যিহোশূয় 16 - Chakma Bibleইফ্রয়িম আর মনঃশি-গুট্টির জাগায়ানি 1 চাম্বা চানা মজিম যোষেফ-গুট্টির মানুচ্চুনোরে যে জাগায়ানি দিয়্যে অলঅ সিয়েনির্ দুযি আরাম্ভ অলঅ যিরীহোর উগুদোন্দি যিরীহোর উইফুদোর্ পূগেন্দি যর্দন গাঙত্তুন্। সে পরেন্দি দুযির্ চিহ্নোগান ধূল্যেচর-চাগালার্ ভিদিরেন্দি যেইনে বৈথেলর মুড়ো-মুড়ি চাগালাত্ উদিলো। 2 বৈথেলত্তুন্ সিয়েন লূসত্ গেলঅ আর লূসত্তুন্ অটারোতথ্ অর্কীয়গুনোর জাগান সং গেলঅ। 3 সে পরেন্দি দুযির্ চিহ্নোগান পোজিমেন্দি লামি যেইনে তলেদি বৈৎ-হোরোণর চাগালা সং যফ্লেটীয়গুনোর জাগানত্ যেইনে সিয়েনত্তুন গেষরত্ গেলঅ আর ভূমধ্য সাগরত্ যেইনে দুযিগান থুম্ অলঅ। 4 যোষেফর পূঅ মনঃশি আর ইফ্রয়িম-গুট্টির মানুচ্চুনে এ বেক্ সোম্বোত্তিগানি পেলাক্। 5-6 ইফ্রয়িম-গুট্টির্ নানান্ বংশগুনোর জাগানি অলঅ ইয়েনি: পূগেন্দি তারার্ সোম্বোত্তির দুযির চিহ্নোগান অটারোৎ-অদ্দরত্তুন্ আরাম্ভ ওইনে উগুরে বৈৎ-হোরোণত্ যেইনে ভূমধ্য সাগর সং গেলঅ। সে পরেন্দি উত্তোরেন্দি সে দুযির্ চিহ্নোগান মিক্মথতত্তুন্ ঘুরিনে পূগেন্দি তানৎ-শীলো পার্ ওইনে যানোহর পূগেন্দি গেলঅ। 7 যানোহত্তুন্ সিয়েন্ লামি যেইনে অটারোৎ আর নারঃ ওইনে যিরীহোর দুযি ঘেস্যে যর্দনত্ যেইনে পড়িলো। 8 উত্তোরেন্দি সে দুযির্ চিহ্নোগান তপূহত্তুন্ পোজিমেন্দি কান্না শুগুনো গাঙান্ ওইনে ভূমধ্য সাগরত্ যেইনে থুম্ অলঅ। ইয়েন অলঅ ইফ্রয়িম-গুট্টির নানান্ বংশর সোম্বোত্তি। 9 ইয়েনবাদে মনঃশি-গুট্টির সোম্বোত্তি ভিদিরে কদক্কানি শঅর আর তারার্ কায়-কুরে আদামানি ইফ্রয়িম-গুট্টিরে দিয়্যে ওইয়্যে। 10 গেষরত্ যিদুক্কুন্ কনানীয় বজত্তি গুরিদাক্ তারারে তারা ধাবেইনে নিগিলেই ন-দুয়োন্। এজঅ তারা ইফ্রয়িম-গুট্টির মানুচ্চুনো লগে বজত্তি গত্তন্; মাত্তর্ ইফ্রয়িম-গুট্টির চাগর ইজেবে তারার কামানি গত্তে বাধ্য গরা ওইয়্যে। |
Copyright © 2021 Bangladesh Bible Society
Bangladesh Bible Society