যিহোশূয় 13 - Chakma Bibleবাদ্বাগি জাগায়ানি পৌইদ্যেনে লগেপ্রভুর উগুম 1 বয়স বাড়িনে যিহোশূয় যেক্কে বুড়ো ওই গেলঅ সেক্কে লগেপ্রভু তারে কলঅ, “তুই বুড়ো ওইয়োচ্, তর্ বয়স ওই যেইয়্যে, অদচ দেজর এমন্ বোউত্ জাগা রোই যেইয়্যে যিয়েনি এজঅ গজক্ গরা ন-অয়্। 2-4 যে জাগায়ানি এজঅ গজক্ গরা ন-অয়্ সে ভিদিরে রোইয়্যেদে মিসরর পূগেদি সীহোর গাঙত্তুন্ আরাম্ভ গুরিনে উত্তরেন্দি ইক্রোণর দুযি সং পলেষ্টীয় আর গশূরীয়গুনোর বেক্ চাগালাগান। এ চাগালাগান্ কনানীয়গুনোর জাগা বিলিনে ধরা অয়্। সিয়েনত্ ঘষা, অস্দোদ, অস্কিলোন, গাৎ আর ইক্রোণ নাঙে পাচজন পলেষ্টীয় শাজনগুরিয়্যের্ পাচছান শঅর আঘে, আর দোগিণেন্দি আঘে অব্বীয়গুনোর জাগানি। ইয়েনিবাদে আরঅ বোউত্ জাগা গজক্ গুরি নেযেবার্ বাগি আঘে, সিয়েনি অলঅ সীদোনীয়গুনোর অধীনোত্ মিয়ারাত্তুন্ ইমোরীয়গুনোর দুযিত্ অফেক সং কনানীয়গুনোর বেক্ জাগায়ানি, 5-6 গিব্লীয়গুনোর চাগালা, পূগেদি হর্মোণ মুড়োবোর তলেদি বাল্গাদত্তুন হমাৎ সং পুরো লেবানন আর লেবাননত্তুন্ মিষ্রফোৎ-ময়িম সং মুড়ো-মুড়ি চাগালাগান্, অত্তাৎ সীদোনীয়গুনোর বেক্ দেজ্চানি। মুই নিজেই ইস্রায়েলীয়গুনো মুজুঙোত্তুন্ বেক্কুনোরে ধাবেই দিম্। মুই তরে যেধোক্ক্যেন্ উগুম্ দুয়োং সেই মজিম তুই এ দেজ্চান সোম্বোত্তি ইজেবে ইস্রায়েলীয়গুনোরে দিবে। 7 ইস্রায়েলীয়গুনোর নয়-গুট্টি আর মনঃশি-গুট্টির অদ্দেক্ মান্জ্যরে তুই সোম্বোত্তি ইজেবে সিয়েনি ভাগ গুরি দিবে।” যর্দনর পূগেন্দি জাগায়ানি 8 মনঃশি-গুট্টির অদ্দেক্ মানুচ্ আর রূবেণ আহ্ গাদ-গুট্টির মানুচ্চুনে যর্দনর পূগেন্দি জাগায়ান সোম্বোত্তি ইজেবে আগে পেইয়োন্। লগেপ্রভুর চাগর্ মোশি তারাত্তে সে জাগায়ান ঠিগ্ গুরি দি যেইয়্যে। 9-10 তারার্ এ জাগায়ান্ আরাম্ভ ওইয়্যেদে অর্ণোন কিজিঙো দুযির্ অরোয়র শঅরত্তুন্ আর সে কিজিঙোর্ সংমোধ্যে আদামত্তুন্। সিয়েন ভিদিরে আগেদে দীবোন সং মেদবার পুরো সং জাগায়ান আর অম্মোনীয়গুনোর দেজর দুযি সং হিষ্বোনর ইমোরীয় রাজা সীহোনর বেক্ আদামানি। 11 গিলিয়দ চাগালাগান্, গশূরীয় আর মাখাথীয়গুনোর জাগায়ান্, পুরো হর্মোণ মুড়োবো আর সল্খা সং পুরো বাশন দেজ্চানঅ সে ভিদিরে এলঅ। 12 ইয়েন এলদে বাশনর রাজা ওগর রেজ্য। তে অষ্টারোৎ আর ইদ্রিয়তত্তুন্ রাজাগিরি গুরিদো। রফায়ীয়গুনো ভিদিরে সেক্কেয়ো যিগুনে বাঁজি এলাক্ তে এলদে তারা ভিদিরে একজন। মোশি তারারে ওদেই দিইনে তারার্ দেজ্চান্ গজক্ গুরি নিলো। 13 মাত্তর্ ইস্রায়েলীয়গুনে এই গশূরীয় আর মাখাথীয়গুনোরে ধাবেই ন-দুয়োন্; সেনত্তেই তারা এজঅ সং ইস্রায়েলীয়গুনো ভিদিরে বজত্তি গত্তন্। 14 মাত্তর্ লেবি-গুট্টিবোরে মোশি কনঅ সোম্বোত্তির অধিকারী ন-গরে, কিত্যে লগেপ্রভুর শমক্ মজিম্ ইস্রায়েলীয়গুনোর গোজেন্ লগেপ্রভুর নাঙে আগুন্দোই-গোজ্যে উৎসর্বর্ জিনিস্চানি অলঅ তারার্ সোম্বোত্তি। 