যোয়েল 2 - Chakma Bibleপুগ্-যুগ-সৈন্যদল 1 তুমি সিয়োনত্ তূরী বাজঅ, বাজঅ দযার্-সংকেত মঅ সুদ্ধো-সাংগ মুড়োবোত্। দেজত্ বজত্তি গুরিয়্যে বেক্কুনে গির্গিরাদোক্, কিত্যে লগেপ্রভুর্ দিন্নো এজের্; সেদিন্নো কায়কুরে লুম্মেগি। 2 সিবে আন্ধার্ আর অমকদ আন্ধারর্ দিন, মেঘর্ আর ঘুর্গুজ্যে আন্ধারর দিন। মুড়ো-মুড়ি উগুরে যেবাবোত্যে বেন্যেপোত্যে পহ্রান্ ছিদি পড়ে সেবাবোত্যেগুরি এক্কো দাঙর্ আর বোলী পুগ্-যুগর সৈন্যদল এজের্। এবাবোত্যে সৈন্যদল আগ-কালত্ কনদিন্অ ন-এলঅ, আর যিদুক্কুন যুগ এত্তন্ সেক্কেনেয়ো ন-থেবাক্। 3 তারার্ আগে আগে গিলি ফেলেয়্যে আগুনানে আর তারা পিজেদি আগুনো জিলান্ জ্বলের্। তারা মুজুঙোত্ দেজ্চান যেন এদন বাগান ধোক্ক্যেন্, আর তারা পিজেদি ভস্ত ওই যেইয়্যে ধূল্যেচর-চাগালাগান; কিচ্ছু সিয়েনত্তুন্ রোক্ষ্যে ন-পার্। 4 তারার্ ধক্কান্ ঘোড়া ধোক্ক্যেন; ঘোড়াত্ চোজ্যে সৈন্যগুনো ধোক্ক্যেন তারা আঢন্। 5 রথ রঅ ধোক্ক্যেন্, নাড়া পুজ্যে আগুনো রঅ ধোক্ক্যেন তারা মুড়ো উগুরেদি ফাল্ দিইনে এজন্। তারা যুদ্ধোত্তে সুর্ গুরি এক্কো বোলীবন্দ সৈন্য ধোক্ক্যেন্। 6 তারারে দেগিনে জাদ্তুনো মনত্ অমকদ যন্ত্রনা অর্; বেক্কুনো মুয়োনি রাঙা-কালা ওই যেইয়্যে। 7 সেই সৈন্যগুন বোলী যোদ্ধাগুনে ধোক্ক্যেন দাবা দুয়োন্, সৈন্যগুনো ধোক্ক্যেন দেবালত্ উদোন্। তারা বেক্কুনে সুর্ গুরি উজেই যান্, তারার্ পথ্তানিত্তুন্ তারা সুরি ন-যান। 8 তারা একজন আর একজন উগুরে চাবাচাবি ন-গরন; পত্তিজনে মুজুঙেদি উজেই যান্। যে কনঅ মানা এজোক্ না কেন তারা সুর্ ন-ভাঙিনে উজেই যাহ্ ধরন। 9 তারা শঅর উগুরে ঝাবেই পড়ন্, দেবাল উগুরে দাবা দুয়োন্; তারা ঘরত্ উদোন্, তারা চুরো ধোক্ক্যেন জানালাদি চমন্। 10 তারা মুজুঙোত্ পিত্থিমীগান গির্গিরেই, আগাজ্চানে গির্গিরেই, চানানে আর বেলানে আন্ধার্ ওই যায় আর তারাগুনে পহ্র দেনা বন্ধ গুরি দুয়োন্। 11 লগেপ্রভু তা সৈন্যদলর্ আগে আগে থেইনে রঅ ছাড়িনে তা মুয়োর্ রবো শুনোই; তা সৈন্যদলর সোংখ্যে গুণো ন-যায় আর যিগুনে তা উগুমান পালান্ তারা খেমতাবলা। লগেপ্রভুর দিন্নো মহৎ আর দর্গরেপারা; কন্না সিবে সোজ্য গুরি পারে? মন্ ফিরো 12 লগেপ্রভু ফগদাং গোজ্যে, “মাত্তর্ ইক্কিনে তুমি উবোস, কানাকুদি আর আবিলেচ্ গুরিনে বেক্ মনান্ দিইনে মইদু ফিরি এজঅ।” 