যিহোশূয় 10 - Chakma Bibleবেলানে থিয়্যেই রলঅ 1 যিরূশালেমর রাজা অদোনী-ষেদকে শুনিল, যিহোশূয় অয় শঅরান গজক্ গুরি নিইনে সিয়েন এক্কুবারে ভস্ত গুরি দিয়্যে আর তে যিরীহো আহ্ সে রাজাবোর দযাাগান্ যেধোক্ক্যেন গোজ্যে অয় আর সে রাজাবোর দযাগান্অ সেধোক্ক্যেন্ গুরিলো। তে আরঅ শুনিলোদে, গিবিয়োনীগুনে ইস্রায়েলীয়গুনো লগে আঢ্ মিলেয়োন্ আর তারা তারার্ সমারে আগন্। 2 ইয়েন্দোই তে আর তা মানুচ্চুনে অমকদ দোরেলাক্, কিত্যে গিবিয়োনান্ এলদে রাজধানী ধোক্ক্যেন্ এক্কান দাঙর্ শঅর। ইয়েন এলদে অয় শঅরত্তুনঅ দাঙর আর সিয়েনর বেক্ মরদ মানুচ্চুন্ বোলী এলাক্। 3 সেনত্যে হিব্রোণর রাজা হোহম, যর্মূতর রাজা পিরাম, লাখীশর রাজা যাফিয় আর ইগ্লোনর রাজা দবীরর কায়কুরে যিরূশালেমর রাজা অদোনী-ষেদকে এ কোজোলীগান্ গুরিনে পাদেল, 4 “তুমি এইনে মরে গিবিয়োন্ শঅরান আক্রমণ গুরিবাত্তে বল্ দুয়ো, কিত্যে তারা যিহোশূয় আর ইস্রায়েলীয়গুনো সমারে আঢ্ মিলেয়োন্।” 5 এ কধাগান শুনিনে সেই পাঁচজন ইমোরীয় রাজা, অত্তাৎ যিরূশালেম, হিব্রোণ, যর্মূত, লাখীশ আর ইগ্লোনর রাজা তারার সৈন্যদলুনোরে এক্কান্ জাগাত্ এগত্তর্ গুরিলাক্। সে পরেন্দি তারার সৈন্যদলুন নিইনে তারা উজেই যেইনে গিবিয়োনর কায়-কুরে তাম্বুলান্ ফেলেলাক্ আর শঅরান আক্রমণ গুরিলাক্। 6 সেক্কে গিবিয়োনীগুনে গিল্গলর তাম্বুলত্ যিহোশূয় ইদু এ হবরান পাদেলাক্, “তঅ চাগরুনোরে ছাড়ি ন-দিবে। তুমি যাদিমাদি এইনে আমারে রোক্ষ্যে গরগি, আমারে বল্ দুয়ো, কিত্যে মুড়োমুড়ি চাগালাত্তুন্ ইমোরীয় রাজাগুনে এইনে আমা বিরুদ্ধে তারার সৈন্যদলুন এক সমারে এগত্তর্ গোজ্যন।” 7 এ হবরান পেইনে যিহোশূয় তার পুরো সৈন্যদলুন নিইনে গিল্গলত্তুন উজেই গেলঅ। তা ভিদিরে এলাক্কে ইস্রায়েলীয়গুনোর বেক্ বীর যোদ্ধাগুন্। 8 লগেপ্রভু যিহোশূয়রে কলঅ, “তুই তারারে ন-দোরেচ্; মুই তারারে তঅ আঢত্ তুলি দুয়োং। তারা কনজনে তঅ মুজুঙোত্ থিয়্যেই ন-পারিবাক্।” 9 গিল্গলত্তুন নিগিলিনে সারা রেত্তো আদানার পরেন্দি যিহোশূয় আদিক্কেগুরি তারারে আক্রমণ গুরিলো। 10 লগেপ্রভু ইস্রায়েলীয়গুনো মুজুঙোত্ তারারে এক্কান যাগুলুক্ অবস্থাত্ ফেলেই দিলো। সেক্কে লগেপ্রভু গিবিয়োনত্ ইস্রায়েলীয়গুনোরে দিইনে তারারে বোউত জনরে মারে ফেলেয়্যে। বৈৎ-হোরোণত্ উদিবার পথ্তান ধুরিনে লগেপ্রভু ইস্রায়েলীয়গুনোরে দিইনে তারারে লোড়েল আর অসেকা আর মক্কেদা সং গোদা পথ্তান তারারে মাত্তে মাত্তে নেগেল। 