লেবীয় 14 - Chakma Bibleভান্ন্যেই চামাড়া রুগোত্তুন্ সিজি অনা পৌইদ্যেনে 1 সে পরেদি লগেপ্রভু মোশিরে কলঅ, 2 ভান্ন্যেই চামাড়ারুগ্ ওইয়্যে এধোক্ক্যেন কনঅ মান্জ্যর্ সুদ্ধো-সাংগ অবার দিনোত্ এ সুদোমান্ পালন গরা পুরিবো। তারে ধর্মগুরুগুনো ইদু নেযা পুরিবো। 3 ধর্মগুরুবো ঘরর্ বারেদি যেইনে তারে চাগি চেবঅ। যুনি দেগা যায় সে চামাড়া রুগোত্তুন্ মানুচ্চো গম্ ওইয়্যে, 4 মাত্তর্ তারে সুদ্ধো-সাংগ গুরিবাত্তে ধর্মগুরুবো দ্বিবে জেদা সুদ্ধো-সাংগ পেক্, কিজু এরস তক্তা, রাঙা রংয়র্ সুদো আর এসোব গাজর্ ডেলালোই এবাত্তে কবে। 5 সে পরেদি ধর্মগুরুবো উগুম্ দিবো যেন পানি গঙারত্তুন্ তুলি আন্যে আর মাত্যে পিলেত্ রাগেয়ে পানি উগুরে সে পেক্ দ্বিবেত্তুন্ এক্কোরে কাবি ফেলা অয়। 6 ধর্মগুরুবো জেদা পেক্কোরে, এরস তক্তা, রাঙা রংয়র্ সুদো আর এসোব গাজর্ ডেলা পানি গঙার উগুরে কাবি ফেলেয়্যে সেই পেক্কোর্ লো-গানত্ চুবেব। 7 যিবেরে সে চামাড়া রুগোত্তুন্ সুদ্ধো-সাংগ গরা অবঅ তা উগুরে ধর্মগুরুবো সাতবার সে লো-গান্ ছিদি দিইনে তারে সুদ্ধো-সাংগ বিলি ফগদাঙ্ গুরিবো। ইয়েনর পরেদি ধর্মগুরুগুনোত্তুন্ খুলো মাদত্ সে জেদা পেক্কোরে ইরি দিয়্যে পুরিবো। 8 যিবেরে সুদ্ধো-সাংগ গরা অবঅ তে তার্ কাবড়-চুগোরানি ধোয় ফেলেব, কিয়্যেগানর্ আর মাদাবোর্ বেক্ কেশ্চানি আর চুলানি কাবিবো আর পানিত্ গাদা পুরিবো। সে পরেদি তে সুদ্ধো-সাংগ অবঅ। ইয়েনর্ পরেদি তে ঘরত্ চোমে পারিবো মাত্তর্ তাত্তুন্ সাত দিন সং তার্ নিজো ঘরর্ বারেন্দি থাহ্ পুরিবো। 9 সে সাত দিনোর্ শেজ দিন্নোত্ তারে তার্ কিয়্যের্ বেক্ চুলানি, অত্তাৎ তার্ মাদাবো চুলানি, দাড়ি, চোগো কেশ্চানি আর কিয়্যের্ কেশ্চানি কাবি ফেলা পুরিবো। পরেদি তাত্তুন্ তার্ কাবড়-চুগোরানি ধোইনে পানিত্ গাদা পুরিবো, আর সে পরেদি তে পুরোপুরি গুরিনে সুদ্ধো-সাংগ অবঅ। 