13 তমা পোজাক্কানি ন-ফাদিনেই মনান্ ফাদি ফেলঅ। তমা গোজেন লগেপ্রভু ইধু ফিরি এজঅ, কিত্যে তে দোয়্যেবলা আর মেয়্যেলোই ভরা; তে সহজে বেজার্ ন-অয়, তার অমকদ কোচ্পানার দুযি নেই আর তে মনান্ বুদুলিনে আর্ সাজা ন-দে। 14 কন্না হবর্ পায়, অয়ত তে আরঅ মনান্ বুদুলিবো আর বর্ দি যেবঅ, যেনে তুমি তমার্ গোজেন লগেপ্রভুর নাঙে শোজ্য আর পানীয়-উৎসর্বর্ অনুষ্ঠান গুরি পার। 15 তুমি সিয়োনত্ তূরী বাজঅ, সুদ্ধো-সাংগ উবোস্ থানার বেবস্থা গর্, এক্কো বিশেষ তেম্মাং ডাগ্; 16 মানুচ্চুনোরে এগত্তর্ গুরিনে গোজেন নাঙে তারারে যুদো গর্; বুড়ো নেতাগুনোরে এক জাগাত্ ডাগ্, যিগুনে বুগো দুধ হান্ তারারে আর পুয়ো-ঝিগুনোরে এগত্তর্ গর্। নুয়ো বৌ নুয়ো জামেয় ঘর ফেলেই এত্তোক্। 17 যিগুনে লগেপ্রভুর মুজুঙোত্ সেবা-কাম গরন্ সেই ধর্মগুরুগুনে উবোসনা-ঘরর্ বারান্দা আর পুজোবোর্ সংমোধ্যে কানোদোক্। তারা কোদোক্, “ও লগেপ্রভু, তঅ মানুচ্চুনো উগুরে তুই দোয়্যে গর্। তঅ সোম্বোত্তিগানরে ঈচ্ গরেপারা ন-গুরিচ্, জাদ ভিদিরে তারার্ নাঙানি ঈচ্ গরেপারা কধা অবাত্তে ন-দিচ্। অন্য জাদ মানুচ্চুনে কিত্তে কবাক্, ‘তারার্ গোজেনে কুদু?’ ” লগেপ্রভুর্ জোব্ দেনা 18 সেক্কে লগেপ্রভু তা দেজ্চানত্তে আওজি অবঅ আর তা মানুচ্চুনো উগুরে মেয়্যে গুরিবো। 19 লগেপ্রভু তারার্ কধানির জোব্ দিইনে কবঅ, মুই তমা ইধু শোজ্য, নূয়ো আংগুর-রস আর তেল পাদাঙর্, সেক্কে তুমি ভর্পুনোং গুরিনে হুজি অবা; অন্য জাদ ইধু আর কনদিন্অ মুই তমারে ঈচ্ গরেপারা ন-গুরিম। 20 “মুই উত্তোরেত্তুন্ এচ্চ্যে সৈন্যদল্লোরে তমাত্তুন্ দূর্ গুরি দিম; শুগুনো আর ভস্ত ওই যেইয়্যে ধূল্যেচর-চাগালাত্ তারারে ধাবেই দিম। তারার্ মুজুঙেদি ভাগ্কান পূগেদি সাগরত্ আর পিজেদি ভাগ্কান পোজিমে সাগরত্ ধাবেই দিম। তারার্ পজাবাজ্ উগুরেদি উদিবো আর সিয়েনত্তুন্ পজাবাজ্ নিগিলিবো, কিত্যেই তারার্ কামানি অলদে অমকদ বাড়্বোলোই ভরা।” 21 ও দেজ্চান, ন-দোরেচ্; তুই হুজি অ, ফুত্তি গর্, কিত্যে লগেপ্রভু দাঙর্ দাঙর্ কাম গোজ্যে। 