যিহোশূয় 15 - Chakma Bibleযিহূদা-গুট্টির জাগায়ানি 1 চাম্বা চানা অনুসারে যিহূদা-গুট্টির নানান্ বংশরে যে জাগায়ানি দিয়্যে অলঅ সিয়েনর্ দুযি ইমোরীয়গুনোর দেজর দুযি সং, অত্তাৎ সীন ধূল্যেচরর্-চাগালার্ দোগিণো দুযি সং যেইনে লুমিলো। 2-3 তারার্ দোগিণো দুযির্ চিহ্নোগান্ নুন্ সাগরর্ দোগিণো দুযির্ বড়গাঙত্তুন আরাম্ভ ওইনে অক্রব্বীমোত্ উদি যেবার পদথ্ দোগিণেন্দি যেইনে সীন-ধূল্যেচরর্-চাগালান্দিগুরি কাদেশ-বর্ণেয়র দোগিণেন্দি যেইনে লুমিলো। সিয়োত্তুন্ সে দুযির চিহ্নোগান্ হিস্রোণ পার্ ওইনে অদ্দর সং ঘুরি যেইনে কর্কায়ত্ গেলঅ। 4 সিয়োত্তুন্ অস্মোন সং যেইনে মিসর নাঙে যে শুগুনো গাঙান্ আঘে সিয়েন সমারে এগত্তর্ ওইনে ভূমধ্য সাগরত্ যেইনে থুম্ অলঅ। ইয়েনই অলঅ তমার্ দোগিণোর্ দুযি। 5-6 পূগেন্দি দুযিগান্ অলদে নুন্ সাগরন্দি যেইনে যর্দন গাঙর্ মোহনা সং। যর্দন গাঙান্ যিদু নুন্ সাগরত্ যেইনে পোজ্যেগোই সিদু যে চিগোন সাগরান্ আঘে সিয়োত্তুন্ উত্তোরেন্দি দুযির্ চিহ্নোগান্ আরাম্ভ ওইনে বৈৎ-হগ্লা সং যেইনে বৈৎ-অরাবার উত্তোরেন্দি যেইনে রূবেণর বংশধর বোহনর পাথর সং গেলঅ। 7 সিয়েনত্তুন্ দুযির চিহ্নোগান আখোর কিঝিঙোত্তুন দবীর সং উদি গেলঅ আর সিয়েন উত্তোরেন্দি কিঝিঙোর্ দোগিণে অদুম্মীমত্ উদি যাইদে পদর উল্টোন্দি গিল্গল সং গেলঅ। গিল্গলত্তুন ঐন্-শেমশর স্রোত সং যেইনে সিয়েন ঐন্-রোগেলত্ নিগিলি এলঅ। 8 সিয়েনত্তুন্ সিয়েন যিবূশীয়গুনোর শঅরর্, অত্তাৎ যিরূশালেমর দোগিণে কামা জাগায়ান্ সং যেইনে বেন-হিন্নোমর কিজিঙোত্ উদিলো। সিয়োত্তুন দুযির্ চিহ্নোগান্ রফায়ীম কিজিঙোর্ উত্তর দুযির্ হিন্নোম কিজিঙোর্ পোজিমে যে মুড়োবো আঘে সিয়েনত্ উদিলো। 9 সেই দুযির্ চিহ্নোগান সে পরেন্দি মুড়োবো উগুরেত্তুন্ নিপ্তোহর উইফুদোর্ ইন্দি গেলঅ। সিয়োত্তুন্ ইফ্রোণ মুড়োবোর্ আদামানির কায়-কুরেন্দি নিগিলিনে সিয়েন বালার ইন্দি, অত্তাৎ কিরিয়োৎ-যিয়ারীমর ইন্দি লামি গেলঅ। 10 বালাত্তুন পোজিমেন্দি ঘুরিনে সিয়েন্ সেয়ীর মুড়োবোত্ গেলঅ; সে পরেন্দি যিয়ারীম মুড়োবোত্, অত্তাৎ কসালোনর উত্তরেন্দি কামান্দি জাগান সং যেইনে সিয়েন বৈৎ-শেমশত্ লামিনে তিম্না সং গেলঅ। 11 সে পরেন্দি সে দুযির চিহ্নোগান ইক্রোণর উত্তোরেন্দি কামা জাগানত্ যেইনে শিক্করোণর ইন্দি ঘুরিনে সোজা বালা মুড়োবোত্ গেলঅ আর যব্নিয়েলত্ লুমিনে ভূমধ্য সাগরত্ যেইনে থুম্ অলঅ। 