লেবীয় 24 - Chakma Bibleচেরাগ বদঙত্ চেরাক্কুন রিনি চানা 1 লগেপ্রভু মোশিরে কলঅ, 2 তুই ইস্রায়েলীয়গুনোরে উগুম দে যেন তারা চেরাগবদঙত্তে তইদু ছিঁজেয়ে জলপাইয়র্ গম্ তেল আনন্ যেনে চেরাক্কুন্ নিত্য জ্বালেই রাগা যায়। 3 মিলন-তাম্বুলো ভিদিরে সাক্ষ্য-সুন্দুগোর পর্দাগানর বারেন্দি হারোণে সাজোন্যেত্তুন্ ধুরি বেন্যেমাদান সং লগেপ্রভুর্ মুজুঙোত্ চেরাক্কুন চাহ্ পুরিবো। বংশর পর বংশ ধুরি ইবে অবঅ এক্কো থিদেবর্ গোজ্যে সুদোম। 4 লগেপ্রভুর্ মুজুঙোত্-রাগেয়ে আজল্ সনার চেরাগ বদঙ উগুরে চেরাক্কুন নিত্য চাহ্ পুরিবো। মুজুঙো-রুটি 5 “নিগুজ্ ময়দেলোই বারোবো রুটি সিগি নেযা পুরিবো। পত্তি রুটিত্তে তিন কেজি ছয়শ গ্রাম মোয়দে নেযা পুরিবো। 6 সে পরেদি লগেপ্রভুর মুজুঙোত্ রাগেয়ে আজল্ সনার টেবিলান উগুরে উই রুটিগানি ছগান গুরি দ্বি সুরোত্ সাজেইনে থুয়ো পুরিবো। 7 পত্তি রুটির সুরো কুরে আজল্ লোবান রাগা পুরিবো। রুটির বদলে এ লোবানান্ দিইনে লগেপ্রভুর নাঙে আগুন্দোই-গোজ্যে উৎসর্ব গরা পুরিবো। 8 ইস্রায়েলীয়গুনোর পক্ষত্তুন্ এ রুটিগান পত্তি জিরেবার দিনোত্ অক্তমজিম লগেপ্রভুর মুজুঙোত্ সাজেই রাগা পুরিবো। তারার্ এ রুটি রাগেবার কামান্ অবঅ এক্কান উমরর্ সুদোম। 9 এই রুটি হারোণ আর তার পূঅগুনে পবিত্র তাম্বুল-ঘরর্ চাগালাত্ হেবাক্, কিত্যে লগেপ্রভুর্ নাঙে আগুন্দোই-গোজ্যে উৎসর্বর জিনিজো ভিদিরে ইবে এক্কো দাঙর্ পবিত্র জিনিস্। ইবে তারার্ নিত্য পাওনা।” ভান্ন্যেই নাঙে লগেপ্রভুর নাঙান্ নেযানার সাজা 10 ইস্রায়েলীয়গুনো ভিদিরে এমন্ এক্কো মানুচ্ বজত্তি গুরিদো যিবের্ মাবো এলঅ ইস্রায়েলীয় আর বাপ্পো মিসরীয়। তাম্বুলো ভিদিরে সে মানুচ্চো সমারে এক্কো ইস্রায়েলীয়োর্ কোল্-কোজ্যে বাঁজি গেলঅ। 11-12 সেক্কে সেই ইস্রায়েলীয় মিলেবোর্ পূঅবো এক্কান ভান্ন্যেই নাঙে লগেপ্রভুর্ নাঙ্ নিইনে অভিশাব্ দিলো। সিয়েন্ শুনিনে মানুচ্চুনে তারে মোশি ইদু নেযেলাক্। পূঅবোর মাবো নাঙান্ এলঅ শালোমীৎ। তে দান-গুট্টির দিব্রির ঝি। ইয়েন পৌইদ্যেনে লগেপ্রভুর আওজচান্ কি সিয়েন্ তাত্তুন্ জানিবাত্তেই ইস্রায়েলীয়গুনে সে মানুচ্চোরে আক্সো রাগেলাক্। 13 ইয়েন্দোই লগেপ্রভু মোশিরে কলঅ, 14 যে মানুচ্চো অভিশাব দিয়্যে তারে তাম্বুলোর্ বারেন্দি নেযঅ। যিগুনে তারে সেই অভিশাব দেদে শুন্যন্ তারা বেক্কুনে তার্ মাদা উগুরে আত্ রাগাদোক্, সে পরেদি ইস্রায়েলীয়গুনে তারে পাত্তর মেলা দিইনে মারে ফেলাদোক্। 15 তুমি ইস্রায়েলীয়গুনোরে জানেই দুয়ো যুনি কনজনে তার গোজেনরে অভিশাব দেয় সালে তারে সিয়েনত্তে দায়ী গরা অবঅ। 16 ভান্ন্যেই নাঙে যে লগেপ্রভুর নাঙ্ নিবো তারে মারে ফেলা অবঅ। ইস্রায়েলীয়গুনে তারে পাত্তর মেলা দিইনে মারে ফেলেবাক্। ইস্রায়েলীয় ওক্ বা তারা ভিদিরে বজত্তি গোজ্যে অন্য জাদর মানুজোই ওক্, যে কনজনে ভান্ন্যেই নাঙে লগেপ্রভুর নাঙান্ নিবাক্ তারে মারে ফেলা অবঅ। 17 “যুনি কনজনে কাররে খুন গরন্ সালে তারেয়ো মারে ফেলা অবঅ। 18 যুনি কনজনে অন্যজনর্ য়েমান মারে ফেলায়্ সালে তারে এক্কো পরানর্ বদলে আর এক্কো পরান্ দিইনে ক্ষেতি পূরোণ দিয়্যে পুরিবো। 19 যুনি কনজনে কাররে আঘাত গরন্ আর সেক্কে তার কিয়্যেত্ ক্ষেতি অয় সালে তে যিয়েন্ গোজ্যে তা উগুরেয়ো সিয়েন্ গরা পুরিবো- 20 আড়্ ভাঙিবার্ বদলে আড়্ ভাঙানা, চোগোর বদলে চোগ, দাঁদর বদলে দাঁদ। তে অন্যগুনোর যে ক্ষেতি গোজ্যে তাত্তুনো সে ক্ষোতিগান্ গরা পুরিবো। 21 য়েমান মারে ফেলেলে ক্ষেতি পূরোণ দিয়্যে পুরিবো, মাত্তর্ মানুচ্ মারে ফেলেলে মরা পুরিবো। 22 ইস্রায়েলীয় আর তারা ভিদিরে বজত্তি গোজ্যে অন্য জাদর মানুচ্, বেক্কুনো উগুরে এই একই সুদোম খাদিবো। মুই লগেপ্রভু তমার গোজেন।” 23 মোশি ইস্রায়েলীয়গুনোরে এ বেক্ কধানি জানেল। যে মানুচ্চো অভিশাব দিয়্যে মানুচ্চুনে তারে তার পরেদি তাম্বুলোর্ বারেন্দি নেযেইনে পাত্তর মেলা দিইনে মারে ফেলেলাক্। লগেপ্রভু মোশিরে যে উগুমান্ দিয়্যে ইস্রায়েলীয়গুনে সিয়েনোই গুরিলাক্। |
Copyright © 2021 Bangladesh Bible Society
Bangladesh Bible Society