যোয়েল 1 - Chakma Bible

পুগ্-যুগোর্ আক্রমণ আর মন ফিরেবার ডাগনি

¹ পথূয়েলর পুয়ো যোয়েল ইধু লগেপ্রভুর কধানি ফগদাং ওইয়্যে।

² ও বুড়ো মানুচ্চুন, তুমি এ কধাগান শুনো; ও দেজত্ বজত্তি গুরিয়্যে মানুচ্চুন, তুমি বেক্কুনে শুনো। তমার্ বা তমা পূরোণি মানুচ্চুনোর সময়োত্ কি এবাবোত্যে ঘটনা কনদিন্‌অ ঘোট্যে?

³ এ ঘটনার্ কধানি তুমি তমার্ পুয়ো-ঝিগুনো ইধু কঅ আর তারা তারার্ পুয়ো-ঝিগুনো ইধু কোদোক্ আর সেই পুয়ো-ঝিগুনে তারার্ বংশধরুনো ইধু কোদোক্।

⁴ কামেড়্যেয়ে পুগ্-যুগে যিয়েনি থোই যেইয়োন সিয়েনি ঝাক্ বান্যে পুগ্-যুগ্‌কুনে হেইয়োন; ঝাক্ বান্যে পুগ্-যুগে যিয়েনি থোই যেইয়োন সিয়েনি ভস্তগুরিয়্যে পুগ্-যুগে হেইয়োন্; ভস্তগুরিয়্যে পুগ্-যুগে যিয়েনি থোই যেইয়োন্ সিয়েনি ফাল্যে ফাল্যে যাইদ্যে পুগ্-যুগে হেইয়োন্।

⁵ ও মাত্তল্‌বলাগুন, জাগি উদো আর কানাকুদি গরঅ। ও বেক্ মদ খুরুন, তুমি তাজা আংগুর-রজর্ মদত্তে আবিলেচ্ গরঅ, কিত্যে সিয়েন তমা মুয়োত্তুন্ কাড়ি নেযা ওইয়্যে।

⁶ এক্কো জাদে মঅ দেজ্‌চান আক্রমন গোজ্যে; তে বোলী আর তা সৈন্যগুন গুণি ন-পুড়েইয়্যে। তা দাত্তুন্ সিংহ দাদ ধোক্ক্যেন আর তার বিষদাত্তুন্ সিংহীর বিষদাদ ধোক্ক্যেন্।

⁷ তে মর্ বেক আংগুর-লুদিগানি বর্‌বাত গোজ্যে আর ডোমোর্ গাজ্‌চুন ভাঙি ফেলেয়্যে। সিগুনোর বাগলানি ছুলিনে তে সিয়েনি ফেলেই দিয়্যে; সেক্কে ডেলাগুন বেক্কানি দুপ্ ওই যেইয়্যে।

⁸ ও মঅ মানুচ্চুন, যে গাবুজ্যে মিলেবো তা গাবুরো অক্তত্ ঠিগ গোজ্যে নেক্কোর্ মরণত্তে বস্তা পাদা পিনিনে আবিলেচ্ গোজ্যে তুমি সিবে ধোক্ক্যেন আবিলেচ্ গরঅ।

⁹ লগেপ্রভুর ঘরত্তুন্ শোজ্য-উৎসর্ব আর পানীয়-উৎসর্বর্ অনুষ্ঠান বাদ দিয়্যে ওইয়্যে। যিগুনে লগেপ্রভুর সেবা গরন্ সেই ধর্মগুরুগুনে আবিলেচ্ খাদন্।

¹⁰ বেক্ খেত্তানি বর্‌‌বাত্ ওই যেইয়্যে, মাদিগানে আবিলেচ্ গরের্, কিত্যে শোজ্যগানি বর্‌‌বাত্ ওইয়্যে, নুয়ো আংগুর-রস শুগেই যেইয়্যে আর তেল শেজ্ ওই এজের্।

¹¹ ও চাজাবলাগুন, তুমি লাজঅ; তুমি যিগুনে আংগুর-গাজর্ যত্তন্ গরঅ, তুমি গম্ আর কেচ্ বিজিত্তে আবিলেচ্ গরঅ; কিত্যে খেদর্ ফসল ভস্ত ওইয়্যে।

¹² আংগুর লুদি শুগেই যেইয়্যে আর ডোমোর্ গাজ মুরি যার্; ডালোম্, খাজোর্ আর আপেল গাজ, এন্ কি, খেদর্ বেক্ গাজ্‌‌চুন শুগেই যেইয়োন। ঘেচ্চেকগুরি মানুচ্চুনো ভিদিরেত্তুন হুজি রাজি ফুরেই যেইয়্যে।

¹³ ও ধর্মগুরুগুন, তুমি বস্তা পিনিনে আবিলেচ্ গরঅ; পূজোত্ যিগুনে সেবার কাম গরঅ তুমি আবিলেচ্ গরঅ। যিগুনে মর্ গোজেনর সেবা গরঅ তুমি এইনে বস্তা পিনিনে রেত্তো কাদঅ, কিত্যেই তমা গোজেন ঘরত্ শোজ্য-উৎসর্ব আর পানীয়-উৎসর্বর অনুষ্ঠান বন্ধ গরা ওইয়্যে।

¹⁴ তুমি সুদ্ধো-সাংগ উবোস্ থানার বেবস্থা গরঅ; এক্কো বিশেষ তেম্মাং ডাগঅ। বুড়ো নেতাগুনোরে আর দেজত্ বজত্তি গুরিয়্যে বেক্কুনোরে তমা গোজেন লগেপ্রভুর ঘরত্ ডাগি আনঅ আর লগেপ্রভু ইধু কানাকুদি গরঅ।

¹⁵ হায়, কি দর্‌‌‌গরেপারা দিন! কিত্যে লগেপ্রভুর দিন কায়কুরে লুম্মেগি; ভস্তগুরিয়্যে দিন ইজেবে সেই দিন্নো বেগত্তুন্ খেমতাবলা গোজেন ইত্তুন্ এজের্।

¹⁶ আমা চোগো মুজুঙোত্ হানা আর আমা গোজেন ঘরত্তুন্ রঙ্গ-ফুত্তি কি বন্ধ ওই ন-যায়?

¹⁷ মাদি ঢলা তলে বীজিগুন পুযি যেইয়োন। শোজ্যর্ ভান্ডারুন্ ভস্ত ওইয়োন, গোলাঘর বেক্কুন ভাঙি ফেলা ওইয়্যে, কিত্যে শোজ্য ফুরেই যেইয়োন্।

¹⁸ কিবাবোত্যেগুরি গোরু-ভেড়াগুনে ফবাদন্! গোরু পালুনে ঘুরি বেড়াদন্, কিত্যেই তারার্ চরিনে হেবার জাগা নেই; ভেড়া পালুনেয়ো দুঘ্ পাদন্।

লগেপ্রভু ইধু যোয়েল কধা

¹⁹ ও লগেপ্রভু, মুই তরে ডাগঙর্, কিত্যে চরি হেবার্ জাগায়ানি আগুনে গিলি ফেলেয়্যে আর আগুনো জিলে পুড়ি ফেলেয়্যে মাদর্ বেক গাজ্-বাজ্‌চুন।

²⁰ এন্ কি, ঝার্‌বো য়েমানুনেয়ো তইধু কানদন্, কিত্যে পানি গঙারান্ শুগেই যেইয়্যে আর চরি হেবার জাগায়ানি আগুনে গিলি ফেল্যে।