10 তার্ কেল্যে দিনোত্ তে দ্বিবে ভেড়াছাগলর ছঅ আর এক্কো এক বোজোজ্যে পাদি ভেড়াছাগল আনিবো। সিগুনোর্ এক এক্কো থুদো নেইয়্যে ওয়া পুরিবো। সে লগে শোজ্য-উৎসর্বত্তে তে পাচ্ কেজি চেরশ গ্রাম তেল মিজেয়ে নিগুজ্ মোয়দে আর পৌনে দ্বিলিটার তেল লোইনে এবঅ। 11 যে ধর্মগুরুবো তার্ সুদ্ধো-সাংগ অবার্ অনুষ্ঠানান্ গোজ্যে তে তারে আর উৎসর্বত্তে আন্যে তার্ জিনিস্চানি মিলন-তাম্বুলো দোরান ইদু লগেপ্রভু মুজুঙোত্ আঝিল্ গুরিবো। 12 “ধর্মগুরুবো সে ভেড়াছাগল দ্বিবেত্তুন্ এক্কো আর সে পৌনে দ্বিলিটার্ তেল্ লোইনে দুষ-উৎসর্বর অনুষ্ঠান গুরিবো আর দোলন-উৎসর্ব ইজেবে লগেপ্রভু মুজুঙোত্ সিয়েনি দুলেব।” 13 পবিত্র তাম্বুল-ঘরর্ চাগালাত্ যিয়েনত্ পাপ-উৎসর্ব আর পুজ্যে-উৎসর্বর্ য়েমান্ কাবা অয় সে ভেড়াছাগল্লো কাবা পুরিবো। পাপ-উৎসর্বর্ য়েরাগান ধোক্ক্যেন দুষ-উৎসর্বর য়েরাগানঅ ধর্মগুরুবোর্ পাওনা। এই য়েরাগান্ দাঙর্ পবিত্র জিনিস্। 14 যে মানুচ্চোরে সুদ্ধো-সাংগ গরা অবঅ ধর্মগুরুবো দুষ-উৎসর্বর য়েমানত্তুন্ কিজু লো লোইনে তার্ ডেন্-কান পাদাত্ আর ডেন্ আঢ আর ডেন্ টেঙর্ বুড়ো আঙুলোত্ লিবি দিবো। 15 ইয়েন পরেদি সে তেলানর্ কিজু তে তার্ বাঙ্ আঢ পাদাত্ ঢালি নিবো। 16 সে পরেদি ডেন্ আঢর্ বুজ্যে আঙুল্লোর্ পরেদি আঙুল্লো দিইনে বাঙ্ আঢত্তুন্ তেল তুলি লোইনে সাতবার্ সিয়েন্ লগেপ্রভু মুজুঙোত্ ছিদিবো। 17 পরেদি তার্ আঢর্ বাদবাগি তেলত্তুন্ কিজু নেযেইনে তে মানুচ্চোর্ ডেন্ কান পাদাত্ আর ডেন্ আঢ আর ডেন্ টেঙর্ বুজ্যে আঙুলোত্ দুষ-উৎসর্বর লো-গান উগুরে লিবি দিবো। 18 আঢর্ বাদবাগি তেলান্ সে মানুচ্চোর্ মাদাত্ দিবো। ইঙিরিনে লগেপ্রভুর মুজুঙোত্ তে তার্ ফি-বলাগান্ নাঢি দিবো। 19-20 যে মানুচ্চোরে ফি-বলা অবস্থাত্তুন্ সুদ্ধো-সাংগ গরা অবঅ ধর্মগুরুবো পাপ-উৎসর্বর য়েমান্নো উৎসর্ব গুরিনে তার্ ফি-বলাগান্ ঢাগি দিবো। পরেদি তে পুজ্যে-উৎসর্বর য়েমান্নো কাবিনে শোজ্য-উৎসর্বর্ জিনিস্চান সমারে সিয়েন পূজোবো উগুরে উৎসর্ব গুরিনে তার্ ফি-বলাগান্ ঢাগি দিবার্ বেবস্থা গুরিবো, আর সেক্কে তে সুদ্ধো-সাংগ অবঅ। 