আবিলেচ্ 2 - Chakma Bible

যিরূশালেমর্ সাজা

¹ হায়, লগেপ্রভু কিবাবোত্যেগুরি তার্ রাগে সিয়োন-ঝিবোরে আন্ধারত্ ঢাগি ফেলেয়্যে! ইস্রায়েলর সয়সাগোজ্যেগানি তে আগাজত্তুন্ পিত্‌‌থিমীত্ ফেলেই দিয়্যে। তার্ রাগ্ উঠ্যেদে দিন্নোত্ তা টেঙানি রাগেবার জাগায়ানরে তে ইদোত্ ন-রাগায়।

² যাকোবর্ বেক থেবার জাগায়ানি লগেপ্রভু গজক্ গোজ্যে, কনঅ মেয়্যে ন-গরে। যিহূদা-ঝিবোর্ ঘরানি তার অমকদ রাগে তে ভাঙি ফেলেয়্যে, সিয়েনি তে মাদিত্ ফেলেইনে ভস্ত গোজ্যে। তার রেজ্যগান আর নেতাগুনোরে তে অসর্মানত্ ফেলেয়্যে।

³ অমকদ রাগে তে ইস্রায়েলর বেক্ খেমতাগান বর্‌বাত্ গুরি দিয়্যে। শত্রুগুনে উজেই এবাত্তে চেলেয়ো তার্ খেমতাবলা আঢ্‌তানি তে গুজেই থোইয়্যে। চেরোকিত্তে বেক্কানি পুড়ি যেইয়্যে আগুনো জিলো ধোক্ক্যেন্ তে যাকোব ভিদিরে জুলি উঠ্যে।

⁴ শত্রু ধোক্ক্যেন্‌গুরি তে তার্ ধনুগান টান্যে, তার্ খেমতাবলা আঢ্‌তানি ঠিগ্ গোজ্যে। যিগুনোরে দেগিনে তারা হুজি অদাক্ তারারে তে মারে ফেলেয়্যে। সিয়োন-ঝিবোর্ তাম্বুলো ভিদিরে তে আগুনো ধোক্ক্যেন্‌গুরি তা রাগ্‌কান ঢালি দিয়্যে।

⁵ লগেপ্রভু শত্রু ধোক্ক্যেন ওইয়্যে; তে ইস্রায়েলরে গজক্ গোজ্যে। তে গজক্ গোজ্যে তার বেক্ দাঙর্ দাঙর্ ঘরানি আর ভস্ত গুরি দিয়্যে তার বেক্ তাম্বুলানি। তে যিহূদা-ঝিবোর্ মনত্ দুঘ্ আর আবিলেচ্ গরানা বাড়েই দিয়্যে।

⁶ তে বাগান গাজ ধোক্ক্যেন্‌গুরি তার থেবার জাগায়ানরে উগুরে ফেলেয়্যে; ভস্ত গুরি দিয়্যে তার নিদ্দিষ্ট এগত্তর্ অইদ্যে জাগায়ানরে। লগেপ্রভু সিয়োনরে তার বেক্ পরব্ আর জিরেবার দিন্নো কধানি ভুলেই দিয়্যে; দর্‌গরেপারা রাগে রাজারে আর ধর্মগুরুবোরে তে এলাফেলা গোজ্যে।

⁷ লগেপ্রভু তার ডালিপূজোবোরে এলাফেলা গোজ্যে, ছাড়ি দিয়্যে তার সুদ্ধো-সাংগ জাগায়ান। তা তাম্বুলানির্ বেক্ দেবালানি তে শত্রুগুনো আঢত্ তুলি দিয়্যে। পরব দিনো ধোক্ক্যেন্‌গুরি শত্রুগুনে লগেপ্রভুর ঘরত্ যগার্ পাত্তন্।

⁸ সিয়োন-ঝিবোর্ চেরোকিত্তে দেবালানি ভাঙি ফেলেবার লগেপ্রভু থির্ গোজ্যে। তে মাবেদে দুড়িলোই মাপ্যে আর ভস্ত গুরিবার কামত্ নিজো আঢ্‌তানিরে থামেই ন-রাগায়। তে সিয়োনর তাম্বুল আর দেবালানিরে আবিলেচ্ গুরিবাত্যে দিয়্যে; সিয়েনি এক সমারে বল্‌পোজ্যে ওইয়্যে।

⁹ তা গেট্‌তুন মাদিলোই নাঢি যেইয়োন; হুক্‌কুন তে ভাঙিনে বর্‌বাত গুরি দিয়্যে। তার রাজা আর নেতাগুনে জাদ্‌তুনো ভিদিরে বন্দী ওই আগন্; রীদি-সুদোম্ কধে কিচ্ছু নেই; তার ভাববাদীগুনে লগেপ্রভুত্তুন্ আর দর্শন ন-পান্।

¹⁰ সিয়োন-ঝিবোর্ বুড়ো নেতাগুনে জুরো গুরি মাদিত্ বোই আগন্। তারা নিজো মাঢাত্ ধূল্যে ছিদি দুয়োন আর বস্তা পাদা উজ্যন্। যিরূশালেমর গাবুজ্যে মিলেগুনে দুঘে মাদিত্ মাঢাগুন লোঙেয়োন্।

¹¹ কানদে কানদে মঅ চোগ্‌কুন চিবে চিবে ওইয়োন, মঅ ভিদিরেয়ো যন্ত্রণা অর্; মঅ মানুচ্চুন ভস্ত ওইয়োন, আর ঝি-পুয়োগুনে আহ্ চিগোন গুরোগুনে শঅরর্ খুলো জাগানিত্ অজ্ঞান ওইনে পড়ি আগন্। সেনত্তে মঅ মনান্ যেন মাদিত্ ঢুলি পোজ্যে।

