যিহোশূয় 9 - Chakma Bibleগিবিয়োনীয়গুনোর চালাগী 1 যর্দন গাঙর্ পোজিমেন্দি রাজাগুনে এ বেক্ কধানি শুনিলাক্। ইগুনে এলাক্ অজল্ মুড়ো চাগালাত্ আর তা তলেদি মুড়ো চাগালার্ দেজ্চানিত্ আর লেবানন সং ভূমধ্য সাগরর্ বেক্ দুযিগুন্ ধুরিনে যে দেজ্চানি এলঅ সিগুনোর রাজাগুন্। ইগুনে এলাক্ হিত্তীয়, ইমোরীয়, কনানীয়, পরিষীয়, হিব্বীয় আর যিবূষীয়গুনোর রাজাগুন্। 2 ইস্রায়েলীয়গুনো পৌইদ্যেনে বেক্ কধানি শুনিনে তারা এক মন ওইনে যিহোশূয় আর ইস্রায়েলীয়গুনোর বিরুদ্ধে যুদ্ধো গুরিবাত্তে এগত্তর্ অলাক্। 3-4 যিরীহো আর অয়র অবস্থা যিহোশূয় যেধোক্ক্যেন্ গোজ্যে সিয়েনি যেক্কে গিবিয়োন শঅরর্ আদাম্মে হিব্বীয়গুনে শুনিলাক্ সেক্কে তারা এক্কান চালাগি গুরিলাক্। তারার্ পক্ষেত্তুন একদল মানুচ্ যিহোশূয় ইদু যাহ্ ধুরিলাক্। তারা গাধাগুনো উগুরে পুরোণ বস্তাগুন্ আর ফাদা আর তালি দিয়্যে আংগুর-রস রাগেবাত্তে পুরোণ চামর্ থৈল্যেগুন্ রাগেলাক্। 5 তারা টেঙত্ পিনিলাক্ পুরোণ আর তালি দিয়্যে জদা আর কিয়্যেত্ উরিলাক পুরোণ কাবড়্। পদথ্ হানা ইজেবে তারা যেদক্কানি রুটি নেযেলাক্ সিয়েনি এলদে কট্টা গোজ্যে শুগুনো রুটি। 6 এধোক্ক্যেনগুরি তারা গিল্গলত্ ইস্রায়েলীয়গুনো তাম্বুলোত্ যিহোশূয়র মুজুঙোত্ আঝিল্ অলাক্। তারা তারে আর ইস্রায়েলীয়গুনোরে কলাক্, “আমি বোউত্ দূর দেজত্তুন্ এচ্ছ্যেই; তুমি আমা লগে আঢ্ মিলো।” 7 সেক্কে ইস্রায়েলীয়গুনে সে হিব্বীয়গুনোরে কলাক্, “যুনি সম্ভব অয় তুমি আমা ইদু থাগঅ। যুনি সিয়েনই অয় সালে কেধোক্ক্যেন্ গুরি আমি তমা লগে আঢ্ মিলেবং?” 8 তারা যিহোশূয়রে কলাক্, “চঅ, আমি তমা চাগর্।” সেক্কে যিহোশূয় তারারে পুজোর্ গুরিলো, “তুমি কন্না, আর কুত্তুন্ এচ্চ্য?” 9 জোবত্ তারা কলাক্, “তঅ গোজেন লগেপ্রভুর সুনাং শুনিনে তর্ এই চাগরুনে বোউত্ দূর দেজত্তুন এচ্চ্যন্। তে মিসর দেজত্ যিয়েনি গোজ্যে সে হবরানি আমি পেইয়্যেই। 10 ইয়েনবাদে তে হিষবোনোর রাজা সীহোন আর অষ্টারোদত্ বজত্তি গুরিয়্যে বাসনর রাজা ওগ-যর্দনর পূগেন্দি এ দ্বিবে ইমোরীয় রাজারে যে দজাত্ ফেলেয়্যে সে কধানিয়ো আমি শুন্ন্যেই। 11 আমা বুড়ো নেতাগুনে আর আমা দেজর আদাম্মেগুনে বেক্কুনে আমারে এই উগুমান দুয়োন্, আমি যেনে যেবার্ পদথ্ হানাগানি সমারে নিইনে তমা লগে দেগা গুরিনে কোই, ‘আমি তমা চাগর্ আর তুমি আমা লগে আঢ্ মিলো।’ 12 তমা ইদু এবার্ দিন্নোত্ আমি ঘরত্তুন্ উমুম্ উমুম্ রুটি লোইনে নিগিল্যেই, মাত্তর্ ইক্কিনে চঅ, সে রুটিগানি শুগেইনে কট্টা কট্টা ওই যেইয়্যে। 13 আংগুর-রস রাগেবার থৈল্যেগুনো ভোজ্যেই আর সিগুন নূয়া এলাক্ মাত্তর্ চঅ, ইক্কিনে সিগুন কেধোক্ক্যেন্ ফাদি যেইয়োন্। এদক্ দূরো পথ এত্তে আমার টেঙঅ জদা আর কিয়্যের কাবড়ানিয়ো পুরোণ ওই যেইয়্যে।” 14 ইস্রায়েলীয়গুনে তারার হানানি নেযেইনে চেলাক্ ঠিগ্ মাত্তর্ লগেপ্রভুর মতামত্তান্ পুজোর্ ন-গুরিলাক্। 