21-22 “মাত্তর্ মানুচ্চো যুনি নাঢা অয় আর এদক্কানি জিনিস্ আনানা তার্ খেমতায়্ ন-কুলোয় তো দুষ-উৎসর্বত্তে এক্কো ভেড়াছাগলর ছঅ তাত্তুন্ আনা পুরিবো, আর সিবে ধর্মগুরুবো তার্ ফি-বলাগান্ ঢাগি দিবার্ নাঙে দুলেব। ইয়েনর সমারে মানুচ্চোরে শোজ্য-উৎসর্বত্তে এক কেজি আস্তোশ গ্রাম তেল মিজেইনে নিগুজ্ মোয়দে, পৌনে দ্বিলিটার্ তেল্ আর দ্বিবে কঅ ন-অলে দ্বিবে কোদোর্ আনা পুরিবো, যিয়েন্ তার্ খেমতার্ বারেন্দি নয়। পেখ্ দ্বিবেত্তুন্ এক্কো পাপ-উৎসর্বত্তে আর অন্যবো পুজ্যে-উৎসর্বত্তে। 23 সে পরেদি আস্টো দিনোত্ সুদ্ধো-সাংগ অবাত্তে মানুচ্চোত্তুন্ এ বেক্ জিনিস্চানি আনিনে মিলন-তাম্বুলো দোরান ইদু লগেপ্রভু মুজুঙোত্ ধর্মগুরুবো ইদু দিয়া পুরিবো। 24 ধর্মগুরুবো দুষ-উৎসর্বর ভেড়াছাগল্লো আর উই তেলান্ লোইনে দুলেয়ে-উৎসর্ব ইজেবে লগেপ্রভু মুজুঙোত্ দুলেব। 25 সেই উৎসর্বত্তে কাবি নেযেয়ে ভেড়াছাগল্লোর্ কিজু লো নেযেইনে ধর্মগুরুবো মানুচ্চোর্ ডেন্ কান পাদাত্ আর ডেন্ আঢর্ আর ডেন্ টেঙর্ বুজ্যে আঙুলোত্ লিবি দিবো। 26-27 তে তার্ বাঙ্ আঢ পাদাত্ কিজু তেল ঢালি নিবো আর ডেন আদর্ বুজ্যে আঙুল্লোর্ পরেদি আঙুল্লো দিইনে কিজু তেল তুলি লোইনে সাতবার্ সিয়েন্ লগেপ্রভু মুজুঙোত্ ছিদি দিবো। 28 মানুচ্চোর্ ডেন্ কান পাদাত্ আর ডেন্ আঢ আর ডেন্ টেঙর্ বুজ্যে আঙুল্লোত্ যেদক্কানি জাগাত্ ধর্মগুরুবো দুষ-উৎসর্বর য়েমান লো বাজেই দিয়্যে সে বেক্ জাগানিত্ সে তেলানত্তুন্ কিজু লোইনে তে লিবি দিবো। 29 লগেপ্রভু মুজুঙোত্ তার্ ফি-বলাগান্ ঢাগি দিবাত্তে তে তার্ আঢর্ বাদবাগি তেলান্ মানুচ্চোর্ মাদাত্ দিবো। 30-31 ধর্মগুরুবো তাত্তুন্ সেই কঅ ন-অলে কোদোর্ নিবো, যিয়েন্ তার খেমতার্ বারেন্দি নয়। সে পরেদি সে পেখ্ দ্বিবেত্তুন্ এক্কো লোইনে তে পাপ-উৎসর্ব ইজেবে আর অন্যবো পুজ্যে-উৎসর্ব ইজেবে শোজ্য-উৎসর্ব সমারে উৎসর্ব গুরিবো। ধর্মগুরুবো ইঙিরিনে লগেপ্রভু মুজুঙোত্ মানুচ্চোর্ ফি-বলাগান্ ঢাগি দিবো।” 