লেবীয় 16 - Chakma Bibleপাপ ঢাগি দিবার দিন্নো 1 হারোণর দ্বিবে পূঅ অন্যেয় গুরিনে লগেপ্রভুর মুজুঙোত্ আঝিল্ ওইনে মুরি যেবার্ পরেদি লগেপ্রভু মোশি লগে কধা কোইয়্যে। 2 তে কলঅ, তর্ ভেই হারোণরে কঅ, সাক্ষ্য-সুন্দুগো উগুরে ঢাগোনিগান মুজুঙোত্ যে পর্দাগান্ রোইয়ে সিয়েনর্ পিজেন্দি সে পবিত্র জাগানত্ তে যেন তার্ আওজ্ মজিম যেক্কে-সেক্কে ন-যায়। সেধোক্ক্যেন গুরিলে তে মুরি যেবঅ, কিত্তে সে ঢাগনিগান উগুরে মেঘ ভিদিরে মুই দেগা দিম্। 3 সিয়েনত্ চোমেবার আগেন্দি তে যেন নিজোরে ইঙিরিনে যুক্কোল্ গুরি নেযায়্। তাত্তুন্ পাপ-উৎসর্বত্তে এক্কো বলদ আর পুজ্যে-উৎসর্বত্তে এক্কো ভেড়া নেযা পুরিবো। 4 তার্ কিয়্যেত্ থেবঅ পবিত্র মসীনার সুলুম্ আর তলেন্দি থেবঅ মসীনা কাবড়র্ বানেইয়্যে জাংগি। তাত্তুন্ মসীনা কাবড়র্ কমর্-বিজোনী কমরত্ বানা পুরিবো আর মাদাত্ দিয়্যে পুরিবো মসীনা কাবড়র্ কবঙান্। ইয়েনি পবিত্র পোজাক্। সিয়েনি উরিবার আগেদি তাত্তুন্ পানিলোই গাদা পুরিবো। 5 পাপ-উৎসর্বত্তে ইস্রায়েলীয়গুনোত্তুন্ তার্ দ্বিবে ছাগল আর পুজ্যে-উৎসর্বত্তে এক্কো ভেড়া নেযা পুরিবো। 6 হারোণত্তুন্ তার্ নিজোর আর তার্ বংশধরুনোর্ পাপ ঢাগি দিবাত্তে পাপ-উৎসর্বর বলত্তো উৎসর্ব গরা পুরিবো। 7 যেরেন্দি সে দ্বিবে ছাগল নিইনে তাত্তুন্ মিলন-তাম্বুল দোরান ইদু লগেপ্রভু মুজুঙোত্ নেযা পুরিবো। 8 তাত্তুন্ পোরোক্ষে গুরি চাহ্ পুরিবো, সিবের্ ভিদিরে কন্ ছাগল্লো লগেপ্রভুত্তে আর কন্ ছাগল্লো অজাজেলত্তে। 9 যে ছাগল্লো লগেপ্রভুর বিলি দেগা যেবঅ হারোণে সিবেলোই পাপ-উৎসর্বর্ অনুষ্ঠান গুরিবো। 10 মাত্তর্ লটারীত্ যে ছাগল্লো অজাজেলত্তে উদিবো সিবে জেদা অবস্থায় লগেপ্রভুর মুজুঙোত্ আঝিল্ গরা পুরিবো আর পাপ ঢাগি দিবার নাঙে অজাজেলত্তে ধূল্যেচর-চাগালাত্ পাদেই দিয়া পুরিবো। 11 হারোণে তার নিজোর আর তার্ বংশধরুনোর্ পাপ ঢাগি দিবার্ নাঙে তার্ নিজোর্ পাপ-উৎসর্বত্তে আন্যে সে বলত্তো নিইনে কাবিবো। 12 লগেপ্রভুর্ মুজুঙোত্ যে পূজোবো আঘে তে সে পূজোবোত্তুন্ আগুনোর্ পিলেত্ জ্বোল্-জ্বোল্যে আঙারা ভোরেই নেযেব আর নিগুজ গুরিনে গুড়ি গোজ্যে দ্বিমুঠ তুম্বাস্ পোইরেগ্অ নিবো। ইগুন্ লোইনে তে পর্দাগানর্ পিজেন্দি যেবঅ। 13 সিয়েনত্ লগেপ্রভুর্ মুজুঙোত্ তে আগুনো উগুরে পোইরেগ্ দিবো। সে পোইরেগর ধূমোলোই সাক্ষ্য-সুন্দুগো উগুরে ঢাগনিগান্ ঢাগা যেবঅ আর সেক্কে তে মারা ন-পুরিবো। 