11 ইস্রায়েলীয়গুনো মুজুঙেত্তুন্ তারা যেক্কে বৈৎ-হোরোণ ছাড়িনে অসেকাত্ লামি এবার পথ্তান ধুরিনে ধেই যাদন্ সেক্কে লগেপ্রভু আগাজত্তুন দাঙর দাঙর শিল্ তারা উগুরে ফেলেল। সেনে ইস্রায়েলীয়গুনো সমারে যুদ্ধোত্ যিদুক্কুন্ মানুচ্ মুরিলাক্ তাত্তুন বেশ্ মুরিলাক্ এ শিলাত্। 12 যেদিন্যে লগেপ্রভু ইস্রায়েলীয়গুনো আঢত্ ইমোরীয়গুনোরে তুলি দিলো সেদিন্যে ইস্রায়েলীয়গুনোর মুজুঙোত্ যিহোশূয় লগেপ্রভুরে কলঅ, “ও বেলান্, গিবিয়োন উগুরে তুই সোজা ওইনে থিয়্যে, ও চানান্, অয়ালোন কিজিঙোত্ তুই যেইনে থিয়্যে।” 13 সেনত্তেই বেলান্ সোজা ওইনে থিয়্যেল আর চানানর্ লড়ানাগান্ থামেল, যেদক্কন সং ইস্রায়েলে তা শত্রুদলুনো উগুরে হেনা ন-উগুরাই। এ কধানি যাশেরর বোইবোত্ লেগা আঘে। সেক্কে বেলান্ আগাজ সংমোধ্যে যেইনে থিয়্যেই রলঅ আর বেলান্ ডুপ্পেগোই প্রায় পুরো এক্কো দিন দেরি অলঅ। 14 এ আগেদি বা পরেন্দি এধোক্ক্যেন দিন আর কনদিনঅ ন-এজে যেক্কেনে লগেপ্রভু এধোক্ক্যেনগুরি মান্জ্যর্ কধানি রাগেয়্যে। সেদিন্যে লগেপ্রভু ইস্রায়েলীয়গুনোর ওইনে যুদ্ধো গোজ্যে। 15 ইয়েনর পরেন্দি যিহোশূয় বেক্ ইস্রায়েলীয়গুনোরে নিইনে গিল্গলর তাম্বুলত ফিরি গেলঅ। ইমোরীয় রাজাগুনোর মরণ 16 সে পাচজন ইমোরীয় রাজা ধেই যেইনে মক্কেদা শঅরর্ ইদু এক্কো গাদত্ পোল্ল্যেই রোইয়োন্। 17-18 সেই গাত্তোত্ পোল্ল্যেয়্যে অবস্থায় সে পাচজন রাজারে থোগেই পানার হবরান্ যেক্কে যিহোশূয়রে জানা অলঅ সেক্কে তে কলঅ, “গাত্তোর মুয়োনত্ দাঙর্ দাঙর্ পাত্তর ভোরেই দুয়ো আর সিবে চুগি দিবাত্তে কয়েকজন মানুচ্ থিয়্যেই রাগঅ। 19 মাত্তর্ তুমি ন-থামেয়ো; তমা শত্রুগুনোরে লোড়েই নেযঅ, পিজেন্দিত্তুন তারারে আক্রমণ গরঅ আর তারারে নিজো শঅরত্ ফিরি যেবাত্তে ন-দুয়ো। তমা গোজেন লগেপ্রভু তমা আঢত্ তারারে তুলি দিয়্যে।” 20 এধোক্ক্যেনগুরি যিহোশূয় আর ইস্রায়েলীয়গুনে ইমোরীয়গুনোরে ভস্ত গুরি ফেলেলাক্। সেক্কে প্রায় বেক্কুনে মুরি গেলাক্; মাত্তর্ যে কয়েকজন বাদ্ এলাক্ তারা তারার দেবাল-ঘিজ্যে শঅরত্ যেইনে চমিলাক্। 21 ইয়েনর্ পরেন্দি ইস্রায়েলীয়গুনোর সৈন্যগুনে বেক্কুনে মক্কেদার তাম্বুলোত্ দোলেডালে যিহোশূয়র ইদু ফিরি গেলাক্। ইস্রায়েলীয়গুনোর বিরুদ্ধে কনজনে কনঅ কধা কবার্ সাহস ন-পেলঅ। 22 পরেন্দি যিহোশূয় কলঅ, “গাত্তোর্ মুয়োন্ খুলিনে সে পাচজন রাজারে নিগিলেনে মইদু আন।” 