যোনা 3 - Chakma Bible

যোনার বাধ্যতা

¹ পরেদি লগেপ্রভুর কধানি দ্বিপল্লা যোনা ইধু ফগদাং অলঅ।

² তে কলঅ, “তুই ইক্কিনে সেই দাঙর্ শঅর্ নীনবীত্ যাহ্ আর মুই যে হবরান তরে দিম্ সিয়েন সিদু ফগদাং গর্।”

³ লগেপ্রভুর কধামজিম যোনা নীনবীত্ গেলঅ। নীনবী অলদে জদবদে দাঙর্ শঅর; তা এক কিত্তেত্তুন্ অন্য কিত্তেদি আঢিনে বেক্ জাগানত্ যাদে তিন দিন লাগিদো।

⁴ যোনা সে শঅরত্ সোমেইনে এক দিনো পথ গেলঅ আর এ কধাগান ফগদাং গুরিলো, “আর চল্লিশ দিন পরেদি নীনবীগান ভস্ত ওই যেবঅ।”

⁵ সেক্কে নীনবীর মানুচ্চুনে গোজেন কধানি বিশ্বেজ্ গুরিলাক্। সেনত্তে তারা উবোস্ থানা কধাগান কলাক্ আর দাঙরত্তুন্ ধুরি চিগোন সং বেক্কুনে বস্তা পাদা পিনিলাক্।

⁶ রাজা ইধু সে হবরান লুমোনার্ পরেদি তে তার্ সিংহাসনান্ ছাড়ি উদিনে তা রাজপোজাক্কানি খুলি ফেলেল আর বস্তা পাদা পিনিনে ছেইয়ো সংমোধ্যে বুজিলো।

⁷ সে পরেদি তে নীনবীত্ তার আর তা রাজচাগরুনোরে এ উগুমান ফগদাং গুরিলো: “মানুচ্ বা য়েমান, গোরু বা ভেড়ার পাল কনজনে কন কিজু ন-খাদোক্; তারা হানা বা পানি ন-খাদোক্।

⁸ মানুচ্ আর য়েমানে বস্তা পাদা পিনোদোক্। পত্তিজনে বেক্ বলান্দোই গোজেনরে ডাগোদোক্ আর ভান্ন্যেই পথ আর কুজুরোমীর্ কামানি ছাড়ি দেদোক্।

⁹ কন্না হবর্ পাই অয়ত বা গোজেনে মন ফিরেইনে তার্ জদবদে রাগত্তুন্ ফিরিবো যেনে আমি ভস্ত ওই ন-যেই।”

¹⁰ তারা যিয়েন গোজ্যন্ আর কেধোক্ক্যেন গুরি তারার্ ভান্ন্যেই পদত্তুন্ ফিজ্যন্ সিয়েন যেক্কে গোজেনে দেগিলো সেক্কে তে তার্ মনান্ ফিরেল। তে যে অমংগল গুরিবো কোইয়্যে সিয়েন ন-গুরিলো।