যিহোশূয় 23 - Chakma Bibleযিহোশুয়র বিদেয় লনা 1 ইস্রায়েলীয়গুনোর চেরোকিত্তে শত্রুগুনোর আঢত্তুন্ লগেপ্রভু তারারে জিরেন্ দেনার্ পরেন্দি ভালোক্ দিন বিদি গেলঅ। এ ভিদিরে যিহোশুয়র বয়স বোউত্ ওই যেইয়্যে, তে বুড়ো ওই যেইয়্যে। 2 একদিন্যে তে বেক্ ইস্রায়েলীয়গুনোরে, অত্তাৎ তারার্ বুড়ো নেতাগুনোরে, মুরুব্বীগুনোরে, বিচেরগুরিয়েগুনোরে আর কাম্গুরিয়েগুনোরে ডাগিনে কলঅ, চঅ, মর্ বয়স বোউত্ ওইয়্যে, মুই বুড়ো ওইয়োং। 3 তমা গোজেন লগেপ্রভু তমাত্তে এ জাত্তো উগুরে যিয়েনি গোজ্যে সিয়েনি দঅ তুমি নিজোর্ চোগেদি দেক্কো। তমা গোজেন লগেপ্রভু নিজেই তমার্ ওইনে যুদ্ধো গোজ্যে। 4 যর্দন গাঙত্তুন্ পোজিমেন্দি ভূমধ্য সাগর সং যিদুক্কুন্ জাদরে মুই ভস্ত গুরি দুয়োং আর যিদুক্কুন্ জাদ এজঅ বাগি রোইয়োন্ তারার্ বেক্কুনোর জাগায়ানি মুই তমা গুট্টিগুনো ভিদিরে সোম্বোত্তি ইজেবে ভাগ গুরি দুয়োং। 5 তমার্ গোজেন লগেপ্রভু নিজে বাদ্বাগি সে বেক্ জাদ্তুনোরে তমার পথ্তানিত্তুন্ সোরেই দিবো। তমা মুজুঙেত্তুন্ তে তারারে ধাবেইনে নিগিলেই দিবো আর তুমি তমার গোজেন লগেপ্রভুর এগেম্ মজিম তারার্ জাগায়ানি গজক্ গুরি নেযেবা। 6 সেনত্তেই তুমি তমার বেক্ বলান্ দিইনে মোশির রীদি-সুদোমর্ বোইয়োত্ যিয়েনি লেগা আঘে সিয়েনি বেক্কানি পালঅ; সিয়োত্তুন ইন্দি উন্দি সুরি ন-যেয়ো। 7 যে জাদ্তুন্ তমা ভিদিরে রোইয়োন্ তারা সমারে ন-মিজেয়ো; তারার্ দেব-দেবেদাগুনোর্ নাঙানি মুয়োত্ ন-আন্য বা তারার্ নাঙে শমক্ ন-গোজ্য। সিগুনোর পূজো ন-গোজ্য বা তারার্ মুজুঙোত্ মাদা ন-নিগিজ্য। 8 তুমি তমার্ গোজেন লগেপ্রভুরে আজাবোদে ধুরি রাগঅ, যেধোক্ক্যেনগুরি এচ্চ্যে সং তুমি গুরি এজর্। 9 দাঙর্ দাঙর্ আর বোলী জাদ্তুনোরে তমা মুজুঙোত্তুন্ লগেপ্রভু ধাবেই দিয়্যে। এচ্চ্যে সং কনঅ জনে তমা মুজুঙোত্ থিয়্যেই থেই ন-পারন্। 10 তমাত্তুন্ একজনে এক আজার্ জনরে ধাবেই দি পাজ্যে, কিত্যে তমা গোজেন লগেপ্রভুর্ এগেম্ মজিম তে তমার ওইনে যুদ্ধো গোজ্যে। 11 সেনত্তেই তমার গোজেন লগেপ্রভুরে কোচ্পানার পৌইদ্যেনে তুমি জদপদে মনযোগী অ। 12 মাত্তর্ এ জাদ্তুনো ভিদিরে যিদুক্কুন্ মানুচ্ পরাণে বাঁজি যেইনে তমা ভিদিরে আগন্ তুমি যুনি লগেপ্রভুরে ছাড়িনে তারা সমারে মিজো, বা তারা সমারে বৌ দেনার কুদুম্মোগান্ থিদে গরঅ, বা তারা সমারে মিজো, 13 সালে তুমি এ কধাগান গমেডালে জানি লঅ, তমা গোজেন লগেপ্রভু এ বেক্ জাদ্তুনোরে তমা মুজুঙোত্তুন্ আর ধাবেই ন-দিবো। সিয়েনর্ বদলে তারা এন্ জাল্ আর ফাল্ ওইনে উদিবাক্ যিয়েন ভিদিরে তুমি যেইনে ধরা পড়িবা আর তারা অবাক্ তমার পিঠ্তানির্ চাবুক্ আর চোগোর্ কাদা। যে দোল্ দেজ্চান তমার্ গোজেন লগেপ্রভু তমারে দিয়্যে যেরেন্দি সিয়েনত্তুন্ তুমি ভস্ত ওই যেবা। 14 “পিত্থিমীত্ বেক্কুনে যে পথ্তানন্দি যান্ ইক্কিনে মুইয়ো সে পথ্তানন্দি যাঙর্। এ কধাগান তমাত্তুন্ গমেডালে জানা আঘে, তমার গোজেন লগেপ্রভু তমারে ভালেদি গুরিবাত্তে যেদক্কানি এগেম্ গোজ্যে সিয়েনির্ এক্কানঅ বিফল ন-অয়। বেক্ শমক্তানি পূরণ ওইয়্যে, এক্কানঅ অপূরণ ন-থায়। 15-16 মাত্তর্ যুনি তুমি তমার গোজেন লগেপ্রভুর দিয়্যে সুদোমানি তে পালেবাত্তে কোইয়্যে সিয়েনি ন-পালঅ, আর যুনি তুমি যেইনে দেব-দেবেদাগুনোরে পূজো গরঅ আর তারার্ মুজুঙোত্ মাদাবো নিগিরো, সালে তমার গোজেন লগেপ্রভু ভালেদি গুরিবাত্তে যেদক্কানি এগেম্ গোজ্যে সিয়েনির বেক্কানি যেধোক্ক্যেন্ পূরণ ওইয়্যে সেধোক্ক্যেন্ লগেপ্রভু যেদক্কানি অমংগলর দর্ দেগেয়্যে সিয়েনি বেক্কানি তে তমা উগুরে ঘোদেব আর যে দোল্ দেজ্চান তে তমারে দিয়্যে যেরেন্দি সিয়োত্তুন্ তমারে ভস্ত গুরি ফেলেব। লগেপ্রভুর রাগ্কান্ তমার বিরুদ্ধে জুলিবো, আর যে দোল্ দেজ্চান তে তমারে দিয়্যে সিয়েনত্তুন যাদিমাদি তুমি ভস্ত ওই যেবা।” |
Copyright © 2021 Bangladesh Bible Society
Bangladesh Bible Society