যিহোশূয় 22 - Chakma Bibleযর্দনর পূগেন্দি গুট্টিগুনোর্ নিজোর্ দেজত্ যানা 1-2 যিহোশূয় ইয়েন পরেন্দি রূবেণ আর গাদ-গুট্টির মানুচ্চুনোরে আর মনঃশি-গুট্টির অদ্দেক্ মানুচ্চুনোরে ডাগিনে কলঅ, “লগেপ্রভুর চাগর্ মোশি তমারে যেদক্কানি উগুম্ দিয়্যে তুমি সিয়েনি বেক্কানি পালেয়্য। সিয়েনি বাদে তুমি বেক্কানিত্ মঅ উগুমোর্ বাধ্য থেইয়্য। 3 ভালোক্ দিন সং, এন্ কি, এচ্চ্যে সং তুমি তমা ভেইয়ুনোরে ছাড়ি ন-যঅ, বরং তমার গোজেন লগেপ্রভু তমা উগুরে যে কামর্ ভারান্ দিয়্যে সিয়েনি তুমি থুম্ গোজ্য। 4 তমা গোজেন লগেপ্রভুর এগেম্ মজিম তে যুদ্ধোত্তুন্ তমা ভেইয়ুনোরে জিরেবাত্তে দিয়্যে; সেনত্তেই লগেপ্রভুর চাগর্ মোশি যর্দনর উইপারত্ তমারে যে জাগায়ান্ দিয়্যে সে জাগানর ঘরানত্ এবেরা তুমি ফিরি যঅ। 5 মাত্তর্ যেদক্কানি উগুম্ আর রীদি-সুুদোম লগেপ্রভুর্ চাগর্ মোশি তমারে দি যেইয়্যে সিয়েনি পালেবাত্তে মন্ দুয়ো। তমা গোজেন লগেপ্রভুরে কোচ্পেইয়ো, তা পথ্তানন্দি আদঅ, তার্ বেক্ উগুমানি পালঅ, তারে আজাবোদে ধরঅ আর তমার্ বেক্ মনান্ আর পরাণান্ দিইনে তার সেবা গরঅ।” 6 ইয়েনর্ পরেন্দি যিহোশূয় তারারে বর্ দিইন বিদেয় দিলো আর তারা ঘরত্ ফিরি গেলাক্। 7 মনঃশি-গুট্টির অদ্দেক্ মান্জ্যরে মোশি বাশন দেজ্চান দিয়্যে, আর যিহোশূয় বাদবাগি অদ্দেক্ মানুচ্চুনোরে জাগা দিলো তারার্ ইস্রায়েলীয় ভেইয়ুনোর সমারে যর্দনর পোজিমেন্দি। যিহোশূয় তারার্ ঘরত্ যেবাত্তে বিদেয় দিবার্ সময়ানত্ বর্ দিইনে কোইয়্যেদে, 8 “তমার বোউত্ ধন-সোম্বোত্তি ওইয়্যে, যেন এ্যমানর দাঙর্ দাঙর্ পাল্, সনা, রূবো, পিদোল, লুয়ো আর বোউত্ কাবড়-চুগোর্। ইয়েনি নেযেইনে এবেরা তুমি তমা ঘরত্ ফিরি যঅ। তমা শত্রুগুনোত্তুন্ লুদেয়্যে এ বেক্ জিনিস্চানি তুমি তমার ভেইয়ুনো সমারে ভাগ গুরি নেযেয়ো।” 9 সেনত্তেই লগেপ্রভু মোশিরে যে উগুমানি দিয়্যে সে মজিম্ রূবেণ আর গাদ-গুট্টির বেক্কুনোরে আর মনঃশি-গুট্টির অদ্দেক্ মানুচ্ নিজোত্তে যে জাগায়ানি পেইয়োন সে গিলিয়দ চাগালাত্ ফিরি যেবাত্তে কনান দেজঅ শীলোত্ ইস্রায়েলীয়গুনোত্তুন বিদেয় নিলো। 10 সে পরেন্দি তারা কনান দেজর যর্দন চাগালাত্ লুমিনে গাঙানর্ কায়কুরে বেক্কুনোর চোগোত্ পড়েদে ধোক্ক্যেন্ দাঙর্ এক্কো পূজো যুক্কোল্ গুরিলাক্। 11 বাদবাগী ইস্রায়েলীয়গুনে যেক্কে শুনিলাক্, তারার্ জাগানিত্ কনান দেজর্ দুযিত্ যর্দন চাগালার্ গাঙানর্ কায়কুরে তারা এক্কো পূজো যুক্কোল্ গোজ্যন, 12 সেক্কে বাদবাগি ইস্রায়েলীয়গুনে তারার্ বিরুদ্ধে যুদ্ধোত্ যেবাত্তে শীলোত্ এগত্তর্ অলাক্। 