যিহোশূয় 24 - Chakma Bibleশিখিমোর বেবস্থার্ কধা 1 ইয়েনর্ পরেদি যিহোশূয় ইস্রায়েলীয়গুনোর বেক্ গুট্টিগুনোরে শিখিমোত্ এক্কান্ জাগাত্ এগত্তর্ গুরিলো। তে ইস্রায়েলীয়গুনোর বুড়ো নেতাগুনোরে, মুরুব্বীগুনোরে, বিচেরগুরিয়েগুনোরে আর কাম্গুরিয়েগুনোরে ডাগিলো। সেক্কে তারা গোজেনর্ মুজুঙোত্ আঝিল্ অলাক্। 2 যিহোশূয় বেক্ মানুচ্চুনোরে কলঅ, ইস্রায়েলীয়গুনোর গোজেন লগেপ্রভু কোইয়্যেদে, ভালোক্ দিন আগেন্দি তমা পূরোণি মানুচ্চুনে ইউফ্রেটিস গাঙর্ উইপারত্ বজত্তি গুরিদাক্ আর দেব-দেবেদাগুনোরে পূজো গুরিদাক্। তারা ভিদিরে এক্কো এলঅ অব্রাহাম আর নাহোরর বাপ্পো তেরহ। 3 মাত্তর্ মুই তমার পূরোণি মানুচ্ অব্রাহামরে গাঙর্ উইপারত্তুন্ লোই আনিনে কনান দেজর বেক্ জাগানিত্ ঘুরেলুং আর তা বংশবো বোউত্ বাড়েই দিলুং। মুই তারে ইস্হাকরে দান গুরিলুং, 4 আর ইস্হাকরে দান গুরিলুং যাকোবরে আর এষৌরে। সেয়ীরর মুড়ো-মুড়ি চাগালাগান মুই এষৌরে সোম্বোত্তি ইজেবে দিলুং, মাত্তর্ যাকোব আর তার্ পুঅগুনে গেলাক্ মিসর দেজত্। 5 সে পরেন্দি মুই মোশি আর হারোণরে পাদেলুং। মঅ কাম্বোই মুই মিসরীয়গুনোরে আঘাত গুরিলুং, আর সে পরেন্দি মুই তমারে নিগিলেই আনিলুং। 6 তমার পূরোণি মানুচ্চুনে মিসরত্তুন্ নিগিলিনে সাগরর্ কায় এলাক্। ইন্দি মিসরীয়গুনে রথ আর ঘোড়ার সৈন্যদল লোইনে লোহিত সাগর সং তারার্ পিজে পিজে লোড়েইনে এলাক্। 7 মাত্তর্ ইস্রায়েলীয়গুনে মইদু কানাকুদি গুরিলে পরেন্দি মুই তারার্ আর মিসরীয়গুনোর সংমোধ্যে আন্ধার্ গুরি দিলুং। মুই মিসরীয়গুনো উগুরে সাগরর্ পানিগান্ ফিরেই আনিনে তারারে ভাজেই দিলুং। মিসরীয়গুনোর অবস্থা মুই কি গোজ্যং সিয়েন দঅ তুমি নিজেই দেক্কো। সে পরেন্দি তুমি ভালোক্ দিন ধূল্যেচরর্-চাগালাত্ বজত্তি গোজ্য। 8 ইয়েনর্ পরেন্দি মুই যর্দনর পূগেন্দি আদাম্মে ইমোরীয়গুনোর দেজত্ তমারে আনিলুং। তারা তমা বিরুদ্ধে যুদ্ধো গুরিলাক্ মাত্তর্ মুই তমা আঢত্ তারারে তুলি দিলুং। তমা মুজুঙোত্তুন্ মুই তারারে ভস্ত গুরি ফেলেলুং আর তুমি তারার্ দেজ্চান গজক্ গুরি নেযেলা। 9 পরেন্দি সিপ্পোরর পূঅ মোয়াবর রাজা বালাকে ইস্রায়েলীয়গুনো লগে যুদ্ধো গুরিবাত্তে যুক্কোল্ অলঅ আর তমারে অভিশাব্ দিবাত্তেই বিয়োরর পূঅ বিলিয়মরে ডাগি আনিলো। 10 মাত্তর্ বিলিয়মর কধালোই কান পাদিবাত্তে মুই রাজী ন-অং, সেনত্তে তে বার্ বার্ তমারে আশিদ্বাদ গোজ্যে। বালাক আঢত্তুন্ মুয়ই তমারে উদ্ধোর গুরিলুং। 