14 সে পরেদি তাত্তুন্ সে বলত্তোর কিজু লো নেযেইনে আঙুল্লোই ঢাগনিগান মুজুঙেন্দি কান্জাবা কুরে সিয়ান্ ছিদি দিয়া পুরিবো। ইয়েনর্ পরেদি আঙুল্লোই তাত্তুন্ আরঅ কিজু লো নিইনে ঢাগনিগানর্ মুজুঙোত্ সাতপল্লা ছিদি দিয়্যে পুরিবো। 15 পরেদি তাত্তুন্ মানুচ্চুনোর্ পাপ-উৎসর্বর্ ছাগল্লো কাবা পুরিবো আর তার লো-নেযেইনে পর্দাগানর্ পিজেন্দি যেইনে বলত্তোর লো-লোই যিয়ান গুরিবার্ কধা কুয়ো ওইয়ে সিয়ান গরা পুরিবো। সুন্দুগোর্ ঢাগনিগান উগুরে আর মুজুঙোত্ সে লো-গান তাত্তুন্ ছিদি দিয়া পুরিবো। 16 ইস্রায়েলীয়গুনে যে পাপ্পানি গুরি থেদাক্ সাৎ, তারার্ সে ফি-বলাগান্ আর অবাধ্যগানর্ কারনে দাঙর পবিত্র জাগানর্ ফি-বলাগান্ হারোণে ইঙিরিনে ঢাগি দিবার্ সুদোম গুরিবো। ইস্রায়েলীয়গুনোর্ ফি-বলাগানর্ সংমোধ্যে থিয়্যেই থেইয়্যে মিলন-তাম্বুলত্তেয়ো তাত্তুন্ সে এক্কুই বেবস্থা গরা পুরিবো। 17 দাঙর পবিত্র জাগানত্ চোমেইনে যেদক্ষণ সং হারোণে তার নিজোর আর তার বংশধরুনোর্ আর গোদা ইস্রায়েল জাদর্ পাপ ঢাগি দিবার্ কাম্ থুম্ গুরি নিগিলি ন-এজে, সেদক্ষণ সং কনঅ জনে মিলন-তাম্বুলত্ থেই ন-পারিবাক্। 18 মিলন-তাম্বুলত্তুন নিগিলি এইনে হারোণে লগেপ্রভুর মুজুঙোত্ যে পূজোবো আঘে সিয়েনত্ যেইনে পূজোবোর্ ফি-বলাগান্ ঢাগি দিবো। সে বলত্তো আর ছাগল্লোর্ কিজু লো নেযেইনে তে সিয়েন্ পূজোবোর্ শিঙুনোত্ লিবি দিবো। 19 পূজোবো সুদ্ধো-সাংগ গুরিবাত্তে আর সিবে ইস্রায়েলীয়গুনোর্ ফি-বলাগানত্তুন্ পবিত্র গুরিবাত্তে তে আঙুল্ দিইনে তার্ উগুরে সাতপল্লা লো ছিদি দিবো। 20 দাঙর্ পবিত্র জাগা, মিলন-তাম্বু আর পূজোবোর্ ফি-বলাগানি ঢাগি দিবার্ অনুষ্ঠান থুম্ গুরিনে হারোণে সে জেদা ছাগল্লো আনিবো। 21 তে তার্ দ্বিয়েন্ আত্ সে জেদা ছাগল্লো মাদা উগুরে রাগেব আর ইস্রায়েলীয়গুনোর্ বেক্ অন্যায় আর অবাধ্যগানি, অত্তাৎ তারার্ বেক্ পাপ্পানি কাম্ হেইনে সিয়েনি ছাগল্লোর মাদা উগুরে চাবি দিবাক্। সে পরেদি এ কামত্তে যুক্কোল্ ওই আঘে এধোক্ক্যেন এক্কো মান্জ্যরে দিইনে তে সিবে ধূল্যেচর-চাগালাত্ পাদেই দিবো। 22 সে মানুচ্চোই সিবেরে ধূল্যেচর-চাগালাত্ ইরি দিইনে এবঅ। ছাগল্লো কনঅ মানুচ্-জন নেইয়্যে জাগাত্ তারার্ বেক্ অন্যেয়ানি বোইনে বেরেব। 23 দাঙর্ পবিত্র জাগানত্ চোমেবার্ আগেন্দি হারোণে যেদক্কানি মসীনার্ কাবড়্ উরিবো মিলন-তাম্বুলত্ ফিরি এইনে সিয়েনি তাত্তুন্ খুলিনে সিয়োদোই থোই দিয়া পুরিবো। 