যিহোশূয় 18 - Chakma Bibleকনান দেজর্ বাদ্বাগি ভূইয়োর ভাগ্কানি 1-2 সে পরেন্দি বেক্ ইস্রায়েলীয়গুনে শীলোত্ এগত্তর্ ওইনে মিলন-তাম্বুলান টাঙেলাক্। পুরো দেজ্চান্ ইস্রায়েলীয়গুনোর অধীনোত্ আনা অলেয়ো তারার সাত্তো গুট্টি সেক্কেয়ো সোম্বোত্তি ন-পান্। 3 সেনত্তেই যিহোশূয় ইস্রায়েলীয়গুনোরে কলঅ, “তমার পূরোণি মানুচ্চুনোর গোজেন লগেপ্রভু যে দেজ্চান তমারে দিয়্যে তুমি সোম্বোত্তি ইজেবে সিয়েন গজক্ গত্তে আর কয়দিন দেরি গুরিবা? 4 তুমি পত্তি গুট্টিত্তুন তিনজন গুরি মানুচ্ নেযঅ। দেজ্চান গমেডালে চেইনে বেক্কানি লিগি আনিবাত্তে মুই তারারে পাধেই দিম্ যেনে তারার গুট্টিগুনো ভিদিরে সোম্বোত্তি ভাগ গুরি দিয়্যে যায়। কামানি থুম্ গুরিনে তারা মইদু ফিরি এবাক্। 5 পুরো দেজ্চান তারা সাত ভাগে ভাগ্ গুরিবাক্। দোগিণেন্দি যিহূদা-গুট্টিরে যে জাগায়ান দিয়্যে ওইয়্যে তারা সিয়েনত্ থেবাক্, আর উত্তোরেন্দি থেবাক্ যোষেফর বংশধরুনে। 6 দেজর সে সাত্ ভাগর্ পত্তিগানি পৌইদ্যেনে বেক্কানি লিগিনে তুমি সিয়েনি মইদু আনিবা, আর মুই আমা গোজেন লগেপ্রভুর মুজুঙোত্ তমাত্তে চাম্বা চেই দিম্। 7 মাত্তর্ লেবীয়গুনে তমা লগে কনঅ ভাগ ন-পেবাক্, কিত্যে লগেপ্রভু ধর্মগুরু ইজেবে সেবা-কাম্ গরানা অলঅ তারার্ সোম্বোত্তি। গাদ-আর রূবেণ-গুট্টির মানুচ্চুনে আর মনঃশি-গুট্টির অদ্দেক মানুচ্ আগে যর্দন গাঙর্ পূগেন্দি তারার সোম্বোত্তিগানি পেইয়োন্। লগেপ্রভুর চাগর্ মোশি সিয়েন তারারে দি যেইয়্যে।” 8 সে মানুচ্চুনে দেজ্চান পৌইদ্যেনে বেক্কানি লিগি আনিবাত্তে রওনা অবার সময়োত্ যিহোশূয় তারারে কোই দিলো, “তুমি যেইনে দেজ্চান গমেডালে চেইনে সিয়েনি বেক্কানি লিগিনে মইদু আনিবা। সে পরেন্দি মুই ইদু, এ শীলোত, লগেপ্রভুর মুজুঙোত্ তমাত্তে চাম্বা চেই দিম্।” 9 সেনত্তেই সে মানুচ্চুনে দেজর বেক্ জাগানিত্ গেলাক্। তারা দেজ্চানর বাদবাগি ভাগকান্ সাত ভাগ গুরিনে পত্তি ভাগর্ শঅর্ আর আদামর নাঙানি আর সিয়েনির পৌইদ্যেনে বেক্কানি এক্কান্ এক্কান্ গুরিনে বোইয়ো ভিদিরে লিগি আনিনে শীলোর তাম্বুলোত্ যিহোশূয় ইদু ফিরি এলাক্। 10 যিহোশূয় শীলোত লগেপ্রভুর মুজুঙোত্ ইস্রায়েলীয়গুনোত্তে চাম্বা চেই দিলো আর সিয়েনত্ তারার গুট্টি মজিম দেজ্চান ভাগ গুরি দিলো। বিন্যামীনর ভাগর ভূইয়ান্ 11 চাম্বা চেই দেনার পরেন্দি বিন্যামীন-গুট্টির নাঙানি উদিলো। সে গুট্টির্ নানান্ বংশরে যে জাগায়ানি দিয়্যে অলঅ সিয়েনি চাম্বা চানা মজিম যিহূদা আর যোষেফ-গুট্টির জাগায়ানর সংমোধ্যে পড়িলো। 