যিহোশূয় 1 - Chakma Bibleযিহোশূয় উগুরে লগেপ্রভুর উগুম 1 লগেপ্রভুর চাগর্ মোশির মরাণার পরেন্দি লগেপ্রভু মোশির এজাল্ দিয়্যে নূনর পুঅ যিহোশূয়রে কলঅ, 2 মঅ চাগর্ মোশি মুরি যেইয়্যে। সেনত্তে ইক্কিনে তুই আর বেক্ ইস্রায়েলীয়গুনে যর্দন গাঙান্ পার ওই যেবাত্তে যুক্কোল্ অ আর যে দেজ্চান মুই ইস্রায়েলীয়গুনোরে দিবাত্তে যাঙর্ সিয়েনত্ যঅ। 3 তুমি যেদক্কানি জাগাত্ টেং দিবা সিয়েনি বেক্কানি মুই তমারে দিম্। মোশি ইদু সে শমক্তান্ মুই গোজ্যং। 4 তমার দেজ্ছান্ অবঅ ধূল্যেচর-চাগালাত্তুন লেবানন সং আর পূগেন্দি বড়গাঙ্ ইউফ্রেটিস আহ্ পোজিমেন্দি ভূমধ্য সাগর সং, অত্তাৎ হিত্তীয়গুনোর পুরো চাগালাগান্। 5 তুই যেদকদিন বাঁজি থেবে কনঅ জনে তর্ বিরুদ্ধে থিয়্যেই ন-পারিবাক্। মুই যেধোক্ক্যেন গুরি মোশি লগে এলুং সেধোক্ক্যেন তঅ লগেয়ো থেম্; মুই কনঅ দিনঅ তরে ছাড়ি ন যেম্ বা ফেলেই ন-যেম্। 6 “তুই বলী অ, মনত্ বল্ বান্, কিত্তেই যে দেজ্চান দিবার্ কধা মুই এ মানুচ্চুনোর পূরোণি মানুচ্চুনো ইদু শমক্ খেইনে কোইয়োং, সে দেজ্চান এ মানুচ্চুনোর অধিকার ইজেবপান্ তত্তুনোই ভাগ গুরি দিয়্যে পুরিবো। 7 তুই বলী অ আর বুগোত্ সাহস বান্। মঅ চাগর্ মোশি তরে যে রীদি-সুদোমানি দি যেইয়্যে বেক্ রীদি-সুদোমানি পালেবাত্তে মন্ দিবা, সিয়োত্তুন এক্কেনায়ো ইন্দি উন্দি ন-সুরিবা। ইয়েন্দোই তুই যিয়োত্ যেবে সিয়োদোই ফোলেবে। 8 রীদি-সুদোমর্ এ বোইবো ভিদিরে যিয়েনি লেগা আঘে সিয়েনি যেনে আমিঝে তঅ মুয়োত্ থায়। ইবে ভিদিরে যিয়েনি লেগা আঘে সিয়েনি যেনে তুই পালেবাত্তে মন দুয়োচ্ সেনত্তেই দিনরেত্ সিয়েনিলোই তুই গমেডালে চিদে গুরিবে। সেক্কে বেক্কানিত্ তুই ফোলেবে আর তর্ গম্ অবঅ। 9 মুই তরে উগুম দুয়োঙর, সেনত্তেই তুই বোলী অ আর মনত্ সাহস আন্। ন-দোরেচ্ বা ঝিমেয়্যে ন-ওস্, কিত্যে তুই যিয়োদোই যেদে সাৎ তর্ গোজেন লগেপ্রভু তঅ লগে থেবঅ।” 10 এ কধা শুনিনে যিহোশূয় মানুচ্চুনোর নেতাগুনোরে কলঅ, 11 “তুমি তাম্বুলোত্ যেইনে মানুচ্চুনোরে কগোই যেনে তারা তারার হানা-দানানি নিইনে যুক্কোল্ থান্। তারার গোজেন লগেপ্রভু যে দেজ্চান তারারে সোম্বোত্তি ইজেবে দিবাত্তে যার্ সিয়েনত যেইনে সিয়েনি গজক্ গুরি নেযেবাত্তে তিন দিনো ভিদিরে তারারে ইয়োত্তুন যর্দন গাঙান্ পার ওই যাহ্ পুরিবো।” 12 রূবেণ আর গাদ-গুট্টির বেক্কুনোরে আহ্ মনঃশি-গুট্টির অদ্দেক্ মান্জ্যরে যিহোশূয় কলদে, 13 “লগেপ্রভুর চাগর্ মোশি যে শমক্তান্ তমা ইদু গোজ্যে সিয়েনি তুমি মনত্ তুলি চঅ। তে কোইয়্যেদে, ‘তমা গোজেন লগেপ্রভু বেক্কানিত্তুন তমারে জিরেবাত্তে দিয়্যে আর এ দেজ্চানঅ তমারে দিয়্যে।’ 14 যর্দনর পূগেন্দি যে জাগায়ান মোশি তমারে দিয়্যে সিদু তমা মোক্, পূঅ-ঝি আর এ্যমানপালুন্ রাগেই পারিবো, মাত্তর্ তমা ভিদিরেত্তুন্ যিগুনে যুদ্ধো গুরি পারন্ তারারে বেক্কুনোরে যুদ্ধো গুরিবাত্তে যুক্কোল্ ওইনে তমা ভেইয়ুনোর আগে আগে গাঙান্ পার ওইনে যাহ্ পুরিবো। 15 লগেপ্রভু যেদকদিন তমা ধোক্ক্যেন গুরি তমা ভেইয়ুনোরেয়ো বেক্কানিত্তুন জিরেবাত্তে ন-দে আর যেদকদিন সং তারা তমার গোজেন লগেপ্রভুর দিয়্যে দেজ্চান গজক্ গুরি ন-নেযান্ সেদকদিন সং তুমি ভেইয়ুনোরে এজাল্ দিবা। সে পরেন্দি তুমি ফিরি এইনে তমার নিজোর জাগায়ানি পুরোপুরিগুরিনে গজক্ গুরি পারিবা যিয়েনি লগেপ্রভুর চাগর্ মোশি যর্দনর পূগেন্দি তমারে দি যেইয়্যে।” 16 জোবত্ তারা যিহোশূয়রে কলাক্, “তুই আমারে যেদক্কানি উগুম দুয়োচ্ সিয়েনি আমি পালন গুরিবোং আর আমারে যিদু পাদেবে সিয়োদোই যেবং। 17 আমি যেন মোশির বেক্ কধানি মানি চুলিদোং, তর্ বেলায়ও সেধোক্ক্যেন গুরিবোং। তর গোজেন লগেপ্রভু যেধোক্ক্যেন মোশি লগে এলঅ সেধোক্ক্যেন যেন তঅ লগেও থায়। 18 কনজনে যুনি তর্ কনঅ উগুমোর বিরুদ্ধে যেইনে তর্ কধামজিম্ ন-চলন্ সালে তারে মারে ফেলা অবঅ। তুই বানা বলী অ আর সাহস্ গর্।” |
Copyright © 2021 Bangladesh Bible Society
Bangladesh Bible Society