লেবীয় 19 - Chakma Bibleঅন্য সুদোমানি 1-2 লগেপ্রভু মোশিরে বেক্ ইস্রায়েলীয়গুনোরে কবাত্তে কোইয়্যেদে, মুই তমার গোজেন লগেপ্রভু পবিত্র বিলি তমাত্তুনো পবিত্র উয়ো পুরিবো। 3 তুমি তমার মা-বাবরে ভোক্তি গুরিবা আর মর্ জিরেবার্ দিন্নো পালন্ গুরিবা। মুই লগেপ্রভু তমার গোজেন। 4 মূত্তিপূজো গরানা তমার্ ন-চলিবো বা নিজোর্ উবোসনাত্তে ছাজি ফেলেয়ে জিনিচ্ছোই কনঅ দেব-দেবেদা বানানা ন-চলিবো। মুই লগেপ্রভু তমার গোজেন। 5 তুমি যেক্কে লগেপ্রভুর্ নাঙে কনঅ উদোলোদি-উৎসর্বর্ অনুষ্ঠান গুরিবা সেক্কে সিয়েন্ এধোক্ক্যেন গুরি গুরিবা যেনে লগেপ্রভু তমা উগুরে হুজি অয়। 6 অনুষ্ঠান দিনোত্ বা তার কেল্যে ভিদিরে উৎসর্বর য়েরাগান্ তমাত্তুন্ হেই ফেলা পুরিবো। তিন দিনোত্ যুনি এক্কানা বাগি থাই সালে সিয়েন্ পুড়ি ফেলা পুরিবো, 7 কিত্যেই তিন দিনোত্ সে য়েরাগান্ ফি-বলা ওই যায়। যুনি কনজনে সে য়েরাগান্ খান্ সালে লগেপ্রভু সে উৎসর্ববো আর ন-গুজিবো। 8 যে সিয়েন্ হেবঅ তারে তার্ অন্যেয়ানত্তে দায়ী গরা অবঅ, কিত্যে সেক্কে মর্ পবিত্র জিনিস্চানরে অপবিত্র গরা অবঅ। সেই মানুচ্চোরে তার্ জাদত্তুন্ তুলি ফেলা অবঅ। 9 ফসল কাবিবার্ অক্তত্ তুমি ক্ষেদর্ কাজাকুরেদি ফসলানি ন-কাবিবা আর ক্ষেদত্ যিয়েনি থেবঅ সিয়েনিয়ো ন-কুড়েবা। 10 আংগুর ক্ষেদত্তুন্ আংগুর্ তুলোনা শেজ্ অলে আরঅ তুমি সে ক্ষেদত্ আংগুর্ তুলিবাত্তে ন-যেবা আর পড়ি থেইয়ে আংগুরুন ন-কুড়েবা। নাদা মানুচ্ আর অন্য জাদর্ মানুচ্চুনোত্তে সিয়েনি থোই দিয়া পুরিবো। মুই লগেপ্রভু তমার গোজেন। 11 চুর্ ন-গুরিবা, কাররে ন-ঠোগেবা, মিজে কধা ন-কবা। 12 মর্ নাঙে মিজে শমক্ হেইনে তমার গোজেনর্ নাঙানর্ পবিত্রতাগান্ বর্বাদ্ ন-গুরিবা। মুই লগেপ্রভু। 13 কনঅ মান্জ্য উগুরে অন্যেয় গুরি সুবিধা আদায়্ গরানা বা জোর্ গুরি তার জিনিস্চান্ নেযানা ন-চলিবো। কামগুরিয়েগুনোর দিনোর্ পাওনা দিনেই দিয়া পুরিবো; সিগুন্ বেন্যেমাদান্ সং আক্সো রাগানা ন-চলিবো। 14 যে কানদি ন-শুনে তারে অভিশাব ন-দিবা বা যে চোগেদি ন-দেগে তার্ পদ্থানদি উজোত্ খাইদে ধোক্ক্যেন কনঅ জিনিস্ ন-থবা। তুমি তমার গোজেনরে ভোক্তিগুরি দোরেইনে চলিবা। মুই লগেপ্রভু। 15 অন্যেয় গুরি বিচের্ গরানা ন-চলিবো। বিচেরত্ চিগোন-দাঙর্ কারঅ পক্ষ নেযানা ন-চলিবো; তুমি বেক্কুনো উগুরে দোল্বিচের্ গুরিবা। 16 কাররে ইংসে-নিন্দে গুরি বেড়ানা ন-চলিবো। কনঅ মান্জ্যর্ পরাণানর্ ক্ষোতি ওই পারে এধোক্ক্যেন কিজু গরানা ন-চলিবো। মুই লগেপ্রভু। 17 অন্য উগুরে মন ভিদিরে ঘিনাইদে মনোভাব রাগানা ন-চলিবো। অন্য মান্জ্যর্ দুষ্চান্ হামাক্কায়্ দেগেই দিয়া পড়িবো যেনে তার্ কারনে তুমি নিজে দুষি ন-অ। 18 হেনা চুযোনা ন-চলিবো, বা কারঅ বিপক্ষে মন ভিদিরে ইংসের্ মনভাব পুযি রাগানা ন-চলিবো। বেক্ মানুচ্চুনোরে নিজো ধোক্ক্যেন গুরি কোচ্পা-পুরিবো। মুই লগেপ্রভু। 19 মর্ সুদোমান মানি চলা পুরিবো। নানান্ জাদর্ য়েমান সমারে কিয়্যেদি মিজেনা ন-চলিবো। একই ক্ষেদত্ দ্বিবাবোত্যে বীজ লাগানা ন-চলিবো। দ্বিজাদর্ সুদোলোই বুন্যে কাবড় উরোনা ন-চলিবো। 