11 “ ‘সে পরেন্দি তুমি যর্দনান্ পার্ ওইনে যিরীহোত্ এলা। যিরীহো শঅরর্ মানুচ্চুনে আর ইমোরীয়, পরিষীয়, কনানীয়, হিত্তীয়, গির্গাশীয়, হিব্বীয় আর যিবূষীয়গুনে তমা বিরুদ্ধে যুদ্ধো গুরিলাক্, মাত্তর্ মুই তারারে বেক্কুনোরে তমা আঢত্ তুলি দিলুং। 12 মুই তমা আগেন্দি বলাপুগ্ পাধেই দিলুং; বলাপুক্কুন্ তমা মুজুঙোত্তুন্ সে দ্বি’জন ইমোরীয় রাজারে ধাবেই দিলো। তুমি যে তমার লাম্বা ছুড়ি বা সেল্-ধনুগানিলোই ইয়েনি গোজ্য সিয়েন্ নয়। 13 যে ভূইয়ানত্ তুমি কনঅ কাম্ ন-গরঅ আর যে শঅর্ আর আদামানি তুমি ন-বানঅ মুই সিয়েনি তমারে দিলুং। তুমি সে শঅর্ আর আদামানিত্ ইক্কিনে বজত্তি গরর্; সিয়েনবাদে যে আংগুরো ক্ষেত্তানি তুমি ন-গরঅ আর যে জলপাই গাজ্ছুন্ তুমি ন-লাগঅ সিগুনোর ফলুনো তুমি খর্।” 14 সে পরেন্দি যিহোশূয় কলঅ, “ইক্কিনে তুমি খাটি মন্দোই বিশ্বেজ্ গুরিনে লগেপ্রভুরে ভোক্তি গরঅ আর তারে সেবা গরঅ। তমার পূরোণিমানুচ্চুনে ইউফ্রেটিস গাঙর্ উইপারত্ আর মিসর দেজত্ যিদুক্কুন দেব-দেবেদার পূজো গুরিদাক্ সিগুন্ তুমি দূর গুরি দিইনে লগেপ্রভুরে সেবা গরঅ। 15 মাত্তর্ লগেপ্রভুর সেবা গুরিবাত্তে যুনি তমার মনত্ ন-পড়ে সালে যিবের্ সেবা তুমি গুরিবা সিয়েন ইক্কিনেই ঠিগ্ গুরি নেযঅ। তমা পূরেণিমানুচ্চুনে ইউফ্রেটিস গাঙর্ উইপারত্ থাগদে যিদুক্কুন দেব-দেবেদারে পূজো গুরিদাক্ তারারে সেবা গুরিবা, না কি যিগুনোর্ দেজত্ তুমি বজত্তি গরর্ সে ইমোরীয়গুনোর দেব-দেবেদাগুনোরে সেবা গুরিবা? মাত্তর্ মুই আর মঅ গিরির্ বেক্কুনে লগেপ্রভুরে সেবা গুরিবোং।” 16 জোবত্ মানুচ্চুনে কলাক্, “লগেপ্রভুরে ছাড়িনে দেব-দেবেদারে পূজো গরানা যেন আমার্ মাধ্যমে কনদিন্ ন-অয়। 17 আমার্ গোজেন লগেপ্রভু নিজেই আমার আর আমার পূরেণিমানুচ্চুনোরে মিসর দেজত্তুন্, সে চাগরর্ দেজত্তুন্ নিগিলেই আন্যে আর আমার চোগো মুজুঙোত্ সে বেক্ দাঙর্ দাঙর্ আমক্ অবার্ কামানি গোজ্যে। আমার পুরো যেবার পদথ্ আর যিদুক্কুন্ জাদ ভিদিরেন্দি আমি এচ্ছ্যেই তারা আঢত্তুন্ তেয়ই আমারে বাজেই রাগেয়্যে। 18 এ দেজর্ আদাম্মে ইমোরীয়গুনোরে আর অন্য বেক্ জাদ্তুনোরে লগেপ্রভু আমা মুজুঙোত্তুন্ ধাবেই দিয়্যে। আমিয়ো লগেপ্রভুরে সেবা গুরিবোং, কিত্যেই তেয়ই আমার গোজেন।” 19 এ কধাগান শুনিনে যিহোশূয় মানুচ্চুনোরে কলদে, “মাত্তর্ তুমি তার সেবা গুরি ন-পারিবা, কিত্যে তে পবিত্র গোজেন, তার্ পাওনা ভোক্তিগান্ তে আর কাররে পেবাত্তে ন-দিবো। তমার উল্লোমিগানি আর তমার পাপ্পানি তে খেমা ন-গুরিবো। 