যিহোশূয় 12 - Chakma Bible

উদি যেইয়্যে রাজাগুনোর নাঙানি

¹ অরাবা সং জাগানর পুরো পূগেদি ভাক্কান্‌ অর্ণোন কিজিঙোত্তুন্‌ হর্মোণ মুড়োবো সং যর্দন গাঙর্‌ পূগেদি ইমোরীয়গুনোর রাজা সীহোন আর বাশনর রাজা ওগরে ইস্রায়েলীয়গুনে ওদেই দিইনে তারার্‌ চাগালাগানি গজক্ গুরি নেযেয়োন্‌।

² ইমোরীয়গুনোর্‌ রাজা সীহোনে হিষ্‌বোনত্তুন রাজাগিরি গুরিদো। অর্ণোন কিজিঙোর্‌ পারত্‌ অরোয়রত্তুন্‌, অত্তাৎ কিজিঙোর্‌ সংমোধ্যেত্তুন অম্মোনীয়গুনোর দেজর দুযি যব্বোক গাঙান সং বেক্‌ চাগালাগান্‌ তার্‌ শাজনর অধীনোত্‌ এলঅ‌। এ চাগালাগান ভিদিরে এলঅ‌ গিলিয়দর অদ্দেক্‌ ভাগ।

³ ইয়েনবাদে কিন্নেরৎ সাগরত্তুন্‌ অরাবার সাগর, অত্তাৎ নুন্‌ সাগর্‌ আর বৈৎ-যিশীমোতর পথ্‌তান্‌ সং আর দোগিণেন্দি পিস্‌গা মুড়োবোর তলেদি সং অরাবা সং জাগানর পূগেদি ভাক্কান্‌ তার শাজনর্‌ অধীনোত্‌ এলঅ‌।

⁴ রফায়ীয়গুনো ভিদিরে যিগুনে বাঁজি এলাক্‌ বাশনর রাজা ওগ এলদে তারা ভিদিরে একজন। তে অষ্টারোৎ আর ইদ্রিয়ীতত্তুন রাজাগিরি গুরিদো।

⁵ হর্মোণ মুড়ো, সল্‌খা, গশূরীয় আর মাখাথীয়গুনোর দুযি সং পুরো বাশন দেজ্‌চান আর হিষ্‌বোনর রাজা সীহোনর রেজ্যর দুযি সং গিলিয়দর বাদবাগি অদ্দেক্‌ ভাক্কান্‌ তার শাজনর অধীনোত্‌ এলঅ‌।

⁶ ইস্রায়েলীয়গুনে আর লগেপ্রভুর চাগর্‌ মোশি এ দ্বিজন রাজারে ওদেই দিলো। তে তারার্‌ জাগায়ানি সোম্বোত্তি ইজেবে রূবেণ আহ্‌ গাদ-গুট্টির বেক্কুনোরে আর মনঃশি-গুট্টির অদ্দেক্‌ মান্‌জ্যরে দি যেইয়্যে।

⁷ লেবানন কিজিঙোর্‌ বাল্‌গাদত্তুন সেয়ীর মুড়োবোন্দি উদি যেইয়্যে হালক মুড়োবো সং যর্দন গাঙর্‌ পোজিমেন্দি চাগালার্‌ রাজাগুনোরে যিহোশূয় আর ইস্রায়েলীয়গুনে ওদেই দুয়োন্‌। তারার জাগায়ানি যিহোশূয় সোম্বোত্তি ইজেবে ইস্রায়েলীয়গুনোর নানান্‌ গুট্টি মজিম্ ভাগ গুরি দিলো।

⁸ এ জাগায়ানি অলঅ‌ অজল্‌ মুড়ো-মুড়ি চাগালাত্‌, তলে মুড়ো-মুড়ি জাগাত্‌, অরাবা, মুড়ো-মুড়ির্‌ তলে জাগায়ানি, পূগেদি ধূল্যেচরর্‌ চাগালাগান্‌ আর নেগেভ। ইয়েনি এলদে হিত্তীয়, ইমোরীয়, কনানীয়, পরিষীয়, হিব্বীয় আর যিবূষীয়গুনোর জাগা।

⁹ এই জাগায়ানির যে রাজাগুনোরে ওদেই দিয়্যে ওইয়্যে তারা অলাক্‌: যিরীহোর রাজা, বৈথেলর কায়কুরে অয়র রাজা,

^10-12 যিরূশালেমর রাজা, হিব্রোণর রাজা, যর্মূতর রাজা, লাখীশর রাজা, ইগ্লোনর রাজা, গেষরর রাজা,

¹³ দবীরোর রাজা, গেদরর রাজা,

¹⁴ হর্মার রাজা, অরাদর রাজা,

^15-17 লিব্‌নার রাজা, অদুল্লমের রাজা, মক্কেদার রাজা, বৈথেলর রাজা, তপূহর রাজা, হেফরর রাজা,

¹⁸ অফেকর রাজা, লশারোণর রাজা,

¹⁹ মাদোনর রাজা, হাৎসোরর রাজা,

²⁰ শিম্রোণ-মরোণর রাজা, অক্‌ষফর রাজা,

²¹ তানকর রাজা, মগিদ্দোর রাজা,

^22-24 কেদশর রাজা, কর্মিলের যক্নিয়ামর রাজা, দোরর মুড়ো-মুড়ি জাগায়ানির দোরর রাজা, গিল্‌গলর গোয়ীমের রাজা আর তির্সার রাজা। এই রাজাগুনে এলাক্কে বেক্কুনে একত্রিশ জন।