যোনা 1 - Chakma Bible

যোনার অবাধ্য অনা

^1-2 লগেপ্রভুর এ কধাগান অমিত্তয়র পুয়ো যোনা ইধু ফগদাং অলঅ, “তুই সে দাঙর্ শঅর্ নীনবীত্ যেইনে তা বিরুদ্ধে ফগদাং গর্, কিত্যেই তা মানুচ্চুনোর ভান্ন্যেয়ানি মুই দেখ্যং।”

³ মাত্তর্ যোনা লগেপ্রভুত্তুন্ তর্শীশোত্ ধেই যেবাত্তে রওনা অলঅ। তে যাফো বন্দরত্ যেইনে তর্শীশোত্ যেবার এক্কান জাহাজ পেলঅ। ভাড়া দেনার্ পরেদি তে সে জাহাজ্‌চানত্ উদিলো আর লগেপ্রভুত্তুন্ ধেই যেবাত্তে তর্শীশো ইন্দি যাহ্ ধুরিলো। ‌‌

⁴ সেক্কে লগেপ্রভু সাগরত্ এক্কান দাঙর্ বোইয়্যের্ পাধেই দিলো। সেক্কে এমন দর্‌‌‌গরেপারা এক্কান ঝড় অলঅ, জাহাজ্‌‌‌চান ভাঙি যাইদ্যে ধোক্ক্যেন অলঅ।

⁵ ইয়েনত্ নাবিক্‌‌‌কুন বেক্কুনে দোরেইনে পত্তিজনে নিজো নিজো দেবেদা ইধু কানাকুদি গরা ধুরিলাক্। জাহাজ ভরান্ কোমেবাত্তে তারা পযাপিরানি সাগরত্ ফেলেই দিলাক্। মাত্তর্ ইয়েনর্ আগেদি যোনা জাহাজর্ তলেদি লামিনে ঘুমোত্ পড়িলো আর তার্ যদেবদে ঘুম্ অলঅ।

⁶ সেক্কে জাহাজ কেপ্টিন্নো যোনা ইধু যেইনে কলঅ, “তুই কিবাবোত্যেগুরি ঘুম যর্? উদিনে তঅ দেবেদাবোরে ডাগ্। তে অয়ত আমা ইন্দি মনযোগ দিবো আর সেক্কে আমি ভস্ত ন-অবং।”

⁷ পরেদি নাবিক্‌‌‌কুনে একজন আর একজনরে কলাক্, “কন্না এই দযাগানত্তে দায়ী সিয়েন চেবাত্তে এজঅ, আমি চাম্বা চেই।”

⁸ সেক্কে তারা তারে পুযোর্ গুরিলাক্, “তুই আমারে কঅ, এই যে দযাগান্ আমা উগুরে এইচ্চ্যে সিয়েনত্তে দায়ী কন্না? তুই কি কাম গরচ্? তুই কুত্তুন্ এচ্চোস্? তুই কন্‌ দেজ মানুচ্? তুই কন্‌ জাদর্ মানুচ্?”

⁹ জোবত্ যোনা কলঅ, “মুই এক্কো ইব্রীয়। মুই স্বর্গর্ গোজেন লগেপ্রভুর উবোসনা গরং। তেয়ই সাগর আর মাদি বানেয়্যে।”

¹⁰ তে যে লগেপ্রভুত্তুন্ ধেই যার্ সিয়েন তারা হবর্ পেলাক্, কিত্যে তে সেই কধাগান তারারে কলঅ। সেক্কে তারা অমকদ দোরেইনে পুযোর্ গুরিলাক্, “তুই ইয়েন কি গোজ্যস্?”

¹¹ সাগরান অশান্তত্তুন্ আরঅ অশান্ত ওই উঠ্যে বিলিনে তারা তারে পুযোর্ গুরিলাক্, “সাগরান যেনে আমাত্তে শান্ত অয় সেনত্তে আমি তরে নিইনে কি গুরিবোং?”

¹² জোবত্ যোনা কলঅ, “মরে সাগরত্ ফেলেই দুয়ো, সেক্কে সাগরান শান্ত অবঅ। মুই হবর্ পাং, মর্ দুজে এ জদবদে ঝরান্ তমা উগুরে এচ্চ্যে।”

¹³ তো সেই নাবিক্‌‌কুনে সিয়েন ন-গুরিনে কুলোচরত্ ফিরি যেবাত্তে যাহ্ বল্ আঘে পাঙেই বাহ্ ধুরিলাক্; মাত্তর্ তারা ন-পারিলাক, কিত্যেই সাগরান আগত্তুন্ বেশ্ আরঅ দর্‌‌‌গরেপারা ওই উদিলো।

¹⁴ সেক্কে তারা লগেপ্রভুরে ডাগিনে কলাক্, “ও লগেপ্রভু, এ মানুচ্চোর মরণর্ কারনে আমাত্তুন্ যেন মরা ন-পড়ে। এক্কো নিদ্দুজি মান্‌জ্যর্ মরণর্ কারনে তুই আমারে দায়ী ন গুরিচ্, কিয়া ও লগেপ্রভু, তুই দঅ তর্ আওজ্ মজিম কাম গোজ্যস্।”

¹⁵ ইয়েনর পরেদি তারা যোনারে ধুরিনে সাগরত্ ফেলেই দিলাক্, সেক্কে তুবোল্ উঠ্যে সেই সাগরান শান্ত ওই গেলঅ।

¹⁶ সেক্কে সে মানুচ্চুনে লগেপ্রভুরে অমকদ দরা ধুরিলাক্। তারা লগেপ্রভুর নাঙে য়েমান উৎসর্ব গুরিলাক্ আর তাইদু কয়েক্কান মানত্ গুরিলাক্।

¹⁷ ইন্দি যোনারে গিলি ফেলেবাত্তে লগেপ্রভু এক্কো দাঙর্ মাছ ঠিগ্ গুরি রাগেয়্যে। যোনা সেই মাছ পেদত্ তিন দিন তিন রেত্ রলঅ।