যিহোশূয় 21 - Chakma Bibleলেবীয়গুনোত্তে শঅর্ আর আদামানি 1 লেবি-গুট্টির বংশর্ নেতাগুনে ধর্মগুরু ইলিয়াসর, নূনর পূঅ যিহোশূয় আর ইস্রায়েলীয়গুনোর অন্য গুট্টির বংশ-নেতাগুনো ইদু গেলাক্। 2 তারা কনান দেজর শীলোত্ তারারে কলাক্, “আমার্ বজত্তি গুরিবাত্তে আদাম আর আমার এ্যামানপালুন্ চোড়েবাত্তে আদামর কায়-কুরে খলা দিবার কধা লগেপ্রভু মোশির মাধ্যমে তমারে উগুম দিয়্যে।” 3 সেনত্তেই লগেপ্রভুর্ উগুম মজিম ইস্রায়েলীয়গুনে তারার্ নিজোর সোম্বোত্তিত্তুন্ কয়েক্কান আদাম আর এ্যমান চোড়েবার খলা লেবীয়গুনোরে দিলো। 4 ভাগা-ভাগি গরানার পরেন্দি পত্তমে কহাতীয় বংশর নাঙানি উদিলো। এ লেবীয়গুনো ভিদিরে যিগুনে ধর্মগুরু হারোণর বংশধর্ তারা যিহূদা, শিমিয়োন আর বিন্যামীন-গুট্টির জাগাত্তুন্ তেরগান আদাম আর শঅর্ পেলাক্। 5 কহাতর বংশর বাদবাগি মানুচ্চুনোরে ইফ্রয়িম-গুট্টির গিরিগুনোর জাগাত্তুন্ আর দান-গুট্টির আর মনঃশি-গুট্টির অদ্দেক্ মানুচ্চুনোর জাগাত্তুন্ দশ্ছান আদাম আর শঅর্ দিয়্যে অলঅ। 6 চাম্বা চেইনে ইষাখর-গুট্টির গিরিগুনোর জাগানত্তুন্, আশের আর নপ্তালি-গুট্টির জাগানত্তুন্ আর বাশন দেজর্ আদাম্মে মনঃশি-গুট্টির অদ্দেক্ মান্জ্যর জাগানত্তুন্ গের্শোনর বংশধরুনোর তেরগান আদাম আর শঅর্ দিয়্যে অলঅ। 7 রূবেণ, গাদ আর সবূলূন-গুট্টির জাগানত্তুন্ মরারির বংশধরুনোর নানান্ গিরিরে বারোগান্ আদাম আর শঅর্ পেলাক্। 8 মোশির্ মাধ্যমে লগেপ্রভুর্ উগুম মজিম ইস্রায়েলীয়গুনে চাম্বা চেলে এ বেক্ আদামানি আর শঅরানি আর সিয়েনির লগে এ্যমান চোড়েবার খলাগুন্ লেবীয়গুনোরে দিলাক্। 9-10 লেবীয়গুনোরে কহাতীয় গিরিগুনো ভিদিরে চাম্বা চানার্ পরেন্দি হারোণর বংশধরুনোর্ নাঙানি উদিলো। ইয়েনত্ যিহূদা আর শিমিয়োন-গুট্টির জাগানত্তুন্ কয়েক্কান আদাম আর শঅর্ তারারে দিয়্যে অলঅ। 11 যিহূদা-গুট্টির মুড়ো-মুড়ি চাগালাত্ কিরিয়ৎ-অর্ব, অত্তাৎ হিব্রোণ আর তার চেরোকিত্তে য়েমান চোড়েবার খলা তারারে দিয়্যে অলঅ। অর্ব এলদে অনাকীয়গুনোর পূরোণি মানুচ্। 12 মাত্তর্ হিব্রোণর চেরোকিত্তে জাগানি আর আদামানি আগে যিফুন্নির পূঅ কালেবরে সোম্বোত্তি ইজেবে দিয়্যে ওইয়্যে। 