাগর; মুয়ই তারারে মিসর দেজত্তুন্ নিগিলেই আন্যং; সেনত্তেই আরঅ কারর চাগর্ ইজেবে তারারে বেজানা ন-চলিবো। 43 তুমি কনজনে কারঅ উগুরে চিৎনপুজ্যে বেবহার্ ন-গোজ্য; তুমি তমার গোজেনরে দোরেনেই চলিবা। 44 তমা কায়কুরে যে জাদ্তুনে থেবাক্ তারা ভিদিরেত্তুন্ তুমি চাগর্-চাগরানি কিনি নেযেই পারিবা। 45 তমা ভিদিরে বজত্তি গোজ্যে অন্য জাদর্ মানুচ্চুনো ভিদিরেত্তুন্ আর তারার্ বংশর্ যিগুনে তমার দেজত্ জোর্মেয়োন্ তারা ভিদিরেত্তুনো তুমি নিজোর্ সোম্বোত্তি ইজেবে চাগর্-চাগরানি নেযেই পারিবা। 46 এ চাগর্-চাগরানিগুনোরে তুমি সোম্বোত্তির্ ভাগ্ ইজেবে ঝি-পূঅগুনোরে দিইনে যেই পারিবা। তুমি তারার্ পুরো জিংকানিবর্ চাগর্ ইজেবে রাগেই পারিবা, মাত্তর্ তমার্ নিজোর্ জাদ ইস্রায়েলীয়গুনো উগুরে তুমি চিৎনপুজ্যে বেবহার গুরি ন-পারিবা। 47 তমা ভিদিরে কনঅ পরবাস্যে যুনি মাজন্ ওই উদে আর তমাত্তুন্ কনজনে যুনি নাদা অবস্থায় পড়ন্ তা সিদু বা তার্ বংশর্ কার ইদু নিজোরে বিজি ফেলায়, 48 মাত্তর্ নিজোরে ছাড়েই নিবার্ অধিকার্ তার্ থেবঅ। তার্ নিজোর্ কনঅ ভেই তারে ছাড়েই নেযেই পারিবো। 49 সিয়েন্ বাদে কুট্টো বা জেঠ্টা অথবা কুট্টো-জেঠ্টাপুত্ ভেই বা বংশর এধোক্ক্যেন কনজন যিবে সমারে তার্ লো-গানদি মিল্ আঘে তেয়ো তারে ছাড়েই নেযে পারিবো। অবস্থা ভালেদি গুরি পারিলে তে নিজেই নিজোরে ছাড়েই নেযে পারিবো। 50 যে বজরত্ তে নিজোরে বিজি দিবো সে বজরত্তুন্ ধুরি আরাম্ভ গুরিনে ফিরি পাইদে বজর্ সং কয় বজর্ অয় সিবে তে আরঅ তার্ গিরোজ্সো ইজেব রাগেব। সেই কয় বজরর এক্কো চাগরর্ যিগুন্ পাওনা অবঅ সে ইজেবে তার্ উদ্ধোর-দামান্ ঠিগ্ গরা অবঅ। 51 ফিরি পাইদে বজর্বো এত্তে যুনি ভালোক্ বজর্ বাগি থেই যায়্ সালে যে দামে তে নিজোরে বিজি দিয়্যে সে দামর্ এক্কো দাঙর্ ভাগ্ নিজোত্তুন্ ছাড়েই নিবাত্তে তার্ দিয়্যে পুরিবো। 52 ফিরি পেবার বজর্বো এত্তে যুনি বানা কয়েক বজর বাগি থায়্ সালে ইজেব গুরিনে সিদুক্কুন্ টেঙালোই তে নিজোরে ছাড়েই নেযে পারিবো। 53 বজর্ ইজেবে রাগেয়ে চাগর ধোক্ক্যেন গুরি তারে চাহ্ পুরিবো আর তমাত্তুন্ চোগ্ দিয়্যে পুরিবো যেনে তা গিরোজ্সো তা উগুরে চিৎনপুজ্যে বেবহার্ ন-গরে। 54 ইগুনোর্ কনঅ উপায়ে যুনি তারে ছাড়েই নেযা ন-অয় সালে তারে আর তার্ ঝি-পূঅগুনোরে ফিরি পেবার্ বজরত্ ছাড়ি দিয়্যে পুরিবো। 55 ইস্রায়েলীয়গুনে বানা মর্ চাগর্। মুয়ই তারারে মিসর দেজত্তুন্ নিগিলেই আন্যং; তারা মরই চাগর। মুই লগেপ্রভু তমার গোজেন। |
Copyright © 2021 Bangladesh Bible Society
Bangladesh Bible Society