32 যিগুনোর্ ভান্ন্যেই ফারাঙি ওইয়্যে অদচ সুদ্ধো-সাংগ অবাত্তে যে উৎসর্বর জিনিস্ আনিবার্ কধা কুয়ো ওইয়্যে সিয়েন্ আনিবার্ খেমতা নেই তারাত্তে ইয়েন্ অলঅ সুদোম। ক্ষয়-গোজ্যে ফারাঙি-ধোজ্যে জিনিস্ সুদ্ধো-সাংগ গুরিবার্ সুদোম 33 সে পরেদি লগেপ্রভু মোশি আর হারোণরে কলঅ, 34 যে কনান দেজ্চান্ সোম্বোত্তি ইজেবে মুই তমারে দিবাত্তে যাঙর্ সে দেজত্ তুমি চোমেবার্ পরেদি সে জাগানর্ কনঅ ঘরত্ মুই যুনি ছিদি পোজ্যে ক্ষয়-গোজ্যে ফারাঙি সাজুরিবার্ বেবস্থা গরঙ্, 35 সেক্কে ঘরর্ গিরোজ্সো ধর্মগুরুবো ইদু যেইনে কবদে, মর্ ঘরত্ ফারাঙি ধোক্ক্যেন কি এক্কান্ দেগঙর্। 36 ধর্মগুরুবো সিয়েন চেবাত্তে ঘরত্ চোমেবার্ আগে উগুম দিবো যেন ঘরত্তুন্ বেক্কানি নিগিলা অয়, যেনে ঘরর্ কনঅ কিজু ফি-বলা বিলি ফগদাঙ্ গরা ন-অয়। সে পরেদি ধর্মগুরুবো সে ঘরত্ চুমিনে সিয়েনি চাগি চেবঅ। 37 দেবাল ফারাঙি চাগি চেবার সময় যুনি দেগা যায় জাগাগান্ দেবালত্তুন্ তলে ওই যেইয়্যে আর ফারাঙির্ রংয়ান্ য়েল্ বা রাঙা আর সিয়েন্ যুনি আরঅ মুদোত্ যেয়েগোই বিলি তার্ মনে অয়, 38 সালে তে সে ঘরত্তুন্ নিগিলি এইনে ঘরর্ দোরান সাত দিনোত্তে বানি রাগেব। 39 সে সাত দিনোর্ শেজ দিন্নোত্ তে ফিরি এইনে ঘরান আরঅ চাগি চেবঅ। যুনি সে ফারাঙিগান্ দেবাল উগুরে ছিদিনে যেই থায়, 40 সালে তে উগুম দিবো যেন সে জাগানর্ ফারাঙি-ধোজ্যে পাত্তরুন নিগিলেনে শঅরর্ বারেন্দি কনঅ ফি-বলা জাগানত্ ফেলেই দিয়া অয়। 41 ঘর ভিদিরে বেক্ দেবালানি চাজি ফেলেইনে সে চাছ্যে ভাগ্কান্ শঅরর্ বারেন্দি কনঅ ফি-বলা জাগাত্ ফেলেই দিয়া পুরিবো। 42 সে পরেদি যিয়েনত্তুন্ পাত্তর্ খুলি নেযা ওইয়্যে সিয়েনত্ নুয়ো পাত্তর্ বোজেনেই নুয়ো মাদি দিইনে লিবি দিয়া পুরিবো। 43 দেবালানত্তুন্ পাত্তরুন খুলি ফেলেইনে, চাজিনে, মাদি দিইনে লিবিবার্ পরেদি ঘরর্ দেবালত্ যুনি আরঅ ফারাঙি দেগা যায়, 44 ছালে ধর্মগুরুবো আরঅ যেইনে সিয়েনি চেবঅ। যুনি দেগা যায় সে ফারাঙি ঘরানত্ ছিদি পোজ্যে, সালে বুঝো পুরিবো সিয়েন্ এক্কান ক্ষয়-গোজ্যে ফারাঙি, আর সে ঘরান্ ফি-বলা। 