যিহোশূয় 4 - Chakma Bible1 এবাবোত্যেগুরি পুরো ইস্রায়েল জাদ্তো যর্দন গাঙান্ পার অনার পরেন্দি লগেপ্রভু যিহোশূয়রে কলঅ, 2 “তুই পত্তি গুট্টিত্তুন একজন গুরি বেক্কুনে বারজন মানুচ্ বেঈ নেযা। 3 তারারে কঅ, গাঙানর সংমোধ্যে যে জাগানত্ ধর্মগুরুগুনে থিয়্যেই আগন্ তারা যেনে সে জাগানত্তুন্ বারবো পাত্তর্ কুড়েই নেযেইনে তমা লগে যান্ আর এচ্ছ্যে রেদোত্ তুমি যে জাগানত্ থেবা সিয়েনত্ সিগুন্ রাগান্।” 4-5 যিহোশূয় ইস্রায়েলীয়গুনোর পত্তি গুট্টিত্তুন একজন গুরি যে বারজনরে নেযেল তারারে ডাগিনে কলঅ, “তুমি যর্দন গাঙত্ লামিনে তমা গোজেন লগেপ্রভুর সাক্ষ্য-সুন্দুগো ইদু যঅ আর ইস্রায়েলীয়গুনোর বারবো গুট্টিত্তে পত্তিজনে এক্কো গুরি বেক্কুনে বারবো পাত্তর্ কানাত্ তুলি লঅ। 6-7 ইগুন তমা ভিদিরে এক্কান চিহ্নো ওই থেবঅ। আগামিদি তমা পূঅ-ঝিগুনে সে পাত্তরুনোর ভেদ্তান্ পুজোর্ গুরিলে তুমি তারারে জানেবাদে, লগেপ্রভুর সাক্ষ্য-সুন্দুক্কো যেক্কে যর্দন গাঙান্ পার্ গুরি নেযাদন্ সেক্কে সিয়েনর গঙার পানিগান বন্ধ ওই যেইয়্যে। এ পাত্তরুন ইস্রায়েলীয়গুনো ইদু এন্ এক্কান চিহ্নো ওই থেবঅ যিয়েন্ জিংকানিবর্ তারার সে কধানি মনত্ তুলি দিবো।” 8 ইস্রায়েলীয়গুনে যিহোশূয়র উগুম মজিম্ কাম্ গুরিলাক্। লগেপ্রভু যিহোশূয়রে যিয়েনি কোইয়্যে সেধোক্ক্যেন ইস্রায়েলীয়গুনে তারার বারবো গুট্টিত্তে যর্দন গাঙর্ সংমোধ্যেত্তুন বারবো পাত্তর্ তোগেই নিলাক্। পরেন্দি সিগুন নিইনে তারা যিয়েনত্ রেত্তো কাদেলাক্ সিয়েনত্ থোই দিলাক্। 9 যর্দন গাঙর্ যে জাগানত্ সাক্ষ্য-সুন্দুক্কো বুয়োই নেযেয়্যে ধর্মগুরুগুনে থিয়্যেই এলাক্ যিহোশূয় সিয়েনত্ আরঅ বারবো পাত্তর্ রাগেল। পাত্তরুন ইয়ো সং সিয়েনত্ আগন্। 10 গাঙান্ পার্ অনার উগুম পৌইদ্যেনে মোশি যিহোশূয়রে উগুম্ দি যেইয়্যে। সেনত্তেই মানুচ্চুনোরে কবাত্তে যিহোশূয়রে দিয়্যে লগেপ্রভুর উগুম মজিম মানুচ্চুনে বেক্কানি ন-গরানা সং সাক্ষ্য-সুন্দুক্কো বোইয়্যে ধর্মগুরুগুনে গাঙত্ থিয়্যেই রলাক্ আর মানুচ্চুনে যাদিগুরি গাঙান্ পার ওই গেলাক্। 11 তারা বেক্কুনে পার্ অনার পরেন্দি লগেপ্রভুর সাক্ষ্য-সুন্দুক্কো নিইনে ধর্মগুরুগুনে মান্জ্যর্ চোগো মুজুঙোত্ এপারত্ এইনে উদিলাক্। 