যোনা 4 - Chakma Bible

লগেপ্রভুর উগুরে যোনার রাগ

¹ মাত্তর্ যোনা ইয়েন্দোই অমকদ বেজার্ ওইনে রাগ্ তুলিলো।

² তে লগেপ্রভু ইধু তবনা গুরিনে কলঅ, “ও লগেপ্রভু, মুই দেজত্ থাগদে হবর্ পেদুং যে, এবাবোত্যে অবঅ। সেনত্তে দঅ মুই পত্তমে তর্শীশোত্ ধেই যাঙর্। মুই হবর্ পেদুং যে, তুই দোয়্যেবলা আর মেয়্যেলিবলা গোজেন, তুই সহজে বেজার্ ন-অচ্, তর্ অমকদ কোচ্‌পানার দুযি নেই আর সাজা দেনার্ পৌইদ্যেনে মনান্ বুদুলি থাচ্।‌

³ ইক্কিনে ও লগেপ্রভু, তুই মঅ পরাণান্ নেযা, কিত্যে মর্ বাঁজি থানাত্তুন্ মুরি যানাগান গম্।”

⁴ জোবত্ লগেপ্রভু কলঅ, “তর্ রাগ গরানা কি উজিত্ অর্?”

⁵ সেক্কে যোনা শঅর বারেদি যেইনে পূগেদি এক্কান জাগাত্ ছাল্ বানেইনে তা ছাবানত্ বুজি রলঅ। শঅরর্ কি দযা অয় সিয়েন চেবাত্তে তে বাজ্জেই থাহ্ ধুরিলো।

⁶ সেক্কে গোজেন লগেপ্রভু সিয়েনত্ এক্কো গাজ্ বানেই দিলো। সে গাজ্‌‌‌চো দাঙর্ ওইনে যোনার দুঘ্ কোমেবাত্তে তা মাঢাত্ ছাবা দিয়্যে ধুরিলো। সেক্কে যোনা সেই গাজ্‌‌‌চোত্তে অমকদ হুজি অলঅ।

⁷ মাত্তর্ তার্ কেল্যে বেন্যেপোত্যে গোজেনে এক্কো পুগ্ পাদেল; গাজ্‌‌‌চোরে সে পুগ্‌‌‌কো হাঃ ধুরিলে পরেদি সিবে শুগেই গেলঅ।

⁸ যেক্কে বেলান্ উদিলো সেক্কে গোজেনে গরম পূগো বোইয়্যের্ বেঈ দিলো; সেক্কে যোনা মাঢাবোত্ এমন রোদ বাঁজিলো যে, তে পেরায়্ অজ্ঞান অইদ্যে ধোক্ক্যেন অলঅ। সেক্কে তে মুরিবাত্তে চেইনে কলঅ, “মর্ বাঁজি থানাত্তুন মুরি যানা গম্।”

⁹ মাত্তর্ গোজেনে যোনারে কলঅ, “সে গাজ্‌‌‌‌চো পৌইদ্যেনে রাগ গরানা কি তর্ উজিত্ অর্?” যোনা কলঅ, “সিয়েনর্ কারণ আঘে। মুই মরণ সং রাগ গুরি থেইম্।”

¹⁰ মাত্তর্ লগেপ্রভু কলঅ, তুই যুনিয়ো এ গাজ্‌‌‌‌‌চোত্তে কনঅ কাম্ ন-গরচ্ বা ইবেরে বাড়েই ন-তুলোচ্ তো গাজ্‌‌‌‌‌‌চোত্তে তর্ মেয়্যে ওইয়্যে। সিবে দঅ এক রেদো ভিদিরে লাম্বা ওইয়্যে আর এক রেদে মুরি গেলঅ।

¹¹ মাত্তর্ নীনবীত্ এক লাখ্ কুড়ি আজারর্‌অ বেশ্ চিগোন গুরো আগন্ যিগুনে হবর্ ন-পান কুবোন ডেন্ আত্ আর কুবোন বাং আত্; ইগুন বাদেয়ো বোউত্ গোরু-ভেড়ায়ো আগন্। সালে মুই কি গুরিম? মুই কি সেই দাঙর্ শঅরানত্তে মেয়্যে ন-গুরিম?