যিহোশূয় 14 - Chakma Bibleযর্দনর পোজিমেন্দি জাগা-জোবিনানি 1 অন্য ইস্রায়েলীয়গুনে কনান দেজত্ সোম্বোত্তি ইজেবে জাগা-জোবিন্ পেলাক্। ধর্মগুরু ইলীয়াসর, নূনর পূঅ যিহোশূয় আর ইস্রায়েলীয়গুনোর যুদো যুদো গুট্টির গিরির্-নেতাগুনে তারারে সিয়েনি ভাগ গুরি দিলাক্। 2 লগেপ্রভু মোশিরে দিইনে যেধোক্ক্যেন উগুম দিয়্যে সেধোক্ক্যেন ইস্রায়েলীয়গুনোরে সাড়ে নয় গুট্টির ভিদিরে চাম্বা চেইনে সোম্বোত্তিগানি ভাগ গুরি দিয়্যে ওইয়্যে। 3 মোশি আড়াই গুট্টির্ সোম্বোত্তিগানি যর্দনর পূগেন্দি আগে দি যেইয়্যে, মাত্তর্ তে লেবি-গুট্টিরে ইস্রায়েলীয়গুনো ভিদিরে কনঅ সোম্বোত্তি ন-দে। 4 মনঃশি আর ইফ্রয়িম নাঙে যোষেফর দ্বিবে পূঅর্ মাধ্যমে দ্বিবে গুট্টির সৃট্টি ওইয়্যে। লেবীয়গুনে ভূইয়োর ভাগ ন-পেলাক্ ঠিগ্, মাত্তর্ তারা বজত্তি গুরিবার আর পযাপিরানি রাগেবাত্তে কয়েক্কান আদাম আহ্ শঅর আর গোরু-ভেড়া ছাগল চোরেবাত্তে কায়-কুরে খলা পেলাক্। 5 লগেপ্রভু মোশিরে যেধোক্ক্যেন্ উগুম দিলো ইস্রায়েলীয়গুনে সেই মজিম দেজ্চান ভাগ গুরি নেযেয়োন। কালেবর ভাগত্ হিব্রোণে 6 যিহূদা-গুট্টির্ মানুচ্চুনে গিল্গলত্ যিহোশূয়র ইদু গেলাক্ আর কনিসীয় যিফুন্নির পূঅ কালেবে তারে কলঅ, লগেপ্রভু কাদেশ-বর্ণেয়ত গোজেনর্ মানুচ্ মোশি ইদু মর্ আর তঅ পৌইদ্যেনে যিয়েনি কোইয়্যে সিয়েনি তর্ জানা আঘে। 7 লগেপ্রভুর্ চাগর্ মোশি দেজ্চানর খোজ-হ্বর আনিবাত্তে যেক্কে মরে কাদেশ-বর্ণেয়ত্তুন্ পাদেয়োন্ সেক্কে মর্ বয়সছান্ এললে চোল্লিশ বজর্। দেজ্চান দেগিনেই মুই যিয়েন্ বুঝি পাজ্যং সে মজিম্ মুই তাইদু হ্বর আনি দুয়োং, 8 মাত্তর্ যে ভেইয়ুনে মঅ লগে যেইয়োন্ তারা মানুচ্চুনোরে নিরাশ্ গুরি তুল্যন্। তো মুই মর্ গোজেন লগেপ্রভুর কধানি পুরোপুরিই মানি চোল্যং। 9 সেনত্তে মোশি সেদিন্যে মইদু শমক্ খেইনে কোইয়্যেদে, তুই যে জাগায়ান্ ঘুরিনে চেই এচ্চ্যস্ সিয়েন্ উমরত্তে তর্ আর তর্ বংশধরুনোর্ সোম্বোত্তি ওই থেবঅ, কিত্যে তুই মর্ গোজেন লগেপ্রভুর কধানি পুরোপুরিই মানি চোল্যচ্। 10 “ধূল্যেচরর্-চাগালাত্ যেক্কে ইস্রায়েলীয়গুনে ঘুরি বেড়াদন্ আর লগেপ্রভু মোশিরে এ কধানি কোইয়্যে সেক্কেত্তুন্ ধুরি তার এগেম্ মজিম এ পাচচোল্লিশ বজর তে মরে বাঁজি রাগেয়্যে, আর ইক্কিনে মর্ বয়সছান্ পাঁচাশি বজর ওইয়্যে। 11 মোশি যেদিন্যে মরে পাদেয়্যে সেদিন্যে ধোক্ক্যেন্ এজঅ মুই বোলী আগং; সেক্কেনে ধোক্ক্যেন্ এজঅ মর্ যুদ্ধোত্ যেবার আর বেক্ কামানি গুরিবার বল্ আঘে। 12 ইয়েন যে মুড়ো-মুড়ি চাগালাগান্ দিবার এগেম্ লগেপ্রভু মইদু গোজ্যে সিয়েন তুই মরে দে। সে সময়োত্ তুই নিজেই শুন্যচ্, অনাকীয়গুনে সিয়েনত্ বজত্তি গুরিদাক্ আর তারার্ শঅরানিয়ো বেশ্ দাঙর্ দাঙর্ আরঅ দেবাল্লোই-ঘিজ্যে। মাত্তর্ লগেপ্রভু মঅ লগে থেলে তা কধা মজিম মুই তারারে ধাবেই দিম্।” 13 এ কধাগান শুনিনে যিহোশূয় যিফুন্নির পূঅ কালেবরে আশিদ্বাদ গুরিলো আর সোম্বোত্তি ইজেবে হিব্রোণ শঅরান তারে দিলো। 14 সিয়োত্তুন ধুরি হিব্রোণ কনিসীয় যিফুন্নির পূঅ কালেবর গজগত্ আঘে, কিত্যে তে ইস্রায়েলীয়গুনোর গোজেন লগেপ্রভুর কধাগান্ পুরোপুরিই মানি চোল্যে। 15 অনাকীয়গুনো ভিদিরে অর্ব নাঙে এক্কো খেমতাবান্ মান্জ্যর নাঙ্ অনুসারে হিব্রোণরে আগে কিরিয়ৎ-অর্ব কুয়ো অদঅ। ইয়েনর্ পরেন্দি দেজত্ যুদ্ধো থামেল। |
Copyright © 2021 Bangladesh Bible Society
Bangladesh Bible Society