12 মোশি যে উগুমানি দি যেইয়্যে সে মজিম রূবেণ আর গাদ-গুট্টির বেক্কুনে আহ্ মনঃশি-গুট্টির অর্দ্দেক মানুচ্ যুদ্ধোত্তে যুক্কোল্ ওইনে ইস্রায়েলীয়গুনোর আগে আগে পার্ ওই যেইয়োন। 13 যুদ্ধো গুরিবাত্তে প্রায় চোল্লিশ আজার মানুচ্ আত্যের্ আদত্ লগেপ্রভুরে মুজুঙোত্ রাগেইনে গাঙান্ পার্ ওইনে যিরিহোর সং জাগানত্ গেলাক্। 14 সেদিন্যে লগেপ্রভু বেক্ ইস্রায়েলীয়গুনোর চোগোত্ যিহোশূয়রে সর্মান গুরিলো। সিয়েনত্তে মানুচ্চুনে মোশি ধোক্ক্যেন্ গুরিনে যিহোশূয়র পুরো জীংকানিগান ধুরিনে তারে ভোক্তি গুরিলাক্। 15 লগেপ্রভু যিহোশূয়রে কোইয়্যেদে, 16 “সাক্ষ্য-সুন্দুক্কো বুয়োইয়্যে ধর্মগুরুগুনোরে যর্দন গাঙত্তুন উদি এবাত্তে উগুম্ দে।” 17 সেনত্তে যিহোশূয় ধর্মগুরুগুনোরে যর্দন গাঙত্তুন উদি এবাত্তে উগুম দিয়্যে। 18 সেক্কে যে ধর্মগুরুগুনে লগেপ্রভুর সাক্ষ্য-সুন্দুক্কো বুয়োই নেযাদন্ তারা গাঙর্ সং মোধ্যেত্তুন উদি এইনে শুগুনো মাদিত্ টেং দেনার্ লগে লগে গাঙর্ গঙার পানিগান আরঅ তুবোল্ উদিলো আহ্ আগঅ ধোক্ক্যেন্ দ্বিপার পানিলোই ভাসি গেলঅ। 19 বজরর্ পত্তম মাজর দশ দিনোত্ মানুচ্চুনে যর্দনত্তুন উদি এইনে যিরিহোর পুগ দুযিত্ গিল্গলত্ যেইনে তাম্বুল্ ফেলেলাক, 20 যিহোশূয় এ গিল্গলদ যর্দনত্তুন তুলি আন্যে বারবো পাত্তর্ রাগেল। 21 সে পরেন্দি তে ইস্রায়েলীয়গুনোরে কলঅ, “আগামিদি তমার বংশধরুনে যেক্কে এ পাত্তরুনোর অত্তগান্ তারার্ বাপ্পুনোরে পুজোর্ গুরিবাক্, 22 সেক্কে তুমি তারারে কবাদে, ‘ইস্রায়েলীয়গুনে শুগুনো মাদি উগুরেদি আদিনে এ যর্দন গাঙান্ পার্ ওই যেইয়োন।’ 23 আমি লোহিত সাগরান্ পার্ ওই ন-যানা সং তমা গোজেন লগেপ্রভু যেধোক্ক্যেন্ আমা মুজুঙোত্ সাগরান শুগুনো অবস্থায় রাগেয়্যে সেধোক্ক্যেন্ যর্দন গাঙানত্অ সিয়েনই গুরিলো। তুমি গাঙান পার্ ওই ন-যানা সং তমা গোজেন লগেপ্রভু তমা মুজুঙোত্ যর্দন গাঙান শুগুনো অবস্থায় রাগেই দিয়্যে। 24 তে এ কামান্ গোজ্যেদে যেনে পিত্থিমীর বেক্ জাদ্তুনে জানি পারন্, লগেপ্রভুর আত্তান্ বোলী আর যেনে তুমি আমিজে তমা গোজেন লগেপ্রভুরে ভক্তিবলা দোরেইনে চলঅ।” |
Copyright © 2021 Bangladesh Bible Society
Bangladesh Bible Society