¹² তারা তারার্ মাগুনোরে কন্, “রুটি আর আংগুর-রস কুদু?” ইয়েন কোইনে তারা শঅরর্ খুলো জাগায়ানিত্ আহত মান্‌‌জ্য ধোক্ক্যেন অজ্ঞান ওই পোজ্যন; মা করত্ তারার্ জিংকানিগানি শেজ্ ওই যার্।

¹³ ও যিরূশালেম-ঝিবো, মুই কি কধা কোইনে তর্ তপ্পে নেযেম্? কা লগে মুই তরে তুলনা গুরিম্? ও সিয়োন গাবুজ্যে-মিলে, তরে বুঝেবাত্তে মুই কা সমারে তরে সং গুরিনে চেম্? তঅ আঘাত্‌‌তান সাগর ধোক্ক্যেন দাঙর্; কন্না তরে গম্ গুরি পারে?

¹⁴ তর্ ভাববাদীগুনোর্ দর্শনানি মিজে আর বাজে; তর্ বন্দীদজাগান্ যেনে দূর্ ওই যায় সেনত্তে তারা তঅ পাপ্‌‌পানি দেগেই ন-দুয়োন্। আগাম্ কধা ইজেবে তারা যিয়েনি তমারে কোইয়োন সিয়েনি মিজে; সিয়েনি তমারে ভুল পধেদি চালেয়্যে।

¹⁵ যিগুনে তঅ কায়-কুরেদি যান তারা তরে দেগিনে আঢ্‌তালি দুয়োন; তারা যিরূশালেম-ঝিবোরে দেগিনে ঠাট্টা-মশ্‌কারি গরন্ আর মাঢাগুন লাড়েইনে কন্, “ইয়েন কি সেই শঅর্ যিয়েনরে কুয়ো অদঅ বেগত্তুন্ দোল্‌বি, যিয়েনরে নিইনে গোদা পিত্‌‌থিমীগানে ফুত্তি গুরিদো?”

¹⁶ তর্ বেক শত্রুগুনে তঅ বিরুদ্ধে মুয়োনি দাঙর্ গুরি আহ্ গোজ্যন্; তারা ঠাট্টা-মশ্‌‌‌কারি গুরিনে দাদ্ কামেড়েনে কন্, “তারে আমি গিলি ফেল্যেই। এ দিন্নোত্তে আমি বাজ্জেই রোইয়্যেই আর সিবে দেগিলোং।”

¹⁷ লগেপ্রভু তা পরিকল্পনা মজিম্ কাম গোজ্যে; যে কধানি তে বোউত্ আগেদি কোইয়্যে সে কধানি পূরোণ গোজ্যে। তে মেয়্যে ন-গুরিনে তরে মেলা মারি দিয়্যে; শত্রুরে তঅ বিরুদ্ধে তে ফুত্তি গুরিবাত্তে দিয়্যে, তর্ বিপক্কগুনোর্ বলানি বাড়েই দিয়্যে।

¹⁸ তঅ মানুচ্চুনোর মনানি লগেপ্রভু ইধু কানি কানি কোইয়্যেদে, “ও সিয়োন-ঝিবোর্ দেবালান, তর্ চোগো পানিগান দিনে-রেদে গাঙ ধোক্ক্যেন বেঈ যোক্; তর্ নিজোরে শান্তি পেবাত্তে ন-দিচ্, চোগ্‌‌কুনোরেয়ো জিরেবাত্তে ন-দিচ্।

¹⁹ উদ্, রেদোর্ বেন্যে পোত্যে কানি উদ্; লগেপ্রভুর মুজুঙোত্ পানি ধোক্ক্যেন গুরি ঢালি দে তঅ মনান্। তর্ ঝি-পুয়োগুনে যিগুনে পেট্‌পরায় পধে পধে অজ্ঞান ওইয়োন্, তারার্ জিংকানিগানি বাঁজেবাত্তে তা নাঙে তঅ আঢ্‌‌তান তুল।”

²⁰ ও লগেপ্রভু, চাহ্, ভাবি চাহ্, তুই দঅ আর্ কারঅ উগুরে এবাবোত্যে বেবহার ন-গরচ্? মিলেগুনে কি তারার্ নিজো পুয়ো-ছাগুনোরে হেবাক্ যিগুনোরে তারা পালেয়োন? প্রভুর সুদ্ধো-সাংগ জাগানত্ কি ধর্মগুরু আর ভাববাদীগুনোরে মারে ফেলা অবঅ?

²¹ পুয়ো আর বুড়োগুনে ধূল্যে ভিদিরে পধে পধে পড়ি আগন্; মর্ গাবুজ্যে-গাবুরিগুনে তলোয়ার ইধু পড়ি যেয়োন। তর্ রাগ দিনোত্ তুই তারারে মারে ফেল্যস্; তুই তারারে কাবি ফেল্যস্, মেয়্যে ন-গরচ্।

²² পরব দিনোত্ যেবাবোত্যে তুই মানুচ্চুনোরে এগত্তর্ গরচ্ সেবাবোত্যেগুরি মর্ চেরোকিত্তে তুই নানান্ বাবোত্যে অমকদ দর্ তুবেয়োচ্। লগেপ্রভুর রাগ দিনোত্ কনজনে রেহাই ন-পান্ বা বাঁজি ন-তান্; যিগুনোরে মুই পালেয়োং আর যত্তন্ গুরিদুং মর্ শত্রুগুনে তারারে ভস্ত গুরি দুয়োন্।