ইয়োব 9 - Chakma Bibleইয়োবর্ জোব্ দেনা 1 জোবত্ ইয়োবে কলঅ, 2 ঠিগ্ আঘে, মুই হবর্ পাং ইয়েনি বেক্কানি সত্য। মাত্তর্ গোজেন চোগেদি কেধোক্ক্যেন্ গুরি মানুচ্ নিদ্দুযি ওই পারন্? 3 কনজনে যুনি তা লগে তর্কাতর্কি গুরিবাত্তে চান্, মাত্তর্ তে আজারান্ পুযোর্ গুরিলেয়ো তে এক্কান্অ জোব্ দি ন-পারিবো। 4 তা জ্ঞানান্ গভীন্, তা বলান্ অমকদ; কন্না তা বিরুদ্ধে থিয়্যেইনে রোক্ষ্যে পেইয়্যে? 5 তে অদাতদ্ মুড়ো-মুড়িরে সোরেই দে, রাগে সিগুনোরে ভস্ত গরে; 6 তে পিত্থিমীগানরে তা জাগানত্তুন্ ইজেরে দে, তা খুদোগুনোরে গির্গিরে তুলে। 7 তে মানা গুরিলে বেলানে পহ্র নঅ-দে আর তারাগুনে পহ্র দেনা বন্ধ গরন্। 8 তেয়ই দাঙর্ আগাজ্ছানরে ছিদি দিয়্যে, আর সাগরর্ তুবোল উগুরে আঢে। 9 তে সপ্তর্ষি, কালপুরুষ, কৃত্তিকা আর দোগিনেদি তারাগুনোর সৃট্টিগুরিয়্যেবো। 10 তে এমন্ মহত্ কাম্ গরে যিয়েনি বুঝো ন-যায় আর এন্ আমক্ আমক্ কাম্ গরে যিয়েনি গুণো ন-যায়। 11 তে আমা মুজুঙোন্দি যায়, মুই তারে ন-দেগং; তে কায়-কুরেন্দি যায়, মুই তারে চিনি ন-পারং। 12 যুনি তে কারি নেযায় কন্না তারে মানা গুরি পারে? কন্না তারে কোই পারে, তুই কি গরর্? 13 গোজেনে তা রাগ্কান ন-দোঙাই; এন্ কি, পানি-দেবেদা রহবর বল্দিয়্যেগুনেয়ো তা টেঙ ইদু দরে মাঢা নিগিরোন্। 14 সালে কেধোক্ক্যেন্ গুরিনে মুই তা কধার্ জোবপান্ দিম্? তারে কবাত্তে কুদু কধা তোগেইনে পেম্? 15 মুই নিজোরে নিদ্দুযি মনে গুরিলেয়ো তারে জোব্ দি ন-পারং; মর্ বিচেরগ ইদু মুই বানা দোয়্যে-মেয়্যে ভিক্ষ্যে গুরিম্। 16 মুই ডাগিলে যুনিয়ো বা তে শুনে তো মুই বিশ্বেজ্ ন-গরং, তে মঅ কধা শুনিবো। 17 তে ঝড়্লোই মরে ভাঙি ফেলায় আর এনেবাদে বার্ বার্ মরে আঘাত্ গরে। 18 তে মরে নিজেস্ নিবাত্তে ন-দে বরং তিদেলোই মঅ জিংকানিগান্ ভোরেই দে। 19 ইয়েন্ যুনি বল্ বেপার্ অয় সালে তে দঅ খেমতাবলা; যুনি বিচেরর্ বেপার অয় সালে কন্না তা বিরুদ্ধে সময়ান্ ঠিগ্ গুরি দিবো? 20 যুনিয়ো মুই নিদ্দুযি তো মর্ মুয়োনে মরে দুযি গুরিবো; যুনিয়ো মুই গম্ তো মর্ মুয়োনে মরে বজং কবঅ। 21 মুই নিদ্দুযি, মাত্তর্ সিয়েন্দোই মর্ কি অয়? মর্ নিজো জিংকানিগানরে মুই ঘিনাঙ্। 22 বেক্কুনে সং সং, সেনত্তে মুই কঙত্তে, নিদ্দুযি আর শদান্-এ দ্বিবেরে তে ভস্ত গরে। 23 দজার্ আঘাতে অদাতদ্ নিদ্দুযিবোর্ মরণ অলে তে আজে। 24 শদানুনোর্ আঢত্ পিত্থিমীগানরে ইরি দিয়্যে ওইয়্যে গোজেনে বিচেরক্কুনোর চোখ্কুন নাদি থোই দিয়্যে। তেয়ই যুনি সিয়েন্ ন-গরে সালে কন্না সিয়েন্ গোজ্যে? 25 যে দাবা দে তাত্তুনো বেশ্ মঅ দিনুন্ যাদিমাদি যায়; সিগুন্ উড়ি যান্, ভালেদি দেগা ন-যায়। 26 পাদল্ নোকো ধোক্ক্যেন্ সিয়েন্ যাদিমাদি যায়ই; সিয়েন্ ঈগল পেগে ছো মারেদে ধোক্ক্যেন্ যায়। 27 যুনি কঙে, মঅ দুখ্কান মুই ভুলি যেম্, মুয়ো চেঙেরাগান্ বুদুলিনে মুই আজিম, 28 তো মর্ বেক্ পিড়েগানিরে মুই দরাং, কিয়া মুই হবর্ পাং তুই মরে নিদ্দুযি বিলিনে ন-ধুরিবে। 29 মরে যেক্কেনে দুযি বিলিনে ধরা অবঅ, সেক্কেনে কিত্তে মুই মিজে মিজে দুখ্ পেম্? 30 মুই যুনি সাগোন্দোই নিজোরে ধোই ফেলাং আর ক্ষারলোই আঢ্তান তেল্তেল্যে গরং, 31 তো তুই কাদা চুরুঙোত্ মরে ভরেই দিবে; সেক্কে মঅ কাবড়্-চুগোরানিয়ে মরে ঘিনেব। 32 তে দঅ মঅ ধোক্ক্যেন্ এক্কো মানুচ্ নয়, তা কধার্ জোব্পান দিম্ বা মকদ্দমাত্ তার্ মুয়োমি ওম্। 33 আহ্, যুনি এধোক্ক্যেন্ কনজন থেদাক্ যিবে আমা ভিদিরে মগদ্দমা গুরি দি পারে আহ্ যিবের্ কধা আমি দ্বিজনে মানি নেযেই পারিই; 34 যুনি এন্ কনজন থেদাক্ যিবে গোজেনর সাজাগান্ মঅ উগুরেত্তুন্ সোরেই দি পারিবো, যেনে তা দর্গরেপারাগানে মরে আর দর্ দেগেই ন-পারে। 35 যুনি সিয়েন্ অদঅ সালে মুই গোজেনরে ন-দোরেইনে কধা ন-কদুং, মাত্তর্ ইক্কিনে মর্ যে অবস্থা ওইয়্যে সেক্কে মুই সিয়েন্ ন-পারং। |
Copyright © 2021 Bangladesh Bible Society
Bangladesh Bible Society