যিহোশূয় 7 - Chakma Bibleআখনর পাপ 1 যিরীহো শঅরর্ ভস্তর্ অভিশাবর তলে থেইয়্যে পযারিরেনি পৌইদ্যেনে ইস্রায়েলীয়গুনে অবিশ্বেজী ওইয়োন্। যিহূদা-গুট্টির কর্মির পূঅ আখনে সে জিনিজোত্তুন্ কয়েক্কান নিজোত্তে নেযেল। কর্মি অলদে সব্দির পূঅ আর সেরহর নাদিন্। আখনর এ কামানত্তেই ইস্রায়েলীয়গুনো উগুরে লগেপ্রভুর রাগকান্ জুলি উদিলো। 2 যিহোশূয় যিরীহোত্তুন অয় শঅরত্ মানুচ্ পাদেল। সে শঅরান এলদে বৈথেল শঅরর্ পূগেন্দি বৈৎ-আবন শঅরর্ কায়। সেই মানুচ্চুনোরে পাদেবার অক্তত্ তে তারারে কোই দিলো্, “তুমি যেইনে দেজ্চান গমেডালে চেই এজঅ।” সেনত্তেই মানুচ্চুনে যেইনে গুমুরোত্ অয় শঅরর্ হবর্ নিলাক্। 3 সে পরেন্দি তারা যিহোশূয় ইদু ফিরি এইনে কলাক্, “অয় শঅরর্ বিরুদ্ধে বেক্ মানুচ্চুনোর যানা দরকার নেই। সিয়েন গজক্ গুরিবাত্তে দুই বা তিন আজার্ মানুচ্ পাধেই দে। ইয়েন্দোই বেক্ মানুচ্চুনোরে দুখ্ ন-দিচ্, কিত্যে সিদুগোর্ মান্জ্যর্ সোংখ্যেগুন অমকদ কম।” 4 সেনত্তে কমেদি তিন আজার মানুচ্ সিদু গেলাক্; মাত্তর্ তারা অয় শঅরর্ মানুচ্চুনো ইদু উদি যেইনে ধেই এত্তে বাধ্য অলাক্। 5 শঅরর্ গেদো ইত্তুন্ অয় শঅরর্ মানুচ্চুনে ইস্রায়েলীয়গুনোরে লোড়েইনে শবারীম সং নেযেলাক্ আর শবারীমর কামা জাগানত্ তারার্ ছত্রিশজনরে মারে ফেলেলাক্। সেক্কে ইস্রায়েলীয়গুনোর মনবল এক্কুবারে ভাঙি পড়িলো। 6 সেক্কে যিহোশূয় আর ইস্রায়েলীয়গুনোর বুড়ো নেতাগুনে নিজোর কাবড়ানি ফাদিনে লগেপ্রভুর সুন্দুগোর মুজুঙোত্ সাজোন্যা সং মাদি উগুরে মাদা নিগিরিনে রলাক্। তারা নিজোর মাদা উগুরে ধূল্যে ছিদি দিলাক্। 7 যিহোশূয় কলঅ, “ও প্রভু লগেপ্রভু, তুই কিত্যে আমার এ জাদ্তোরে যর্দন গাঙান্ পার্ গুরি আনিনে ভস্ত গুরিবাত্তে ইমোরীয়গুনোর আদত্ তুলি দিলে? হায়, আমি যুনি যর্দনর ওপারত্ থেদং গম্ থেদং! 8 ও প্রভু, ইস্রায়েলীয়গুনে শত্রুগুনো ইদু ঊদি যেইনে ধেই এজানার পরেন্দি মত্তুন্ আর কবার্ কি আঘে? 9 কনানীয়গুনে আর এ দেজর্ অন্য মানুচ্চুনে এ কধানি শুনিবাক্ আর তারা আমারে ঘিরিবাক্ আহ্ দুনিয়ের্ বুগোত্তুন আমা নাঙানি বাদ দিবাক্। ইয়েনর্ পরেন্দি তুমি কিঙিরিনে তমার সুনাঙানি রোক্ষ্যে গুরিবা?” 