12 পোজিমেন্দি দুযিগান্ অলঅ ভূমধ্য সাগরর পারত্। ইয়েন্ অলঅ যিহূদা-গুট্টির্ নানান্ বংশর জাগানির্ চেরোকিত্তে দুযির্ চিহ্নোগান্। 13 যিহোশূয় লগেপ্রভুর উগুম্ মজিম্ যিফুন্নির পূঅ কালেবরে যিহূদা-গুট্টির জাগান ভিদিরে কিরিয়ৎ-অর্ব, অত্তাৎ হিব্রোণ শঅরান দিয়্যে। অর্ব এলদে অনাকীয়গুনোর পুরোণি মানুচ্। 14 সে পরেন্দি শেশয়, অহীমান আর তল্ময় নাঙে তিনজন অনাকীয়রে কালেব হিব্রোণত্তুন ধাবেই দিলো। ইগুনে এলাক্ অনাকর বংশধর। 15 কালেবে সিয়েত্তুন্ দবীরর মানুচ্চুনোর্ বিরুদ্ধে যুদ্ধো গুরিবাত্তে গেলঅ। আগেন্দি দবীরর নাঙান্ এলদে কিরিয়ৎ-সেফর। 16 কালেবে কোইয়্যেদে, “যে কনজনে কিরিয়ৎ-সেফর আক্রমণ গুরিনে গজক্ গুরি পারিবাক্ তা সমারে মুই মঅ ঝি অক্ষারে বৌ দিম্।” 17 এ কধাগান শুনিনে কনষর বংশধর কালেবর ভেই অৎনীয়েলে সিয়েন গজক্ গুরিলো। সেনত্তেই কালেবে তার ঝি অক্ষারে অৎনীয়েল লগে বৌ দিলো। 18 অৎনীয়েল ইদু যানার পরেন্দি অক্ষা তারে উসকানি দিয়্যে ধুরিলো যেনে তে অক্ষার বাবত্তুন্ এক্কান্ ভুই চেইনে নেযায়্। সে পরেন্দি অক্ষা গাধার পিঠত্তুন লামানার পরেন্দি কালেবে তারে পুজোর গরলঅ, “মা, তুই কি চাজ?” 19 তে কলঅ, “বাবা, তুই মর্ এক্কান্ কধা রাগা। তুই মরে যেক্কে নেগেভ ধূল্যেচরর্-চাগালাত্ জাগা দুয়োচ্ সেক্কে পানির উইফুত্তুনো মরে দে।” এ কধাগান শুনিনে কালেবে তারে সে জাগার অজল্ আর তলেদি জাগানর উইফুত্তুনো দিলো। 20 যিহূদা-গুট্টির নানান্ বংশগুনোরে যে সোম্বোত্তিগানি দিয়্যে অলঅ সিয়েনি অলঅ। 21 ইদোমর ইদু নেগেভত্ তারা চাগালার্ এক্কুবারে দোগিণে তারা যে শঅর আর আদামানি পেইয়োন সিয়েনির নাঙানি অলঅ: কব্সেল, এদর, যাগুর, 22 কীনা, দীমোনা, অদাদা, 23 কেদশ, হাৎসোর, যিৎনন, 24 সীফ, টেলম, বালোৎ, 25 হাৎসোর-হদত্তা, করিয়োৎ-হিষ্রোণ, অত্তাৎ হাৎসোর, 26-28 অমাম, শমা, মোলদা, হৎসর-গদ্দা, হিষ্মোন, বৈৎ-পেলট, হৎসর-শূয়াল, বের্-শেবা, বিষিয়োথিয়া, 29-31 বালা, ইয়ীম, এৎসম, ইল্তোলদ, কসীল, হর্মা, সিক্লগ, মদ্মন্না আর সন্সন্না, 32 লবায়োৎ, শিল্হীম, ঐন আর রিম্মোণ। বেক্কানিয়ে বোত্রিশচান্ শঅর্ আর তারার কায়-কুরে আদামানি তারা পেইয়োন। 33 তলে মুড়ো-মুড়ি চাগালা ভিদিরে তারা যেদক্কানি শঅর্ আর আদাম্ পেইয়োন সিয়েনি অলঅ: ইষ্টায়োল, সরা, অশ্না, 34 সানোহ, ঐন্-গন্নীম, তপূহ, ঐনম, 35 যর্মূৎ, অদুল্লম, সোখো, অসেকা, 36 শারয়িম, অদীথয়িম, গদেরা আর গদেরোথয়িম। এ চৌদ্দোগান শঅর্ আর তারার কায়-কুরে আদামানি তারা পেইয়োন। 