যিহোশূয় 17 - Chakma Bible

¹ মনঃশি যোষেফর দাঙর্‌ পূঅ এলঅ‌ বিলিনে চাম্বা চানা মজিম তা গুট্টিবোরেয়ো এক্কান জাগা দিয়্যে ওইয়্যে। মনঃশির দাঙর্‌ পূঅবোর্‌ নাঙান্‌ এলঅ‌ মাখীর। মাখীরে অলদে গিলিয়দর বাপ্‌। মাখীরে এক্কো দাঙর্‌ যোদ্ধা এলঅ বিলিনে তে গিলিয়দ আর বাশনর অধিকারান আগে পেইয়্যে।

² মাত্তর্‌ মনঃশি-গুট্টির বাদবাগী বেক্‌ বংশর মানুচ্চুনোর, অত্তাৎ অবীয়েষর, হেলক, অস্রীয়েল, শেখম, হেফর আর শমীদার বংশর মানুচ্চুনোরে কনান দেজত্‌ জাগা-জোমি দিয়্যে ওইয়্যে। বংশধরর্‌ ইন্দি ইগুনে এলাক্‌ যোষেফর পূঅ মনঃশির বাদবাগী বেক্‌ মরদ বংশধরুন্‌।

³ মনঃশির পূঅ মাখীর, মাখীরর পূঅ গিলিয়দ, গিলিয়দর পূঅ হেফর, আর হেফরর পূঅ সল্‌ফাদ। সল্‌ফাদর বানা ঝি এলাক্‌, পূঅ ন-এলাক্‌। সে ঝিগুনোর নাঙানি অলঅ‌ মহলা, নোয়া হগ্‌লা, মিল্কা আর তির্সা।

⁴ এ মিলেগুনে ধর্মগুরু ইলিয়াসর আর নূনর পূঅ যিহোশূয় আর নেতাগুনো ইদু যেইনে কলাক্‌, “আমা গুট্টির মানুচ্চুনো ভিদিরে আমারঅ‌ সোম্বোত্তির এক্কান ভাগ দিবার উগুম লগেপ্রভু মোশিরে দিয়্যে।” এ কধাগান শুনিনে যিহোশূয় লগেপ্রভুর উগুম মজিম তারা বাপ্পোর্‌ ভেইয়ুনো লগে তারারেয়ো সোম্বোত্তির অধিকার দিলো।

⁵ যর্দনর পূগেন্দি গিলিয়দ আর বাশন বাদেয়ো মনঃশি-গুট্টির ভাগত্‌ পড়িলো আরঅ দশ ভাগ্‌ ভূই,

⁶ কিত্যে মনঃশি-গুট্টির এই মিলেগুনে তারার্‌ গুট্টির পূঅগুনো সমারে সোম্বোত্তির অধিকার পেলাক্‌; আর মনঃশি-গুট্টির বাদবাগী বংশধরুনে গিলিয়দ চাগালাগান পেলাক্‌।

⁷ মনঃশি-গুট্টির জাগায়ানর দুযির চিহ্নোগান আশেরত্তুন্‌ আরাম্ভ ওইনে শিখিম ইদু মিক্‌মথৎ সং গেলঅ‌। সে পরেন্দি সিয়েন দোগিনেন্দি গেলঅ‌, যিয়েনত্তে ঐন্‌-তপূহর আদাম্মেগুনে মনঃশি-গুট্টির চাগালা ভিদিরে পড়ি গেলাক্‌।

⁸ তপূহর কায়-কুরে জাগায়ানি হামাক্কাই মনঃশি-গুট্টির ভাগত্‌ পড়িলো মাত্তর্‌ মনঃশি-গুট্টির দুযিগান লগে বাজেয়্যে তপূহ শঅরান ইফ্রয়িম-গুট্টির অধিকারত্ পড়িলো।

⁹ সে পরেন্দি সে দুযির চিহ্নোগান দোগিণে কান্না শুগুনো গাঙান্‌ সং লামি গেলঅ। ইফ্রয়িম-গুট্টির কদক্কানি শঅর্‌ আর আদাম মনঃশি-গুট্টির দুযিত্‌ পোজ্যে। মনঃশি-গুট্টির দুযির চিহ্নোগান সে শুগুনো গাঙর্‌ উত্তোরেন্দি যেইনে থুম্‌ ওইয়্যে ভুমধ্য সাগরত্‌।