10 সেক্কে লগেপ্রভু যিহোশূয়রে কলঅ, উদিনে থিয়্যে। হিত্তেই তুই উবোত্ পুন্দুরী ওই পড়ি আগচ্? 11 ইস্রায়েলীয়গুনে পাপ গোজ্যন্; মুই তারারে মর্ যে সুদোমানি পালেবাত্তে কোইয়োং সিয়েনি তারা ন-পালান্। যেদক্কানি জিনিস ভস্তর্ অভিশাবর তলে সিয়েনির্ কয়েক্কান তারা নেযেয়োন; তারা চুর্ গোজ্যন্, মিজে কধা কোইয়োন্ আর বেক্ জিনিসছানি নিইনে তারা তারার নিজো জিনিসছানি লগে রাগেয়োন্। 12 সেনত্তেই ইস্রায়েলীয়গুনে তারার্ শত্রুগুনোর মুজুঙোত্ থিয়্যেই ন-পাত্তন্; তারা পিচ্ছো ফিরিনে ধেই যাদন্, কিত্যে তারা ভস্তর্ অভিশাবর তলে ওই পোজ্যন্। ভস্তর্ অভিশাবর তলে কদক্কানি জিনিস তমা ইদু আঘে। যুনি তুমি সিয়েনি ভস্ত গুরি ন-ফেলঅ সালে মুই আর তমা লগে ন-থেম্। 13 “তুই যেইনে মানুচ্চুনোরে মঅ নাঙে যুদো গুরি নেযা। তারারে কঅ যেন তারা এযেত্যে কেল্যেত্তে নিজোরে সিজি গরন্। ইস্রায়েলীয়গুনোর গোজেন্ লগেপ্রভু কোইয়্যে, ‘ও ইস্রায়েল, তমা ভিদিরে এন্ কদক্কানি জিনিস আঘে যিয়েনি ভস্তর্ অভিশাবর তলে। সিয়েনি তমা ভিদিরেত্তুন দূর্ গুরি ন-ফেলানা সং তুমি তমার শত্রুগুনোর বিরুদ্ধে থিয়্যেই ন-পারিবা। 14 সেনত্তে, বেন্যেমাদান্ তুমি গুট্টি মজিম মঅ মুজুঙোত্ এইনে থিয়্যেবা। যে গুট্টিবো মঅ আদত্ ধরা পুরিবো সে গুট্টিবো বংশ মজিম উজেই এবঅ; সিবে ভিদিরে যে বংশবো মঅ আদত্ ধরা পুরিবো সে বংশর মানুচ্চুনে পরিবার মজিম উজেই এবাক্; সে ভিদিরে যে গিরিবো মঅ আদত্ ধরা পুরিবো সে গিরির্ মানুচ্চুনে এক একজন গুরি উজই এবাক্। 15 যিয়েন ভস্তর্ অভিশাবর তলে সিয়েন যে মানুচ্চো ইদু আঘে বিলিনে ধরা পুরিবো তাত্তুন্ তার বেক্কানি আগুনোত্ পুড়ি ফেলা পুরিবো। তে লগেপ্রভুর সুদোম অমান্য গোজ্যে আর এন্ এক্কান কাম্ গোজ্যে যিয়েন্ ইস্রায়েলীয়গুনোর পক্ষে এক্কান লাজানার্ কধা।’” 16 তার্ কেল্যে বেন্যেপোত্যে যিহোশূয় গুট্টি মজিম ইস্রায়েলীয়গুনোরে লগেপ্রভুর মুজুঙোত্ আনিলো, সেক্কে যিহূদা-গুট্টিবো ধরা পুরিলো। 17 সে পরেন্দি যিহূদা-গুট্টির বংশগুনে উজেই এলে পরেন্দি সেরহীয় বংশবো ধরা পুরিলো। পরেন্দি সেরহীয় বংশর নেতাগুনে এক এক গুরি উজেই এজানার পর সব্দি ধরা পুরিলো। 