13-16 সেনত্তেই হিব্রোণ, লিব্না, যত্তীয়, ইষ্টমোয়, হোলোন, দবীর, ঐন, যুটা আর বৈৎ-শেমশ আর সিয়েনির লগে এ্যমান চোড়েবার খলা ধর্মগুরু হারোণর বংশধরুনোরে দিয়্যে অলঅ। ইয়েন ভিদিরে হিব্রোণান্ এলদে খুনি আজামীর্ আশ্রয়-শঅর্। এ দ্বিবে গুট্টির জাগাত্তুন্ এ নঅগান আদাম আর শঅর্ তারারে দিয়্যে অলঅ। 17-18 ইয়েনবাদে বিন্যামীন-গুট্টির্ জাগাত্তুনঅ গিবিয়োন, গেবা, অনাথোৎ আর অল্মোন নাঙে চেরান্ আদাম আর শঅর্ আর সিয়েনির লগে য়েমান চোড়েবার খলা তারারে দিয়্যে অলঅ। 19 ধর্মগুরুগুনে, অত্তাৎ হারোণর বংশধরুনে বেক্কানিয়ে তেরগান আদাম আর শঅর্ আর সিয়েনির লগে য়েমান চোড়েবার খলা পেলাক্। 20 লেবীয়গুনোরে কহাতীয় বংশর বাদবাগি গিরিগুনোরে ইফ্রয়িম-গুট্টির্ জাগানত্তুন্ কয়েক্কান আদাম আর শঅর্ দিয়্যে অলঅ। 21-22 ইফ্রয়িম-গুট্টির মুড়ো-মুড়ি চাগালা ভিদিরে শিখিম, গেষর, কিবসয়িম আর বৈৎ-হোরোণ নাঙে চেরান আদাম আহ্ শঅর্ আর সিয়েনির লগে য়েমান চোড়েবার খলা তারারে দিয়্যে অলঅ। ইয়েন ভিদিরে শিখিমান এলদে খুনি আসামীর আশ্রয়-শঅর্। 23-24 ইয়েনবাদে দান-গুত্তির্ জাগানত্তুন্ ইল্তকী, গিব্বথোন, অয়ালোন আর গাৎ-রিম্মোণ নাঙে চেরান আদাম আর শঅর্ আর সিয়েনির লগে য়েমান চোড়েবার খলা তারারে দিয়্যে অলঅ। 25 মনঃশি-গুট্টির অদ্দেক্ মান্জ্যর্ জাগানত্তুন্ তানক আর গাৎ-রিম্মোণ নাঙে দ্বিয়েন আদাম আর সিয়েনি লগে য়েমান চোড়েবার খলা তারারে দিয়্যে অলঅ। 26 এ্যামান্ চোড়েবার খলা সহ এ দশ্ছান আদাম আর শঅর্ কহাতীয় বংশর বাদবাগি গিরিগুনোরে দিয়্যে অলঅ। 27 মনঃশি-গুট্টির অদ্দেক্ মান্জ্যর্ জাগানত্তুন্ বাশন দেজর্ গোলন আর বীষ্টরা নাঙে দ্বিয়েন আদাম আর সিয়েনির লগে এ্যমান চোড়েবার খলা লেবি-গুট্টির গের্শোনীয়গুনোরে দিয়্যে অলঅ। ইয়েন ভিদিরে গোলনান্ এলদে খুনি আজামীর্ আশ্রয়-শঅর্। 28-29 ইয়েনবাদে ইষাখর-গুট্টির জাগানত্তুন্ য়েমান চোড়েবার খলা সহ কিশিয়োন, দাবরৎ, যর্মূৎ আর ঐন্-গন্নীম নাঙে চেরান আদামঅ গের্শোনীয়গুনোরে দিয়্যে অলঅ। 30-31 আশের-গুট্টির জাগানত্তুন্ এ্যামান্ চোড়েবার খলা সহ তারারে দিয়্যে অলঅ মিশাল, অব্দোন, হিল্কৎ আর রহোব নাঙে চেরান আদাম। 