37-39 সনান, হদাশা, মিগ্দল্-গাদ, দিলিয়ন, মিস্পী, যক্তেল, লাখীশ, বস্কৎ, ইগ্লোন, 40 কব্বন, লহমম, কিৎলীশ, 41 গদেরোৎ, বৈৎ-দাগোন, নয়মা আর মক্কেদা। এ ষুলোগান শঅর্ আর ইয়েনির কায়-কুরে বেক্ আদামানি তারা পেইয়োন। 42-44 লিব্না, এথর, আশন, যিপ্তহ, অশ্না, নৎসীব, কিয়ীলা, অক্ষীব আর মারেশা। এ নঅগান শঅর্ আর ইয়েনির কায়-কুরে বেক্ আদামানি তারা পেইয়োন। 45 ইক্রোণ শঅর্ আর তার কায়-কুরে জাগা আর আদামানি, 46 ইক্রোণর পোজিমেন্দি অস্দোদর বেক্ আদামানি, 47 অস্দোদ আর তার কায়-কুরে বেক্ জাগা আর আদামানি আর মিসরর শুগুনো গাঙান্ আর ভূমধ্য সাগরর পার সং গাজা আর তার কায়-কুরে বেক্ জাগায়ানি আর এ বেক্ আদামানি তারা পেইয়োন। 48 অজল্ মুড়ো-মুড়ি চাগালা ভিদিরে তারা যেদক্কানি শঅর্ আর আদামানি পেইয়োন সিয়েনি অলঅ: শামীর, যত্তীর, সোখো, 49 দন্না, কিরিয়ৎ-সন্না, অত্তাৎ দবীর, 50 অনাব, ইষ্টিমোয়, আনীম, 51 গোশন, হোলোন আর গীলো। এ এগারগান শঅর্ আর ইয়েনির কায়-কুরে বেক্ আদামানি তারা পেইয়োন। 52-54 অরাব, দূমা, ইশিয়ন, যানীম, বৈৎ-তপূহ, অফেকা, হুমটা, কিরিয়ৎ-অর্ব, অত্তাৎ হিব্রোণ আর সীয়োর। এ নঅগান শঅর্ আর ইয়েনির কায়-কুরে বেক্ আদামানি তারা পেইয়োন। 55-57 মায়োন, কর্মিল, সীফ, যুটা, যিষ্রিয়েল, যক্দিয়াম, সানোহ, কয়িন, গিবিয়া আর তিম্না। এ দশচান শঅর্ আর ইয়েনির কায়-কুরে বেক্ আদামানি তারা পেইয়োন। 58 হল্হূল, বৈৎ-সূর, গদোর, 59 মারৎ, বৈৎ-অনোৎ আর ইল্তকোন। এ ছঅগান শঅর্ আর ইয়েনির কায়-কুরে বেক্ আদামানি তারা পেইয়োন। 60 কিরিয়ৎ-বাল, অত্তাৎ কিরিয়ৎ-যিয়ারিম আর রব্বা। এ দ্বিয়েন শঅর্ আর ইয়েনির কায়-কুরে জাগায়ানি তারা পেইয়োন। 61 ধূল্যেচরর্-চাগালাত্ তারা যেদক্কানি শঅর্ আর আদামানি পেইয়োন সিয়েনি অলঅ: বৈৎ-অরাবা, মিদ্দীন, সকাখা, 62 নিব্শন, লবণ-নগর আর ঐন্-গদী। এ ছঅগান শঅর্ আর ইয়েনির কায়-কুরে বেক্ আদামানি তারা পেইয়োন। 63 মাত্তর্ যিহূদা-গুট্টিবো যিবূষীয়গুনোরে ধাবেই দি ন-পারন্। যিবূশীয়গুনে এলাক্ যিরূশালেমর আদাম্মে। যিহূদা-গুট্টির মানুচ্চুনোর্ লগে যিবূশীয়গুনে এজঅ সিয়েনত্ বজত্তি গত্তন্। |
Copyright © 2021 Bangladesh Bible Society
Bangladesh Bible Society