যিহোশূয় 20 - Chakma Bibleআশ্রয়-শঅর 1 ইয়েনর্ পরেন্দি লগেপ্রভু যিহোশূয়রে কলঅ, 2 “তুই ইস্রায়েলীয়গুনোরে কঅ, ‘মোশিরে দিইনে মুই তরে যে উগুমানি দুয়োং সেধোক্ক্যেন্ তারা যেন কয়েক্কান আশ্রয়-শঅর্ ঠিগ্ গুরি নেযান্। 3 যুনি কনজনে আদিক্কে গুরিনে খুন্ গুরিবার আওজ্ মনত্ ন-রাগেইনে কাররে মারে ফেলায় সালে তে সিয়েনত্ ধেই যেই পারিবো আর লো-র্ হেনা সুজিবার্ কধা তা আঢত্তুন্ রোক্ষ্যে পেবঅ। 4 এ বেক্ আশ্রয়-শঅরানির্ কনঅ এক্কান ইদু লুমিনে শঅরর্ গেদোর্ কায়কুরে থিয়্যেইনে সিদুগোর্ বুড়ো নেতাগুনো ইদু তে নিজো পৌইদ্যেনে বেক্ কধানি ভাঙি কবঅ। সে পরেন্দি তারা তারে তারার্ শঅরত্ চোমেবাত্তে দিবাক্ আরঅ তারে থেবাত্তে এক্কান্ জাগা দিবাক্। 5 লো-র্ হেনা যিবেত্তুন্ সুজিবার্ কধা তে যুনি তা পিজেন্দি লোড়েইনে এজে সালে খুনোত্ পোজ্যে মানুচ্চোরে তারা তা আঢত্ ইরি ন-দিবাক্, কিত্যে সে মানুচ্চোরে মারে ফেলানার পিজেদি আগেত্তুন্ ধুরি তা মনত্ কনঅ আওজ্ বা ইংসে ন-এলঅ। 6 বিচের-সভাত্ যেদকদিন সং তা বিচের ন-অয় আর সে সময়ানত্ দাঙর্ ধর্মগুরুবোর্ যেদকদিন সং মরণ ন-অয় সেদকদিন সং তাত্তুন্ আশ্রয়-শঅর্ত্ থাহ্ পুরিবো। ইয়েনর্ পরেন্দি যিয়েনত্তুন তে ধেই এচ্চ্যে সিয়েনত্ তার নিজোর্ ঘরত্ ফিরি যেই পারিবো।’” 7 সেনত্তেই ইস্রায়েলীয়গুনে আশ্রয়-শঅর্ ইজেবে নপ্তালি-গুট্টিগুনোর্ ভাগর্ মুড়ো-মুড়ি চাগালার গালীলর কেদশ, ইফ্রয়িম-গুট্টির ভাগর মুড়ো-মুড়ি চাগালার শিখিম আর যিহূদা-গুট্টির ভাগর মুড়ো-মুড়ি চাগালার কিরিয়ত-অর্ব, অত্তাৎ হিব্রোণান ফারক্ গুরি রাগেল। 8 যিরীহোর উগুদোন্দি যর্দনর পূগেন্দি তারা রূবেণ-গুট্টির ভাগর্ সং জাগানর ধূল্যেচরর্-চাগালার্ ভিদিরেন্দি বেৎসর, গাদ-গুট্টিগুনোর্ ভাগঅ গিলিয়দর রামোৎ আর মনঃশি-গুট্টির ভাগঅ বাশনর গোলন আশ্রয়-শঅর্ ইজেবে ঠিগ্ গুরিলাক্। 9 কনঅ ইস্রায়েলীয় বা তারা ভিদিরে বজত্তি গোজ্যে অন্য কনঅ জাদঅ মানুচ্ যুনি কাররে আদিক্কেনগুরি মারে ফেলায় সালে তে এ ঠিগ্ গোজ্যে শঅরানিত্ কনঅ এক্কানত্ ধেই যেই পারিবো। লো-র্ হেনা যিবের্ সুজিবার্ কধা বিচের-সভাত্ খুনোত্ পোজ্যে মানুচ্চোর বিচের্ ন-অনা সং তে তারে মারে ফেলেই ন-পারিবো। |
Copyright © 2021 Bangladesh Bible Society
Bangladesh Bible Society