15-16 মোশি রূবেণ-গুট্টির নানান্ বংশধরুনোরে যে জাগায়ানি দিয়্যে সিয়েনি অর্ণোন কিজিঙোর্ দুযিত্ অরোয়র শঅরত্তুন্ আর কিজিঙোর্ সং মোধ্যে আদামত্তুন্ আরাম্ভ ওইয়্যে। সে ভিদিরে এলদে মেদবার চেরোকিত্তে বেক্ সং জাগায়ানি, 17 হিষ্বোন আর সংজাগায়ান ভিদিরে আদাম আর শঅরানি। এ আদাম আর শঅরানি অলঅ দীবোন, বামোৎ-বাল, বৈৎ-বাল্-মিয়োন, 18 যহস, কদেমোৎ, মেফাৎ, 19 কিরিয়াথয়িম, সিব্মা, কিজিঙো ভিদিরে মুড়ো-মুড়ি উগুরে সেরৎ-শঅরান্, 20 বৈৎ-পিয়োর, পিস্গা মুড়োবোর তলে জাগায়ান্ আর বৈৎ-যিশীমোৎ। 21 ইয়েনি এলঅ সং জাগান ভিদিরে আদাম আহ্ শঅর্ আর হিষ্বোনর ইমোরীয় রাজা সীহোনর পুরো রেজ্যগান্। মোশি এ রাজাবোরে আর ইবি, রেকম, সুর, হূর আর রেবা নাঙে মিদিয়নীয় সর্দারুনোরে ওদেই দিলো। ইগুনে সে চাগালাত্ বজত্তি গুরিদাক্ আর সীহোনর অধীনোত্ শাজনগুরিয়্যে এলাক্। 22 যুদ্ধোত্ যিগুনোরে মারে ফেলা ওইয়্যে তারা বাদে ইস্রায়েলীয়গুনে বিয়োরর পূঅ গণকে বিলিয়মরেয়ো মারে ফেলেয়্যে। 23 যর্দন গাঙান্ এলদে রূবেণীয়গুনোর চাগালার পোজিম দুযিত্। এ বেক্ শঅরানি আর সিয়েনর্ কায়-কুরে আদামানি রূবেণ-গুট্টির নানান্ বংশর মানুচ্চুনে সোম্বোত্তি ইজেবে পেইয়োন্। 24-25 মোশি গাদ-গুট্টির্ নানান্ বংশগুনোরে যে জাগায়ানি দিয়্যে সে ভিদিরে এলদে যাসের, গিলিয়দর বেক্ আদামানি আর রব্বার কায়কুরে অরোয়র সং অম্মোনীয়গুনোর অদ্দেক্ জাগায়ানি। 26 ইয়েন বাদে সে ভিদিরে এলদে হিষ্বোনত্তুন্ রামৎ-মিস্পী আর বটোনীম সং আর মহনয়িমত্তুন্ দবীরর দুযি সং বেক্ জাগায়ানি, 27 কিজিঙো ভিদিরে বৈৎ-হারম, বৈৎ-নিম্রা, সুক্কোৎ, সাফোন আর হিষ্বোনর রাজা সীহোনর রেজ্যর বাদবাগি ভাক্কান্ আর কিন্নেরত সাগরর দোগিণেন্দি সং যর্দন গাঙর পূগ দুযিগান ধুরিনে বেক্ চাগালাগান। 28 এ শঅরানি আর তার কায়-কুরে আদামানি গাদ-গুট্টির নানান্ বংশর মানুচ্চুনে সোম্বোত্তি ইজেবে পেইয়োন্। 29-30 মোশি মনঃশি-গুট্টির অদ্দেক্ মান্জ্যর্ নানান্ বংশরে যে জাগায়ানি দিয়্যে সিয়েনি অলঅ মহনয়িমত্তুন্ আরাম্ভ গুরি পুরো বাশন দেজ্চান। ইয়েন্ এলদে বাশন দেজর রাজা ওগর বেক্ রেজ্যগান। সে ভিদিরে এলদে যায়ীরর বেক্ আদামানি, অত্তাৎ ষায়েট্টান আদাম, 31 গিলিয়দর অদ্দেক্ জাগা আর অষ্টারোৎ আহ্ ইদ্রিয়ী শঅরান্। এ দ্বিশঅরত্তুন্ বাশনর রাজা ওগ রাজাগিরি গুরিদো। এ জাগায়ানি মনঃশির পূঅ মাখীরোর অদ্দেক্ মান্জ্যর্ নানান্ বংশরে দিয়্যে ওইয়্যে। 32 মোশি যর্দনর উইপারত্ যিরীহোর পূগেন্দি মোয়াবর সং জাগানত্ সে বেক্ জাগায়ানি সোম্বোত্তি ইজেবে ভাগ গুরি দিলো। 33 মাত্তর্ লেবি-গুট্টিরে তে কনঅ সোম্বোত্তি ন-দিলো; তারা ইদু লগেপ্রভু যে শমক্তান্ গোজ্যে সে মজিম্ ইস্রায়েলীয়গুনোর গোজেন লগেপ্রভু এলদে তারার্ সোম্বোত্তি। |
Copyright © 2021 Bangladesh Bible Society
Bangladesh Bible Society