¹⁰ শুগুনো গাঙর্‌ দোগিণে এলঅ‌ ইফ্রয়িম-গুট্টির জাগা আর উত্তোরে এলঅ‌ মনঃশি-গুট্টির জাগায়ানি। মনঃশি-গুট্টির পোজিম দুযি এলদে ভূমধ্য সাগরান্, উত্তরেন্দি এলঅ আশের-গুট্টির দুযি আর পূগেন্দি এলঅ‌ ইষাখর-গুট্টির দুযি।

¹¹ ইষাখর আর আশের-গুট্টির দুযি ভিদিরে বৈৎ-শান, যিব্‌লিয়ম আর সিয়েনির কায়-কুরে বেক্‌ আদামানি মনঃশি-গুট্টিরে দিয়্যে ওইয়্যে। ইয়েনবাদে দোর, ঐন্‌-দোর, তানক আর মগিদ্দোর মানুচ্চুন্‌ সহ এ বেক্‌ শঅর্‌ আর সিয়েনির কায়-কুরে বেক্‌ আদামানি মনঃশি-গুট্টিরে দিয়্যে ওইয়্যে। যেরেন্দি তিনান্‌ শঅর্‌ আর তারা সমারে আদামানি এলঅ মুড়ো-মুড়ি চাগালাত্‌।

¹² মাত্তর্‌ মনঃশি-গুট্টির মানুচ্চুনে সে বেক্‌ শঅর্‌ আর আদামানি গজক্ গুরি ন-পারন, কিত্যে কনানীয়গুনে ঠিগ্‌ গোজ্যন্দে যে, তারা সে জাগায়ানি ছাড়ি ন-যেবাক্‌।

¹³ মাত্তর্ ইস্রায়েলীয়গুনে যেক্কে বোলী ওইনে উদিলাক্‌ সেক্কে তারা কনানীয়গুনোরে তারার চাগর্‌ ইজেবে কাম্‌ গুরিবাত্তে বাধ্য গোজ্যন্‌। মাত্তর্‌ দেজত্তুন্‌ তারারে বেক্কুনোরে তারা ধাবেই ন-দিলাক্‌।

¹⁴ যোষেফ-গুট্টির মানুচ্চুনে যেইনে যিহোশূয়রে কলাক্‌, “সোম্বোত্তি ইজেবে কিত্তেই তুই আমারে বানা এক ভাগ দুয়োচ্‌? লগেপ্রভুর আশিদ্‌বাদে আমার মান্‌জ্যর সোংখ্যে বোউত্‌।”

¹⁵ জোবত্‌ যিহোশূয় কলঅ্‌, “মান্‌জ্যর সোংখ্যে যুনি তমার এদক্‌ বেশ্‌ আর ইফ্রয়িমর মুড়ো-মুড়ি চাগালাত্‌ যুনি তমার ন-কুলোয় সালে পরীষীয় আর রফায়ীয়গুনোর দেজর ঝার্-জংগল কাবি ফেলেইনে নিজোত্তে ভূই যুক্কোল্‌ গুরি নেযঅ।”

¹⁶ যোষেফ-গুট্টির মানুচ্চুনে কলাক্, “মুড়ো-মুড়ি চাগালার জাগানত্‌ আমার ন-কুলোই আর যিদুক্কুন কনানীয় সং জাগার বৈৎ-শান আর তা কায়-কুরে আদামানিত্‌ আর যিষ্রিয়েল কিজিঙোত্‌ বজত্তি গুরিদাক্‌ তারার বেক্কুনোর লুয়োর রথ আঘে।”

¹⁷ যিহোশূয় যোষেফর বংশধরুনোরে, অত্তাৎ ইফ্রয়িম আর মনঃশি-গুট্টির মানুচ্চুনোরে কলঅ্‌, “তমার মানুচ্‌অ বেশ্‌, বল্‌অ বেশ্‌। তুমি বানা এক্কো ভাগ ন-পেবা।

¹⁸ ঝাড়্-জংগলে ভোজ্যে মুড়ো-মুড়ি চাগালাগানঅ তুমি পেবা। তমার সিয়েন কাবিনে তেল্‌তেল্যে গুরি নেযা পড়িবো। ঝাড়ান্‌ আর তা লগে বেক্‌ ভূইয়ানি তমার অধিকারত্ থেবঅ। কনানীয়গুনোর লুয়োর রথ থেলেয়ো আর তারা বোলী অলেয়ো তুমি তারারে ধাবেই দিবা।”