15 যিহোশূয় তারা সমারে আঢ্ মিলেল আর তারারে মারে ন-ফেলেব বিলিনে এক্কান্ চুক্তি গুরিলো, আর ইস্রায়েলীয় সমাজর নেতাগুনেয়ো সে পৌইদ্যেনে শমক্ খেলাক্। 16 গিবিয়োনীয়গুনো সমারে আঢ্ মিলেবার তিন দিন পরেদি ইস্রায়েলীয়গুনে শুনিলাক্, তারা আজলে তারার্ পাড়াল্যে আর তারা কায়কুরে বজত্তি গরন্। 17 সেক্কে ইস্রায়েলীয়গুনে তারার্ চাগালান্দি যাহ্ ধুরিলাক্ আর তিন দিনোত্ সিদু যেইনে লুমিলাক্। তারার্ চাগালাত্ এলাক্কে গিবিয়োন, কফীরা, বেরোৎ আর কিরিয়ৎ-যিয়ারীম শঅরান্। 18 মাত্তর্ ইস্রায়েলীয়গুনে তারারে আক্রমণ ন-গুরিলাক্, কিত্যে তারা সমাজর নেতাগুনে ইস্রায়েলীয়গুনোর গোজেন লগেপ্রভুর নাঙে তারা ইদু শমক্ খেইয়োন্। সেক্কে নেতাগুনোর বিরুদ্ধে পুরো ইস্রায়েল সমাজ্সোই কাঙেলাত্যে ফগদাং গরা ধুরিলো। 19 সেক্কে বেক্ নেতাগুনে তারারে কলাক্, “আমি ইস্রায়েলীয়গুনোর গোজেন লগেপ্রভুর নাঙে তারা ইদু শমক্ গোজ্যেই সেনত্তেই ইক্কিনে আমি তারার কিয়্যেত্ আঢ্ তুলি ন-পারিই। 20 তো আমি তারাত্ত্যেই এই কামান্ গুরিবোং, আমি তারারে পরাণে ন-মারিবোং যেনে আমি তারা ইদু যে শমক্তান্ গোজ্যেই সিয়েন ভাঙিবার কারনে লগেপ্রভুর রাগ্কান্ আমা উগুরে ন-পড়ে।” 21 তারা আরঅ কলাক্, “তারা বাঁজি থাদোক্।” সেনত্তেই গিবিয়োনীয়গুনো পৌইদ্যেনে নেতাগুনোর কধা মজিম তারা ইস্রায়েলীয় সমাজর বেক্ মানুচ্চুনোত্তে দার্বো কাবিবার আর পানি আনিবার মানুচ্ অলাক্। 22 ইয়েনর্ পরেন্দি যিহোশূয় গিবিয়োনীয়গুনোরে ডাগিনে কলঅ, “তুমি আমার কায়-কুরেত্তুন বোউত্ দূরোত্ থাগঅ এ কধাগান কোইনে কিত্তে আমারে ঠোগেলা? আজলে তুমি দঅ আমা কায়-কুরে বজত্তি গরঅ। 23 সেনত্তেই তমা উগুরে এ অভিশাপ্পান্ রলঅ, আমা গোজেনর্ ঘরত্তে তুমি দার্বো কাবিবার আর পানি আনিবার কাম্ গুরিবা। এ চাগরবোর্ কাম্ গরানাত্তুন তুমি কনদিনঅ রেহাই ন-পেবা।” 24 জোবত্ তারা যিহোশূয়রে কলাক্, “এই গোদা দেজ্ছানই তমারে দিবাত্তে আর তমা মুজুঙোত্তুন্ এ দেজছানর্ বেক্কুনোরে পুজি ফেলেবাত্তে যে উগুমান তঅ গোজেন লগেপ্রভু তা চাগর্ মোশিরে দিয়্যে সিয়েন গমেডালেই তর্ এই চাগরুনোরে কুয়ো ওইয়্যে। সেনত্তে তমা পৌইদ্যেনে বেক্ কধানি শুনিনে পরাণর দরে আমি এ কামানি গোজ্যই। 25 আমি ইক্কিনে তঅ আঢত্ আগিই; তর্ যিয়েন গম্ আর উজিত বিলিনে মনে গরচ্ আমা উগুরে তুই সিয়েনই গর্।” 26 সেনত্তে যিহোশূয় ইস্রায়েলীয়গুনোর আঢত্তুন তারারে বাজেল; তারা তারারে মারে ন-ফেলেলাক্। 27 যিহোশূয় গিবিয়োনীয়গুনোরে সেদিন্যে উগুম দিলো যেন তারা ইস্রায়েলীয়গুনোত্তে আর লগেপ্রভু যে জাগায়ান বেঈ নেযেব সেই জাগানত্ লগেপ্রভুর ডালি-পূজোত্তে দার্বো কাবিবার আর পানি আনিবার কাম্ গরন্। এজঅ সং তারা সেই কামানি গত্তন্। |
Copyright © 2021 Bangladesh Bible Society
Bangladesh Bible Society