23 সেক্কে সে গাত্তোত্তুন্ সে পাচজন রাজারে তারা নিগিলেনেই আনিলাক্। ইগুনে এলাক্ যিরূশালেম, হিব্রোণ, যর্মূত, লাখীশ আর ইগ্লোনর রাজা। 24 তারা যেক্কে সে রাজাগুনোরে যিহোশূয় ইদু আনিলাক সেক্কে তে বেক্ ইস্রায়েলীয়গুনোরে ডাগিলো আর তা লগে যে সেনাপতিগুনে যুদ্ধোত্ যেইয়োন তারারে কলঅ, “তুমি ইদু এইনে সে রাজাগুনোর গত্তনাত্ তমা টেঙানি রাগঅ।” সেক্কে তারা উজেই যেইনে সে রাজাগুনোর গত্তনা উগুরে তারার টেঙানি রাগেলাক্। 25 যিহোশূয় তারারে কলঅ, “তুমি ন-দোরেয়ো, আশা ন-আরেয়ো। তুমি বোলী অ আর মনত্ সাহস আনঅ। তুমি যিদুক্কুন শত্রুর্ লগে যুদ্ধো গুরিবাত্তে যেবা তারার বেক্কুনোর অবস্থা লগেপ্রভু এ দোক্ক্যেন্ গুরিবো।” 26 সে পরেন্দি যিহোশূয় সে রাজাগুনোরে মারে ফেলেইনে পাচ্চো গাজত্ তারারে টাঙেই দিলো। বেল্যেমাদান্ সং তারার কিয়্যেনি গাজত্ টাঙেয়্যে রলঅ। 27 বেলান্ ডুবিবার্ অক্তত্ যিহোশূয়র উগুমে মানুচ্চুনে গাজত্তুন্ তারার কিয়্যেনি লামেল আর যে গাত্তোত্ তারা পোল্ল্যেই এলাক্ সে ভিদিরে কিয়্যেনি ফেলেলাক্। গাত্তোর্ মুয়োনি তারা দাঙর্ দাঙর্ পাত্তর্ দিইনে নাঢি দিলাক্। সিগুন এজঅ সিয়েনত্ আগন্। 28 যিহোশূয় সেদিন্যে মক্কেদাগান্ অধিকার গুরি নিলো। তে সে শঅরর্ রাজা আর বেক্ মানুচ্চুনোরে মারে ফেলেল আর সিদুগোর্ বেক্ জেদা পরাণবলাগুনোরে শেজ্ গুরি দিলো, কাররে বাজে ন-রাগেল। তে যিরীহো রাজার যে অবস্থা গোজ্যে মক্কেদার রাজার অবস্থায়ো সেধোক্ক্যেন্ গুরিলো। দোগিণো শঅরানির অবস্থা 29 পরেন্দি যিহোশূয় ইস্রায়েলীয়গুনোরে বেক্কুনোরে নিইনে মক্কেদাত্তুন লিব্নার ইন্দি উজেই যেইনে সিয়েন আক্রমণ গুরিলো। 30 লগেপ্রভু সে শঅরান আর সিদুগোর্ রাজাবোরে ইস্রায়েলীয়গুনো আঢত্ তুলি দিলো। যিহোশূয় সে শঅরর্ মানুচ্চুনোরে আর বেক্ জেদা পরাণবলাগুনোরে মারে ফেলেল, কাররে বাঁজেই ন-রাগেল। তে যিরীহো রাজার যে অবস্থা গোজ্যে সিদুগোর্ রাজার অবস্থায়ো সেধোক্ক্যেন্ গুরিলো। 31 ইয়েনর্ পরেন্দি যিহোশূয় ইস্রায়েলীয়গুনোরে বেক্কুনোরে নিইনে লিব্নাত্তুন লাখীশর ইন্দি উজেই গেলঅ। তে লাখীশছান্ ঘিরিনে সিয়েন আক্রমণ গুরিলো। 32 লগেপ্রভু লাখীশছানরে ইস্রায়েলীয়গুনোর আঢত্ তুলি দিলো। দ্বিদিনোত্ যিহোশূয় সিয়েন গজক্ গুরি নিলো। যিহোশূয় লিব্না শঅরত্ যেধোক্ক্যেন্ গোজ্যে সেধোক্ক্যেন্ লাখীশ মানুচ্চুনোরে আর বেক্ জেদা পরাণবলাগুনোরে মারে ফেলেল। 33 এ ভিদিরে গেষরর রাজা হোরম লাখীশর মানুচ্চুনোরে বল্ দিবাত্তে এচ্ছ্যে মাত্তর্ যিহোশূয় তারে আর তার সৈন্যদল্লোরে ওদেই দিলো। যেরেন্দি আর কনজনে বাঁজি ন-থেলাক্। 