12 উত্তোরেন্দি তারার্ ভূইয়োর দুযির্ চিহ্নোগান্ যর্দন গাঙ্ত্তুন্ আরাম্ভ ওইনে যিরীহোর উত্তোরেন্দি কামা জাগায়ান পার্ ওইনে পোজিমেন্দি মুড়ো-মুড়ি চাগালার ভিদিরেন্দি যেইনে বৈৎ-আবনর ধূল্যেচরর্-চাগালাগান সং গেলঅ। 13 সিয়োত্তুন্ দুযির চিহ্নোগান লূসের, অত্তাৎ বৈথেলর দোগিণোর কামা জাগানত্ যেইনে তলেদি বৈৎ-হোরণর দোগিণে যে মুড়োবো আঘে সে মুড়োবো উগুরে অটারোৎ-অদ্দরত্ লামি গেলঅ। 14 সে পরেন্দি সে দুযির্ চিহ্নোগান বৈৎ-হোরোণর দোগিণো মুড়োবোর পোজিমেন্দি ওইনে দোগিণেন্দি ঘুরি গেলঅ আর কিরিয়ৎ-বাল, অত্তাৎ কিরিয়ৎ-যিয়ারীম সং গেলঅ। কিরিয়ৎ-যিয়ারীম এলঅ যিহূদা-গুট্টির এক্কান্ শঅর্। ইয়েন অলঅ বিন্যামীন-গুট্টির পোজিমেন্দি দুযি। 15 তারার্ দোগিণেন্দি দুযির্ চিহ্নোগান পোজিমে কিরিয়ৎ-যিয়ারীমর দুযিত্তুন্ আরাম্ভ ওইনে নিপ্তোহর উইফুদ সং গেলঅ। 16 পরেন্দি সে দুযির্ চিহ্নোগান রফায়ীম কিঝিঙো উত্তোরে বেন-হিন্নোম কিঝিঙোর্ মুজুঙোত্ মুড়োবোর কামা সং লামি গেলঅ। সে পরেন্দি সিয়েন হিন্নোম কিঝিঙোর ভিদিরেন্দি যিবূশীয়গুনোর শঅরর্ দোগিণেন্দি কামা জাগানত্ সং যেইনে ঐন্-রোগেল সং গেলগোই। 17 পরেন্দি সে দুযির্ চিহ্নোগান উত্তোরেন্দি ঘুরিনে ঐন্-শেমশ ওইনে অদুম্মীমোত্ উদিবার পদ মুজুঙোত্ গলীলোত্ যেইনে রূবেণর বংশধর বোহনর পাত্তর্ সং লামি গেলঅ। 18 যেরেন্দি সিয়েন অরাবার উত্তোরেন্দি কামা জাগানত্ যেইনে অরাবাতত্ লামি গেলঅ। 19 পরেন্দি সে দুযির্ চিহ্নোগান বৈৎ-হগ্লার উত্তোরেন্দি কামা জাগায়ান্ ধুরিনে নুন্ সাগরর্ উত্তোরেন্দি চিগোন সাগরত্, অত্তাৎ যর্দন গাঙর্ মোহনাত্ যেইনে পড়িলো। ইয়েনই এলদে বিন্যামীন-গুট্টির দোগিণেন্দির্ দুযি। 20 তারার্ পূগেন্দি দুযিগান এলঅ যর্দন গাঙান্। ইয়েনই এলদে বিন্যামীন-গুট্টির নানান্ বংশর সোম্বোত্তির্ চেরোকিত্তে দুযিগান্। 21 বিন্যামীন-গুট্টির নানান্ বংশর ভাগত্ যে আদামানি আর শঅরানি পোজ্যে সিয়েনি অলঅ যিরীহো, বৈৎ-হগ্লা, এমক-কশিশ, 22 বৈৎ-অরাবা, সমারয়িম, বৈথেল, 23 অব্বীম, পারা, অফ্রা, 24 কফর-অম্মোনী, অফ্নি আর গেবা। এই বারগান শঅর আর সিয়েনির কায়-কুরে বেক্ আদামানি তারা পেইয়োন। 25 ইয়েনবাদে তারা গিবিয়োন, রামা, বেরোৎ, 26-28 মিস্পী, কফীরা, মোৎসা, রেকম, যির্পেল, তরলা, নেতা, এলফ, যিবূষীয়গুনোর শঅর্ যিরূশালেম, গিবিয়াৎ আর কিরিয়ৎ পেইয়োন। তারা বেক্কানিয়ে চৌদ্দোগান শঅর্ আর সিয়েনির্ কায়-কুরে বেক্ আদামানি পেইয়োন। |
Copyright © 2021 Bangladesh Bible Society
Bangladesh Bible Society