22 ও মাদর্ য়েমানুন, তুমি ন-দোরেয়ো, কিত্যে চরি বেড়েবার মাদ্তুন য়্যাল্ ওই উঠ্যে। গাজে গাজে ফল ধোজ্যন্; ডোমোর্ গাজ আর আংগুর লুদিগানিয়ে বোউত্ ফল দের্। 23 ও সিয়োনর্ মানুচ্চুন, হুজি অ, তমা গোজেন লগেপ্রভুরে নিইনে ফুত্তি গরঅ, কিত্যে তার্ সততার্ কারনে তে তমারে শরৎকালর্ ঝড় দিয়্যে। তে তমারে বোউত্ ঝড় পাধেই দের্, আগ ধোক্ক্যেন শরৎ আর বসন্তকালর্ ঝড় দের্। 24 খলাবো শোজ্যলোই ভুরি যেবঅ; পিলেত্তুন্ আংগুর-রস আর তেল উগুরি পড়িবো। 25 লগেপ্রভু কত্তে, মর্ বিরেট্ সৈন্যদল যিবে মুই তমা ইধু পাধেয়োং তারা, অত্তাৎ ঝাক্-বোত্যে পুগ্-যুগো পাল, ভস্তগুরিয়্যে পুগ্-যুগ্, ফাল্যে-যেইয়্যে পুগ্-যুগো পাল আর কামেড়্যেয়ে পুগ্-যুগো যেদক্ বজর ধুরিনে তমা ফসলানি হেইয়োন সিয়েনি মুই সুজি দিম। 26 তুমি পেট্ ভুরি হেইনে ঈল্ অবঅ আর তুমি তমার্ গোজেন লগেপ্রভুর বাঈনী গুরিবা যিবে তমাত্তে আমক্ আমক্ অইদ্যে কাম গোজ্যে; মঅ মানুচ্চুনে আর কনদিন্অ ন-লাজেবাক্। 27 সেক্কে তুমি হবর্ পেবা, মুই ইস্রায়েলীয়গুনো ভিদিরে আগং আর মুয়ই তমার্ গোজেন লগেপ্রভু, অন্য কনজন নয়; মঅ মানুচ্চুনে আর কনদিন্অ ন-লাজেবাক্। লগেপ্রভুর্ দিন 28 সে পরেদি মুই বেক্ মানুচ্চুনো উগুরে মঅ আত্মাগান ঢালি দিম। সেক্কে তঅ পুয়োগুনে আর ঝিগুনে ভাববাদী ইজেবে গোজেন কধা কবাক্, তমা বুড়ো মানুচ্চুনে স্ববন দেগিবাক্ আর তমা গাবুজ্যেগুনে দর্শন পেবাক্। 29 এন্ কি, সে অক্তত্ মর্ চাগর আর চাগরানীগুনো উগুরে মুই মঅ আত্মাগান ঢালি দিম। 30 মুই আগাজত্ আর পিত্থিমীত্ আমক্ আমক্ ঘটনা দেগেম, অত্তাৎ লো, আগুন আর অমকদ ধূমো দেগিবা। 31 লগেপ্রভুর সেই মহৎ আর দর্গরেপারা দিনুন এবার্ আগেদি বেলান্ আন্ধার্ ওই যেবঅ আর চানান্ লো ধোক্ক্যেন অবঅ। 32 রোক্ষ্যে পেবাত্তে যে কনজনে লগেপ্রভুরে ডাগিলে তে রোক্ষ্যে পেবঅ, কিত্যে লগেপ্রভুর কধা মজিম সিয়োন মুড়োবোত্ আর যিরূশালেমত্ কয়েক্কো মানুচ্ রোক্ষ্যে পেবাক্। গোজেনে যিগুনোরে বেঈ নেযেয়্যে তারা সেই রোক্ষ্যে পেইয়্যে মানুচ্চুনো ভিদিরে থেবাক্। |
Copyright © 2021 Bangladesh Bible Society
Bangladesh Bible Society