18 পরেন্দি সব্দির গিরির্ মানুচ্চুনে এক এক গুরি মুজুঙেন্দি এলে যিহূদা-গুট্টির কর্মির পূঅ আখনে ধরা পুরিলো। কর্মি এলঅ সব্দির পূঅ আর সেরহর নাদিন্। 19 যিহোশূয় সেক্কে আখনরে কলঅ, “বাবা, সত্য কধা কোইনে ইস্রায়েলীয়গুনোর গোজেন লগেপ্রভুরে বাঈনী গর্, তার বাঈনী গর্; তুই যিয়েনি গোজ্যচ্ সিয়েনি মরে কঅ, ন-লুগেজ্।” 20 জোবত্ আখনে কলঅ, “এ কধাগান্ সত্য, মুই ইস্রায়েলীয়গুনোর গোজেন লগেপ্রভুর বিরুদ্ধে পাপ গোজ্যং। মুই যে কামানি গোজ্যং সিয়েন অলদে: 21 মুই লুদেয়্যে মাল ভিদিরে শিনিয়র দেজর দোল্ এক্কান কাবড়্, প্রায় আড়ি কেজি রূবো আর ছয়শ গ্রাম ওজনর্ এক্কান সনার কট্টা দেগিনে লুভ্ সামেলেই ন-পারিনে সিয়েন নেযেয়োং। সিয়েনি মঅ তাম্বুলান ভিদিরে মাদিত্ তলে লুগেয়্যে আঘে আর বেক্কানির তলেদি আগেদে রূবোনি।” 22 এ কধানি শুনিনে যিহোশূয় মানুচ্ পাধেই দিলো। তারা দাবা দিইনে সে তাম্বুলান ভিদিরে যেইনে দেগিলাক্ সিয়েনত্ পযাবিরেনি লুগেই রাগেয়োন্, আর বেক্কানির তলেদি আগেদে রূবোনি। 23 তারা সিয়েনি তাম্বুলানত্তুন্ নিগিলেনে যিহোশূয় আর বেক্ ইস্রায়েলীয়গুনো ইদু আনিলাক্ আর লগেপ্রভুর মুজুঙোত্ সিয়েনি বিজেই রাগেলাক্। 24 পরেন্দি যিহোশূয় আর বেক্ ইস্রায়েলীয়গুনে সেরহর বংশধর আখনরে লোইনে আখোর কিজিঙোত্ গেলাক্। তারা লগে নেযেলাক্ সে রূবোনি, কাবড়ানি, সনার কট্টানি, আখনর পূঅ-ঝিগুন্, তার গোরু-গাধা-ভেড়াগুন্, তার তাম্বুলানি আর যিয়েনি এলঅ বেক্কানি। 25 সে পরেন্দি যিহোশূয় কলঅ, “কিত্তেই তুই আমা উগুরে এ দযাগান্ ডাগি আনিলে? এচ্চ্যে লগেপ্রভুয়ো তঅ উগুরে দযা আনিবো।” সেক্কে বেক্ ইস্রায়েলীয়গুনে পত্তমে আখনরে আর পরেন্দি তা গিরির্ বেক্কুনোরে পাত্তর্ মেলা দিইনে মারে ফেলেলাক্। সে পরেন্দি বেক্কানিলোই তারারে পুড়ি ফেলেলাক্। 26 আখনর কিয়্যের্ উগুরেন্দি তারা ভালোক্কুন্ পাত্তর্ এগত্তর্ গুরিনে এক্কো হুড়্ বানেলাক্। সিবে এজঅ আঘে। ইয়েনর্ পরেন্দি লগেপ্রভু তা রাক্কানত্তুন্ ফিরিলো। ইয়েনত্তেই সে জাগায়ানরে ইয়েনর্ পরেত্তুন্ ধুরি আখোর কিজিং কুয়ো অদঅ। |
Copyright © 2021 Bangladesh Bible Society
Bangladesh Bible Society