32 নপ্তালি-গুট্টির জাগানত্তুন্ তারারে দিয়্যে অলঅ গালীলর কেদশ, হম্মোৎ-দোর আর কর্তন নাঙে তিনেন্ আদাম আর সিয়েনির লগে য়েমান চোড়েবার খলা। ইয়েন ভিদিরে কেদশছান্ এলদে খুনি আজামীর্ আশ্রয়-শঅর্। 33 য়েমান চোড়েবার খলা সহ এ তেরগান আদাম আর শঅর্ গের্শোনীয়গুনোর নানান্ গিরিরে দিয়্যে অলঅ। 34-35 লেবীয়গুনোর বাদবাগি বংশবোরে, অত্তাৎ মরারীয়গুনোরে দিয়্যে অলঅ সবূলূন-গুট্টির জাগানত্তুন্ যকিয়াম, কার্তা, দিম্না আর নহলোল নাঙে চেরান আদাম আর সিয়েনির লগে এ্যামান্ চোড়েবার খলা। 36-37 ইয়েনবাদে রূবেণ-গুট্টির জাগানত্তুন্ এ্যামান্ চোড়েবার খলা সহ তারারে দিয়্যে অলঅ বেৎসর, যহস, কদেমোৎ আর মেফাৎ নাঙে চেরান আদাম। 38-39 গাদ-গুট্টিগুনোর্ জাগানত্তুন্ তারারে দিয়্যে অলঅ গিলিয়দর রামোৎ, মহনয়িম, হিষ্বোন আহ্ যাসর নাঙে চেরান আদাম্ আর সিয়েনির লগে য়েমান চোড়েবার খলা। ইয়েনি ভিদিরে রামোৎতান্ এলদে খুনি আজামীর্ আশ্রয়-শঅর্। 40 বেক্কানিয়ে বারগান্ আদাম লেবীয়গুনোর্ বাদবাগি বংশবোরে, অত্তাৎ মরারীয়গুনোর্ নানান্ গিরিরে দিয়্যে অলঅ। 41 ইস্রায়েলীয়গুনোর গজক্ গোজ্যে জাগানি ভিদিরে এ্যামান্ চোড়েবার খলা সহ বেক্কানিয়ে আটচল্লিশ্চান্ আদাম আর শঅর্ লেবীয়গুনোর এলঅ। 42 ইয়েনির্ পত্তিগানির্ চেরোকিত্তে এ্যামান্ চোড়েবার খলা এলঅ। 43 লগেপ্রভু ইস্রায়েলীয়গুনোর পূরোণি মানুচ্চুনো ইদু যেদক্কানি জাগা দিবার শমক্ গোজ্যে সিয়েনি বেক্কানি তে তারারে দিয়্যে। ইস্রায়েলীয়গুনে সে দেজ্চানি গজক্ গুরি নেযেইনে সিয়েনিত্ বজত্তি গরা ধুরিলাক্। 44 তারার্ পূরোণিমানুচ্চুনো ইদু লগেপ্রভুর শমক্ মজিম্ তে চেরোকিত্তে বেক্ যুদ্ধোগানিত্তুন্ তারারে জিরেবাত্তে দিলো। কনঅ শত্রু তারার্ মুজুঙোত্ থিয়্যেই ন-পারে। লগেপ্রভু তারার্ বেক্ শত্রুগুনোরে তারা আদত্ তুলি দিলো। 45 লগেপ্রভু ইস্রায়েলীয়গুনোরে ভালেদি গুরিবাত্তে যেদক্কানি এগেম্ গোজ্যে সিয়েনির্ এক্কানঅ অপূরোণ ন-থায়, বেক্কানি পূরোণ ওইয়্যে। |
Copyright © 2021 Bangladesh Bible Society
Bangladesh Bible Society