লেবীয় 20 - Chakma Bibleপাপর সাজা 1-2 পরেদি লগেপ্রভু মোশিরে ইস্রায়েলীয়গুনোরে এ কধাগান্ কবাত্তে কোইয়েদে, কনঅ ইস্রায়েলীয় বা ইস্রায়েলীয়গুনো ভিদিরে বজত্তি গোজ্যে অন্য জাদর্ কনঅ মানুচ্ যুনি মোলক দেবেদা ইদু তার্ কনঅ পূঅ বা ঝিবোরে উৎসর্ব গরে সালে সে মানুচ্চোরে মারে ফেলা পুরিবো। দেজর্ মানুচ্চুনে যেন তারে পাত্তর্লোই ঢলা মারন। 3 তাত্তুন্ মুই মুয়োন্ ফিরেই নিম্ আর তা জাদত্তুন্ মুই তারে তুলি ফেলেম, কিত্যে মোলক দেবেদা ইদু তার্ পূঅবো উৎসর্ব গুরিনে তে মর্ পবিত্র তাম্বুলান্ ফি-বলা গোজ্যে আর মর্ পবিত্র নাঙানর্ পবিত্রতাগান্ বরবাদ্ গোজ্যে। 4 মোলক দেবেদা ইদু পূঅ উৎসর্ব গুরিবার্ অক্তত্ যুনি দেজর্ মানুচ্চুনে সিয়েন্ দেগিনেয়ো ন-দেগন্ আর উৎসর্ব গুরিয়্যেবোরে মারে ন-ফেলান, 5 মাত্তর্ সেই উৎসর্ব গুরিয়েবো আর তার্ পরিবারত্তুন্ মুই নিজেই মুয়োন ফিরেই নিম। তারে আর তা সমারে যিগুনে মঅ উগুরে অবিশ্বেজী ওইনে মোলক দেবেদা ইদু নিজোরে গোজেই দুয়োন তারারে মুই ইস্রায়েল জাদত্তুন্ তুলি ফেলেম। 6 যে মানুচ্চো মঅ উগুরে অবিশ্বেজী ওইনে ভূত্তুনো মাধ্যম ইদু বা ভান্ন্যেই আত্মাগুনো সমারে মিজেই এবাবোত্যে মান্জ্য ইদু নিজোরে গোজেই দে মুই তাত্তুন্ মুয়োন্ ফিরেই নিম আর তা জাদত্তুন্ তারে তুলি ফেলেম। 7 তুমি মর্ নাঙে নিজোরে যুদো গুরি নিইনে পবিত্র ওইয়ো, কিত্যে মুই লগেপ্রভু তমার গোজেন। 8 মর্ সুদোমানি তমাত্তুন্ ধুরি রাগা পুরিবো আর সে ধোক্ক্যেন চলা পুরিবো। মুই লগেপ্রভু, মুয়ই তমারে মর্ নাঙে যুদো গুরি নেযেয়োং। 9 যিবের কধালোই মা-বাব উগুরে অশ্রদ্ধা থেবঅ তারে হামাক্কায় মারে ফেলা পুরিবো। সেই অশ্রদ্ধাগানর্ কারনে তে নিজোর্ মরণানত্তে নিজেই দায়ী। 10 যুনি কনজনে তার্ পাড়াল্যে মোগো সমারে, অত্তাৎ অন্য কনঅ মান্জ্যর্ মোগো সমারে সিনেলী গরে সালে বেভিচারী আর বেভিচারিনী দ্বিজনরেই মারে ফেলা পুরিবো। 11 যে তার্ সাদাঙা মা সমারে কিয়্যেদি মিজেয়্ তে তার্ বাপ্পোরে অসর্মান গরে। সিয়েন্ গুরিলে তারে আর তার্ সাদাঙা মাবোরে মারে ফেলা পুরিবো। তারা নিজোর্ মরণানত্তে নিজেই দায়ী। 12 কনজনে যুনি তার্ পুদোবো সমারে কিয়্যেদি মিজেন্ সালে দ্বিজনরে মারে ফেলা পুরিবো। তারার্ মিজেনা স্বাভাবিক সুদোমর্ বারেদি। তারা নিজোর্ মরণানত্তে নিজেরাই দায়ী। 13 মিলেমান্জ্য সমারে কিয়্যেদি মিজেইদে ধোক্ক্যেন গুরি যুনি কনজনে মরদ সমারে মিজেই সালে সিয়েন্ দ্বিজনর্ পক্ষে এক্কান জঘন্য বেপার। তারারে মারে ফেলা পুরিবো। তারা নিজোর্ মরণানত্তে নিজেরাই দায়ী। 14 যে মানুচ্চো কনঅ ঝি-রে আর তার্ মাবোরে মোগ্ বানায় তে বজং কাম্ গরে। যুনি কনজনে সিয়েন্ গরন্ সালে সে মানুচ্চো আর সে দ্বিজন মিলেমান্জ্যরে আগুনোত্ পুড়ি মারে ফেলা পুরিবো যেনে এধোক্ক্যেন ভান্ন্যেই বেপার্ তমা ভিদিরে ন-ঘদে। 15 কনঅ য়েমান সমারে কেউ যুনি কিয়্যেদি মিজেন্ সালে তারে আর সে য়েমান্নোরে মারে ফেলা পুরিবো। 