20 অন্য মান্জ্য লগে বৌ চাহ্ ওইয়্যে অথচ টেঙা দিইনে ছাড়ি নেযানা ন-অয় বা সুর্ কাগোজ্ দিয়া ন-অয় এধোক্ক্যেন কনঅ চাগরানীর্ লগে যুনি কনজনে কিয়্যেদি মিজেন্ সালে তাত্তুন্ জোরিবানা দিয়া পুরিবো। সে দ্বিজনরে মারে ফেলানা ন-চলিবো কিত্যে মিলেবোরে ছাড়ি নেযানা ন-অয়। 21 মাত্তর্ সে মানুচ্চোরে লগেপ্রভুর্ নাঙে তার্ দুষ-উৎসর্ব ইজেবে মিলন-তাম্বুলো দোরান ইদু এক্কো ভেড়া আনা পড়িবো। 22 দুষ্-উৎসর্বর সেই ভেড়াবোলোই ধর্মগুরুবোত্তুন্ লগেপ্রভুর মুজুঙোত্ তার্ সেই পাপ্পান্ ঢাগি দিয়া পুরিবো। সেক্কে তার্ সে পাপ্পান্ ক্ষেমা গরা অবঅ। 23 তমা দেজত্ যেইনে যুনি তুমি কনঅ ফল গাজ্ লাগঅ সালে ফলুন্ তমার্ তিন বজর্ সং মানা গোজ্যে ফল বিলি ধরা পুরিবো। উই সময়ো ভিদিরে সেই ফলুন্ হানা তমার্ ন-চলিবো। 24 চের্ বজরত্ গাজর্ বেক্ ফলুন্ লগেপ্রভুরে বাঈনী গুরিবাত্তে তাঁর্ নাঙে উৎসর্ব গরা পুরিবো। 25 পাঁচ বজরত্তুন্ ধুরি তুমি সে গাজর্ ফলুন্ হেই পারিবা। সেক্কে তমার গাজ্চুনোত্ ভালোক্কুন্ ফল্ অবাক্। মুই লগেপ্রভু তমার গোজেন। 26 লো সুদ্ধো কনঅ য়েরা ন-হেবা। লক্ষন-বিদ্যে বা মায়াবিদ্যে বেবহার্ গরানা ন-চলিবো। 27 মাদাবোর্ দ্বিডাগেন্দি চুলানি কাবানা বা দাড়ির্ আগানি মুড়োনা ন-চলিবো। 28 মরা মানুচ্চুনোত্তে দুঘ্-ফগদাঙ্ গুরিবাত্তে যেইনে কিয়্যেগানর্ কনঅ জাগাত্ ঘা গরানা ন-চলিবো। কিয়্যেত্ কনঅ উল্কি-চিহ্নো দেনা ন-চলিবো। মুই লগেপ্রভু। 29 নিজোর্ ঝিবোরে বেশ্যে বানেইনে তারে তলে লামানা ন-চলিবো। সিয়েন্ গুরিলে দেজত্ বেশ্যেগিরি বাড়িবাক্ আর যেরেন্দি দেজ্চান্ কজরালোই ভুরি যেবঅ। 30 মর্ উগুম্ গোজ্যে ঝিরেবার্ দিনুন্ পালন্ গরা পুরিবো আর মর্ থেবার-তাম্বুলো উগুরে ভোক্তি রাগা পুরিবো। মুই লগেপ্রভু। 31 যিগুনে ভূদো ভিদিরে থান্ বা ভান্ন্যেই আত্মা সমারে মিলেমিলি রাগান্ তারা ইদু যানা ন-চলিবো, কিত্যে তারা তমারে ফি-বলা বানেবাক্। মুই লগেপ্রভু তমার গোজেন। 32 যিগুনে বুড়ো তারা কায়কুরে এলে উদিনে থিয়্যেবা আর তারারে সর্মান গরা পুরিবো। তুমি তমার গোজেনরে ভোক্তি গুরিনে দোরেবা। মুই লগেপ্রভু। 33 তমা দেজত্ তমা ভিদিরে বজত্তি গোজ্যে অন্য জাদর্ মানুচ্চুনো সমারে বজং বেবহার্ গরানা ন-চলিবো। 34 নিজো জাদর্ মানুচ্চুনো সমারে যেধোক্ক্যেন বেবহার্ গরা অয় তা সমারে সেধোক্ক্যেন বেবহার্ গরা পুরিবো। তারে নিজো ধোক্ক্যেন গুরি কোচ্পা পুরিবো, কিত্যে তুমিয়ো মিসরীয়গুনো ভিদিরে অন্য জাদর্ মানুচ্ এলা। মুই লগেপ্রভু তমার গোজেন। 35 “বিচেরর্ রায় দিবাত্তে বা কনঅ কিজু লাম্বান্দি বা মাব ইন্দি বা পরিমাণ ইন্দি কত্তমান্ সিয়েন্ মাবদে যেইনে তুমি অন্যেয় ন-গোজ্য। 36 তমার পাল্লাবো, সিলুন্ আর অন্যান্য মাবর্ জিনিস্চানি যেন ঠিগ্ অয়। মুই লগেপ্রভু তমার গোজেন। মিসর দেজত্তুন্ মুয়ই তমারে নিগিলেই আন্যং। 37 মর্ বেক্ সুদোমানি তমাত্তুন্ পালন গরা পুরিবো আর বেক্ রীদি-সুদোমানি মানি চলা পুরিবো। মুই লগেপ্রভু।” |
Copyright © 2021 Bangladesh Bible Society
Bangladesh Bible Society