যিহোশূয় 5 - Chakma Bibleইস্রায়েলীয়গুনোরে জাদত্ তুলোনা 1 যর্দন গাঙর্ পোজিমেন্দি ইমোরীয়গুনোর বেক্ রাজাগুনে আর সাগর পারর্ বেক্ কনানীয় রাজাগুনে যেক্কে শুনিলাক, আমি পার্ ওই এজানার্ সলাবোত্ লগেপ্রভু কিঙিরিনে যর্দনর পানিগান আমারে, অত্তাৎ ইস্রায়েলীয়গুনোর মুজুঙোত্তুন্ শুগেই দিয়্যে সেক্কে তারার আজা-ভরসা থুম্ অলঅ; ইস্রায়েলীয়গুনো মুজুঙোত্ থিয়্যেবার সাহস আর তারার ন-থেলঅ। 2 সে অক্তত্ লগেপ্রভু যিহোশূয়রে কলঅ, “তুই ঝক্ঝক্যা পাত্তরর্ কয়েক্কান ছুরি যুক্কোল্ গুরি নেযা আর সিয়েনিলোই আগঅ ধোক্ক্যেন্ এ ইস্রায়েলীয়গুনোরে জাদত্ তুলো।” 3 এ কধানি শুনিনে যিহোশূয় ঝক্ঝক্যা পাত্তরর্ কয়েক্কান ছুরি যুক্কোল্ গুরিলো আর সিয়েনিলোই গিবিয়োৎ হারালোত (যিয়েনর্ ভেদ্তান্“জাদত্ উদোনার্ মুড়ো”) ইস্রায়েলীয়গুনোরে জাদত্ তুলিলো। 4 যিয়েনত্তে তে এ কামান্ গুরিলো সিয়েন অলঅ: যুদ্ধোত্ যেবাত্তে বয়স ওইয়্যে এধোক্ক্যেন যিদুক্কুন মরদ মানুচ্ মিসর দেজত্তুন নিগিলি এচ্ছ্যন্ তারা মিসরান্ ছাড়ি এজানার পরেন্দি পদথ্ ধূল্যেচর-চাগালাত্ মুরি যেইয়োন্। 5 যিগুনে মিসর ফেলেইনে নিগিলি এচ্ছ্যন্ তারারে জাদত্ তুলো ওইয়্যে; মাত্তর্ মিসরত্তুন নিগিলি এজানার পরেন্দি যেবার্ পদথ্ ধূল্যেচর- চাগালাত্ যিগুনোর জর্ম ওইয়্যে সিগুনোরে কাররে জাদত্ তুলো ন-অয়। 6 মিসরত্তুন নিগিলি এজানার্ সলাবোত্ যিগুনোর যুদ্বো গরেদে ধোক্ক্যেন্ বয়স ওইয়্যে তারা বেক্কুনে মুরি ন-যানা সং চোল্লিশ বজর ইস্রায়েলীয়গুনোরে ধূল্যেচর-চাগালাত্ ঘুরো পোজ্যে, কিত্যে তারা লগেপ্রভুর কধানি ন-মানন্। লগেপ্রভু তারারে শমক্ খেইনে কোইয়্যেদে, তারার পুরোণি মানুচ্চুনো ইদু দুধ আর মধুলোই ভোজ্যে যে দেজ্চান আমারে দিবো বিলিনে শমক্ খেইয়্যে সিয়েন্ তারা চেই ন-পেবাক্। 7 সেনত্তেই তারার্ জাগানিত্ তারার্ পূঅগুনোরে তে থিয়্যেই রাগেল আর যিহোশূয় ইগুনোরে জাদত্ তুলিলো। যেবার্ পদথ্ তারারে জাদত্ তুলো ন-অয় বিলিনে তারা সেক্কেয়ো জাদত্ ন-উঠ্যে অবস্থায় এলাক্। 8 বেক্ মানুচ্চুনোরে জাদত্ তুলো অলঅ আর তারা গম্ ন-অনা সং সেই জাগায়ানত্ তাম্বুল ভিদিরে থেলাক্। 9 ইয়েনর্ পরেন্দি লগেপ্রভু যিহোশূয়রে কলঅ, “মিসরত্ তমার যে অসর্মানান্ এলঅ সিয়েন এচ্ছ্যে তমা ইত্তুন্ দূর গুরি দিলুং।” সেনত্তেই এজঅ সে জাগায়ানরে গিল্গল বিলিনে কন্। 10 সে মাসর চৌদ্দো দিনোত্ সজোন্যা অক্তত্ যিরীহোর সং জাগানত্ গিল্গলত্ তাম্বুল্ ফেলেইনে থেবার অক্তত্ ইস্রায়েলীয়গুনে উদ্ধোর-পরব্ পালেলাক্। 11 তার্ কেল্যে দিন্নোদই তারা সে দেজর্ ফসলত্তুন্ বানেয়্যে সদা নেইয়্যে রুটি আর ভাজেয়্যে শোজ্য হেলাক্। 12 যেদিন্যে তারা সে দেজর হানা হেলাক্ তার্কেল্যে দিন্নোত্তুন ধুরি মান্না পড়ানা বন্ধ ওই গেলঅ। ইয়েনর্ পরেন্দি ইস্রায়েলীয়গুনে আর মান্না ন-পান্। সে বজরত্তুন ধুরি তারা কনান দেজর ফসল হা ধুরিলাক্। যিরীহো শঅরর্ ভস্ত অনা 13 যিরীহোর কায়কুরে যানার পরেন্দি যিহোশূয় খুলো তলোয়ার আদত্ এক্কো মান্জ্যরে তা মুজুঙোত্ থিয়্যেই থাদে দেগিলো। যিহোশূয় তাইদু যেইনে পুযোর্ গুরিলো, “তুই কা তপ্পের্ মানুচ্-আমার্, না আমা শত্রুগুনোর?” 14 জোবত্ তে কলঅ, “মুই কারঅ পক্ষর মানুচ্ নয়। মুই লগেপ্রভুর সৈন্যদলর সেনাপতি; ইক্কিনে মুই ইয়েনত্ এচ্চ্যং।” এ কধা শুনিনে যিহোশূয় মাটিত্ আদু পাড়ি পড়িনে তারে সালাম্ গুরিলো আর পুজোর্ গুরিলো, “মঅ গিরোজ্ তা চাগর্বোরে কি কিজু কবাত্তে চায়?” 15 লগেপ্রভুর সৈন্যদলর সেনাপতিবো কলঅ, “তঅ টেঙর্ জদানি খুলি ফেলা, কিত্যে তুই যিয়েনত্ থিয়্যেই আগচ্ সে জাগায়ান পবিত্র।” যিহোশূয় সিয়েনই গুরিলো। |
Copyright © 2021 Bangladesh Bible Society
Bangladesh Bible Society