16 কনঅ মিলে যুনি কনঅ য়েমান সমারে কিয়্যেদি মিজেবার্ চেট্ট্যা গরে সালে সেই মিলেবোরে আর সেই য়েমান্নোরে মারে ফেলা পুরিবো। তারারে হামাক্কায়্ মারে ফেলা পুরিবো। তারার্ নিজোর্ মরণানত্তে নিজেরাই দায়ী। 17 নিজোর বোন্নোরে বা সাদাঙা বোন্নোলোই জড়া বানিনেই তা সমারে কিয়্যেদি মিজেনা এক্কান লাজ্গরেদে কাম্-সেই বোন্নো মাবো ইন্দি ওক্ বা বাপ্পো ইন্দি ওক্। যিগুনে সিয়েন্ গুরিবাক্ মানুচ্চুনোর্ চোগো মুজুঙোত্ তারারে মারে ফেলা পুরিবো। এ কামান্ গুরিনে বোন্নোরে অসর্মান গুরিলে তারে দায়ী গরা অবঅ। 18 কনঅ মিলেমান্জ্যর্ মাসকাবরর্ সময়োত্ যে মানুচ্চো তা সমারে কিয়্যেদি মিজেই তে সেই মিলেমানুচ্চোর্ লো-স্রাবর্ মান্ ন-দিলো আর সেই মিলেবো নিজেয়ো তার্ মর্যাদা ন-রাগায়। দ্বিজনরে তারার্ জাদত্তুন্ তুলি ফেলা পুরিবো। 19 কনজনে যেন মোজেঙা বা পিজেঙা সমারে কিয়্যেদি ন-মিজেন্। সেক্কে লো-গানদি মিল্ আঘে এবাবোত্যে একজন কুদুম্মোরে অসর্মান গরা অয়। ইয়েনত্তেই তারারে দ্বিজনরেই দায়ী গরা অবঅ। 20 যুনি কনজনে কাক্কিরে, জেদেঙা বা মজেঙা সমারে কিয়্যেদি মিজেন্ সালে তে তার্ কাক্কা, জিদু বা মোল্যেবোরে অসর্মান গরে। ইয়েনত্তে তারারে দ্বিজনরেই দায়ী গরা অবঅ। তারা ঝি-পুঅ নেইদে অবস্থায় মড়িবাক্। 21 ভেই জেদা থাগদে যে তা মোক্কোরে লয়্ তে এক্কান জঘন্য কাম গরে। সেক্কে তে তার্ ভেইবোরে অসর্মান গরে। তারার্ কনঅ ঝি-পূঅ ন-অবাক্। 22 মুই তমারে যে দেজ্চানত্ বজত্তি গুরিবাত্তে নেযাঙর্ সেই দেজচানে যেনে তমারে উগুলি ফেলেই ন-দে সেনত্তে মর্ বেক্ সুদোমানি আর রীদি-সুদোমানি তমাত্তুন্ পালন গরা পুরিবো। 23 তমা মুজুঙেত্তুন্ মুই যিদুক্কুন্ জাদরে দাবেই দিবাত্তে যাঙর্ তুমি সেই জাদতুনোর্ চালচলন মজিম ন-চলিবা। তারার্ সেই চালচলনত্তেই মুই তারারে অমকদ ঘিনাইদে চোগোন্দি দেগং। 24 মুই তমারে কোইয়োংগে, তারার্ দেজ্চান্ তমা অধীনোত্ এবঅ। দুধ, মধু আর কনঅ কিজুর্ অভাব নেইয়ে এক্কান্ দেজ্ সোম্বোত্তি ইজেবে মুই তমারে দিম। মুই লগেপ্রভু তমার গোজেন। অন্য বেক্ জাদত্তুন্ মুয়ই তমারে ফারক্ গোজ্যং। 25 সেনত্তে য়েমান আর পেগো ভিদিরে কুবো সুদ্ধো-সাংগ আর কুবো ফি-বলা সিয়েনি বুঝিনে তমাত্তুন্ চলা পুরিবো। যিদুক্কুন্ য়েমান-পেখ্ বা মাদি উগুরে ঘুরি বেড়ান্দে চিগোন্-চাগোন্ প্রাণী তমাত্তে মুই ফি-বলা বিলি ফারগ্ গুরি দুয়োং, সিগুনোর্ কনবোলোই যেন তুমি নিজোরে ঘিনাইদে মানুচ্ ইজেবে ন-অ। 26 মুই লগেপ্রভু পবিত্র বিলি তমাত্তুনো পবিত্র ওয়া পুরিবো; আর মুয়ই তমারে মর্ নিজোর্ মানুচ্ অবাত্তে অন্য বেক্ জাদত্তুন্ ফারগ্ গুরি নেযেয়োং। 27 “যিদুক্কুন মরদ বা মিলে ভূত্তুনোর্ মাধ্যম অন্ বা যিগুনে ভান্ন্যেই আত্মা সমারে মিজেন্ তারার্ সাজা অবঅ মরণ। তারারে পাত্তর্ মারিনে মারে ফেলা পুরিবো। নিজোর্ মরণানত্তে তারা নিজেরাই দায়ী।” |
Copyright © 2021 Bangladesh Bible Society
Bangladesh Bible Society