13 তারা ধর্মগুরু ইলিয়াসরর পূঅ পীনহসরে গিলিয়দত্ রূবেণ আর গাদ-গুট্টির মানুচ্চুনোরে আর মনঃশি-গুট্টির অদ্দেক্ মানুচ্চুনো ইদু পাদেলাক্। 14 তারা তারার্ পত্তি গুট্টিত্তুন্ একজন গুরিনে দশজন নেতারে পীনহসর সমারে পাদেলাক্। এ দশজন পত্তিজনে এলাক্ ইস্রায়েলীয় বংশর নেতা। 15 তারা গিলিয়দত্ রূবেণ আর গাদ-গুট্টির মানুচ্চুনোরে আর মনঃশি-গুট্টির অদ্দেক্ মান্জ্য ইদু যেইনে কলাক্, 16 “লগেপ্রভুর্ সমাজর্ বেক্কুনেই কদন্, ‘তুমি কেধোক্ক্যেন্ গুরিনে এবাবোত্যেগুরি ইস্রায়েলীয়গুনোর গোজেনর্ লগে বেঈমানী গুরিলে? কেধোক্ক্যেন্ গুরি তুমি এচ্চ্যে লগেপ্রভুর পথ্তানত্তুন্ সুরিনে গেলা আর তা বিরুদ্ধে উল্লোমি গুরিনে নিজোত্তে এ পূজোবো যুক্কোল্ গুরিলা? 17 পিয়োরত্ আমি যে পাপ্পানি গোজ্যেই সিয়েনত্তে লগেপ্রভুর্ সমাজর মানুচ্চুনো ভিদিরে সাজুরেদে পিড়ে দেগা দিয়্যে; এজঅ সং আমি সে পাপত্তুন্ নিজোরে সিজি ন-গুরিই। সে পাপর কারণে কি আমাত্তুন্ যদেষ্ট শিক্ষ্যে ন-অয়, 18 ইক্কিনে আরঅ তুমি লগেপ্রভুর পথ্তানত্তুন্ সুরি যেবাত্তে চর্? এচ্চ্যে যুনি তুমি লগেপ্রভুর্ বিরুদ্ধে উল্লোমী গরঅ সালে কেল্যে তে আমার পুরো ইস্রায়েলীয় সমাজ উগুরে রাগকান্ ফগদাঙ্ গুরিবো। 19 যে দেজ্চান তোমার গজক্ গোজ্যে আঘে সিয়েন যুনি অসিজি ওই থায় সালে তুমি পার্ ওইনে লগেপ্রভুর্ দেজত্ এজঅ। ইয়েনত্ লগেপ্রভুর থেবার্-তাম্বুলান্ আঘে। তুমি আমা সমারে বজত্তি গরঅ। মাত্তর্ আমার গোজেন লগেপ্রভুর ডালিপূজো বাদে আর কনঅ ডালিপূজো নিজোত্তে যুক্কোল্ গুরিনে লগেপ্রভুর আর আমা বিরুদ্ধে উল্লোমি ন-গুরিবা। 20 যেদক্কানি জিনিস ভস্তর্ অভিশাবর্ তলে এলঅ সে পৌইদ্যেনে সেরহর পূঅ আখনে বিশ্বেজ্ ন-গরে বিলিনে লগেপ্রভুর রাগ্কান্ কি পুরো ইস্রায়েল সমাজ উগুরে ন-পড়ে? তে দঅ-তার্ পাবত্তে গায়্ গায়্ মুরি ন-যায়।’” 21 এ কধাগান শুনিনে রূবেণ আর গাদ-গুট্টির মানুচ্চুনে আর মনঃশি-গুট্টির অদ্দেক্ মান্জ্যে জোবত্ ইস্রায়েলীয় নানান্ বংশর নেতাগুনোরে কলাক্, 22 বেক্কুনোর্ দাঙর্ গোজেন লগেপ্রভু! বেক্কুনোর্ দাঙর্ গোজেন লগেপ্রভু! তে দঅ হবর্ পায় আর ইস্রায়েলীয়গুনেয়ো হবর্ পাদোক্। ইয়েন যুনি লগেপ্রভুর বিরুদ্ধে কনঅ উল্লোমী বা অবাধ্য অনার্ কাম্ ওই থায় সালে তুমি এচ্চ্যে আমারে রেহাই ন-দিবা। 23 যুনি আমি লগেপ্রভুর পথ্তানত্তুন্ সুরি যেবাত্তে আর পুজ্যে-উৎসর্ব, শোজ্য-উৎসর্ব বা উদোলোলি-উৎসর্বর মেইত্বান্ গুরিবার আজায় নিজোত্তে এ পূজোবো বানেই থেই সালে লগেপ্রভু নিজে আমারে সাজা দোক্। 24 আমি এ পূজোবো বানেয়্যেই এ দরে, অয়ত বা কনঅদিন তমা বংশধরুনে আমা বংশধরুনোরে কবাক্, ইস্রায়েলীয়গুনোর গোজেন লগেপ্রভুর লগে তমার কি কুদুম্মো? 