45 সেক্কে ঘরানর্ পাত্তরুন, লিবি দিয়া মাদিগান্ আর দার্বো বেক্কানি ভাঙি ফেলা পুরিবো আর শঅরর্ বারেন্দি কনঅ ফি-বলা জাগানত্ নিইনে সিগুন্ ফেলেই দিয়া পুরিবো। 46 সাত দিন বানি রাগেবার্ সময় যুনি কনজনে ঘরানর্ ভিদিরে যায় সালে তে সেদিন্যে সাজোন্যে সং ফি-বলা অবস্থায় থেবঅ। 47 যুনি কনজনে সে ঘরত্ খায় অথবা ঘুম যায় সালে তার্ কাবড়-চুগোর্ ধোয়্ ফেলা পুরিবো। 48 “মাত্তর্ সে ঘরান্ লিবি দেনার্ পরেদি ধর্মগুরুবো সিয়েন্ চাগি চেবাত্তে এইনে যুনি দেগেদে ফারাঙিগান ছিদিনে ন-পড়ে সালে ঘরান তে সুদ্ধো-সাংগ বিলি ফগদাঙ্ গুরিবো, কিত্তে সে ঘরান্ আর ফারাঙি-ধোজ্যে অবস্থায়্ নেই। 49 ঘরান্ সুদ্ধো-সাংগ গুরিবাত্তে ধর্মগুরুবোর দ্বিবে পেখ্, কিজু এরস গাজ, রাঙা রংয়র্ সুদো আর এসোব গাজর্ বাগল্ নেযা পুরিবো। 50 সে পরেদি মাদির্ পিলেত্ রাগেয়ে গোরত্তুন্ তুলি আন্যে পানি উগুরে এক্কো পেখ্ তাত্তুন্ কাবা পুরিবো; 51 আর সে এরস গাচ্ছো, এসোবর বাগলান্, রাঙা রঙয়র্ সুদোগান আর জেদা পেক্কো লোইনে কাবি ফেলেয়ে অন্য পেক্কোর্ লো-মিজেয়ে গঙার পানিত্ ভুরো পুরিবো আর ঘরান উগুরে সাতবার্ সিয়েন্ ছিদি দিয়া পুরিবো। 52 পেগোর্ লো, গঙার পানি, জেদা পেখ্,এরস গাজ, এসোবর্ বাগল্ আর রাঙা রংয়র্ সুদো দিইনে তে সে ঘরান্ সুদ্ধো-সাংগ গুরিবো। 53 সে পরেদি তে জেদা পেক্কোরে সে শহরানর্ বারেন্দি খুলো মাদত্ ইরি দিবো। ইঙিরিনে সে ঘরানর্ ফি-বলাগান্ ঢাগি দেনার্ পরেদি ঘরান্ সুদ্ধো-সাংগ অবঅ।” 54-56 কনঅ ফারাঙি, কাচ্ছোনি, কাবড় বা ঘরর্ ক্ষয়-গোজ্যে সাজুরেদে ফারাঙি, কিয়্যের্ চামাড়াত্ কনঅ ফুলি উঠ্যে জাগাত্, ফেস্ফেস্যে কিম্বা জ্বোল্-জ্বোল্যে কনঅ জাগা পৌইদ্যেনে ইয়েন্ অলঅ সুদোম। 57 ইয়েনিত্তুন্ মানুষ বা জিনিস্চানি কক্কে সুদ্ধো-সাংগ আর কক্কে ফি-বলা অয় এ সুদোম ভিদিরে সে উগুমান্ রোইয়্যে। ইয়েন্ অলঅ ভান্ন্যেই চামাড়ারুগ্ আর ক্ষয়-গোজ্যে ফারাঙি পৌইদ্যেনে সুদোম। |
Copyright © 2021 Bangladesh Bible Society
Bangladesh Bible Society