34 সে পরেন্দি যিহোশূয় ইস্রায়েলীয়গুনোরে বেক্কুনোরে নিইনে লাখীশত্তুন ইগ্লোনর ইন্দি উজেই গেলঅ। তারা ইগ্লোনান্ ঘিরিনে সিয়েন আক্রমণ গুরিলাক্। 35 সেদিন্যে তারা ইগ্লোনান্ গজক্ গুরিনে নেযেলাক্ আর সে জাগার মানুচ্চুনোরে মারে ফেলেলাক্। লাখীশোত্ যিহোশূয় যেধোক্ক্যেন্ গোজ্যে সেধোক্ক্যেন্ তে ইগ্লোনর বেক্ জেদা পরাণবলাগুনোরে এক্কুবারে শেজ্ গুরি দিলো। 36 ইয়েনর্ পরেন্দি যিহোশূয় ইস্রায়েলীয়গুনোরে বেক্কুনোরে নিইনে ইগ্লোনত্তুন হিব্রোণত্ যেইনে শঅরান আক্রমণ গুরিলো। 37 তারা শঅরান গজক্ গুরিনে সে জাগার মানুচ্চুনোরে, তারার রাজাবোরে, তা কায়কুরে আদামানির বেক্ মানুচ্চুনোরে আর হিব্রোণর বেক্ জেদা পরাণবলাগুনোরে মারে ফেলেল। যিহোশূয় ইগ্লোনত্ যেধোক্ক্যেন্ গোজ্যে সেধোক্ক্যেন্ সিদু কাররে বাঁজেই ন-রাগেল; তে হিব্রোণ আর তার্ বেক্ মানুচ্চুনোরে এক্কুবারে শেজ্ গুরি দিলো। 38 পরেন্দি যিহোশূয় ইস্রায়েলীয়গুনোরে বেক্কুনোরে নিইনে ঘুরিনে দবীর শঅরান আক্রমণ গুরিলো। 39 তারা সে শঅরান, তার্ রাজাবো আর আদামানি গজক্ গুরি নেযেইনে সে জাগার বেক্কুনোরে মারে ফেলেল। তারা সে জাগার বেক্ জেদা পরাণবলাগুনোরে এক্কুবারে শেজ্ গুরি দিলাক্। যিহোশূয় কাররে বাঁজেই ন-রাগেল; তে লিব্না আর সে রাজাবো আহ্ হিব্রোণর অবস্থা যেধোক্ক্যেন্ গোজ্যে দবীর আর তার রাজাবোর অবস্থায়ো সেধোক্ক্যেন্ গুরিলো। 40 এবাবোত্যেগুরি যিহোশূয় বেক্ চাগালাগান্ জিদি নেযেল। সে ভিদিরে এলদে অজল্ মুড়ো-মুড়ি চাগালা, নেগেভ, তলেদি মুড়ো-মুড়ি চাগালা আর মুড়ো-মুড়ির কামা জাগানি। তে সে চাগালার রাজাগুনোরেয়ো ওদেই দিলো আর সিদুগোর্ কাররে বাঁজেই ন-রাগেল। ইস্রায়েলীয়গুনোর গোজেন লগেপ্রভু যেধোক্ক্যেন্ উগুম গোজ্যে সেধোক্ক্যেন্ তে বেক্ জেদা পরাণবলাগুনোরে এক্কুবারে শেজ্ গুরি দিলো। 41 যিহোশূয় কাদেশ-বর্ণেয়ত্তুন গাজা সং আর গোদা গোশন চাগালাগান্, এন্ কি, গিবিয়োন সং বেক্ মানুচ্চুনোরে ওদেই দিলো। 42 এধোক্ক্যেনগুরি একবার যুদ্ধো গুরিবাত্তে নিগিলিলে যিহোশূয় এ বেক্ রাজাগুনোরে আর তারার দেজ্চানি জিদি নিলো, কিত্যে ইস্রায়েলীয়গুনোর গোজেন লগেপ্রভু তারার্ ওইনে যুদ্ধো গোজ্যে। 43 ইয়েনর পরেন্দি যিহোশূয় বেক্ ইস্রায়েলীয়গুনোরে নিইনে গিল্গলর তাম্বুলোত্ ফিরি গেলঅ। |
Copyright © 2021 Bangladesh Bible Society
Bangladesh Bible Society