25 রূবেণীয় আর গাদীয়োগুনে, লগেপ্রভু তমার্ আর আমার সংমোধ্যে যর্দন গাঙানরে দুযি ইজেবে রাগেয়্যে। লগেপ্রভু উগুরে তমার কনঅ দাবি নেই। এবাবোত্যেগুরি অয়ত তমা বংশধরুনে লগেপ্রভুর উগুরে আমার বংশধরুনোর ভোক্তির্ মনভাব্পান্ বর্বাদ্ গুরি দিবাক্। 26 সেনত্তেই আমি কোইয়্যেই, এজঅ, আমি এক্কো পূজো বানেই। মাত্তর্ সিবে কনঅ পুজ্যে-উৎসর্ব বা অন্য এ্যমান-উৎসর্বর আজাই নয়। 27 ইবে তমার আর আমা ভিদিরে আর আমার বংশধরুনো ভিদিরে এ সাক্ষিগান দিবো, আমি লগেপ্রভুর মুজুঙোত্ আমার পুজ্যে-উৎসর্ব আর অন্য এ্যমান-উৎসর্ব আর উদোলোলি-উৎসর্বর অনুষ্ঠান গুরিনে তার তবনা গুরিবোং। সালে আগামিদি তমার বংশধরুনে আমার বংশধরুনোরে এ কধাগান কোই ন-পারিবাক্, লগেপ্রভু উগুরে তমার কনঅ দাবি নেই। 28 আমি মনে গোজ্যেইদে, তারা যুনি আমার বা আমার বংশধরুনোরে সে কধাগান কন্ সালে সিয়েনর্ জোবত্ আমি কবং, লগেপ্রভুর পূজো ধোক্ক্যেন্ চাদে অদেঅদে এ পূজোবোর্ ইন্দি তুমি চঅ। পুজ্যে-উৎসর্ব আর অন্য এ্যমান-উৎসর্বত্তে আমার পূরোণিমানুচ্চুনে ইবে ন-বানান্ মাত্তর্ গোজ্যন্দে তমার আর আমার সংমোধ্যে ইবে যেনে এক্কো সাক্ষী ওই থায়। 29 “আমার্ গোজেন লগেপ্রভুর থেবার-তাম্বুলোর্ মুজুঙোত্ যে পূজোবো আঘে সিবে বাদে পুজ্যে-উৎসর্ব, শস্য-উৎসর্ব আর অন্য এ্যমান-উৎসর্ব গুরিবাত্তে অন্য কনঅ পূজো বানেইনে আমি যে লগেপ্রভুর বিরুদ্ধে উল্লোমি ওইনে তার্ পথ্তানত্তুন্ এচ্চ্যে সুরি যেবং সিয়েন আমার কায়-কুরেত্তুন দূরোত্ থোক্।” 30 রূবেণ, গাদ আর মনঃশি-গুট্টির মানুচ্চুনে ধর্মগুরু পীনহস আর ইস্রায়েলীয় সমাজর নেতাগুনোরে, অত্তাৎ ইস্রায়েলীয় বংশগুনোর মুরুব্বীগুনোরে যিয়েনি কলাক্ সিয়েনিলোই তারা হুজি অলাক্। 31 ধর্মগুরু ইলিয়াসর পূঅ পীনহসে তারারে কলঅ, “এচ্চ্যে আমি বুঝি পারিলোং, লগেপ্রভু আমা লগে আঘে, কিত্যে তুমি এ পৌইদ্যেনে লগেপ্রভু উগুরে বেঈমানীর্ কাম্ ন-গরঅ। তুমি লগেপ্রভুর আদত্তুন্ ইস্রায়েলীয়গুনোরে বাজেলা।” 32 ইয়েন পরেন্দি ইলিয়াসর পূঅ পীনহস আর নেতাগুনে গিলিয়দত্ রূবেণীয় আর গাদীয়গুনো ইত্তুন্ কনান দেজত্ ফিরি যেইনে বেক্ কধানি ইস্রায়েলীয়গুনোরে জানেলাক্। 33 সিয়েন শুনিনে তারা হুজি অলাক্ আর গোজেনরে ভালেদি জানেলাক্। রূবেণীয় আর গাদীয়গুনে যে দেজছানত্ বজত্তি গুরিদাক্ সিয়েন ভস্ত গুরি দিবাত্তে তারার্ বিরুদ্ধে যুদ্ধো গুরিবার কধাগান তারা আর্ ন-কলাক্। 34 রূবেণীয় আর গাদীয়গুনে সে পূজোবোর্ নাঙান্ দিলাক্, “আমার সংমোধ্যে ইবেয়ই অলঅ সাক্ষী, লগেপ্রভুয়ই গোজেন।” |
Copyright © 2021 Bangladesh Bible Society
Bangladesh Bible Society