20 তুমি যুনি লগেপ্রভুরে ছাড়িনে দেব-দেবেদারে সেবা গরঅ সালে তে তমা ইন্দিত্তুন্ ফিরিবো আর যুনিয়ো তে আগেন্দি তমারে ভালেদি গোজ্যে মাত্তর্ সেক্কে তমা উগুরে অমংগল আনিনে তমারে শেজ্ গুরি দিবো।” 21 সেক্কে মানুচ্চুনে যিহোশূয়রে কলাক্, “না, আমি লগেপ্রভুরে সেবা গুরিবোং।” 22 সেক্কে যিহোশূয় কলঅ, “এ কধাগান্দোই তুমি নিজোরে নিজেই সাক্ষী ওই থেলা, লগেপ্রভুরে তুমি সেবা গুরিবাত্তে বেঈ লোইয়ো।” জোবত্ তারা কলাক্, “অয়, আমি সাক্ষী রলং।” 23 যিহোশূয় কলঅ্, “সালে তমা ভিদিরে যিদুক্কুন্ দেব-দেবেদা আগন্ সিগুনোরে ইক্কিনে তুমি দূর্ গুরি দুয়ো আর ইস্রায়েলীয়গুনোর গোজেন লগেপ্রভু উগুরে তমার মনানি রাগঅ।” 24 সেক্কে বেক্কুনে যিহোশূয়রে কলাক্, “আমি আমার গোজেন লগেপ্রভুরে সেবা গুরিবোং আর তার্ উগুমানি পালেবং।” 25 যিহোশূয় সেদিন্যে ইস্রায়েলীয়গুনোত্তে এক্কান্ সুদোম্ ঠিগ্ গুরিলো আর শিখিমোত্ রীদি আর সুদোমানি পালেবাত্তে তারারে উগুম দিলো। 26 বেক্কানি তে গোজেনর্ রীদি-সুদোমর্ এক্কো বোইয়োত্ লিগি রাগেল। তে এক্কো দাঙর্ পাথর্ লোইনে লগেপ্রভুর পবিত্র জাগান ইদু এলোন গাজর্ গড়াত্ বোজেল। 27 পরেন্দি তে বেক্ মানুচ্চুনোরে কলঅ্, “এ পাত্তর্বো আমা বিরুদ্ধে সাক্ষী ওই থেবঅ। লগেপ্রভু আমা ইদু যেদক্কানি কধা কোইয়্যে সিয়েনি এ পাত্তর্বো শুন্যে। যুনি তুমি তমার গোজেনরে অস্বীগের্ গরঅ সালে ইবে তমার বিরুদ্ধে সাক্ষ্য দিবো।” 28 ইয়েনর্ পরেন্দি যিহোশূয় বেক্কুনোরে তারার্ নিজোর নিজোর জাগা-জোমিত্ পাধেই দিলো। যিহোশূয়র মরাণা 29 এ ঘটনাগানির পরেন্দি লগেপ্রভুর চাগর্ নূনর পূঅ যিহোশূয় একশঅ দশ বজর বয়জত্ মুরি গেলঅ। 30 মানুচ্চুনে গাশ মুড়োবো উগুরে তা সোম্বোত্তিগানি ভিদিরে, অত্তাৎ ইফ্রয়িমর মুড়ো-মুড়ি চাগালার তিম্নৎ-সেরহত্ তারে গোর্ দিলাক্। 31 যিহোশূয়র জীংকানিত্ আর তা পরেন্দি যিদুক্কুন বুড়ো নেতায় ইস্রায়েলীয়গুনোত্তে লগেপ্রভু যিয়েনি গোজ্যে সিয়েনি দেখ্যন্ তারার জিংকানিত্ ইস্রায়েলীয়গুনে লগেপ্রভুরে সেবা গোজ্যন্। 32 যোষেফর আড়ুন, যিগুন ইস্রায়েলীয়গুনে মিসর দেজত্তুন্ লোই এচ্ছো্ন্, সিগুন্ তারা শিখিমোত্ গোর্ দিইনে রাগেয়োন্। যাকোবে এ জাগায়ান শিখিমর বাপ হমোরর পূঅগুনোত্তুন্ একশঅ্ কসীতা দিইনে কিনি লোইয়্যে। এ জাগায়ান যোষেফর বংশধরুনোর সোম্বোত্তি ভিদিরে পোজ্যে। 33 পরেদি হারোণর পূঅ ইলিয়াসরে মুরি গেলে তারে গিবিয়াতত্ গোর্ দিয়্যে অলঅ। ইফ্রয়িমর মুড়ো-মুড়ি চাগালাত্ এ জাগায়ান তার্ পূঅ পীনহসরে দিয়্যে ওইয়্যে। |
Copyright © 2021 Bangladesh Bible Society
Bangladesh Bible Society