24 সে পরেদি তে পবিত্র তাম্বুল-ঘরর্ চাগালাত্ যেইনে পানিলোই গাদিনে ধর্মগুরুর অক্তমজিম কাবড়-চুগোর্ উরিবো। ইয়েনর পরেদি তে নিগিলি এইনে তার্ নিজোর্ আর মানুচ্চুনোত্তে এক্কো গুরি পুজ্যে-উৎসর্বর্ অনুষ্ঠান গুরি তার্ নিজোর্ আর মানুচ্চুনোর্ পাপ ঢাগি দিবার্ বেবস্থা গুরিবো। 25 পাপ-উৎসর্বর্ য়েমান তেল্ তাত্তুন্ পূজোবো উগুরে পুড়ি ফেলা পুরিবো। 26 যে মানুচ্চো অজাজেলত্তে ছাগল্লো ইরি দিইনে এবগোই তাত্তুন্ তার্ কাবড়-চুগোর্ ধোয়নে পানিলোই গাদা পুরিবো, আর পরেদি তে তাম্বুল ভিদিরে চোমেই পারিবো। 27 পাপ ঢাগি দিবাত্তে পাপ-উৎসর্বর যে বলত্তো আর ছাগলর্ লো-গান্ দাঙর্ পবিত্র জাগাত্ লোই যেবার্ কধা কুয়ো ওইয়্যে সিগুনোর্ কিয়্যেগানি তাম্বুল বারেন্দি নেযেইনে চামাড়া, য়েরা আর গু-সুদ্দো বেক্কানি পুড়ি ফেলা পুরিবো। 28 যে মানুচ্চো সিয়েনি উরিবাত্তে লোই যেবঅ তাত্তুন্ তার্ কাবড়-চুগোর্ ধোইনে পানিলোই গাদা পুরিবো আর তার্ পরেদি তে তাম্বুল ভিদিরে চোমেই পারিবো। 29 ইয়েনর্ পরেদি যিয়েন্ কঙর্ সিয়েন্ তমাত্তে এক্কান্ থিদেবর সুদোম ওই থেবঅ। বজরর্ সাত্ মাজর্ দশ দিনোত্ তুমি বেক্কুনে নিজোর্ মনানি ভাঙিচুরি দুঘ্ স্বীগের্ গুরিবা। সে দিনোত্ কনঅ কাম্ গরানা ন-চুলিবো। ইস্রায়েলীয় ওক্ কিম্বা ইস্রায়েলীয়গুনোর্ ভিদিরে বজত্তি গোজ্যে অন্য জাদর্ মানুচ্ ওক্, বেক্কুনোত্তুন্ সিয়েন্ মানা পুরিবো, 30 কিত্তে এ দিন্নোত্ তমার্ পাপ্পানি ঢাগি দিবার্ অনুষ্ঠান গুরিনে তমারে সুদ্ধো-সাংগ গুরি নেযা পুরিবো, আর যেরেন্দি তুমি লগেপ্রভু ইদু তমার বেক্ পাবত্তুন্ সুদ্ধো-সাংগ অবা। 31 এ দিন্নো অবঅ তমার কামত্তুন্ জিরেবার্ দিন। এ দিনোত্ তুমি বেক্কুনে নিজোর্ মনানিরে ভাঙিনে দুঘ্ স্বীগের্ গুরিবা। ইয়েন্ অবঅ এক্কান্ থিদেবর্ গোজ্যে সুদোম। 32-33 যেক্কেনে যে ধর্মগুরুবোরে দাঙর্ ধর্মগুরু ইজেবে অভিষেগ গুরিনে তা বাবর্ পদ্তানত্ বোজেই দিয়া অবঅ সেক্কে তে এ পাপ ঢাগি দিবার্ অনুষ্ঠানান্ গুরিবো। তাত্তুন্ সে পবিত্র মসীনা কাবড়র্ পোজাক্ উরিনে দাঙর্ পবিত্র জাগাত্, মিলন-তাম্বুলোত্, পূজোর, ধর্মগুরুগুনোর্ আর গোদা ইস্রায়েল জাদর্ ফি-বলাগানি আর পাপ ঢাগি দিবার্ বেবস্থা গরা পুরিবো। 34 ইবে অবঅ তমাত্তে এক্কান্ থিদেবর্ গোজ্যে সুদোম। বজরত্ একবার্ গুরি ইস্রায়েলীয়গুনোর্ বেক্ পাপ্পানিত্তে এ পাপ ঢাগি দিবার্ অনুষ্ঠানান্ গরা পুরিবো। মোশিরে দিয়্যে লগেপ্রভুর উগুম মজিম বেক্কানি গরা ওইয়্যে। |
Copyright © 2021 Bangladesh Bible Society
Bangladesh Bible Society