আবিলেচ্ 3 - Chakma Bibleগোজেন মানুচ্চুনোর্ দুঘ্ আর কোজোলী গরানা 1 মুই সে মানুচ্চো, যে লগেপ্রভুর রাগর্ সাজা পেইয়্যে। 2 তে মরে লোড়েই দিয়্যে; তে মরে পহ্রত্ নয়, মাত্তর্ আন্ধারত্ আঢেয়্যে; 3 ঘেচ্চেকগুরি গদাদিন্নো তে মঅ বিরুদ্ধে বার্ বার্ তা আঢ্তানি তুল্যে। 4 মর্ চামানি আর য়েরাগানরে তে শুগেই ফেলেয়্যে আর আড়ুন্ ভাঙি দিয়্যে। 5 তে মনত্ দুঘ্ আর কষ্টলোই মরে আক্সোনে ঘিরি রাগেয়্যে। 6 যিগুনে ভালোক্ দিন আগে মুরি যেইয়োন তারা ধোক্ক্যেন্গুরি তে মরে আন্ধারত্ বজত্তি গোরেয়্যে। 7 মুই যেনে ধেই যেই ন-পারং সেনত্তে তে মঅ চেরোকিত্তেদি ঘিরি রাগেয়্যে; মরে গুয়োড়্ শিগোল্লোই বান্যে। 8 যেক্কে মুই ডাগং বা সাহায্যত্তে কানং, সেক্কে মঅ তবনাগান তে ন-শুনে। 9 গুয়োর্ গুয়োর্ পাত্তর্লোই তে মঅ পথ্তান নাঢি দিয়্যে; মঅ পথ্তান তে বেঙা গুরি দিয়্যে। 10 মইদু তে হাপ্ দি থেইয়্যে ভালুগো ধোক্ক্যেন্ আর লুগি থেইয়্যে সিংহ ধোক্ক্যেন্; 11 পধত্তুন্ তে মরে টানি আনিনে কট্টা কট্টা গোজ্যে আর মরে গায় গায় ফেলেইনে থোই যেইয়্যে। 12 তা ধনুগানরে টানিনে তে মরে তা সেল্লো তাক্ গোজ্যে। 13 তা বাক্সুবোত্তুন্ সেল্ লোইনে তে মঅ মনান্ কানা গুরি দিয়্যে। 14 মর্ বেক্ মানুচ্চুনো ইধু মুই ঈচ্ গরে পারা ওইয়োং; তারা গোদাদিন্নো গান গেই গেই মরে ঈচ্ গরন্। 15 তিদেলোই তে মরে ভড়ন্ গোজ্য, বিষ্চোই মঅ পেট্তো ভোরেয়্যে। 16 তে পাত্তর্লোই মঅ দাত্তুন ভাঙি দিয়্যে আর ধূল্যেলোই মরে মিগি দিয়্যে। 17 সুগ-শান্দি মত্তুন্ দূর্ গরা ওইয়্যে; ভালেদি কি, সিয়েন মুই ভুলি যেইয়োং। 18 সেনত্তে মুই কং, “মঅ বলান্ যেয়্যেগোই। লগেপ্রভুত্তুন্ মুই যিয়েনি আজা গোজ্যং সিয়েন্অ আর নেই।” 19 মর্ দুঘ্কান আর ঘুরি বেড়েবার কধানি ইদোত্ তুল্; তিদে আর বিষে ভরা জিংকানিগানর কধানি ইদোত্ তুল্। 20 সিয়েন নিত্য মর্ ইদোত্ আঘে, আর মঅ পরাণানে মন ভিদিরে দুগ্ পেই পেই আঘে। 21 তো মর্ আজা আঘে, কিত্তে মুই এ কধাগান ইদোত্ তুলোং; 22 লগেপ্রভুর অমকদ কোচ্পানাত্তে আমি ভস্ত ন-ওর্, কিত্তে তার্ মেয়্যেগান কনদিন্অ শেজ্ ন-অয়; 23 পত্তিদিন বেন্যেমাদান্ সিয়েন নুয়ো ওইনে দেগা দে; তার বিশ্বেজ্চান দাঙর্। 24 মুই মনে মনে কং, “লগেপ্রভু মর্ সোম্বোত্তি, সেনত্তে মুই তা উগুরে আজা রাগেম।” 25 লগেপ্রভু উগুরে যিগুনে আজা রাগান আর তা উগুরে নির্ভর গরন্ তারারে তে ভালেদি গরে। 26 লগেপ্রভু উদ্ধোর্ ন-গরানা সং জুরো গুরি বাজ্জেই থানাগান্ গম্। 27 গাবুজ্য কালত্ জুঙোল্ বুয়োনা মানুচ্চুনোত্তে গম্। 28 লগেপ্রভু সে জুঙোলান্ তা উগুরে দিয়্যে, সেনত্তে তে গায় গায় অলর্ গুরি বোই থোক্। 29 তে ধূল্যেত্ মুয়োন ঢাগোক্, অয়ত আজা থেইয়ো পারে। 30 যে তারে মাজ্যে তাইদু তে গালান্ পাদি দুয়োক্, নিজোরে অগমান পেবাত্তে দুয়োক্। 31 প্রভু দঅ উমরত্তে মান্জ্যরে ধাবেই ন-দে। 32 যুনি বা তে দুঘ্ দে, তো তার্ অমকদ কোচ্পানা মজিম্ তে মেয়্যে গুরিবো, 33 কিত্যে তে আওজ্ গুরিনে মান্জ্যরে দুঘ্ বা মনত্দুঘ্ ন-দে। 34 দেজর্ বেক বন্দীগুনোরে টেঙোই দলানা, 35 মহান গোজেন মুজুঙোত্ মান্জ্যর অধিকারানরে অস্বীগের্ গরানা, 36 ন্যায়বিচের্ অবাত্তে ন-দেনা- ইয়েনি কি প্রভু ন-দেগিবো? 37 যুনি লগেপ্রভু উগুম ন-দে সালে কন্না মুয়োদি কোইনে কিজু ঘোদেই পারে? 38 মহান গোজেন মুয়োত্তুন্ কি অমংগল আর মংগল ন-নিগিলে? 39 পাপত্তে সাজা পানার্ পরেদি মান্জ্যে কিত্তেই সিয়েন্দোই আবিত্তি গুরিবাক্? 40 এজঅ, আমি আমার জিংকানির্-পথ্তানি পোরোক্ষে গুরিই আর যাচাই গুরিই আর লগেপ্রভু ইধু ফিরি যেই। 41 এজঅ, আমি আমা মনানি আর আঢ্তানি স্বর্গত্ গোজেন ইন্দি তুলিই আর কোই, 42 “আমি পাপ গোজ্যেই, উল্লোমি গোজ্যেই; তুই খেমা ন-গরচ্। 43 তুই রাগ্কোই নিজোরে ঢাগিনেই আমারে লোড়েয়োচ্; মেয়্যে ন-গুরিনে তুই মারে ফেল্যচ্। 44 তুই মেঘ্কোই নিজোরে ঢাগি ফেল্যচ্ যেনে কনঅ তবনা তা ভিদিরেদি যেই ন-পারে। 45 জাদ্তুনো ভিদিরে তুই আমারে গোজ্যস্ আধং আর কাজর ধোক্ক্যেন্। 46 আমা বেক্ শত্রুগুনে আমা বিরুদ্ধে মুয়োন দাঙর্ গুরিনে আ গোজ্যেন্। 47 আমি দর্, ফাল্, দজা আর ভস্ত অনার্ মুয়োত্ পোজ্যেই।” 48 মঅ মানুচ্চুনে ভস্ত ওই যাদন্, সেনত্তে মঅ চোগ্কুনোত্তুন্ পানি গঁঙার ধোক্ক্যেন্ বেঈ পড়ের্। 49 মঅ চোগ্কুনোত্তুন্ পানি গঁঙার ধোক্ক্যেন্ বেঈ পুরিবো, ন-থামেব, 50 যেদক্ বিলোন্ সং লগেপ্রভু স্বর্গত্তুন্ তলেদি রিনি ন-চায়। 51 মঅ শঅরর্ বেক্ মিলেগুনো পৌইদ্যেনে মুই যিয়েনি দেগঙর্, সিয়েনিলোই মঅ পরাণান কানের্। 52 এনেবাদে যিগুনে মর্ শত্রু ওইয়োন্ তারা পেগো ধোক্ক্যেন্ গুরি মরে শিগের্ গোজ্যন্। 53 তারা গাদ ভিদিরে মঅ পরাণান শেজ্ গুরি দিবার্ চেরেস্টা গোজ্যন্ আর মঅ উগুরে পাত্তর্ মাজ্যন্। 54 মঅ মাঢা উগুরেদি পানি বেঈ যেইয়্যে, মুই মনে গোজ্যংগে মুই মুরি যাঙর্। 55 ও লগেপ্রভু, সেই গভিন্ গাদ ভিদিরেত্তুন্ মুই তরে ডাগিলুং। 56 তুই মর্ এই কোজোলীগান শুন্যচ্, “সাহায্যত্তে মঅ কানানিগান উগুরে তুই কানানি নাঢি ন-রাগেচ্।” 57 মুই যেক্কে তরে ডাক্কোং সেক্কে তুই কায়-কুরে এইনে কোইয়োচ্, “ন-দোরেচ্।” 58 ও প্রভু, তুই মর্ তপ্পে লোয়োচ্, তুই মঅ পরাণান উদ্ধোর্ গোজ্যস্। 59 ও লগেপ্রভু, মঅ উগুরে যে অন্যেয়ান্ গরা ওইয়্যে সিয়েন দঅ তুই দেখ্যচ্। মঅ উগুরে ন্যায়বিচের্ গর্। 60 তারা কিবাবোত্যেগুরি হেনা সুচ্যন্ সিয়েনি তুই দেখ্যচ্, দেখ্যচ্ মঅ বিরুদ্ধে তারার্ বেক কুজুরোমিগানি। 61 ও লগেপ্রভু, তারার্ ঈচ্ গরানার কধা তুই শুন্যচ্, শুন্যচ্ মঅ বিরুদ্ধে তারার্ বেক কুজুরোমির্ কধানি। 62 মঅ শত্রুগুনে গোদাদিন্নো মঅ বিরুদ্ধে কদক্ ফিস্ ফিস্ গরন্ আর নানান্ কধা কন্। 63 চাহ্, তারার্ বেক কামানিত্ তারা গান গেই গেই মরে ঠাট্ট-মশ্কারি গরন্। 64 ও লগেপ্রভু, তারার্ কাম মজিম্ তুই তারারে ফল দে। 65 তারার্ মনানি দর গর্, আর তঅ অভিশাব্পান তারা উগুরে পোড়োক্। 66 তুই রাগে তারারে লড়া, তর্ আগাজ তলেত্তুন্ তারারে ভস্ত গুরি ফেলা। |
Copyright © 2021 Bangladesh Bible Society
Bangladesh Bible Society